---

1. MGA ANAK NI ABRAHAM

a. Unsang pag-angkon ang padayon nga gisublisubli sa mga Pariseo? Juan 8:33, 39 (unang bahin). Apan unsa may magproyba niana nga pagka-kaliwat? Juan 8:39 (katapusang bahin), 56; Roma 9:6-8.

“Ang mga Pariseo mipahayag sa ilang kaugalingon nga mga anak ni Abraham. Miingon si Jesus kanila nga kini nga pag-angkon maestablisar lamang pinaagi sa pagbuhat sa mga buhat ni Abraham. Ang tinuod nga mga anak ni Abraham magkinabuhi, sama sa iyang gihimo, usa ka kinabuhi sa pagkamasinugtanon ngadto sa Dios. Dili sila mosulay sa pagpatay sa Usa nga nagsulti sa kamatuoran nga gihatag Kaniya gikan sa Dios. Sa paglaraw batok kang Cristo, ang mga rabbi wala magbuhat sa mga buhat ni Abraham. Ang usa lamang ka linya sa pagka-kaliwat ni Abraham walay bili. Kon walay espirituhanong kadugtongan uban kaniya, nga mapadayag diha sa pagbaton ug sama nga espiritu, ug pagbuhat sa samang mga buhat, sila dili iyang mga anak.

“Kini nga prinsipyo adunay parehas nga gibug-aton sa usa ka pangutana nga dugay nang nagsamok sa Cristohanong kalibutan — ang pangutana sa apostolikanhong pagpuli. Ang kagikan kang Abraham napamatud-an, dili sa ngalan ug kaliwat, kondili pinaagi sa pagkasama sa kinaiya. Busa ang apostolikanhong pagpuli wala magdepende sa pagpasa sa eklesiastikanhong awtoridad, kon dili sa espirituhanon nga relasyon. Usa ka kinabuhi nga gipalihok sa espiritu sa mga apostoles, ang pagtuo ug pagtulon-an sa kamatuoran nga ilang gitudlo, kini ang tinuod nga ebidensya sa apostolikanhong pagpuli. Mao kini ang naghimo sa mga tawo nga mga manununod sa una nga mga magtutudlo sa ebanghelyo.”— The Desire of Ages, pp. 466, 467.

---

2. DILI KON UNSA ANG ILANG GIPANGHAMBUG

a. Bisan tuod nga ang mga Judeo mao ang natural nga mga kaliwat ni Abraham, kang kinsang mga anak sila sa tinud-anay sa dihang ilang gisalikway si Cristo? Juan 8:41- 44.

“Si Jesus milimod nga ang mga Judeo mga anak ni Abraham. Siya miingon, ‘Gibuhat ninyo ang mga buhat sa inyong amahan.’ Sa pagbiaybiay sila mitubag, ‘Kami wala matawo sa pakighilawas; kami adunay usa ka Amahan, nga mao ang Dios.’ Kini nga mga pulong, sa pasumbingay sa mga sirkumstansya sa Iyang pagkahimugso, gituyo ingon nga usa ka pagduot batok kang Cristo diha sa atubangan niadtong nagsugod sa pagtuo Kaniya. Si Jesus wala magtagad sa walay kwenta nga insulto, apan miingon, ‘Kon ang Dios mao pa ang inyong Amahan, kamo mahigugma unta Kanako: kay Ako mitungha ug nagagikan sa Dios.’

