Domingo
, Hunyo 22
1. SI JESUS DIDTO SA BETANIA
a. Diha sa pagkadungog nga si Jesus moadto sa Betania, unsa may gihimo ni Marta ug unsang konbiksyon ang iyang gipahayag? Juan 11:20-22.
“Kauban sa nagbangotan nga mga higala mao ang mga paryente sa pamilya, ang uban kanila adunay taas nga katungdanan sa responsibilidad sa Jerusalem. Lakip niini mao ang pipila sa mga labing mapait nga mga kaaway ni Cristo. Si Cristo nahibalo sa ilang mga katuyoan, ug busa wala dayon Siya magpaila sa Iyang kaugalingon. Ang mensahe gihatag ngadto kang Marta sa hilom nga paagi nga ang uban sa lawak wala makadungog. . . .
“Si Marta nagdali sa pagsugat kang Jesus, ang iyang kasingkasing napalihok sa nagkasumpaki nga mga pagbati. Diha sa Iyang mapahayagon nga nawong nabasa niya ang samang kalumo ug gugma nga naa sa kanunay niana. Ang iyang pagsalig diha Kaniya wala maputol, apan siya naghunahuna sa iyang hinigugma nga igsoon, nga gihigugma usab ni Jesus. Uban sa kaguol nga misulbong diha sa iyang kasingkasing tungod kay si Cristo wala man dayon moabut, apan uban sa paglaum nga bisan karon Siya aduna pay mahimo aron sa paghumpay kanila, siya miingon, ‘Ginoo, kon dinhi Ka pa, wala unta mamatay ang akong igsoon.’ Taliwala sa kaguliyang nga nahimo sa mga nagbangutan, pabalikbalik nga gisubli sa magsoon nga babaye kining mga pulonga.
“Uban sa tawhanon ug diosnon nga kalooy si Jesus mitan-aw sa iyang masulob-on, mabalak-on nga nawong. Si Marta walay inklinasyon sa paghisgut sa nangagi; ang tanan napahayag na pinaagi sa makapatandog nga mga pulong, ‘Ginoo, kon dinhi ka pa, ang akong igsoon wala unta mamatay.’ Apan nagtan-aw nianang nawong sa gugma, midugang siya, ‘Nasayud ako, nga bisan karon, bisan unsa ang Imong pangayoon sa Dios, kini ihatag sa Dios Kanimo.’ ”— The Desire of Ages, pp. 529, 530.
Lunes
, Hunyo 23
2. ANG KATAPUSANG SAAD SA PAGLAUM
a. Sa unsa nga si Jesus mipasalig kang Marta? Juan 11:23. Unsa may iyang nasabtan pinaagi niini? Juan 11:24.
“Gidasig ni Jesus ang iyang pagtuo, nga nag-ingon, ‘Ang imong igsoon mabanhaw.’ Ang iyang tubag wala gitinguha sa pagdasig sa paglaum sa usa ka dihadiha nga pagbag-o. Iyang gidala ang mga hunahuna ni Marta saylo sa presente nga pagpahiuli sa iyang igsoon, ug nagtumong kanila diha sa pagkabanhaw sa matarung. Gibuhat niya kini aron makita niya sa pagkabanhaw ni Lazaru ang usa ka pasalig sa pagkabanhaw sa tanan nga mga matarung nga nangamatay, ug usa ka kasigurohan nga kini matuman pinaagi sa gahum sa Manluluwas.
“Si Marta mitubag, ‘Ako nahibalo nga siya mabanhaw sa pagkabanhaw sa katapusang adlaw.’ ”—The Desire of Ages, p. 530.
b. Uban sa unsang mga pulong nga giila ni Jesus ang pagtuo ni Marta? Juan 11:25; 1 Juan 5:12.
