Upu Tomua O ai o i tatou e lē’i uia tulaga e fa’apei o mea na o’o ia Peteru, le so’o lē fefe e tautala? O lona olaga fa’aletagata e mautinoa lava o se olaga lea tatou te malamalama uma lava i ai, i nisi o vaega. O lona vilivilita’i finafinau ma lona naunau sauni ma agava’a e faia fa’atonuga a lona Matai, e matuā fa’aosofia ai lava lea lagona ia i tatou. E mautinoa lava tatou te malamalama i ana mea sese fa’alumaina i nisi o taimi, ma e fa’alototeleina fo’i i tatou i lona toe tula’i mai ina ua mavae lona pa’ū. O le la’asaga o le avea ma tagata matua na uia e Peteru e ala i le ta’ita’iga a le Atua, na aumaia ai o ia i le avea ma aposetolo o tapula’a maualuga o le amio, fa’atasi ai ma ana tusi e lua ua ta’uaogaina ua tusia ai i totonu o le Tusi Paia.Talu ai ona o nei uiga uma, i le tolu masina oi lumana’i nei, o le au su’esu’e o le A’oga o le Sapati i le lalolagi atoa, o le a latou taula’i i Lesona Mai I Tusi a Peteru (I). O ma’a tāua o le upu moni mai i lenei tane o le Atua, na ulufia e le Agaga Paia, ua fuafuaina e fa’amalosia ai la tatou savaliga ma le Ali’i i taimi faigata.O le tasi o vaega autu o le tusi a Peteru, o loo fa’ailoa mai fa’apea, o tagata o le Atua, e tatau ona latou ola i olaga e fausia a’e ai le tino o Keriso ina ia avea o se molimau pupula i se lalolagi fa’apogisaina i le agasala.“O le toe fa’aola mai ma se toe fuata’iga e tatau ona faia, i lalo o le galuega a le Agaga Paia. O le toe fa’aola mai ma le toe fuata’iga, o mea eseese ia e lua. O le toe fa’aola mai o loo fa’ailoa mai ai se toe fa’afouina o le ola fa’aleagaga, o le toe fa’aolaina mai lea o malosi o le mafaufau ma le loto, o se toe fa’atuina mai lea mai i le oti fa’aleagaga. O le toe fuata’iga o loo fa’ailoa mai ai se toe fa’atulagaina, o se suiga lea i manatu, masaniga ma fa’atinoga. O le toe fuata’iga o le a lē aumaia ai fua lelei o le amiotonu se’ivagana ua feso’ota’i atu i le toe fo’i mai o le Agaga Paia. O le toe fa’afo’isia mai ma le toe fuata’iga, e tatau ona faia la la galuega filifilia, ma i le faia o lenei galuega, e tatau ai ona la galulue fa’atasi.” – Selected Messages, bk. 1, p. 128.O se molimau tāua lava, e aumaia ai se olega malosi lava ia i tatou ta’ito’atasi, lea e mafai ona tatou fa’apotopotoina mai mo lo tatou tutupu a’e fa’aleagaga, a’o tatou su’esu’eina le ulua’i tusi a Peteru: “Lo’u uso e, afai e te mana’o i ai, e mafai ona avea oe ma tagata malosi i totonu i le Atua. O loo ia te oe taleni o malosi ua foa’i atu e le Atua e te tausia ina ia tu’uina atu fa’apaiaina i le auaunaga ia te Ia. Peita’i, afai e te lē gaua’iina atu mea uma lava ia Keriso, o ou agava’a o le a fa’amaonia e mata’utia tele lona leaga ia te oe ma isi, ma ē ta’ita’ia ai i latou ina ia latou savavali vavae ese mai i le upu moni ma vavae ese mai ia Keriso.“O tagata o le ekalesia i – e tele le galuega latou te mana’omia e faia mo i latou. E tatau ona latou maua le vilivilita’i finafinau mo Keriso, e tatau ona sili atu ona latou agamalu loto maulalo, e tatau ona sili atu lo latou onosa’i, e tatau ona sili atu lo latou agalelei, e tatau ona sili atu ona latou naunau e a’oa’oina i latou, ma e tatau ona sili atu lo latou fa’apei o Keriso i uiga uma lava. I a latou amio, e tatau ona latou fa’ailoa atu i le lalolagi le mana fa’apaiaina o le alofa tunoa. Talosia ia aua ne’i ē punitiaina le ala aga’i atu i lenei galuega tāua e mana’omia lona fa’ataunu’uina, e ala i au poloa’iga poo au fa’ata’ita’iga fo’i. O le a ē galue fa’atasi ea ma Iesu? O le a ē fa’amaoni ea i le Ali’i o Lē na fa’atauina oe? O le a ē tu’ueseina ea i tua mataupu uma lava e itiiti lo latou tāua? E tatau ona papatisoina atu oe i totonu o se fa’atuatua e sili atu ona telē, ma se alofa e sili atu ona tele. E te mana’omia le ava migao sili atu mo mea e fa’avavau lo latou tāua.” – Testimonies for the Church, vol. 5, pp. 570, 571.Tau ina ia fesoasoani mai le Atua ia i tatou uma ina ia tatou taliaina nei apoapoa’iga i totonu o ō tatou loto a’o tatou su’esu’e!O le Matagaluega o le A’oga o le Sapati a le Koneferenisi Aoao
