1. LOLOTO O LE ALOFA – O LE FA’AILO TELE LEA Ulua’i Aso Iuni 9

a. Ua fa’apefea ona fa’aleagaina e le agasala le loloto o lo tatou alofa? Kenese 3:12. “O le alofa, agaga fa’afetai, o le fa’amaoni i lo tatou Atua-foafoa – o uiga uma lava nei na fa’ato’ilaloina e le alofa o [Atamu] ia Eva. O Eva o se vaega o ia lava, ma na te lē’i mafai ona onosa’ia le manatu o le vavaeeseina o ia mai ia Eva [ina ua mavae ona ia aina le fua fa’asāina.] . . . O lea na ia filifili ai e oti fa’atasi ma Eva; afai o le a tatau ona ia oti, o le a ia oti fo’i fa’atasi ma ia. . . .“[Mulimuli ane, i luma o le Atua], e lē’i mafai ona te’ena e Atamu pe faia fo’i se alofaga mo lana agasala; peita’i e aunoa ma le fa’aalia o lona salamō, na ia taumafai ai e lafo atu le tu’ua’iga i luga o lana avā, ma luga fo’i o le Atua lava Ia.” – Patriarchs and Prophets, pp. 56, 57. b. O le a le auala e sili ona faigofie e iloa ai po’o a’u o se kerisiano moni? 1 Ioane 2:9; 4:20; Ioane 13:35. “O anapo na ou miti ai fa’apea, o se vaega itiiti o tagata sa fa’apotopoto fa’atasi ina ia faia se fa’atasiga fa’aletapua’iga. Sa i ai se tasi na sau i totonu ma nofo i se tulimanu pogisa, i le nofoaga o le a lē iloa atu ai o ia e le tele o tagata. E lē’i i ai se agaga o le sa’olotoga. O le Agaga o le Atua sa fusifusia. E i ai ni fa’amatalaga na faia. . . . Na manino mai e lē’i i ai le alofa o Iesu i totonu o loto o i latou na fai mai e talitonu i le upu moni, ma o le i’uga mautinoa, e lē’i fa’atasi mai le Agaga o Keriso. . . . O le fa’apotopotoina fa’atasi, e lē’i toe fa’amalosia ai se tasi.“Ina o le a fa’amutalia le fa’atasiga, na tula’i ai le tagata ese lea sa nofo i le tulimanu ma na ia fai atu ia i latou i se leo na tumu i le fa’anoanoa ma loimata, o loo matuā telē se mea lea latou te lē o maua i totonu o ō latou lava loto, i o latou lava olaga, o le alofa lea o Iesu.” – This Day With God, p. 157.