“Sa gihapon nagtinguha sa paghatag ug matuod nga direksyon sa iyang pagtuo, si Jesus mipahayag, ‘Ako mao ang pagkabanhaw, ug ang kinabuhi.’ Diha kang Cristo ang kinabuhi, orihinal, dili hinulaman, dili kinuha. 'Siya nga adunay Anak adunay kinabuhi.’ 1 Juan 5:12. Ang pagka-Dios ni Cristo maoy kasigurohan sa magtutuo sa kinabuhing dayon.”— Ibid.
c. Unsang saad ang pasukaranan sa atong paglaum luyo sa lubnganan, ug sa unsang paagi nadugtong ang konbiksyon ni Marta sa milagro ni Cristo? Juan 5:26; 11:26, 27.
“Si Cristo dinhi nagpaabot sa panahon sa Iyang ikaduhang pag-anhi. Unya ang matarung nga mga minatay pagabanhawon nga dili madunoton, ug ang buhi nga mga matarung pagalalinon ngadto sa langit nga wala makakita sa kamatayon. Ang milagro nga mao si Cristo hapit na mahitabo, sa pagbanhaw kang Lazaru gikan sa mga patay, magrepresentar sa pagkabanhaw sa tanang matarung nga patay. Pinaagi sa Iyang pulong ug sa Iyang mga buhat Siya mipahayag sa Iyang kaugalingon ang Tigpasiugda sa pagkabanhaw. Siya nga sa Iyang kaugalingon hapit na mamatay diha sa krus mibarug uban sa mga yawe sa kamatayon, usa ka mananaug sa lubnganan, ug mipahayag sa Iyang katungod ug gahum sa paghatag ug kinabuhing dayon.”— Ibid.
Martes
, Hunyo 24
3. SI JESUS MIHILAK
a. Ihubit ang mga lihok ug mga pulong sa naguol kaayo nga Maria. Juan 11:28-32.
b. Sa dihang nakita ni Jesus si Maria ug ang pipila sa mga Judeo nga naghilak, unsa may gihimo ni Jesus ug ngano? Juan 11:33-35.
“‘Busa sa dihang si Jesus nakakita kaniya nga naghilak, ug ang mga Judeo usab nga naghilak nga miuban kaniya, Siya miagulo sa espiritu, ug nasamok.’ Iyang nabasa ang mga kasingkasing sa tanan nga nagtigom. Nakita niya kana sa kadaghanan, kung unsa ang gipakita ingon nga usa ka demonstrasyon sa kasubo maoy pagpakaaron-ingnon lamang. Siya nahibalo nga ang pipila sa pundok, nga karon nagpakita ug salingkapaw nga kasubo, sa dili madugay magplano sa kamatayon, dili lamang sa gamhanang magbubuhat sa milagro, apan sa usa nga pagabanhawon gikan sa mga patay. Mahimo ni Cristo huboon gikan kanila ang ilang kupo sa pagpakaaron-ingnon nga kasubo. Apan gipugngan Niya ang iyang matarung nga kasuko. Ang mga pulong nga Iyang masulti sa tanang kamatuoran, wala Niya isulti, tungod sa hinigugma nga nagluhod sa Iyang tiilan sa kasubo, nga sa tinuod mituo Kaniya.
“‘Diin ninyo siya ibutang?’ Siya nangutana, ‘Sila miingon ngadto Kaniya, Ginoo, umari ka ug tan-awa.’ Magkauban sila ngadto sa lubnganan. Usa kadto ka makapasubo nga talan-awon. Si Lazaru gihigugma pag-ayo, ug ang iyang mga igsoong babaye mihilak alang kaniya uban sa masulub-on nga mga kasingkasing, samtang sila nga iyang mga higala misagol sa ilang mga luha uban sa mga igsoon nga mga babaye. Tungod niining tawhanong kagul-anan, ug sa kamatuoran nga ang nag-antus nga mga higala mahimong magbangotan tungod sa mga patay samtang ang Manluluwas sa kalibutan nagbarug - ‘si Jesus mihilak.’ Bisan tuod Siya Anak sa Dios, apan Iyang gikuha ang tawhanong kinaiya diha Kaniya, ug Siya natandog pinaagi sa tawhanong kasub-anan. Ang Iyang malumo, maloloy-on nga kasingkasing kanunay nga napukaw sa pagsimpatiya pinaagi sa pag-antus. Siya mihilak uban sa mga naghilak, ug nagmaya uban niadtong nangalipay.”— The Desire of Ages, p. 533.
c. Sa unsang paagi kining higayona sa kinabuhi ni Jesus mahimong usa ka panig-ingnan alang kanato? Roma 12:15.
