1. O SE ILOA E MANA’OMIA E TA’ITA’I TA’ITASI Ulua’i Aso Iuni 16

a. O anafea na avea ai le aposetolo o Peteru o se leoleo mamoe moni, ua sauni e leoleo mo agaga o isi? Mataio 26:75; Ioane 21:15-17; 1 Peteru 5:1 “Na fa’afitia e Peteru le Tagata o le fa’anoanoa. . . . Peita’i na ia salamō mulimuli ane ma na ia toe liua. Sa moni le loto momomo o lona agaga ma na ia toe tu’uina atu o ia i se tulaga fa’afouina i lona Fa’aola. . . . Na ia sauni loa i le taimi lena e alofa mutimutivale i le tagata fa’aosoosoina. Na fa’alotomaulaloina o ia, ma na mafai ona ia iloa lagona o tagata vaivai ma le sese. Na mafai ona ia fautua ma lapata’i i le tagata fa’afefeteina, ma na saunia atoa lava o ia e fa’amalosi i lona au uso.” – Testimonies for the Church, vol. 3, p. 416. b. E fa’apena fo’i, o le a le iloa ma le olaga e tatau ona maua e leoleo mamoe uma ma ta’ita’i uma lava o ekalesia i le taimi lenei? Ioane 3:1-3. “O Nikotemo na liua ona o le i’uga o lenei talanoaga. O upu a Keriso o loo fetalaia moni mai lava i peresitene o koneferenisi, toea’i’ina o ekalesia, ma i latou o loo i tofiga aloa’ia i a tatou fa’alapotopotoga fa’aletapua’iga, ‘E moni, e moni, Ou te fai atu ia te oe, Se’ivagana ua toe fanaufouina le tagata, e lē mafai ona va’ai o ia i le malō o le Atua.’” – Testimonies to Ministers, p. 369.“O le mana liua o le Atua e tatau ona o’o mai i luga o loto o faifeau, afai e leai, e tatau ona latou sa’ilia se isi a latou galuega. . . .“Se’iloga e avea faifeau ma tane liua, o le a mama’i fo’i ekalesia ma sauni e feoti.” – Evangelism, p. 643.

---

2. APOAPOA’I MA LE PULE Aso Gafua Iuni 17

a. O le a se mea e tatau ona manatunatu i ai le ekalesia a’o ia le’i filifilia se tagata i auaunaga, a’o le a fo’i le mea e tatau ona faia e le tagata a’o ia le’i taliaina le vala’au? 1 Peteru 5:2 (vaega muamua). “Ua fa’ailoa so’o mai e le Atua, e lē tatau ona lagolagoina tagata e o atu e galulue i laufanua o matagaluega e aunoa ma le fa’amaoniga-e-lē-mafai-ona-sese e iloa ai, ua Ia vala’auina i latou. O le a lē tu’uina atu e le Atua le avega mo Lana lafu i tagata ta’itasi e lē agava’a. O i latou e vala’auina e le Atua, e tatau ona avea o ni tane e matuā loloto lo latou iloa, ua tofotofoina ma ua fa’amaonia, o i latou o tane o filifiliga tonu, o tane o le a lē fefefe e a’oa’i le agasala i le agaga o le loto maulalo, o tane e malamalama i le auala e fafaga ai le lafu.” – Testimonies for the Church, vol. 1, p. 209.“O tagata ta’itasi uma lava e taliaina matafaioi e avea ai o ia o se fautua, o tagata ta’itasi uma lava o loo fautuaina tagata . . . o le a lē sili a’e lava lona poto se’ivagana ua matuā itiiti lava o ia i lana lava fua. . . . O lenei suiga e tatau ona tupu i totonu o tane ta’itasi uma lava, a’o ia le’i taliaina se tofiga e avea ai o ia o se ta’ita’i po’o se pule fo’i i le feso’ota’i atu i le galuega paia a le Atua.” – Testimonies to Ministers, pp. 370, 371. b. O le a le lamatiaga na lapata’ia ai e Peteru i latou o loo galulue i totonu o le tovine a le Atua? 1 Peteru 5:2 (vaega lona lua). “O le naunauta’iga ina ia pu’e mai totogi tetele, fa’atasi ai ma le finafinauga ina ia aveesea mai i isi a latou aiā na foa’i mai i le Atua, o loo i ai lona amataga i totonu o le mafaufau o Satani. . . . E itiiti lava se fa’atuatuaga e mafai ona tu’uina i luga o i latou ua maileia i lenei mailei, se’ivagana ua latou liua mae’ae’a ma toe fuata’iina.” – Ibid., p. 393.“O tane o loo i tofiga fa’amoemoeina, e tatau ona latou manatu i tupe ma meatotino o loo latou taulimaina, o mea ia a le Atua, ma e tatau ona fa’aaoga i se uiga fuafua lelei ma le fa’autauta, e aunoa ma se ma’imau . . . .“O le pule e fa’aaoga ma fa’aalu ai tupe a le Atua, e lē tatau ona tu’ua atu i le filifiliga a so’o se tagata e to’atasi. E tatau ona aumai le tala o le tupe mo talā ta’itasi uma e fa’aaluina. O meatotino a le Atua e tatau ona fa’aa,oga i taimi fetaui ma nofoaga sa’o.” – Medical Ministry, p. 165. c. E ui lava o le galuega mo le Atua e lē o se galuega e telē lona totogi, o a manatunatuga e tatau ona faia e le ekalesia? 1 Timoteo 5:17, 18. “O tagata faigaluega uma i totonu o a tatou ekalesia, e tatau ona fetaui le taui na te maua. Afai e fetaui totogi e maua e le au faigaluega, latou te maua fo’i le loto fa’amalieina e foa’i ai tupe i le galuega. E lē sa’o le mauaina e nisi o se totogi telē lava, a’o isi, o ē o loo faia galuega tatau, tāua, ma o loo faia ma le fa’amaoni, e itiiti lava totogi o loo latou mauaina.” – The Publishing Ministry, p. 239.

