1. O SE MANATU E FA’ALOTOTELEINA AI E FA’AVAVAU Ulua’i Aso Iuni 2

a. O le a se mea ua fautua mai le aposetolo o Peteru ia i tatou ina ia tatou manatunatu i ai ina ia fa’amalosia ma fa’alototeleina ai i tatou pe a osofa’ia i tatou e fa’aosoosoga ma puapuaga eseese? 1 Peteru 4:1; Eperu 12:3. “E mafai ona tatou fa’amalosia lo tatou fa’atuatua ma fafaguina lo tatou alofa e ala i lo tatou o atu so’o i aao o Iesu, ma o iina tatou te manatunatu ai i lona fa’alumaina.” – Our High Calling, p. 361.“[1 Peteru 4:1] Ia tatou fesili fa’apea: O le a se mea o le a faia e lo tatou Fa’aola pe ana fa’apea o Ia o loo tutupu ai mea ia o loo tutupu ia i tatou? . . . O lenei fesili e taliina e le fa’ata’ita’iga a Keriso. Na Ia tu’ua lona tulaga fa’alēatua, tu’u ese Lona mamalu, fa’asatauro Ana oa, ma fa’aofuina Lona natura atua i le tino tagata, ina ia mafai ai ona Ia maua tagata i le tulaga sa latou i ai. O Lana fa’ata’ita’iga o loo fa’ailoa mai ai na Ia foa’i mai Lona soifua mo tagata agasala.” – Testimonies for the Church, vol. 4, p. 79.“O Keriso na fa’aosoosoina i mea uma lava e fa’apei ona fa’aosoosoina ai i tatou. O i latou o loo mafatia i lalo o tofotofoga ma fa’aosoosoga, ma ua latou manatu ua lafoa’ia i latou e a latou uo, ia latou manatunatu e fa’atatau ia Keriso. . . . i Lona nofo to’atasi i le vao, ma fetaia’i ai ma fa’aosoosoga e sili atu ona faigata nai lo so’o se fa’aosoosoga ua aumaia ia i latou. Aua ne’i latou fa’avaivai i le fa’anoanoa, a ia aapa atu se lima gatete o le fa’atuatua ina ia taofimauina le lima o loo fa’aloaloa mai e lavea’i. Ia latou lafo atu o latou agaga leai se fa’asoasoani i luga ia Iesu, o Lē, talu ai ona ua uma ona Ia uia lea lava fa’aosoosoga, o lea Na te silafia ai le auala e lavea’i ai i latou ua fa’aosoosoina.” – Manuscript Releases, vol. 21, p. 12.

