Sapati, Me 4, 2024 O lo o tula’i le lagi i le to’asa tele i le fa’atalalē o loo fa’ailoa atu i agaga o tagata. O le a tatou iloa ea le finagalo o Keriso e fa’atatau i lenei uiga? O le a le lagona o le a o’o i le tamā ma le tinā, pe ana fa’apea la te iloa o le la tama, lea ua leiloa i le malūlū ma le timu aisa, ua lē amanaiaina, ma ua tu’ua ina ia fano, e i latou sa ono mafai ona lavea’iina o ia?” – The Desire of Ages, p. 825. A tatou tautala fa’ale-agaga, o ai nei fanau “o loo leiloa i le malūlū ma le timu aisa”? “E miliona ma miliona tagata o loo sauni e fano, o loo fusifusia i filifili o le lē malamalama ma le agasala, latou te lē’i fa’alogo lava e fa’atatau i le alofa o Keriso mo i latou. Ana fa’apea e fesuia’i o tatou tulaga ma i latou, o le a se mea o le a tatou manana’o latou te faia mo i tatou? O mea uma lava la nei, i le lautele e mafai ai e lo tatou malosi ona tatou faia ai, ua tatou i lalo o le matafaioi sili ona tāua, ina ia tatou faia mo i latou.” – Ibid., p. 640. “O so’o se mea lava e tatau ona susulu atu i ai le malamalama o le upu moni, ina ia fafaguina ma ia liua loto ia o loo momoe i le lē malamalama. I atunu’u uma lava ma aai uma lava e tatau ona folafolaina ai le tala lelei.” – Evangelism, p. 19. E fa’apefea la ona latou vala’au atu ia te Ia o Lē latou te lē’i talitonu i ai? ae e fa’apefea fo’i ona latou talitonu ia te Ia o Lē latou te lē’i fa’alogo lava i ai? ae e fa’apefea ona latou fa’alogo e aunoa ma se tagata e tala’i atu ia i latou? Ma o le a fa’apefea ona latou tala’i atu pe afai e lē auina atu i latou?” (Roma 10:14, 15, vaega muamua). “O le tala’iga e tu’uina atu i le lalolagi atoa, ua mana’omia i le taimi lenei, manū o mātala pea faitoto’a. E moni lava, o le itula lenei e mafai moni ai lava ona tatou toe tautalagia upu a Iesu: “E tatau ona ou faia galuega a Lē na auina mai a’u, manū o ao: auā e sau le po, e lē toe mafai ai ona galue se tasi. A’o o’u i ai i le lalolagi, o A’u o le malamalama o le lalolagi” (Ioane 9:4, 5). “E lē o tagata uma e mafai ona o atu i nofoaga uma lava e mana’omia e o’o atu i ai le feau i luga o lenei paneta pogisa. Peita’i o le aveina atu o lenei feau, e i ai lona tau e manaomia mai ia i tatou uma lava: O le Taimi, mafaufau naunauta’i fa’autauta, malosi, ma tupe e tatau ona foa’iina ma le loto i lenei galuega se’ia o’o ina fa’amalamalamaina le lalolagi atoa lava i le pupula o le Atua. O lou loto foa’i fa’amaoni i galuega i le lalolagi atoa e mafai ona faia ai se suiga tele lava! O lo Outou Au Uso mai i le Koneferenisi Aoao