Fanau Usiusita’i a le Atua MAU TAULOTO: “Ua outou fa’amamā i o outou loto i le gaua’i i le upu moni e le Agaga, ua i’u i le alofa fa’amaoni i le au uso, o le mea lea ia matuā fealofani ai outou ai le loto naunau” (1 Peteru 1:22).
Faitauga Fautuaina:
Steps to Christ, pp. 43-48.
“A tatou taofi mau atu loa ia Keriso e ala i le fa’atuatua, ua fa’ato’a amata loa la tatou galuega. O tagata ta’itasi uma lava e i ai o latou masaniga leaga ma le agasala lea e tatau ona fa’ato’ilaloina e ala i le tauiviga finafinau. O tagata ta’itasi uma lava e mana’omia ia tauina le taua o le fa’atuatua.” – Selected Messages, bk. 2, p. 20.
1. FILIFILIA MA LE FA’AETEETE O Ō TATOU MANATUNATUGA Ulua’i Aso Aperila 14
a. E tusa ai ma le Upu a le Atua, o fea e amata ai le usita’i moni? 1 Peteru 1:13, 14; Roma 12:2.“O toe fuata’iga moni uma lava e amata lava i le fa’amamāina o le loto. O le fufuluina o le toe fanaufouina ma le toe fa’afouina o le mafaufau e ala i le mana o le Agaga Paia, lea e galuea’iina ai se suiga i le olaga.“O lo tatou va’ava’ai ia Keriso e suia ai i tatou. Afai e manatunatu le mafaufau i taimi uma lava i mea fa’alētumau, o nei mea o le a matua miti’ia ai le mafaufau, ma a’afia ai le amio, o lea ua lē va’aia ai le mamalu o le Atua ma ua fa’agaloina. O avanoa o loo mafai ona latou maua ina ia latou malamalama ai i mea fa’alelagi, ua lē amanaiaina. Ua oti loa le olaga fa’aleagaga.” – Sons and Daughters of God, p. 105.b. O fea e aga’i i ai manatunatuga ma faufauga fa’alenatura o manatu fa’aletagata? Kenese 6:5; Ieremia 17:9.c. O le a le mea o le a tatou faia pe a tatou iloa o ō tatou manatu ma faufauga e lē mamā? Galuega 8:22.
2. MANATU FA’AUTAUTA Aso Gafua Aperila 15
a. E fa’apefea ona mafai ona tatou “fusi a’e sulugatiti o ō tatou mafaufau” i se uiga fa’atinoina? Kenese 4:7.“O i latou e lē manana’o e pa’u’ū i faufauga a Satani, e tatau ona latou puipuiina lelei ala e aga’i atu i le loto; e tatau ona latou ‘alo ese mai i le faitauina, va’ai, poo le fa’alogo foi i mea o le a fa’amanatu mai ai manatu lē mamā. O le mafaufau e lē tatau ona tu’ua e manatunatu i matāupu uma lava e ono fa’amanatu mai e le fili o agaga. O le loto e tatau ona leoleoina ma le fa’amaoni, afai e leai, o le a fafaguina e manatu leaga mai i fafo, lagona leaga i totonu, ma o le a fealualua’i ai loa le tagata i le pogisa. Fai mai le tusi a Peteru, ‘Ia outou fa’autauta, ia fusi a’e sulugatiti o ō outou mafaufau,’” – The Acts of the Apostles, p. 518.b. Aisea e matuā taua ai tele le puleaina o manatunatuga o ō tatou loto? Fa’ata’oto 23:7 (vaega muamua); 24:9 (vaega muamua).“O manatunatuga, e tatau ona aumaia ia gaua’i atu i le finagalo o le Atua, ma lagona fo’i ia i lalo o le pule’aga a le mafaufau ma le tapua’iga. O ō tatou manatunatuga e lē’i foa’iina mai ia i tatou ina ia fa’atagaina e so’ona tamo’e solo ma le lē puleaina ma fa’ataga e manatunatu i so’o se mea e mana’o i ai, e aunoa ma se taumafaiga ina ia taofia ma koleniina ma a’oa’iina. Afai e sesē manatunatuga, o le a sesē fo’i lagona; ma o manatu ma lagona tu’ufa’atasia e fausia a’e ai le amio fa’aleagaga. A tatou filifili loa e fa’apea, o le avea o i tatou ma kerisiano e lē o mana’omia ai i tatou ina ia taofia o tatou manatunatuga ma o tatou lagona, ua aumaia loa i tatou i lalo o le a’afiaga o agelu leaga, ma tatou vala’aulia mai ai loa lo latou fa’atasi mai ma la latou pule’aga. Afai tatou te gaua’i i lagona e osofia ai i tatou ma tatou fa’atagaina ai o tatou manatu e manatunatu i se taula’iga o le masalosalo, fa’alotolotolua, ma le mafatia, o le a tatou lē fiafia, ma o ō tatou olaga o le a fa’amaonia mai o se to’ilalo.” – The Review and Herald, April 21, 1885.c. Aisea e aioi mai ai le aposetolo o Peteru ia i tatou ina ia tatou fa’autauta ma “fa’amoemoe e o’o i le i’uga? 1 Peteru 1:13 fa’atusatusa i le mataupu e 5:8.