Domingo
, Mayo 4
1. MAGHINUMDOM SA PAGLALANG
a. Unsa ang gilalang sa Dios diha sa unang adlaw sa paglalang? Genesis 1:3-5.
“Diha sa malalangon nga pulong sa sinugdanan, ang kahayag milamdag sa kangitngitan”- The Desire of Ages, p. 464.
b. Kinsa ang presente diha sa paglalang sa kalibutan - dili ingon nga usa ka tigpaniid, kon dili usa ka aktibo nga partisipante? Genesis 1:1, 2; Juan 1:1, 2; Colosas 1:16.
“Sa sinugdan, ang Dios nadayag diha sa tanang mga buhat sa paglalang. Si Cristo mao kadtong nagbuklad sa mga langit, ug nagpahaluna sa mga patukoranan sa yuta. . . . Siya mao ang nagpuno sa yuta sa katahum, ug sa kahanginan uban sa awit. Ug diha sa tanan nga mga butang sa yuta, ug sa hangin, ug sa langit, Iyang gisulat ang mensahe sa gugma sa Amahan.”— Ibid., p. 20.
“Ang kamot nga nagpugong sa mga kalibutan diha sa kawanangan, ang kamot nga nagkupot sa ilang libutanan (orbit) nga han-ay ug walay kakapoy nga paglihok sa tanan nga mga butang sa tibuok uniberso sa Dios, mao ang kamot nga gilansang sa krus alang kanato.”— Education, p. 132.
Lunes
, Mayo 5
2. KAHAYAG SA DESERTO
a. Sa unsa nga ang mga anak sa Israel nagiyahan didto sa deserto? Exodus 13:21, 22. Isaysay ang presensya nga nagtabon diha sa haligi sa panganod ug diha sa haligi nga kalayo? Exodus 13:21 (unang bahin); 1 Corinto 10:1-4.
“Diha sa pagpadayag sa Dios ngadto sa Iyang katawhan, ang kahayag kanunay nagsimbolo sa Iyang presensya. Diha sa malalangon nga pulong sa sinugdanan, kahayag midan-ag gikan sa kangitngitan. Ang kahayag gibukotan diha sa haligi sa panganod diha sa adlaw ug sa haligi nga kalayo sa gabii, naggiya sa mabaga nga kasundalohan sa Israel.”- The Desire of Ages, p. 464.
b. Unsa may nasulat mahitungod sa presensya ni Cristo uban sa Israel didto sa deserto - ug unsang proteksyon ang gisaad sa Dios ngadto sa Iyang katawhan? Salmo 105:39; Isaias 4:5, 6.
“Diha sa usa sa labing matahom ug makapalipay nga mga pasahi sa tagna ni Isaias, reperensya gihimo ngadto sa haligi sa panganod ug sa kalayo aron magrepresentar sa pag-alima sa Dios alang sa Iyang katawhan diha sa katapusang pakigbisug uban sa mga gahum sa dautan.”- Patriarchs and Prophets, p. 283.
c. Giunsa ni Cristo pagpakita ang Iyang kaugalingon didto sa Sinai - ug giunsa ni Moises ug sa katawhan pagtubag? Exodus 19:16-18; 20:18, 19; Hebreohanon 12:21.
“‘Ang himaya sa Ginoo sama sa nagaut-ut nga kalayo didto sa tumoy sa bukid’ diha sa panan-aw sa nagkatigom nga panon sa katawhan. . . . Makalilisang kaayo ang mga timaan sa presensya ni Jehova nga ang mga panon sa Israel nangurog sa kahadlok, ug nanghapa sa atubangan sa Ginoo.”— Ibid., p. 304.
“Mahimayaon kaayo ang pagpadayag sa presensya [ni Cristo] nga kini dili makaya sa mamalatyon nga tawo. Si Moises, nga gikahimut-an pag-ayo sa Dios, mipatugbaw, ‘Ako nahadlok pag-ayo ug nangurog’. Apan siya gipalig-on sa Dios sa pag-antus niining hilabihan ka dakong himaya, ug sa pagdala gikan sa bukid sa usa ka pagpasanag niini diha sa iyang nawong nga tungod niana ang mga tawo dili makalahutay sa pagtutok niini.”— Sons and Daughters of God, p. 225.