“Ang kahibulongan nga panig-ingnan ni Cristo, ang dili hitupngan nga kalumo diin Siya misulod ngadto sa mga pagbati sa uban, naghilak uban niadtong naghilak, nagmaya uban kanila nga nalipay, kinahanglan nga adunay usa ka halalum nga inpluwensya diha sa kinaiya sa tanan nga misunod Kaniya sa kinasingkasing. Pinaagi sa maloloy-on nga mga pulong ug mga buhat ilang sulayan sa paghimo ang dalan nga sayon alang sa gikapoy nga mga tiil.”— The Ministry of Healing, pp. 157, 158.
Mierkules
, Hunyo 25
4. KOOPERASYON TALI SA DIOS UG SA TAWO
a. Unsang sugo ang gihatag ni Jesus ngadto niadtong nagpalibut Kaniya? Juan 11:39 (unang bahin). Giunsa ni Marta sa pag-aksyon ug unsa ang gisulti ni Jesus ngadto kaniya? Juan 11:39 (katapusang bahin).
“Sa diha nga ang Ginoo mobuhat na ug usa ka buhat, si Satanas mopalihok sa usa ka tawo sa pagsupak. ‘Kuhaa ninyo ang bato,’ miingon si Cristo. Kutob sa mahimo, andama ang dalan para sa Akong bulohaton. Apan ang positibo ug ambisyoso nga kinaiya ni Marta mipahayag sa iyang kaugalingon. Siya dili gusto nga ang nadugta nga lawas kinahanglan nga makita. Ang kasingkasing sa tawo mahinay sa pagsabot sa mga pulong ni Cristo, ug ang pagtuo ni Marta wala nakasabot sa tinuod nga kahulogan sa Iyang saad.
“Gibadlong ni Cristo si Marta, apan ang Iyang mga pulong gisulti sa hilabihan nga kalumo. ‘Wala Ako mag-ingon kanimo, nga, kon motuo ka, makakita ka sa himaya sa Dios?’ Nganong magduhaduha ka mahitungod sa Akong gahum? Nganong nagrason ka supak sa Akong mga kinahanglanon? Anaa kanimo ang Akong pulong. Kung motuo ka, ikaw makakita sa himaya sa Dios. Ang natural nga mga imposibilidad dili makapugong sa buhat sa Usa nga Makagagahum sa tanan. Ang pagduhaduha ug pagkawalay pagtuo dili pagpaubos. Bug-os nga pagtuo diha sa pulong ni Cristo mao ang tinuod nga pagpaubos, matuod nga pagtugyan sa kaugalingon.
“‘Kuhaa ninyo ang bato.’ Si Cristo makasugo unta sa bato sa pagkawagtang, ug kini motuman unta sa Iyang tingog. Mahimo niyang mandoan ang mga manulonda nga duol sa Iyang kiliran sa pagbuhat niini. Sa Iyang pagsugo, ang dili makita nga mga kamot makahimo sa pagkuha sa bato. Apan kini gikuha sa mga kamot sa tawo. Sa ingon si Cristo nagpakita nga ang tawo kinahanglan makipagtimbayayong uban sa pagkadiosnon. Unsa ang mahimo sa gahum sa tawo diin ang diosnon nga gahum wala ipatawag nga mobuhat. Ang Dios wala magsalikway sa tabang sa tawo. Siya nagpalig-on kaniya, nagakooperar uban kaniya maingon sa iyang paggamit sa mga gahum ug mga katakus nga gihatag kaniya.”— The Desire of Ages, p. 535.
b. Unsang mga pulong ni Cristo sa malumo nagbadlong sa atong pagkawalay pagtuo karon? Juan 11:40.