“Ang ilang mga buhat nagpamatuod sa ilang relasyon kaniya kinsa usa ka bakakon ug usa ka mamumuno. ‘Kamo gikan sa inyong amahan ang yawa,’ miingon si Jesus, ‘ug ang mga kailibgon sa inyong amahan kini mao ang inyong gusto nga buhaton. Siya usa ka mamumuno sukad pa sa sinugdan, ug wala magbarug sa kamatuoran, tungod kay walay kamatuoran diha kaniya. . . . Tungod kay nagsulti ako sa kamatuoran, dili kamo motuo Kanako.’ Juan 8:44, 45, R.V. Ang pamatuod nga si Jesus nagsulti sa kamatuoran, ug kana tino gayud, mao ang hinungdan nga wala Siya gidawat sa mga pangulo sa mga Judeo. Kini mao ang kamatuoran nga nakapasilo niining nagpakamatarung sa kaugalingon nga mga tawo. Ang kamatuoran nagbutyag sa kasaypanan sa sayop; gikondenar niini ang ilang pagtudlo ug buhat, ug kini dili nila madawat. Mas ila pa nga ipiyong ang ilang mga mata sa kamatuoran kaysa magpaubos sa ilang kaugalingon sa pagsugid nga sila nasayop. Wala nila higugmaa ang kamatuoran. Wala nila kini tinguhaa, bisan nga kini kamatuoran.”— The Desire of Ages, p. 467.

b. Unsa ang naghimo kanato nga mga anak ni Abraham — ug giunsa sa pagpakita sa mga pangulo sa mga Judeo nga sila dili tinuod nga mga anak ni Abraham? Galacia 3:6–9; Juan 8:40.

“‘Kay kamo wala makadawat sa espiritu sa pagkaulipon pag-usab ngadto sa kahadlok; apan kamo adunay nakadawat sa Espiritu sa pagkasinagop, diin kita nagatuaw, Abba, Amahan.’ Ang espiritu sa pagkaulipon namugna pinaagi sa pagtinguha nga magkinabuhi uyon sa legal nga relihiyon, pinaagi sa pagpaningkamot sa pagtuman sa mga gipangayo sa balaod diha sa atong kaugalingong kusog. Adunay paglaum lamang alang kanato samtang kita mopasakop ilalum sa Abrahamic nga pakigsaad, nga mao ang pakigsaad sa grasya pinaagi sa pagtuo kang Cristo Jesus. Ang ebanghelyo giwali ngadto kang Abraham, nga pinaagi niini siya adunay paglaum, mao ang sama nga ebanghelyo nga gimantala nganhi kanato karon, nga pinaagi niini kita adunay paglaum. Si Abraham mitan-aw ngadto kang Jesus, kinsa mao usab ang Tigpasiugda ug ang Tigtapos sa atong pagtuo.”— The Youth’s Instructor, Septembre 22, 1892.

---

3. ANG KINAIYA NI CRISTO

a. Unsang pangutana nga ang mga kaaway ni Jesus wala makahimo sa pagtubag mahitungod sa Iyang walay mansa nga kinaiya? Juan 8:46 (unang bahin).

“Sa Iyang kinabuhi dinhi sa yuta, si Cristo nakaugmad ug usa ka hingpit nga kinaiya, Siya nakahatag ug hingpit nga pagsunod sa mga sugo sa Iyang Amahan. Sa pag-anhi sa kalibutan diha sa dagway sa tawo, sa pagpasakop sa balaod, diha sa pagpadayag sa mga tawo nga Iyang gipas-an ang ilang balatian, ilang kasub-anan, ilang kasal-anan, Siya wala mahimong makasasala. Sa atubangan sa mga Pariseo Siya makaingon, ‘Kinsa kaninyo ang makapamatuod nga Ako nakahimo ug sala?’ Walay usa ka buling sa sala ang nakaplagan diha Kaniya. Siya mibarug atubangan sa kalibutan ang walay buling nga Cordero sa Dios.”— Sons and Daughters of God, p. 25.

“Si Jesus nagkinabuhi sa balaod diha sa panan-aw sa langit, sa atubangan sa wala mahulog nga mga kalibutan, ug diha sa panan-aw sa makasasala nga mga tawo. Sa atubangan sa mga manulonda, mga tawo, ug mga demonyo, Siya misulti, nga walay nakasukmat, mga pulong nga kon gikan sa lain nga mga ngabil mahimong usa ka pagpasipala: ‘Gibuhat ko kanunay kadtong mga butang nga makapahimuot Kaniya.’ ”— The Desire of Ages, pp. 467, 468.

b. Gawas pa nianang gisulti ni Jesus ingon nga Anak sa tawo, unsay gipahayag sa Kasulatan mahitungod sa kinaiya ni Cristo? Hebreohanon 4:15; 1 Pedro 1:18, 19.

