Ijambo ry’Ibanze
Mbese mu mibereho yawe ya Gikristo uri gushakisha uko wagera ku nsinzi? Ubwo rero waje ahantu hakwiriye:
“Mu rwandiko rwa kabiri Petero yandikiye abari barakiriye “Ukwizera kw’igiciro cyinshi” nka we, intumwa Petero yerekana gahunda y’Imana yo gutuma imico ya Gikristo ijya mbere.” – Ibyakozwe n’Intumwa, p.529.
“Igice cya mbere cy’urwandiko rwa kabiri rwa Petero cyuzuyemo guhugura kandi gitanga urufunguzo rw’intsinzi. Ukuri kwacengejwe mu bwenge mu buryo bukomeye binyuze mu buryo kwagaragajwe muri iki gice. Nimutyo turusheho gushishikarira kwiga ayo magambo, no gushyira mu bikorwa ayo mabwiriza.” – Ellen G. White, Ubusobanuro bwa Bibiliya bw’Abadiventisiti b’Umunsi wa Karindwi, vol 7, p.942.
Mbega ukuntu ari ngombwa guteza imbere imico ya Gikristo by’ukuri muri iki gihe cy’amateka, ubwo vuba aha tuzaba dukwiriye guhagarara tudafite Umuhuza udusabira ahera cyane ho mu buturo bwera bwo mu ijuru! Mu gihe abigishwa b’Ishuri ryo ku Isabato hirya no hino ku isi yose bazaba bafite ibyo bitekerezo bikomeye mu bwenge, bazibanda ku Byigisho dukura mu Nzandiko za Petero (II).
“Nta gihe cyigeze kibaho ngo bibe iby’ingenzi cyane ko twiyanga kandi tukikorera umusaraba wacu buri munsi kurusha uko bimeze ubu. Mbese dushaka gushyira mu bikorwa ukwiyanga ku rugero rungana iki?” – Ibihamya by’Itorero, vol 9, p.186.
“Tugomba guhinduka abasangiye kamere y’Imana, tumaze guhunga no gukira ukononekara kwazanywe mu isi no kwifuza…..
“Nta kintu nk’icyo mu ijambo ry’Imana cyitwa ko ari ugutoranywa kutagira icyo gushingiyeho, ni ukuvuga ko umuntu yatoranyijwe rimwe gusa kubw’ubuntu bw’Imana, kandi agahora abeshejweho n’ubuntu. Mu gice cya kabiri cy’urwandiko rwa kabiri rwa Petero; iyo ngingo yarasobanuwe kandi mu buryo bwumvikana neza….
“Ibyanditswe Byera bisobanura neza ko abantu bigeze kumenya inzira y’ubugingo kandi bakishimira ukuri, bari mu kaga ko kugwa mu buhakanyi maze bakazimira. Kubw’ibyo rero, hakenewe guhindukirira Imana buri munsi; nta kudohoka.
“Abantu bose bashaka gushyigikira inyigisho yo gutoranywa, ni ukuvuga ko umuntu yatoranyijwe rimwe gusa kubw’ubuntu bw’Imana, kandi agahora abeshejweho n’ubuntu, ibi babikora mu buryo burwanya ‘Uku niko Uwiteka avuga’…..
“Abahindutse by’ukuri bahambanywe na Kristo mu rupfu nk’urwe, kandi bazurwa mu mva y’amazi mu muzuko nk’uwe, kugirango bagendere mu bugingo bushya. Binyuze mu kumvira ukuri mu budahemuka, bakwiriye gutuma guhamagarwa kwabo no gutoranywa kwabo kuba impamo.” – Ellen G. White, Ubusobanuro bwa Bibiliya bw’Abadiventisiti b’Umunsi wa Karindwi, vol 6, p.1114,1115.
“Mu gihe twitegereza kandi tukigana imibereho [ya Kristo], tuzahindurwa bashya mu ishusho Ye. Ubwiza bw’ijuru buzamurikira mu mibereho yacu kandi bugaragare no ku bandi. Ku ntebe y’ubuntu ya cyami tuzahabona ubufasha dukeneye kugirango dushobore kubaho muri ubwo buryo. Uko niko kwezwa by’ukuri, kandi se ni iyihe mimerere yo mu rwego rwo hejuru abantu bashobora kwifuza kuruta iyo kuba bafitanye isano na Kristo nkuko ishami riba rifashe ku muzabibu?” – Ibihamya by’Itorero, vol 5, p.306. Amena!
Icyiciro cy’Ishuri ryo ku Isabato mu Nteko Nkuru Rusange