---

2. E ALA ATU I PUAPUAGA E O’O ATU AI I LE MANUMALO Aso Gafua Iuni 3

a. Aisea e fa’atagaina ai e le Atua i tatou ina ia tatou ui atu i puapuaga ma tiga? 1 Peteru 4:1 (vaega mulimuli); 2 Korinito 12:7-10. “Ina ua fa’aalia e le Fa’aola Ia lava ia Paulo i ave pupula o Lona mamalu. . . . na fa’atauasoina ai mata fa’aletino o Paulo ona o le pupula o le fa’atasi mai o Lē na ia upu leaga i ai, peita’i na fa’apena ona faia ina ‘ia ia maua ai le va’ai fa’aleagaga, ina ia fafaguina ai o ia mai i le paiē lea na fa’anunumiina ma fasiotia ai lana va’ai fa’aleagaga.” – The SDA Bible Commentary [E. G. White Comments], vol. 6, p. 1058.“O le mata’u tele lava na fa’apologaina ai a’u, o le manatu lea, afai ou te usita’i i le valaa’u o tiute, ma ou alu atu ma fa’ailoa atu ua alofagia a’u e Lē Silisiliese i fa’aaliga mo tagata, atonu o le a ou gaua’i atu i le loto vi’i agasala, ma . . . aumaia ai i luga ia te a’u le to’asa o le Atua, ma fano ai lo’u lava agaga. . . .“O lenei na ou aioi atu afai e tatau ona ou alu ma fa’ailoa atu mea ua fa’ailoa mai e le Ali’i ia te a’u, ia tausia a’u mai i le fa’amaualuga lea e lē tatau ia te a’u. Na fai mai le agelu: ‘Ua fa’afofogaina au tatalo, ma o le a taliina mai. Afai e fa’amata’uina oe e lenei uiga leaga o loo ē fefe ai, o le aao o le Atua o le a fa’aloaloa atu e lavea’i ia te oe; e ala i puapuaga o le a Ia fa’alatalataina atu ai oe ia te Ia lava, ina ia fa’atumauina lou agamalu. Ave le feau ma le fa’amaoni; onosa’i seia o’o i le i’uga, ma o le a ē ‘ai i le fua o le la’au o le ola ma ē inu i le vai o le ola.’” – Christian Experience and Teachings of Ellen G. White, pp. 67, 68. b. E ui lava ina fa’aosoosoina e fa’anaunauga agasala o le tino, o le a le sini o kerisiano ta’itasi uma e tatau ona i ai? 1 Peteru 4:2, 15; Efeso 4:17, 22-24. “E sili atu le mea e mana’omia e le Atua mai i Ona so’o nai lo le tulaga o loo iloa ai e le to’atele. Afai o le a tatou lē manana’o e fausiaina o tatou fa’amoemoega o le lagi i luga o se fa’avae sese, e tatau ona tatou taliaina le Tusi Paia e fa’apei lava ona tatou faitau atu i ai, ma ia tatou talitonu o le a faia e le Ali’i le mea ua Ia fetalai mai ai. Na te lē mana’omia mai ia i tatou se mea e tasi lava o le a Ia lē foa’iina mai ia i tatou le alofa tunoa e fa’atino ai. O le a leai se tatou alofaga e tu’uina atu i le aso o le Atua pe afai tatou te lē ausia le tapula’a ua tu’uina mai i o tatou luma i totonu o Lana upu.” – Testimonies for the Church, vol. 5, p. 171.“O le liuaga o se galuega lea e lē fa’atāuaina e le tele o tagata. E lē o se mea itiiti le liuaina o se mafaufau fa’alelalolagi, fiafia i le agasala ma aumaia ai ina ia malamalama i le alofa lē mafa’amatalaina o Keriso. . . . A malamalama loa [le loto] i nei mea, ona ia va’aia loa lea o lona olaga i le taimi ua mavae ua ia inosia ma ita i ai. Ua inoino i le agasala. . . . Ua ia lafoa’ia ona fiafiaga ua mavae. Ua ia maua se mafaufau fou, lagona fou, o finafinauga fou e fiafia i ai, ma se loto fou.” – The Faith I Live By, p. 139.