“Ang pagtuo sa mga tawo diha kang Cristo ingon nga mao ang Mesias wala magbasi sa mga ebidensya nga nakita, ug sila mituo Kaniya tungod sa Iyang personal nga mga atraksyon, kon dili tungod sa kahalangdon sa kinaiya nga makaplagan diha Kaniya, nga wala gayud makaplagi, ni makaplagan, diha sa lain.”— The SDA Bible Commentary [E. G. White Comments, vol. 7, p. 904.

c. Sa unsang paagi kita matandog sa kinabuhi ni Jesus? Filipos 2:6–8.

“Wala ba ang atong Ehemplo mitunob sa usa ka malisud, pagdumili sa kaugalingon, pagsakripisyo sa kaugalingon, mapaubsanon nga dalan nga kini ato aron sa pagluwas kanato? Siya nakasugat ug mga kalisdanan, nakasinati ug mga pagkahigawad, ug nag-antus sa kaulawan ug kasakitan sa Iyang buhat sa pagluwas kanato. Ug magdumili ba kita sa pagsunod kon asa ang Hari sa himaya maggiya sa dalan? Moreklamo ba kita sa kalisdanan ug pagsulay diha sa buhat sa pagdaug sa atong kaugalingon nga bahin, sa dihang atong mahinumdoman ang mga pag-antus sa atong Manunubos?”— Testimonies for the Church, vol. 3, p. 371.

---

4. ANG KINAIYA SA MGA SUMOSUNOD NI CRISTO

a. Unsa man ang tumong sa tanang matuod nga mga sumosunod ni Cristo? 1 Pedro 1:13-16.

“Ang atong buluhaton mao ang pagpaningkamot nga makab-ot diha sa atong natad sa paglihok ang kahingpitan nga nakab-ot ni Cristo sa Iyang kinabuhi dinhi sa yuta sa matag hugna sa kinaiya.”— That I May Know Him, p. 130.

b. Unsaon nato pagkab-ut kini nga kalab-uton? Hebreohanon 12:1–4; Galacia 5:6 (katapusang bahin); Filipos 3:12–15; 4:13.

“Unsaon nato pagkab-ot ang kahingpitan nga gitakda sa atong Ginoo ug Manluluwas nga si Jesu Cristo — atong Dakong Magtutudlo? Matuman ba nato ang Iyang gikinahanglan ug makakab-ot sa hilabihan ka taas nga sumbanan? Mahimo nato, kon dili, si Cristo dili unta magsugo kanato sa pagbuhat sa ingon. Siya mao ang atong pagkamatarung. Diha sa Iyang pagkatawhanon Siya nag-una kanato ug naghimo alang kanato ug kahingpitan sa kinaiya. Kita kinahanglan nga adunay hugot nga pagtuo diha Kaniya nga nagabuhat pinaagi sa gugma ug nagputli sa kalag. Ang kahingpitan sa kinaiya gibase sa kong unsa si Cristo alang kanato. Kon kita adunay makanunayon nga pagsalig diha sa mga merito sa atong Manluluwas, ug maglakaw diha sa Iyang mga tunob, kita mahimong sama Kaniya, putli ug walay kahugawan.”—Ibid.

c. Sa unsa nga paagi gayud nga kita mahimong putli ug walay lama atubangan sa Dios? Roma 5:18–20; Hebreohanon 10:14.

“Walay pasayloon ni Cristo gawas sa mahinulsulon, apan kinsa ang Iyang gipasaylo Siya naghimo una nga mahinulsulon.”— Selected Messages, bk. 1, pp. 393, 394.

“Ang makasasala kinahanglan nga kanunay motan-aw sa Kalbaryo; ug uban sa yano nga pagtuo sa usa ka gamay nga bata, kinahanglan siya mosalig diha sa mga merito ni Cristo, modawat sa Iyang pagkamatarung ug magatuo sa Iyang kalooy. . . .