“Ia matuā puipuia ma le fa’amaoni ou manatunatuga. Ia matuā malu puipuia lava le puipuia o lou loto mai i manatunatuga ta’itasi uma e fa’alatalata atu i ai. E tatau ona ē fa’atuina a’e i luga pa puipui e tete’e atu ai i le fa’alatalata mai o Satani. O le mataala i le vaega e tasi ae fa’atalalē ai i isi vaega, o le a lē aoga lea. . . . O loo i ai fa’afanoga i o tatou luma ia e tatau ona tatou fa’afetaia’ia, ma o lo tatou saogalemu e tasi lava, o loo i totonu o le Atua.” – This Day With God, p. 174.
3. SOLA ESE MAI I TU’INANAUGA UA TUANA’I MA IA PAIA Aso Lua Aperila 16
a. O a vaega eseese o ō tatou olaga e tatau ona tatou matuā fa’autauta ai lava i o tatou mafaufau ina ia fa’apaiaina i tatou? 1 Peteru 1:14, 15; 4:2, 3.“Aua ne’i fa’aseseina e se tasi ia lava i le manatu fa’apea, o agasala na teufatuina mo se taimi e mafai ona faigofie ona lafoa’ia i se taimi pu’upu’u? E lē sa’o le manatu lea. O agasala ta’itasi uma lava e teufatuina, e fa’avaivaia ai le amio ma fa’amalosia ai masaniga; ma o le amioleaga i le tino, mafaufau, ma o le amio leaga, o le i’uga lea. Atonu e mafai ona ē salamo i le sesē ua ē faia, ma tu’uina ou vae i ala tonu; peita’i o le suiga i lou mafaufau ma lou iloaina o le agasala, o le a faigata ai mo oe ona ē iloa le mea tonu mai i le mea sese. E ala i masaniga sese ua fausiaina, o le a toe osofa’i ai pea lava pea oe e Satani.” – Christ’s Object Lessons, p. 281.b. E ui lava ina fa’amanatu mai ia i tatou i taimi uma lava ina ia tatou paia (1 Peteru 1:15, 16) – lea atonu tatou te manatu e mafai ona fa’ataunu’uina e ala i a tatou lava taumafaiga – a’o le mea moni, o a auala e mafai ai e i tatou ona tatou paia? Levitiko 20:7, 8; Filipi 2:13; Tito 3:5.“E ui lava ina leai se amiotonu i totonu ia i tatou lava, o le agalelei ma le alofa tele o le Atua, ua tauia ai i tatou e peisea’ī o le amiotonu o se meatotino lea a i tatou. A uma loa ona tatou faia le lelei atoa lava e mafai ona tatou faia, o i tatou lava o auauna lē aogā. . . . O le mea ua tatou fa’ataunu’uina, e na o le alofa tunoa lava o Keriso ua mafai ai ona tatou faia, ma e leai se taui e tatau mo i tatou mai i le Atua ona o la tatou amiotonu.” – The Review and Herald, June 27, 1893.c. Ina ua uma le olega ina ia fa’autauta, aisea ua fa’amanatu mai ai e le aposetolo ia i tatou e fa’atatau i le fa’amasinoga o le a o’o mai? 1 Peteru 1:17; Kolose 3:5, 6.“O galuega a tagata ta’itasi uma lava e iloiloina i luma o le Atua ma e tusia fa’amauina mo le fa’amaoni poo le lē fa’amaoni fo’i. O tafatafa o igoa ta’itasi i totonu o tusi a le lagi o loo tusia ai ma le ma’oti mata’utia, upu sesē ta’itasi, o gaioiga fa’apito ta’itasi uma, o tiute ta’itasi uma e lē’i fa’ataunu’uina, ma agasala lilo ta’itasi uma, i fa’atinoga fa’afoliga taufa’asese uma. O lapata’iga poo a’oa’iga ta’itasi uma mai i le lagi e fa’atalalē i ai, o sekone e fa’ama’imauina, o avanoa e lē fa’aleleia atili, o le a’afiaga e tu’uina atu mo le lelei poo le leaga fo’i, fa’atasi ai ma ona i’uga e mamao lava ona o’oo’oga, o mea uma lava nei o loo tusia uma e le agelu o fa’amaumauga.” – The Great Controversy, p. 482.
