1. ALO ESE MAI I MEA E FETE’ENA’I MA LE AGAGA Ulua’i Aso Me 5

a. O le a le tasi o taua sili ona tāua ae e sili ona faigata mo tagata aumau ta’itasi? 1 Peteru 2:11; 1 Ioane 2:15, 16. “Na malamalama le aposetolo o Peteru i le feso’ota’iga i le va o le mafaufau ma le tino, ma si’itia a’e ai loa lona leo i lapata’iga i lona au uso: ‘Le au pelē, ou te aioi atu ia te outou o tagata ese ma ē aumau, ia outou fa’amamao mai i tu’inanauga o le tino, o mea ia e tau ma le agaga.’ E to’atele latou te manatu i lenei fuaiupu e fa’apea e na o tu’inanauga o le tino o loo fa’atatau atu i ai; peita’i e i ai lona uiga e sili atu ona lautele. E fa’asāina ai tu’inanauga leaga uma lava e fa’amanu’alia ai i le ‘ai, poo lagona fo’i. O tu’inanauga leaga uma lava o le ‘ai, e i’u ina avea ma tu’inanauga o loo tete’e atu i le agaga. O le fa’anaunauga o le ‘ai, na foa’iina mai ia i tatou mo se mafua’aga lelei, ae lē ina ia avea ai ma auauna a le oti, e ala i le fa’aleagaina, ma fa’apena ona pa’ū maulalo ifo ai i le avea ma ‘tu’inanau lea e fai taua atu i le agaga.’ . . .“O le malosi o le fa’aosoosoga ina ia tu’inanau sa’oloto i le ‘ai, e na o le tiga lē mafa’amatalaina lava o lo tatou Fa’aola i lena anapogi umi i le vao, e mafai ona fuaina ai. Na Ia silafia o le so’ona fa’amalieina o le tu’inanau fa’aleagaina o le ‘ai, o le a matuā fasiotia ai le va’ai fa’aleagaga a le tagata, ma o le a lē mafai ai ona iloa mea paia. . . . Afai na matuā malosi lava le tu’inanau sa’oloto i le ‘ai i luga o le aiga tagata, o le auala la e talepeina ai lona malosi, o le Alo o le Atua, na Ia onosa’ia se anapogi e toeitiiti lava a atoa le ono vaiaso mo le tagata, oka se galuega o lo o i luma o le kerisiano! Peitai, tusa lava poo le a le tele o le tauiviga, e mafai ona ia manumalo. O le fesoasoani a lena mana fa’alelagi . . . o ia fo’i, e mafai ona ia manumalo atoatoa lava i lana tauiviga ma le agasala, ma ia paleina mulimuli ai loa le pale o le tagata manumalo i le malo o le Atua.” – Counsels on Diet and Foods, pp. 166, 167.