Martes
, Mayo 6
3. KAHAYAG DIHA SA PULOY-ANAN SA DIOS
a. Giunsa ni Cristo pagpakita ang Iyang presensya diha sa tabernakulo? Exodus 40:34, 35.
“Uban sa matinguhaon nga kasibut ang mga panon sa Israel midugok aron sa pagtan-aw sa Sagrado nga istruktura. Samtang sila namalandong sa talan-awon uban sa matinahuron nga pagkatagbaw, ang haligi nga panganod naglutaw ibabaw sa sanctuaryo ug, mikunsad, nagputos niini. ‘Ug ang himaya sa Ginoo mipuno sa tabernakulo.’ Dihay pagpadayag sa diosnon nga kahalangdon, ug sa usa ka panahon bisan si Moises dili makasulod. Uban sa halalum nga pagbati ang mga tawo nakakita sa timaan nga ang buhat sa ilang mga kamot gidawat. Walay makusog nga mga papakita sa pagmaya. Usa ka solemne nga kataha midangat diha sa tanan. Apan ang kalipay sa ilang mga kasingkasing mitubo diha sa mga luha sa kalipay, ug sila naghagawhaw ug hinay, sa mainiton nga mga pulong sa pagpasalamat nga ang Dios mikunsad aron sa pagpabilin uban kanila.”— Patriarchs and Prophets, pp. 349, 350.
“Sa ibabaw sa lingkoranan sa kalooy mao ang Shekinah, ang pagpadayag sa diosnon nga presensya; ug gikan sa taliwala sa mga querubin, ang Dios magpahibalo sa Iyang kabubut-on. Balaanon nga mga mensahe usahay ipahibalo ngadto sa labawng sacerdote pinaagi sa usa ka tingog gikan sa panganod. Usahay ang usa ka kahayag mahulog diha sa manulonda sa tuo, aron magpasabot sa pag-uyon o pagdawat, o usa ka landong o panganod nga mopatong sa usa nga naa sa wala aron sa pagpadayag ug dili pag-uyon o pagsalikway.”— Ibid.
b. Unsa ang nahitabo sa ulahi, sa dihang ang templo gidedikar? 2 Cronicas 7:1.
“Usa ka labing nindot nga sanctuaryo ang gihimo, sumala sa gipakita nga sumbanan kang Moises didto sa bukid, ug sa ulahi gipresentar ni Jehova ngadto kang David. Ang yutan-on nga sanctuaryo gihimo nga sama sa langitnon. Dugang pa sa mga kerubin sa ibabaw sa arka, si Solomon naghimo ug laing duha ka manulonda nga mas dagko, nga nagbarog diha sa matag tumoy sa arka, nagrepresentar sa langitnong mga manulonda nga kanunay nagbantay sa balaod sa Dios. Imposible ang paghulagway sa katahum ug kanindot niini nga tabernakulo. Didto, maingon didto sa tabernakulo, ang sagradong arka gidala sa solemne, matinahuron nga han-ay, ug ibutang sa iyang dapit sa ilalum sa mga pako sa duruha ka halangdon nga querubin nga nagbarog sa salog.
“Ang sagrado nga mga mag-alawit naghiusa sa ilang mga tingog, uban sa tanang matang sa mga instrumento sa musika, sa pagdayeg sa Dios. Ug samtang ang mga tingog nagkaharmoniya, uban sa instrumento sa musika, milanog latas sa templo, ug gipadpad sa kahanginan latas sa Jerusalem, ang panganod sa himaya sa Dios mikunsad sa gambalay, sama sa pagpuno niini kaniadto sa tabernakulo. ‘Ug nahitabo, sa paggula sa mga sacerdote sa balaang dapit, nga ang panganod mipuno sa balay ni Jehova, nga tungod niana ang mga sacerdote dili makabarog sa pag-alagad tungod sa panganod, tungod kay ang himaya sa Ginoo mipuno sa balay sa Ginoo’ (1 Hari 8:11)..”— Spiritual Gifts, vol. 4a, pp. 113, 114.