4. TOE FA’ATAUINA MAI E KERISO Aso Lulu Aperila 17
a. O le a se mea ua aumaia e Peteru o se mafua’aga lelei lea, e lē gata ina aogā, ae o lo tatou tiute fo’i lo tatou faia o taumafaiga ina ia tatou manumalo mai i tu’inanauga ua mavae? 1 Peteru 1:4, 18, 19; 1 Korinito 6:18-20.“O tagata uma lava ua fa’atauina i lenei tau lē mafuatia. O le sasa’aina mai o le fale oa atoa o le lagi i lenei lalolagi, o le foa’iina mai ia i tatou o le lagi atoa e ala mai ia Keriso, ua fa’atauina ai e le Atua le loto, o lagona, o le mafaufau, ma le agaga, o tagata ta’itasi uma lava. Po’o i latou o ni tagata talitonu pe e lē talitonu fo’i, o tagata uma lava o meatotino ia a le Atua. O tagata uma ua vala’auina ina ia auauna mo Ia, ma, mo le uiga la ua latou fetaia’i ai ma lenei mana’oga, o tagata uma fo’i o le a mana’omia ina ia talatala atu se tala i le aso tele o le fa’amasinoga.” – Christ’s Object Lessons, p. 326.b. O anafea na fa’amausaliina ai le fuafuaga o le fa’aolataga? 2 Timoteo 1:8, 9.“Na silafia e le Atua mea e tutupu i le lumana’i, a’o le’i foafoaina le lalolagi. Na te lē’i faia Ana fuafuaga ina ia fa’afetaui ma mea e tutupu, peita’i na Ia fa’atagaina mea tutupu ina ia fa’aalia pea ma galuea’iina. Na te le’i galue ina ia aumaia ai se tulaga fa’apitoa o mea tutupu, peita’i na Ia silafia o se tulaga fa’apea o le a tula’i mai. O le fuafuaga e tatau ona fa’ataunu’uina i le liliu ese o so’o se tasi o agelu i tulaga maualuluga o le lagi – o le mea lilo lenei, o le mea lilo lea sa natia mai i tausaga o le vavau. Ma na saunia ai loa se taulaga ofo i fuafuaga e fa’avavau na te faia le galuega tonu lava lea ua faia e le Atua mo le aigā tagata pa’ū.” – The Signs of the Times, March 25, 1897.c. O fea e sau ai le fa’atuatua i le Atua? Roma 10:17; 1 Peteru 1:21.“E leai se tagata e mafai ona ia foafoaina le fa’atuatua. O le Agaga o lo o galue ma fa’amalamalamaina ai le mafaufau fa’aletagata, na te foafoaina le fa’atuatua i le Atua. I totonu o le Tusi Paia, o le fa’atuatua o loo fa’ailoaina mai e fa’apea, o le meaalofa lea a le Atua, e mamana e o’o atu ai i le fa’aolataga, e fa’amalamalamaina ai loto o i latou e sa’ili mo le upu moni e peisea’i o se oa natia. O le Agaga o le Atua na te fa’ama’otiina mai le upu moni i le loto. O le tala lelei o loo fa’aigoaina o le mana o le Atua e o’o atu ai i le fa’aolataga auā, e na o le Atua lava e mafai ona Ia faia le upu moni e avea o se mana e fa’apaiaina ai le loto.” – The SDA Bible Commentary [E. G. White Comments], vol. 7, p. 940.