---

3. O SE UIGA SILI ATU ONA LOTO MAULALO O LOO MANA’OMIA Aso Lua Iuni 18

a. O le a le mafua’aga autu o fa’afitauli i le lotolotoi o le au uso o loo i tofiga o matafaioi tāua? 1 Peteru 5:3; 3 Ioane 9. “O le agaga o le fia pule ua o’o atu i peresitene o a tatou koneferenisi. Afai o loo mautinoa e se tagata ona lava malosi, ma sa’ili ai e fa’atino lana pule i luga o lona au uso, ma ia manatu ai fa’apea, ua tu’uina atu ia te ia le pule na te faia ai lona manatu ma malosi e pule, e tasi lava le auala, ma e na o le pau lava lea o le auala saogalemu, o le aveesea lea o ia, ne’i tele le manu’a e faia ma fano ai lona lava agaga ma lamatia ai fo’i agaga o isi.” – Testimonies to Ministers, p. 362. b. O le a le olega ua tu’uina mai i ta’ita’i ma toea’ina uma lava o ekalesia (local), lea afai e mulimulita’ia, o le a taofia ai le fa’amaualuga ma se agaga o le fa’atāuaina e le tagata o ia lava i le lotolotoi o le au uso o loo i tofiga sili atu ona maualuluga? 1 Peteru 5:2 (vaega muamua); 1 Korinito 6:2-5. “Ua fa’ailoaina mai ia te a’u, o se mea sese le manatu fa’apea, o tane i tofiga o matafaioi fa’apitoa lava i Battle Creek, o loo ia i latou le poto e matuā sili atu ona maoa’e nai lo le poto o tagata lautele. . . .“E to’atele ua latou a’oa’oina i latou ina ia tusi pe fesili mai fo’i mo fautuaga, pe a aumaia i latou i nofoaga faigata. Peita’i o se mea sese mo i latou ua tu’uina i tofiga o matafaioi i a tatou ekalesia eseese, lo latou fa’alagolago i tane. . . . O se iloa vaivai, ma ma’i, o le a avea lea ma tofi o i latou e a’oa’oina ina ia fa’alagolago atoatoa i isi. . . .“E tatau ea ona manatu i tane o lo o i Battle Creek e fa’apea, e lē mafuatia lo latou poto?” – Ibid., pp. 374, 375.“Aua tou te va’ava’ai i tane o loo i tofiga maualuga o matafaioi, mo le malosi, auā o tane tonu lava ia o loo lamatia i le manatu e fa’atatau i se tofiga o matafaioi e fa’apea, o se fa’amaoniga lea o le mana fa’apitoa o le Atua. O a tatou ekalesia, o loo vaivai auā o tagatā ekalesia, ua a’oa’oina ina ia va’ava’ai atu, ma fa’alagolago atu i le au faigaluega fa’aletagata, ma e afe ma afe o talā ua fa’aaluina lē aogā, i le fela’ua’iina solo o tane e i ai le gata’aga o ō latou ola, mai i le tasi nofoaga aga’i atu i le isi nofoaga, ina ia latou fofōina fa’afitāuli laiti.” – Ibid., p. 380. c. O le a se mea o le a mafai ai e le au faigaluega e itiiti lo latou iloa, ona latou maua se malamalama’aga sili atu ona tele mo le fa’amanuiaina? Aumai se fa’ata’ita’iga o le mafua’aga o le to’ilalo ona o le lē maua o lenei malamalama’aga. 1 Peteru 5:5 (vaega muamua); 1 Tupu 12:6-8, 16; Luka 6:39. “O talavou e mafai ona latou tu’uina atu se a’afiaga malosi lava pe afai o le a latou lafoa’ia lo latou fa’amaualuga ma lo latou loto fa’apito, ma tu’u atu atoatoa i latou i le Atua.” – Testimonies for the Church, vol. 1, p. 485.“Ia fausiaina a’e e talavou se uiga e mafai ona a’oa’oina, ina ia mafai ona fa’amanuiaina i latou i taumafaiga a i latou o loo sa’ili e fesoasoani ia i latou.” – The Youth’s Instructor, August 31, 1893.