---

2. MALAMALAMA I LE TAPULA’A O LE ALOFA Aso Gafua Iuni 10

a. O le a le tapula’a o loo fausia ai i luga le talitonuga o le alofa i lenei lalolagi? Luka 6:32-34. b. O le a le tapula’a o loo fausia ai i luga le alofa moni fa’aleAtua? Mataio 5:44, 45; Ioane 15:13; 1 Ioane 4:7-11. “O le alofa e sili atu nai lo se lagona oso, o se lagona. O le alofa o se tapula’a ola,galue lea. E lē ta’ita’ia e lagona, peita’i e ta’ita’ia e le malosi fai filifiliga o le loto. I totonu o le alofa lea o loo fa’amalamalamaina mai ai le filifiliga mausali a se mafaufau ua fa’amaulaloina ma agamalu, lea e taofi mau atu i le malosi o le Atua lē mafuatia, ma fa’apea atu, O le a ou auauna ia te Oe e o’o lava i le oti.” – The Signs of the Times, June 20, 1900.“Afai o le a sauni lava i taimi uma tagata uma lava o loo sa’ilia le malo o le Atua ma Lana amiotonu e galulue i galuega a Keriso, semanu o le a matuā sili atu ona faigofie le ala aga’i atu i le lagi! O fa’amanuiaga a le Atua o le a tafe mai i totonu o le agaga, ma o Ona vi’iga o le a i ai i ou laugutu i taimi uma lava. O le a ē auauna loa i le Atua mai i tapula’a. O ou lagona atonu o le a lē i ai i se natura olioli i taimi uma; o le a i ai taimi e fa’apaologia ai e ao pogisa le lautele o lou iloa; peita’i o le fa’amoemoe o le kerisiano, e lē fa’alagolago i le fa’avae oneone o lagona. O i latou e gaioi mai i tapula’a, o le a latou va’aia le mamalu o le Atua i tala atu o pogisa, ma latou malolo atu i luga o le upu mautinoa o le folafolaga. O le a lē fa’avaivaia i latou mai i lo latou fa’amamaluina o le Atua, tusa lava po’o le a le pogisa o le ala. O faigata ma tofotofoga o le a na ona foa’i atu ai ia i latou se avanoa e fa’ailoa ai le fa’amaoni o lo latou fa’atuatua ma lo latou alofa.” – The Review and Herald, October 20, 1910. c. Afai o i tatou ua uma ona papatisoina, o loo faigata pea ona tatou fa’amagalo, gaua’i, ma fa’ailoa atu le alofa ma le onosa’i, o le a le mea o loo tatou misia? Roma 8:7-10; 1 Ioane 4:8. “O le fa’apaiaina moni lava e fa’atasia atu ai tagata talitonu ia Keriso ma le tasi i le isi i filifili o le agalelei. O lenei fa’atasiga e fa’atupulia ai le tafe atu o galu taumasuasua o le alofa fa’aKeriso i taimi uma lava i totonu o le loto, lea e toe tafe atu i le alofa o le tasi i le isi.“O uiga ia e aoga ona maua e tagata uma, o uiga ia na iloga ai le atoatoa o le amio a Keriso – o Lona alofa. . . .“O le fa’aseseēga tele lava ma sili ona mata’utia le manatu fa’apea, e mafai e se tagata ona maua le fa’atuatua e o’o atu ai i le ola e fa’avavau, e aunoa ma lona mauaina o le alofa fa’aKeriso mo lona au uso.” – The SDA Bible Commentary [E. G. White Comments], vol. 5, p. 1141.

---

3. O SE TAPULA’A E TATAU ONA A’OA’OINA Aso Lua Iuni 11

a. O le a le tapula’a paia ua ofo mai e Peteru ia tatou a’oa’oina ma fa’atino i o tatou olaga i aso ta’itasi? 1 Peteru 4:8 (vaega muamua); 1:22. b. O le a le uiga o le a “ufiufi ai agasala e tele” e le alofa”? 1 Peteru 4:8 (vaega mulimuli) fa’atusatusa i le Fa’ata’oto 17:9; Iakopo 5:19, 20. “Afai e te manatu ua fa’amanu’alia oe e lou uso poo lou tuagane, alu ia te ia i le agalelei ma le alofa, ma e mafai ona lua taunu’u i se malamalama’aga ma le toe fa’aleleiga. A ē a’oa’i i le tagata sese, ia ē manatua i taimi uma lava o loo ē faia ia Keriso e ala atu i Lana au paia. Alu i lou uso lea ua ē manatu o loo sese, ma talanoa i le alofa na o oe lava ma ia; afai e fa’amanuiaina oe i le fofōina o le fa’afitauli, ua ē maua mai lou uso e aunoa ma lou fa’aalia o ona vaivaiga, ma o le maliega i le va o oulua, o le ufiufi lea o agasala e tele mai i mata fia iloa o isi o loo mata’itū mai. O isi tagata latou te lē mana’omia lo latou iloa fua o ou fa’afitauli, ma e fa’apena ona mataala ai ina ia va’ava’ai ma le masalosalo i mea uma lava, atonu e faia e lē o loo ē manatu o loo sese, ma faia ai loa se fausaga sese o fa’amatalaga i ana sini.” – The Review and Herald, February 24, 1891.“O loo a’oa’o manino mai lava le Tusi Paia, o tagata sese e tatau ona fautuaina ma le onosa’i ma manatunatuga lelei. Afai e mulimulita’ia le ala sa’o, o le loto lea e foliga mai e ma’a’a e mafai ona manumaloina mai ia Keriso. O le alofa o Iesu e ufitia ai agasala e tele. O lona alofa tunoa e lē ta’ita’ia atu ai lava i le fa’aalia o sese o se isi tagata se’ivagana o se mea e tatau ona fai.” – Counsels to Parents, Teachers, and Students, p. 267.“ ‘Ia muamua i mea uma ona maua e outou o le alofa naunau o le tasi i le tasi’ o le tusi lea a le aposetolo. (1 Peteru 4:8). Aua e te fa’alogo i ripoti e fa’aleaga ai se uso po’o se tuafafine. Ia ē matuā fa’aeteete lava i lou taliaina o se ripoti e fa’aleaga ai lou tuaoi. Fesili i lē o loo aumaia le tu’ua’iga po ua ia usita’i i le Upu a le Atua e fa’atatau i lenei mataupu. Ua tu’ua mai e Keriso fa’atonuga manino i le mea e tatau ona faia. Alu i lou uso ma ta’u atu ia te ia lona sese tau o ia lava ma oe. Aua le faia sou alofaga mai i lenei fa’atonuga, i lou fai mai, E leai sa’u faitioga i le va o a’u ma lē o loo tu’ua’ia. O tulafono ua tu’uina mai e Keriso e matuā ma’oti lava, e matuā manino lava, o lea, o lenei alofaga e lē tusa ma le tulafono.“Pe i ai, pe leai fo’i sau faitioga i le va o oe ma lē ua tu’ua’iina, o loo tumau pea le fa’atonuga lava lea e tasi a Keriso. O lou uso o loo ia mana’omia le fesoasoani. Ta’u atu ia te ia, ae aua le ta’uina i se isi tagata, e fa’apea, o loo fa’ata’amiloina solo ripoti e fa’atatau ia te ia. Tu’u atu ia te ia le avanoa na te fa’amaninoina mai ai.” – In Heavenly Places, p. 292.