---

2. LAUGA E ALA ATU I GALUEGA LELEI Aso Gafua Me 6

a. Aisea e manatu ai i kerisiano moni uma lava fa’apea o i latou o ni tagata ese ma o ni fili fo’i o le lalolagi lenei? 1 Peteru 2:12; 1 Korinito 1:18, 23; 2:14. “I le lotolotoi o tagata Iutaia na fa’alogo i lauga a [Paulo], e to’atele na ono feita ona o le feau o le a ia folafolaina atu. I le fua a tagata Eleni, o ana upu, o upu fa’avalevalea ia. O le a manatu tagata o ia e vaivai lona mafaufau ona o lona taumafai e fa’ailoa mai le auala, na mafai ona feso’ota’i atu ai le maliu o Iesu i le si’itiaina i luga o le aigā tagata poo le fa’aolataga fo’i o tagata.“Peita’i, ia Paulo, o le maliu o Iesu o le sini e tasi lea na sili ona naunau i ai.” – The Acts of the Apostles, p. 245.“O le agaga o le lalolagi e lē o sili a’e lona loto gatasi ma le agaga o Keriso i le taimi lenei, nai lo ulua’i taimi, ma o i latou e laugaina le upu a le Atua i lona tulaga mamā , o le a lē sili a’e le fiafia e talileleia ai i latou i le taimi lenei, nai lo na aso. O foliga o itu tete’e i le upu moni atonu e suia, o le matau’a atonu e itiiti ifo le fa’aalia fa’alaua’iteleina ona e sili atu ona faia ma le poto taufa’asese; peitai o le ita lava lea e tasi, o loo i ai pea i le taimi lenei ma o le a fa’aalia pea e o’o i le i’uga o le taimi.” – The Great Controversy, p. 144. b. O le a se mea o loo fa’asino atu i ai Peteru o se auala sili lea i le laugaina o le Tala Lelei ma fetaia’i ai ma le “valea o tagata valea”? 1 Peteru 2:12, 15. “O a tatou faifeau ma a tatou faia’oga e tatau ona latou fa’ailoaina atu le alofa o le Atua i se lalolagi pa’ū. O loto liu suavai i le alofa, ia tautalagia atu ai upu o le upu moni. O i latou uma o loo i le sese ia a’oa’iina i le agamalu o Keriso. Afai e lē vave ona taofimauina le upu moni e i latou o loo ē galue i ai, auā e te tu’ua’i, aua e te faitio pe fa’asala. Manatua e tatau ona ē fa’atusaina atu Keriso i Lona agamalu ma lona agalelei ma Lona alofa. E tatau ona tatou iloa o le a tatou fetaia’i ma le lē talitonu ma tagata tete’e mai. O le upu moni sa tatau lava ona fetaia’i i taimi uma ma nei uiga. Peita’i e ui lava ina tatau ona ē fetaia’i ma itu tete’e mai e sili ona leaga, aua e te ta’uleagaina i latou o loo tete’e mai ia te oe. . . .“E tatau ona ē amio i le agamalu ia i latou o loo i le sese, auā e te le’i tauaso ea fo’i oe lava i se taimi e lē’i mamao atu i au agasala? Ma, talu ai ona o le onosa’i o Keriso ia te oe, e lē tatau ai ea ona ē agalelei ma onosa’i i isi? Ua tu’uina mai e le Atua ia i tatou le tele o apoapoa’iga ina ia tatou fa’aalia le agalelei tele lava ia i latou e tete’e mai ia i tatou, ne’i tatou liliueseina se agaga i le taula’iga sese.” – Testimonies for the Church, vol. 6, pp. 120, 121.

---

3. GAUA’I FA’AKERISIANO Aso Lua Me 7

a. Fa’amatala le uiga e tatau ona ia i tatou aga’i i pule fa’alemalō ma tulafono o le laueleele. 1 Peteru 2:13-17. “O le aposetolo na manino ona ia fa’ailoa mai le uiga o tagata talitonu e tatau ona latou fa’atumauina aga’i i pulega i tagata lautele: ‘Ia outou gaua’i atu i tofiga uma a tagata.’” – The Acts of the Apostles, p. 522. b. Aumai fa’ata’ita’iga o mea e tatau ona faia i taimi e fete’ena’i ai tulafono a le laueleele ma le tulafono a le Atua – ae poo le a fo’i le uiga tatou te uiga a’i. Galuega 5:29; Esoto 1:15-17; Tanielu 6:7-10, 21, 22. “Na ou va’aia o lo tatou tiute i mea uma lava e tutupu, lo tatou usita’i i tulafono a le laueleele, se’ivagana ua fete’ena’i ma le tulafono sili atu ona maualuga lea na fetalaia mai e le Atua i Lona si’ufofoga mai i Sinai.” – Testimonies for the Church, vol. 1, p. 361.“E lē o mana’omia i tatou ina ia tatou fouvale i pulega. O a tatou upu, pe tautalagia pe tusia fo’i, e tatau ona manatunatu i ai ma le fa’autauta, ne’i tatou foliga mai o loo tatou tete’e i tulafono ma le fa’atulaga lelei. E lē tatau ona tatou tautalagia pe faia fo’i so’o se mea o le a tapunia ai lo tatou ala i se tulaga lē tatau. E tatau ona tatou aga’i i luma i le Suafa o Keriso, ma lagolagoina ai upu moni ua tu’uina mai ia i tatou. Afai e fa’asāina i tatou e tagata ia aua ne’i tatou faia lenei galuega, ona mafai loa lea ona tatou tali atu, e fa’apei ona tautala atu ai le au aposetolo.” – The Acts of the Apostles, p. 69.“O le tagata ua tusia le tulafono a le Atua i totonu o lona loto, o le a ia usita’i i le Atua ae lē o tagata. . . . O le poto ma le pule a le tulafono a le Atua e matuā silisiliese lava.“Na fa’ailoaina mai ia te a’u, o tagata o le Atua, o Ana oa fa’apitoa, e lē mafai ona auai i lenei taua nunumi [The American Civil War, 1861-1865], auā e fete’ena’i ma tapula’a uma lava o lo latou fa’atuatua. I le ami, e lē mafai ona latou usita’i i le upu moni ma usita’i ai fo’i i mana’oga o ō latou ta’ita’i i le taimi lava lea e tasi. O le a fa’aauau le osofa’ia o le malosi fai filifiliga o le mafaufau.” – Testimonies for the Church, vol. 1, p. 361. c. Afai o i tatou o “auauna” i o tatou nofoaga o galuega, o a ituaiga tagata galulue e tatau ona i ai i tatou? 1 Peteru 2:18; Kolose 3:23. “O loo i ai le atamai i le galuega sili ona maulalo, ma afai o le a fa’apena ona manatu i ai tagata uma, o le a latou iloa le mamalu i galuega fa’apea.” – Fundamentals of Christian Education, p. 315.