---

3. O NI MASANIGA E TATAU ONA FA’ATO’ILALOINA Aso Lua Iuni 4

a. O a tu’inanauga agasala o loo ta’ua mai e Peteru o loo ta’atele ma faigata ona manumalo mai ai? 1 Peteru 4:3. Fa’atumulia i tu’inaunauga leaga lē mataofia o le tino: “O le tu’inanauga agasala ua fa’atinoina i lenei augatupulaga amio pepelo lē fa’amaoni, e lē tatau ona avea ma tapula’a mo so’o o Keriso. O nei fa’aaliga ta’atele ua a’e mai nei o le lē popoi lē fa’atuaoia, e lē tatau ona tula’i mai i le lotolotoi o kerisiano. . . . Afai o lagona o tu’inanauga leaga lē mataofia o le tino, olaga lē mamā o le fa’aleagaina o le tino, mulilua. . . afai o amioga nei o le taimi lenei i le lotolotoi o i latou e lē o iloa le upu moni, . . . o le a le tāua tele e tatau ona tula’i ai le vasega o loo ta’utino mai o i latou o so’o o Keriso. . . . i le eseesega manino mai i lena vasega o loo pulea e tu’inanauga fa’amanu!” – The Adventist Home, p. 329.So’ona Tu’inanau i le Uaina: “O le auala e tasi lava e mafai ona fa’amausalīina le saogalemu o so’o se tasi mai i le malosi o le lē faifa’atatau lelei, i le ‘ai, o lona lē fa’aaogaina atoa lava lea o le uaina, pia, ma vai inu malolosi. . . . O le tagata e manumalo lea o le a fa’amamaluina, ma o le a lē soloiesea lona igoa mai i le tusi o le ola.” – Child Guidance, pp. 401, 402.Fiafiaga, faigā’ai: “O kerisiano ia o loo fa’afoliga i a latou amio ma o latou olaga fa’aletapua’iga, o loo fa’aaogaina e le ti’apolo taufa’aosooso e fai ma ana mailei. O le vasega lenei e sauni i taimi uma lava mo fa’apotopotoga mo fiafiaga po’o ta’aloga fo’i, ma o lo latou a’afiaga e tosina i ai isi. O tane ma tama’ita’i talavou ia ua taumafai ia avea i latou ma kerisiano o le Tusi Paia, ua fa’atauanauina i latou ina ia fa’atasi atu i le pātī. . . . Latou te lē o iloa fa’aleagaga, o nei fiafiaga o faigā ‘ai moni lava nei a Satani, ua saunia ina ia taofia agaga mai i le. . . . mauaina o le ofu pa’epa’e o le amio, o le amiotonu lea a Keriso. Ua nunumi ai loa o latou mafaufau po’o le a le mea tonu mo i latou e tatau ona latou faia i le avea o i latou ma kerisiano.” – The Adventist Home, p. 518.“O le to’atele o tagata ua fa’aaogaina le toe fuata’iina o le soifua maloloina, ua latou lafoa’ia mea uma lava e fa’amanu’alia ai; peita’i o lona uiga la . . . e mafai ona latou aai i le tele o meaai latou te malilie ai? Latou te nonofo i lalo i le laulau . . . ma tu’uina atu i latou i le tu’inanau i le ‘ai ma matuā so’ona aai ai lava. . . .“Ma o le a le a’afiaga e faia e le so’ona ‘ai i le manava? Ua fa’avaivaia, ua fa’avaivaia totoga e lomiina ai meaai, ma o fa’ama’i, fa’atasi ai ma ona a’afiaga leaga uma lava, ua aumaia ona o le i’uga lea. . . .“Ua lē lelei lo latou fa’alogona, ma ua foliga mai ia i latou e matuā leaga lava a latou fanau. E lē mafai ona latou tautala lēmū atu ia i latou, pe gaioi to’a filemu fo’i i totonu o ō latou aiga e aunoa ma le alofa tunoa fa’apitoa. O i latou uma lava o loo i o latou itu uma, ua a’afia i le fa’ama’i o loo i luga ia i latou; o i latou uma fo’i e tatau ona puapuagatia ai i i’uga o ō latou ma’i. . . .“E o’o lava i tagata toe fuata’i o le soifua maloloina, e mafai ona latou sese i le telē o le meaai e aina.” – Counsels on Diet and Foods, pp. 135, 136.Ifogātupua inosia: “E le’i fa’atagaina i latou e liua atu i aganu’u ma masaniga a tagata fa’apaupau, po’o lo latou fa’atumauina fo’i o fa’atusa o a latou ifogā tupua inosia. Tusa lava po’o le a le fa’apelepeleina o le tupua, po’o le a le matagofie na’uā o le fausaga, po’o le tomai na faia a’i, o mea uma lava na patino i tapua’iga fa’apaupau, e tatau ona fa’aumatiaina.” – The Signs of the Times, January 13, 1881.