“Daghan ang walay buhi nga pagtuo. Mao kini ang hinungdan nga dili nila makita ang labaw pa sa gahum sa Dios. Ang ilang kahuyang maoy resulta sa ilang pagkawalay pagtuo. . . . Nagplano sila ug magplano, apan ang pag-ampo gamay, ug adunay gamay nga tinuod nga pagsalig sa Dios. Nagtuo sila nga adunay pagtuo, apan kini mao lamang ang kadasig sa panahon. Napakyas sa pagsuta sa ilang kaugalingong panginahanglan, o ang kaandam sa Dios sa paghatag, wala sila molahutay sa pagtipig sa ilang mga hangyo atubangan sa Ginoo.”— Christ’s Object Lessons, pp. 145, 146.
Huebes
, Hunyo 26
5. SI JESUS NAGBANHAW KANG LAZARU
a. Unsang pag-ampo ang gihimo ni Jesus sa kiliran sa lubnganan? Juan 11:41, 42.
“Ang mando gituman. Ang bato giligid. Ang tanan nahimo sa dayag ug sa tinuyo. Ang tanan nahatagan ug kahigayonan sa pagtan-aw aron nga walay limbong ang mahimo. Didto naghigda ang lawas ni Lazaru diha sa iyang lubnganan nga bato, bugnaw ug hilom diha sa kamatayon. Ang hilak sa mga nagbalata nahunong. Nahibulong ug nagpaabot, ang panon nagbarug palibut sa lubnganan, naghulat aron sa pag-tan-aw unsay mahitabo. . . .
“Dinhi si Cristo miangkon sa Dios ingon nga Iyang Amahan, ug uban sa hingpit nga pagsalig nagpahayag nga Siya mao ang Anak sa Dios.”- The Desire of Ages, pp. 535, 536.
b. Uban sa unsang mga pulong si Jesus nagbanhaw kang Lazaru? Juan 11:43. Unsa man dayon ang nahitabo? Juan 11:44.
“Ang tingog [ni Cristo], tin-aw ug nagadulot, milapos sa igdulongog sa patay. Samtang Siya nagasulti, ang pagka-Dios mokidlap diha sa tawhanon. Diha sa Iyang nawong, nga gilamdagan pinaagi sa himaya sa Dios, ang mga tawo nakakita sa kasigurohan sa Iyang gahum. Ang matag mata natumong diha sa pultahan sa langob. Ang matag dalunggan gikiling aron makadakop sa pinakagamay nga dahunog. Uban sa mainiton ug masakit nga tinguha ang tanan naghulat alang sa pagsulay sa pagkadios ni Cristo, ang ebidensya nga magpamatuod sa Iyang pag-angkon ingon nga mao ang Anak sa Dios, o pagwala sa paglaum hangtud sa kahangtoran.
“Adunay kaukyab diha sa hilom nga lubnganan, ug siya nga namatay mibarog diha sa pultahan sa lubnganan. . . . Ang tawhanon mao ang magabuhat alang sa tawhanon. Si Lazaru gipagawas, ug mibarug sa atubangan sa panon, dili ingon sa usa nga naluya tungod sa sakit, ug uban sa mahuyang, nagkurog nga mga bukton, kon dili ingon sa usa ka tawo nga anaa sa pinakataas sa kinabuhi, ug sa kalagsik sa usa ka halangdon nga pagkatawo. Ang iyang mga mata nagasidlak uban sa salabutan ug sa gugma alang sa iyang Manluluwas. Iyang gipahalona ang iyang kaugalingon sa pagsimba diha sa tiilan ni Jesus.”— Ibid., p. 536.
Biernes
, Hunyo 27
PERSONAL SUBLI NGA MGA PANGUTANA
1. Ihulagway ang pagsalig nga anaa sa mga igsoong babaye ni Lazaru diha kang Jesus.
2. Unsa ang gisaad ni Jesus kang Marta, kang Maria, ug sa tanang magtutuo?
3. Ngano nga si Jesus mihilak?
4. Giunsa sa tawhanon pagkooperar uban sa diosnon dinhi niini nga milagro?
5. Ihulagway ang mga lihok ni Lazaru diha sa pagtawag ni Jesus.