---

4. PUAPUAGATIA ONA O MAFUA’AGA SESE Aso Lulu Me 8

a. O a uiga e tatau ona ia i tatou e fa’atatau ia i latou e sauāina, fai upu fa’atigā mai, inoino pe amuamu mai fo’i ia i tatou? 1 Peteru 2:19, 20; Roma 12:19-21. “E lē mafai ona tatou fa’atagaina o tatou agaga ia tigā ona o so’o se sese moni poo ni sese fo’i ua tatou manatu ua faia mai ia i tatou. O le tagata lava ia, o le fili lea e sili ona tatou mana’omia ia tatou fefefe i ai. E leai se ituaiga agasala e sili atu ona leaga sona a’afiaga i le amio, nai lo le a’afiaga o le lagona fa’aletagata e lē oi lalo o le puleaga a le Agaga Paia. E leai lava se isi manumalo e mafai ona tatou maua o le a matuā tāua lava e fa’apei o le manumalo e maua e le tagata ia te ia lava.“E lē tatau ona tatou fa’atagaina o tatou lagona ina ia manu’a gofie. E tatau ona tatou ola, e lē ina ia puipuia o tatou lagona po o ō tatou igoa, ae ia tatou ola ina ia lavea’i agaga. . . .Po’o a lava manatu o isi e fa’atatau ia i tatou poo ni mea fo’i latou te faia mai ia i tatou, e lē tatau ona fa’avevesiina ai lo tatou tasi ma Keriso. . . .“Aua e te taui atu. O le malosi atoa lava e mafai ona ē faia ai, ia ē aveesea mafuaaga uma lava mo malamalama’aga sese. Ia alo ese mai i le foliga o le agasala. Ia ē faia mea uma lava e te mafaia, e aunoa ma le fa’asatauroina ai o tapula’a, ina ia manumaloina mai ai isi. . . .“Afai e tautalagia mai upu lē onosa’i ia te oe, aua lava e te tali atu i le agaga lava lea e tasi.” – The Ministry of Healing, pp. 485, 486. b. Aisea e fa’atagaina ai i tatou e le Atua e puapuagatia i lima o tagata sauā ma le amioleaga? Mataio 5:11, 12, 43-48. “O le ta’ita’iga lilo lea e fa’atagaina ai tagata amiotonu e puapuagatia i sauāga i lima o tagata amioleaga, o loo avea lea ma mafuaaga o le nunumi tele, lē malamalama i le to’atele o tagata o loo vaivai i le fa’atuatua. O nisi ua sauni e lafoa’i ese lo latou talitonuga i le Atua, auā Na te fa’atagaina tagata sili ona amioleaga ina ia manuia, a’o tagata sili ona lelei ma sili ona amio mamā o loo puapuagatiaina ma fa’apologaina e lo latou malosi sauā. Ua fesiligia le fesili fa’apea, E fa’apefea ona fa’atagaina e Lē e amiotonu ma tumu i le alofa, ma e lē mafuatia Lona mana, nei faiga lē tonu ma sauaga fa’apea? O se fesili lea e leai sa tatou aiā i ai. Ua foa’i mai e le Atua ia i tatou fa’amaoniga atoatoa o Lona alofa, ma e lē tatau ona tatou masalosalo i Lona agalelei ona e lē mafai ona tatou malamalama i le galuea’iina o Lana ta’ita’iga. . . .“[O le Ali’i] Na te lē fa’agaloina pe fa’atalalē fo’i i Lana fanau; peita’i Na te fa’atagaina tagata amioleaga ina ia fa’aalia a latou amio moni, ina ia lē fa’aseseina ai so’o se tasi lava e fa’anaunau e faia Lona finagalo, e fa’atatau ia i latou. Ua toe fa’ailoa mai fo’i, o tagata amiotonu o loo tu’uina i totonu o le ogaumu o puapuaga, ina ia fa’amamāina ai i latou.” – The Great Controversy, pp. 47, 48.