5. O LE PALE O LE USITA’I Aso Tofi Aperila 18
a. Ina ua mavae ona aioi mai le aposetolo i le au talitonu ina ia tete’e atu i o tatou tu’inanauga ua mavae, o le a le sini ua ia tu’uina mai o le ituaiga usita’i silisili lea? 1 Peteru 1:22.“Na fa’aauau le fa’amatalaga a Peteru, ‘ia matuā outou alofa le tasi i le tasi i le loto mamā naunau.’ O le upu a le Atua – le upu moni – o le auala lea e fa’aalia ai e le Atua Lona Agaga ma Lona mana. O le usita’i i le upu e fanau mai ai fua o le amio lea e mana’omia – ‘o le alofa lē fa’atagā fai, lē fa’afoliga lea i le au uso.’ O lenei alofa e fanau mai i le lagi ma e ta’ita’ia atu ai i sini maualuluga ma gaioiga lē fa’apito.” – The Acts of the Apostles, p. 519.“‘Ua outou fa’amamā i o outou loto i le gaua’i i le upu moni e le Agaga ua i’u i le alofa fa’amaoni i le au uso.’ . . . O le a matuā tāua tele la, ia i latou uma lava e tauaveina le galuega, o i latou e asiasi i aiga ma tufa atu pepa o tusitusiga ma i latou e galulue i ofisa, lo latou fa’atumauina ma lo latou fa’atinoina ma le fa’amaoni o tapula’a e sili ona maualuga ma paia o le Upu a le Atua.” – The Publishing Ministry, p. 297.“Tatou te mana’omia ia teufatuina le alofa i totonu o ō tatou loto. E le tatau ona tatou sauni e manatu i mea leaga e fa’atatau i lo tatou au uso. E tatau ona matuā itiiti lava lo tatou fa’auigaina o mea latou te faia poo upu fo’i latou te tautala ai. E tatau ona avea i tatou ma kerisiano o le Tusi Paia. [1 Peteru 1:22]. . . .“E tatau ona tatou fesiligia le amio po’o uiga o ō tatou manatu ma lagona, o ō tatou lagona ita, sini, upu, ma gaioiga. . . . Se’ivagana ua tatou sa’ili ma le finafinau i le va’iliiliina o ō tatou loto i le malamalama o le Upu a le Atua, o le alofa o le tagata ia te ia lava, o le a fa’ailoa maia se manatu e matuā sili atu ona lelei e fa’atatau ia i tatou lava nai lo manatu e tatau ona tatou maua.:” – This Day With God, p. 83.“Ana fa’apea e lē o i ai ni mea e lē o atoatoa ai i tatou i o tatou lava olaga, semanu tatou tatou te lē masalosalo fua i lo tatou au uso. O le tagata lea o loo fa’asalaina o ia e lona lava malamalama’aga e iloa ai le lelei ma le leaga, lea e matuā naunau lava e fa’amasino. Ia gatete tagata ta’itasi uma ma ia fefe ia te ia lava. . . . ‘Ua outou fa’amamā i o outou loto i le gaua’i i le upu moni e le Agaga ua i’u i le alofa fa’amaoni i le au uso.’” – The Review and Herald, October 29, 1901.
FESILI TOE FA’AMANATU Aso Faraile Aperila 19
1. O le a le mea e tatau ona ou faia pe a ulufale mai se manatu agasala pe lē mamā i lo’u mafaufau?2. E fa’afia ona tatau ona ou su’esu’eina lo’u loto e fa’atatau i le natura o le mafua’aga o’u te faia ai se gaioiga?3. E fa’apefea ona mafai ona ou fausiaina a’e se lagona sili atu ona loloto o le amio mamā i lo’u olaga?4. O le a se mea e mafai ona sili atu le fausiaina a’e ai o lo’u agaga fa’afetai mo le tau na totogiina e Iesu mo a’u?5. O le a le moni o lo’u alofa i lo’u ‘au uso?