---

4. O LE FA’ATA’ITA’IGA A PETERU O LE LOTO MAULALO Aso Lulu Iuni 19

a. E fa’apefea ona tatou iloa o se liuaga moni e tasi po’o se iloa moni fo’i e tasi i le Ali’i, e lē lava lea mo se leoleo mamoe – po’o so’o se tagata talitonu lava? 2 Korinito 13:5; Eperu 3:13. “Ina ua asiasi atu Peteru i Anetioka, i se taimi mulimuli ane, na ia mauaina le fa’atuatuaga o le to’atele e ala i lana amio fa’autauta aga’i i tagata liua o nu’u ese. Mo sina taimi na ia gaioi e tusa ai ma le malamalama na tu’uina mai i le lagi. E o’o mai i le taimi lea, na ia fa’ato’ilaloina ai lona fa’ailoga tagata fa’alenatura e fa’apei o lona nofo fa’atasi i laulau ma tagata liua mai o nu’u ese. Peitai ina ua o mai nai i Ierusalema ni tagata Iutaia o ē sa vilivilita’i mo le tulafono fa’asauniga, na suia ai e Peteru ona uiga i se filifiliga lē poto ma le lē fa’autauta agai i tagata na liua mai i tapua’iga fa’apaupau. . . . O lenei fa’aaliga o le vaivai e i latou na fa’aaloalogia ma alofagia e avea ma ta’ita’i, na tu’ua ai se ata sili ona tigā i mafaufau o tagata talitonu o nu’u ese. Na lamatia le ekalesia i fevaevaea’iga.” – The Acts of the Apostles, pp. 197, 198. b. A aumaia e se sese poo se amio a se faifeau, tagata faigaluega o le Tusi Paia, poo se ta’ita’i fo’i o le ekalesia, le ita fa’aaliali poo le nunumi fo’i i totonu o le ekalesia, e fa’apefea ona tatau ona a’oa’iina i latou? Kalatia 2:14; 1 Timoteo 5:20. c. O a uiga e tatau ona uiga a’i se ta’ita’i ua liua, pe a a’oa’iina fa’aaliali o ia? 1 Peteru 5:5 (vaega lona lua), 6; Iakopo 5:16. “O Paulo, o lona iloaina o le a’afiaga e lamatia ai, o le sese ua faia i le ekalesia e ala i gaioiga e lua na fa’atinoina e Peteru, o lea na ia a’oa’iina fa’aaliali ai o ia mo lona natiaina fa’apena o ona manatu moni. I luma o le ekalesia, na fesiligia ai Peteru e Paulo. . . .“Na iloa e Peteru le sese na ia pa’ū atu i ai, ma faia loa i le taimi lava lena le fa’asa’oina o le sesē ua faia, i le malosi na ia mafai ai. O le Atua, o Lē na te silafia le i’uga mai i le amataga, na Ia fa’atagaina Peteru na te fa’aalia lenei vaivaiga o le amio, ina ia iloa ai e le aposetolo tofotofoina, e lē’i i ai lava se mea i totonu ia te ia lava na mafai ona ia gugutu ai. E o’o lava i tane e sili ona lelei, a tu’ua i latou ia i latou lava, o le a latou sese i filifiliga. . . .“O le tala’aga o lenei liliu ese mai i tapula’a sa’o, o loo tula’i e avea o se lapata’iga mata’utia i tane o loo i tofiga fa’amoemoeina i le galuega a le Atua. . . . O le sili atu o le telē o matafaioi e tu’uina i luga o le mea faigaluega fa’aletagata, ma o le sili atu o le telē o ona avanoa e fa’atonu atu ai ma pulea, o le sili atu fo’i lena o le manu’a e mautinoa lava o le a ia faia.” – Ibid., pp. 198, 199.