Mierkules
, Mayo 7
4. ANG KAHAYAG SA EBANGHELYO
a. Unsang mensahe ni Cristo diha sa Juan 8:12 nagdala kanato ug dakong paglaum?
“Dili ang eskolar nga mga teologo ang adunay pagpanabut niini nga kamatuoran, ug miapil sa pagmantala niini. Kon kini sila matinumanon pa nga mga magbalantay, makugihon ug mainampoon nga nagsusi sa mga Kasulatan, nahibal-an unta nila ang takna sa kagabhion; ang mga tagna mag-abli unta kanila sa mga hitabo nga hapit na magakahitabo. Apan wala sila magbaton niini nga posisyon, ug ang mensahe gihatag ngadto sa mas mapaubsanon nga mga tawo. . . . Kadtong mitalikod gikan sa kahayag nga gihatag sa Dios, o kinsa wala magpakabana sa pagpangita niini samtang nga kini maabot pa nila, gibiyaan diha sa kangitngit.”— The Great Controversy, p. 312.
“Ang Ginoo mihimo sa matag probisyon aron kita makabaton ug madato, abunda, malipayong kasinatian. Si Juan nagsulat mahitungod kang Cristo, nga nag-ingon, ‘Diha Kaniya ang kinabuhi; ug ang kinabuhi mao ang kahayag sa mga tawo.’ Ang kinabuhi kadugtong sa kahayag, ug kon kita walay kahayag gikan sa Adlaw sa Pagkamatarung, dili kita makabaton ug kinabuhi diha Kaniya. Apan kini nga kahayag gitagana alang sa matag kalag, ug diha lamang nga kita mobiya gikan sa kahayag nga ang kangitngit moabut kanato. Si Jesus miingon, ‘Siya nga magasunod kanako dili magalakaw sa kangitngit, apan makabaton sa kahayag sa kinabuhi.’ Sa kalibutan nga naglibut kanato walay kinabuhi kon walay kahayag. Kon ang adlaw mahunong sa iyang pagsidlak, tanang tanom, tanang kinabuhi sa mananap, mahimong matapos. Kini nag-ilustrar sa kamatuoran nga kita dili makabaton ug espirituhanong kinabuhi gawas kon ibutang nato ang atong mga kaugalingon ilalum sa sidlak sa Adlaw sa Pagkamatarung. Kon atong ibutang ang usa ka mamulak nga tanum sa usa ka ngitngit nga kwarto, kini sa dili madugay malaya ug mamatay; ug mao nga kita mahimo nga makabaton ug pipila ka espirituhanong kinabuhi, apan sa gihapon mawad-an niini pinaagi sa pagpabilin diha sa usa ka kawanangan sa pagduhaduha ug kasubo.”— Sons and Daughters of God, p. 281.
b. Unsang kasigurohan ang moabut samtang kita modangup kang Jesus? 2 Corinto 3:18.
“Sama sa usa ka bulak nga moliso ngadto sa adlaw nga ang masanag nga mga silaw niini makatabang diha sa paghingpit sa katahom niini ug simetriya, mao nga ang mga sumosunod ni Cristo moliso ngadto sa Adlaw sa Pagkamatarung, aron nga ang kahayag sa langit modan-ag diha kanila, maghingpit sa ilang mga kinaiya, ug maghatag kanila ug lawom ug malungtaron nga kasinatian sa mga butang sa Dios. Wala sa atong gahum ang paghunahuna sa mga panalangin nga gidala nganhi kanato pinaagi kang Cristo, kon atong ihiusa ang atong tawhanong paningkamot uban sa diosnong grasya.”— Ibid., p. 26.
“Bisan kinsa nga adunay usa ka katuyoan magatinguha sa pagbuhat sa kabubut-on sa Dios, sa kamainiton mosunod sa kahayag nga gihatag, makadawat ug mas dako nga kahayag; ngadto nianang maong kalag ang mga bituon sa langitnong kahayag ipadala aron sa paggiya kaniya ngadto sa tanang kamatuoran.”— The Great Controversy, p. 312.