---

5. MULIMULI I LE FA’AA’OA’O Aso Tofi Me 9

a. Ina ua uma ona fa’alototele mai Peteru i kerisiano ina ia latou fetaia’i ma le olioli ma puapuaga ma sauaga, o le a se mea ua ia aumaia o se finauga sili lea ona malosi e ao ai ona tatou faia fa’apea? 1 Peteru 2:21-24. “Na puapuagatia Iesu mo i tatou e sili atu nai lo le tulaga e mafai ona fa’apuapuagatiaina ai so’o se tasi o Ona so’o e ala i le sauā o tagata amioleaga. O i latou ua vala’auina ina ia onosa’ia sauaga ma le oti fa’amaturo, o loo latou mulimuli i la’asaga o le Alo pele o le Atua.” – The Great Controversy, p. 47. b. O le a se ata e fa’alototeleina ai ua aumaia e le aposetolo i le i’uga o ona manatunatuga i le auala e tatau ai ona tatou fetaia’i ma puapuaga? 1 Peteru 2:25; Ioane 10:11. “O Keriso o loo fa’atusalia mai o Ia o loo su’e, sa’ili, mo le mamoe na leiloa. O Lona alofa o loo si’omia ai i tatou, ma toe aumaia ai i tatou i totonu o le lafu mamoe. O Lona alofa e foa’iina mai ai ia i tatou le avanoa sili ona tāua o lo tatou nonofo fa’atasi ma Ia i nofoaga fa’alelagi.” – Testimonies for the Church, vol. 6, p. 479.“O a tatou tagata faigaluega – faifeau, faia’oga, foma’i, o fa’atonu – o i latou uma lava e mana’omia ina ia latou manatua ua ta’utinoina atu i latou e galulue fa’atasi ma Keriso. . . . E tatau ona latou teufatuina i taimi uma se lagona o le alofa o le Fa’aola, o Lona mana, o Lona mataala, ma Lona agalelei. E tatau ona latou va’ava’ai ia te Ia o le Leoleo mamoe ma le ulu o ō latou agaga. O le a latou maua loa le alofa mutimutivale ma le lagolago a agelu fa’alelagi. O Keriso o le a avea ma o latou olioliga ma o latou pale o le olioliga. O ō latou loto o le a pulea e le Agaga Paia, ma o le a ia i latou se iloa e fa’atatau i le upu moni lea e lē mafai lava ona maua e i latou e na ona igoa i le avea ma tagata talitonu.” – Counsels to Parents, Teachers, and Students, p. 284.

FESILI TOE FA’AMANATU Aso Faraile Me 10

1. E fa’apefea ona mafai ona lavea’iina a’u mai i le nofo pologa i le tu’inanau o le ‘ai ma lagona leaga? 2. O le a se mea o le a faia ai lo’u olaga o se molimau ola o le mana o le Tala Lelei? 3. O a nisi o auala e mafai ona sili atu ona ou fa’aalia ai le usita’i i pulega fa’alemalō? 4. A tu’ua’iseseina a’u pe e’ē mai fo’i se tasi ia te a’u, o le a la’u tali e tatau ona tali atu ai? 5. O le a se mea o le a ou naunau moni ai lava ina ia puapuagatia mo Iesu?