---

5. FA’AMALOSIGA MO LE AUFAIGALUEGA VAIVAI Aso Tofi Iuni 20

a. O le a se mea e masani ona avea ma mafua’aga o le fa’avaivai i le olaga o se tagata faigaluega o le tala lelei? 1 Peteru 5:5 (vaega mulimuli). “O loo matuā tele lava a tatou faifeau ma’ale’ale e matuā vaivai lava lo latou iloa, e lē o ia i latou alofa tunoa fa’akerisiano, e lē o ia i latou le loto tu’u atu atoatoa i le Atua, ma e faigofie lava ona fa’avaivai. . . . O tane o loo mana’omia i le galuega lenei, o tane ia o le a lē muimui pe faitio fo’i i faigatā poo tofotofoga fo’i, mā latou te iloa o se vaega lea o le tofi ua tu’ua mai e Iesu ia i latou. E tatau ona latou naunau e o atu i fafo atu o le to’agalauapi ma puapuagatia ai i faitioga ma tauaveina avega e fa’apei o fitafita lelei a Keriso.” – Testimonies for the Church, vol. 3, p. 423. b. A taumafai Satani e fa’avaivaia so’o se tasi o i tatou e ala i lona fa’ailoa mai o fa’afitauli i totonu o le ekalesia, o le a le folafolaga e tatau ona tatou pipi’i atu i ai? 1 Peteru 5:4, 7. “Aua ne’i tatou fa’atagaina se mea e tasi lava e taofia mai ai i tatou mai i lo tatou ofoina atu o ō tatou mana’oga i le suafa o Iesu, ma tatou talitonu ai ma le fa’atuatua mausali, ua fa’afofoga mai le Atua ia i tatou, ma o le a Ia tali mai ia i tatou. Ia tatou aveina atu o tatou fa’afitauli i le Atua, ma tatou fa’amaulaloina i tatou lava i Ona luma. O loo i ai le galuega tele lava e tatau ona faia; ma a’o ia i tatou le avanoa sili ona taua tatou te fefautuaa’i ai, e tatau ona tatou matuā mautinoa, i mataupu ta’itasi uma lava, ina ia tatou fautua fa’atasi ma le Atua, auā o le a Ia lē ta’ita’iseseina lava i tatou. E lē tatau ona tatou faia le tagata ma o tatou malosi. Afai tatou te faia fa’apena, . . . o le lē talitonu o le a sau fa’alilolilo i totonu, ma o le a oti ai loa lo tatou fa’atuatua.” – Testimonies to Ministers, p. 487.“O le agaga o le leoleo mamoe moni, o le agaga lea o le fa’agaloina e ia o ia lava. Ua galo ia te ia, ia lava ina ia mafai ai ona ia galuea’iina galuega a le Atua. . . . O le galulue fa’atasi ma le Atua silisiliese o Lē na te tauaveina avega, Na te tofusia ai i o latou puapuaga, ma Ia fa’amafanafanaina ai o latou fa’anoanoaga, ma fa’amalie o latou agaga fia ‘aai, ma manumaloina mai o latou loto i le Atua.” – The Acts of the Apostles, p. 527.

FESILI TOE FA’AMANATU Aso Faraile Iuni 21

1. O anafea le taimi mulimuli na ou tagi ai i o’u tulivae i aao o Iesu? 2. Ou te manatu ea i nisi o taimi e fa’apea, afai ou te maua se tofiga sili atu ona maualuga, ona mafai lea ona ou faia mea e sili atu mo le Ali’i” 3. Aisea e lē tatau ai ona ulufale mai i lo’u mafaufau, le sini mo se tofiga e sili atu ona maualuga i totonu o le ekalesia? 4. O le a lo’u uiga aga’i ia i latou e fa’ailoaina mai o’u sese? 5. O ai ou te manatu e agasala mo o’u taimi ou te fa’avaivai ai?