Huebes
, Mayo 8
5. NAGADAN-AG DIHA SA ATONG MGA KASINGKASING
a. Sa unsa nga kita mapatuboy pinaagi sa makapadasig nga reperensya ni Pablo sa Kahayag sa kalibutan? 2 Corinto 4:6.
“Himoa nga ang mahimayaon nga mga pagpanabut sa Dios magagahum sa imong hunahuna. Himoa nga ang imong kinabuhi mahiusa pinaagi sa tinago nga mga sumpay ngadto sa kinabuhi ni Jesus. Siya nga nagsugo sa kahayag sa pagdan-ag sa kangitngit andam sa pagdan-ag diha sa imong kasingkasing, aron sa paghatag sa kahayag sa kahibalo sa himaya sa Dios diha sa nawong ni Jesu-Cristo. Ang Espiritu Santo mokuha sa mga butang sa Dios ug magapakita niini nganha kanimo, nga magatunol kanila ingon nga usa ka buhi nga gahum ngadto sa masinugtanon nga kasingkasing. Si Cristo mogiya kanimo ngadto sa ganghaan sa Walay Kinutuban. Mahimo nimong makita ang himaya sa luyo sa tabil, ug magpadayag ngadto sa mga tawo sa pagkaanaa Niya nga nabuhi sa walay katapusan aron sa pagpataliwala alang kanato.”— Christ’s Object Lessons, p. 149.
“Ang pagpadayag sa Iyang kaugalingong himaya diha sa dagway sa pagkatawhanon magdala sa langit haduol kaayo sa mga tawo aron ang katahum nga nagdayandayan sa sulod nga templo makita sa matag kalag kang kinsa ang Manluluwas nagpuyo. Ang mga tawo mabihag sa himaya sa usa ka pagpabilin ni Cristo. Ug diha sa mga bul-og sa pagdayeg ug pagpasalamat gikan sa daghan nga mga kalag nga sa ingon nadaug ngadto sa Dios, ang himaya modagayday balik ngadto sa dakong Maghahatag.
“‘Tindog, sidlak; kay ang imong kahayag miabut na, ug ang himaya ni Jehova misubang sa ibabaw nimo.’ Isaias 60:1. Alang niadtong mogula aron sa pagsugat sa Pamanhonon mao kini ang mensahe nga gihatag. Si Cristo moabot uban ang gahum ug dakong himaya. Moanhi Siya uban sa Iyang kaugalingong himaya ug uban sa himaya sa Amahan. Moanhi Siya uban ang tanang balaan nga mga manulonda uban Kaniya. Samtang nga ang tibuok kalibutan naunlod diha sa kangitngit, adunay kahayag diha sa matag puloy-anan sa mga balaan. Ilang makuha ang unang kahayag sa Iyang ikaduhang pagpadayag. Ang kahayag nga putli mosidlak gikan sa Iyang kahalangdon, ug si Cristo ang Manunubos pagadayegon sa tanan nga nag-alagad Kaniya. Samtang ang mga dautan mangalagiw gikan sa Iyang presensya, ang mga sumusunod ni Cristo magmaya.”— Ibid., pp. 420, 421.
Biernes
, Mayo 9
PERSONAL SUBLI NGA MGA PANGUTANA
1. Unsa ang gitudlo sa Biblia mahitungod sa pagka-Dios diha sa buhat sa paglalang?
2. Ihulagway giunsa ni Jesus pagpakita sa Iyang kaugalingon ngadto sa Iyang katawhan didto sa deserto.
3. Sa unsang paagi ang kahayag ni Cristo misidlak diha sa sulod sa tabernakulo ug sa templo?
4. Ihulagway kon giunsa ni Jesus pagpakita ang Iyang kaugalingon diha sa pagdedikar sa templo.
5. Sa unsang paagi nga si Cristo magpadayag sa Iyang kaugalingon nganhi kanato ug pinaagi kanato?