---

4. O SE FUA AOGA O LE ALOFA Aso Lulu Iuni 12

a. O le a le uiga lelei o le amio o loo fa’asino atu i ai Peteru o se fa’ailoga lelei lea, o le alofa o le Atua o loo nofo i totonu o le loto? 1 Peteru 4:9. b. Aisea ua avea ai le uiga tali malō o se uiga sili ona tāua fa’akerisiano? Eperu 13:2; Roma 12:13. “E o’o lava i le lotolotoi o i latou e ta’utino mai o i latou o kerisiano, e itiiti lava si uiga tali malō o loo fa’atinoina ai. I le lotolotoi o ō tatou lava tagata, o le avanoa o le fa’ailoaina mai o le agalelei, e lē o manatu i ai i le tulaga e tatau ona i ai, o se avanoa sili lea ona tāua ma o se fa’amanuiaga fo’i. O loo matuā itiiti lava le uiga fa’afeiloa’i atu i isi, matuā itiiti lava le naunauta’iga ina ia faia se avanoa mo le to’a lua pe to’a tolu fo’i i le laulau ‘ai a le aiga, e aunoa ma le fa’alumaina ai po’o le fa’alialia ai fo’i. O nisi latou te aioi mai e fa’apea, ‘e faigatā tele lea tulaga.’ . . .“E lē o fiafia le finagalo o le Atua i le naunauta’iga fa’apito lea e masani lava ona fa’aalia mo ‘a’u ma lo’u aiga.’ O aiga ta’itasi uma lava e teufatuina lenei agaga, e mana’omia ina ia liua e ala i tapula’a mamā ua fa’ata’ita’ia mai i le soifuaga o Keriso. O i latou e tapunia ese i latou i totonu ia i latou lava, o loo lē manana’o e tali leleia tagata asiasi mai, latou te lē maua le tele o fa’amanuiaga.” – Testimonies for the Church, vol. 6, pp. 343, 344.Ou te iloa tagata e maualuga lava a latou ta’utinoga, o ō latou loto o lo o matuā punitia lava i le alofa o le tagata ia te ia lava ma le loto fa’apito. . . . O ō latou olaga atoa lava o loo latou manatunatu ai ma ola mo na o i latou lava. O le fa’asatauroina o i latou lava ina ia faia ai se mea lelei mo isi, o le fa’amativaina o i latou ina ia fesoasoani ai i isi, e lē fa’atagaina lea e i latou. . . . O i latou lava o lo latou tupua lea. O vaiaso tāua lava, masina, ma tausaga o loo mavae atu e fa’avavau, peita’i e leai ni o latou fa’amaumauga i le lagi o ni galuega agalelei, o le fa’asatauroina mo le lelei o isi, o le fafagaina o ē fia ‘aai, fa’aofuina o ē e lē lavalava, poo le aumaia fo’i o tagata ese i totonu o ō latou fale.” – Ibid., vol. 2, p. 26. c. O le a le “uiga tali malō” sese, o loo fa’atinoina e le to’atele o aiga kerisiano? Iopu 1:4; 2 Tupu 20:13-15. “O le fa’afitia o Keriso le faia o sauniuniga mo tagata asiasi mai e mana’omia ai le taimi lea e patino tonu lava i le Atua. . . .“O popolega ma avega lē mana’omia, ua foafoaina e le fa’anaunauga ina ia faia se fa’alialiaga i le taliina o malō. O le auala e saunia ai se vaega eseese tele lava o meaai mo le laulau, ua ova ai le galue a le avā; talu ai ona o le tele o meaai eseese ua saunia, ua so’ona a’ai ai mālō; ma o fa’ama’i ma mafatiaga, o i’uga ia mai i le so’ona galue ma le so’ona a’ai.” – Ibid., vol. 6, p. 343.