“Unsa nga gugma kini — unsa ka kahibulongan, dili matugkad nga gugma — nga magdala kang Cristo sa pagpakamatay alang kanato samtang kita mga makasasala pa! Unsa nga kapildihan sa kalag nga nakasabut sa lig-on nga mga gipangayo sa balaod, ug kinsa mapakyas pa sa pagsabut sa grasya ni Cristo nga mas modagaya!”— Ibid., p. 384.

---

5. ATONG KINAIYA MAHIMONG MAHISAMA SA IYA

a. Unsaon nato sa paghimo ang atong pagkatinawag ug pagkapinili nga sigurado? 2 Pedro 1:4-11; Bugna 19:8.

“Ang Dios nagkinahanglan karon kon unsay Iyang gikinahanglan kang Adan, hingpit nga pagkamasinugtanon, pagkamatarung nga walay depekto, walay kasaypanan diha sa Iyang panan-aw. Ang Dios magtabang kanato sa paghatag ngadto Kaniya sa tanan nga gikinahanglan sa Iyang balaod. Dili nato kini mahimo kon wala kanang pagtuo nga nagdala sa pagkamatarung ni Cristo ngadto sa adlaw-adlaw nga pagginawi.”— Selected Messages, bk. 2, p. 381.

“Samtang si Satanas naghari pa, aduna kitay kaugalingon nga buntogon, nagaataki nga mga sala nga pagabuntogon; samtang ang kinabuhi nagalungtad, walay dapit nga hunongan, walay punto diin kita makaabot ug makaingon, hingpit na nako nga nakab-ot. Ang pagkabalaan maoy resulta sa tibuok kinabuhi nga pagkamasinugtanon.”— The Acts of the Apostles, pp. 560, 561.

“Kita kinahanglang makaamgo nga pinaagi sa pagtuo diha Kaniya kini atong pribilehiyo nga mahimong umalambit sa diosnon nga kinaiya, ug sa ingon makalikay sa pagkadunot nga ania sa kalibutan pinaagi sa kaibog. Unya kita mahinloan gikan sa tanang sala, tanang depekto sa kinaiya. Dili kita kinahanglan maghupot ug usa ka makasasala nga kahiligan. . . .

“Samtang kita moambit sa diosnong kinaiya, napanunod ug naugmad nga mga kahiligan ngadto sa sayop maputol gikan sa kinaiya, ug kita mahimo nga usa ka buhi nga gahum alang sa maayo. Kanunay nga nagkat-on sa balaang Magtutudlo, matag adlaw nga mag-ambit sa Iyang kinaiya, kita mokooperar sa Dios sa pagbuntog sa mga tentasyon ni Satanas. Ang Dios magabuhat, ug ang tawo magabuhat, aron ang tawo mahiusa kang Cristo ingon nga si Cristo usa sa Dios. . . .

“Ang Dios maoy naghatag kanatog gahum sa pagdaug. Kadtong makadungog sa Iyang tingog ug nagtuman sa Iyang mga sugo makahimo sa pagporma ug matarung nga mga kinaiya.”— The SDA Commentary [E. G. White Comments], vol. 7, p. 943.

---

PERSONAL SUBLI NGA MGA PANGUTANA

1. Ngano nga ang mga Pariseo dili makaangkon sa kinabuhing dayon pinasikad sa ilang kagikan sa dugo — ni bisan kinsa karon nga misalig sa kagikan o DNA ingon nga timaan sa kaluwasan?

2. Isaysay ang mga kinaiyahan sa tinuod nga mga anak ni Abraham.

3. Mahitungod sa Iyang kinaiya, unsa ang nahimo ni Jesus sa pagpahayag?

4. Unsang tumong ang gibutang sa atubangan sa matag Cristohanon?

5. Sa unsang paagi nga kita makaplagan nga hingpit ug walay ikasaway sa atubangan sa Dios?