---

5. AUAUNAGA MONI FA’AKERISIANO Aso Tofi Iuni 13

a. Ta’u mai se vaega e tasi o loo fa’aalia ai le alofa i le olaga o se kerisiano moni. 1 Peteru 4:10. “Ua filifilia mai e le Atua ia i tagata ta’ito’atasi uma lava lana galuega e tusa ai ma le mea e mafai ona ia faia. O le a’oa’oga ma fa’atinoga e tatau ona agava’a ai tagata ina ia fetaia’i ma so’o se mana’oga fa’afuase’i lava e ono tula’i mai; ma o fuafuaga poto e mana’omia, ina ia tu’uina ai tagata ta’itasi uma i lona tulaga fetaui, ina ia mafai ona ia maua ai se iloa o le a saunia ai o ia na te tauaveina matafaioi.” – Testimonies for the Church, vol. 9, pp. 221, 222.“O talavou e fa’apitoa ai lava, e tatau ona latou lagona, e tatau ona latou koleniina o latou mafaufau, ma fa’aaoga avanoa ta’itasi uma lava ina ia a’oa’oina i latou ia latou atamamai, ina ia mafai ai ona latou tu’uina atu auaunaga e taliaina e Ia, o Lē na foa’iina mai Lona soifua lē mafuatia mo i latou. . . . Ia fa’aleleia atili e i latou uma lava avanoa ia e alofagia ai o ia i le ta’ita’iga a le Atua, ina ‘ia ia maua le iloa uma lava e mafai ona maua i fa’aaliga po’o a’oa’oga fo’i. . . .“O taleni ta’itasi uma ua foa’iina mai i tagata, e tatau ona fa’aaogaina ina ia fa’atupula’ia ai lona tau, ma o le vaega uma la lea ua fa’aleleia atili, e tatau ona toe fa’afo’i atu i le Atua. Afai e leaga ou uiga, lou leo, o lau a’oa’oga, e te lē mana’omia e te nofonofo ai pea i lenei tulaga. E tatau ona ē taumafai i taimi uma lava ina ia ē ausia se tapula’a e sili atu ona maualuga, i a’oa’oga ma le iloa fa’aletapua’iga fo’i. . . . E lē foa’i mai e le Atua se auala e mafai ai ona maua e so’o se tagata se alofaga mo lona faia o galuega fa’atalalē lē fa’atulagaina lelei; peita’i o le tele lava o lenei ituaiga galuega, o loo ofoina atu ia te Ia e i latou o loo galulue i Lana galuega, peita’i e lē taliaina e Ia.” – Fundamentals of Christian Education, pp. 213-215. b. O le a le sini e tasi lava e tatau ona i ai mo a tatou auaunaga uma lava? 1 Peteru 4:11. Kolose 3:23.

FESILI TOE FA’AMANATU Aso Faraile Iuni 14

1. O le a le eseesega i le va o le alofa fa’alelagi ma le “alofa” fa’alelalolagi? 2. O le a le tapula’a o loo ta’oto i le fa’avae o le alofa fa’akerisiano? 3. E fa’apefea ona mafai ona ou fausiaina a’e masaniga sili atu ona lelei o le uiga tali mālō? 4. O a ituaiga auaunaga fa’akerisiano o le a lelei mo a’u ona ou fausiaina a’e? 5. E fa’apefea ona mafai ona ou fa’amautinoaina o la’u galuega e mo le Atua, ae lē o le faia ma le fa’atalalē lē fa’atulagaina lelei?