---

4. FA’APEI O KERISO I SO’O SE MEA I TAIMI UMA LAVA Aso Lulu Iuni 5

a. O le a le i’uga e masani lava ona tupu o le a tatou fetaia’i i lenei olaga, pe a tatou filifili tatou te ola e tusa ai ma le finagalo o le Atua? 1 Peteru 4:4, 12. “A’o latalata mai pea le taimi o le i’uga, . . . o le a fa’aaoga e Satani mea faigaluega fa’aletagata ina ia tauemu ma faifai ia i latou o loo ‘fausia le pa.’” – Prophets and Kings, p. 659.“O loimata [o tagata o le Atua] o le a latou lapata’iina ai tagata amio leaga i lo latou lamatiaga i lo latou solia o le tulafono a le Atua, ma o le fa’anoanoa lē mafa’amatalaina o le a latou fa’amaulaloina ai i latou lava i luma o le Alii i le salamō. O tagata amio leaga o le a latou fa’atauemu i lo latou fa’anoanoa ma ulagia a latou olega finafinau. Peita’i o le tiga fa’alemafaufau ma le fa’alumaina o tagata o le Atua, o se fa’amaoniga moni lea e iloa ai, ua latou toe maua lo latou malosi ma la latou amio fa’ale-Atua lea sa leiloa ona o le agasala.” – Ibid., p. 590. b. O le a se mea e tatau ona manatua e kerisiano uma lava a’o tauemua pe inosia fo’i i latou? 1 Peteru 4:5, 13-16; 2 Peteru 2:12. c. O le a le uiga e tatau ona ia i tatou pe a fa’amauoaina ē o loo tauemu mai ia i tatou – pe i ai fo’i se mea leaga e tupu ia i latou? A’o le a lo tatou uiga i tagata uma lava e fai mea leaga mai ia i tatou? 1 Peteru 4:17-19; Mataio 5:44. d. O le a se mea tatou te mana’omia ia teuina i ō tatou mafaufau e fa’atatau i tagata e tauemu ma inoino mai ia i tatou – ma e fa’apefea ona mafai ona tatou ausia lenei ituaiga mafaufau? 1 Peteru 4:6; Efeso 2:3-5; 2 Timoteo 2:24-26. “A ē fetaia’i ma i latou o ē . . . e lē fiafia i le upu moni, aua le fa’amalosia atu ou manatu uiga ese. Talanoa muamua ma i latou e fa’atatau i mataupu e mafai ona outou ioe uma i ai. To’otuli fa’atasi ma i latou i le tatalo. . . . O oe ma i latou o le a aumaia fa’atasi i se so’otaga vavalalata ma le lagi, o uiga lē fiafia i le upu moni o le a fa’avaivaia, ma o le a sili atu le faigofie ona aapa atu i le loto.” – Evangelism, p. 446.

---

5. MANATUA I MEA UMA LAVA E TUTUPU Aso Tofi Iuni 6

a. O le a se mea e tatau ona tatou manatua i taimi uma lava pe tatou te mauoa, maloloina ma fiafia, pe o tatou mama’i fo’i, fa’anoanoa, po ua aveesea atu fo’i meatotino mai ia i tatou? 1 Peteru 4:7. “Afai tatou te talanoa ma o tatou masalosaloga ma mea tatou te popole ai, pe tatou te taumafai fo’i e fofōina mea uma lava e lē o mafai ona tatou va’ai manino atu i ai, a’o le’i i ai ia i tatou le fa’atuatua, o le nunumi lē malamalama o le a na ona fa’atuputeleina ma sili atu ona loloto. Peita’i afai tatou te o mai i le Atua, ma lo tatou lagonaina o le leai o so tatou fesoasoani ma lo tatou fa’alagolago ia te Ia, e fa’apei o le tulaga moni lava o lo o i ai i tatou, ma o le fa’atuatua agamalu talitonu tatou te fa’ailoa atu ai o tatou mana’o ia te Ia o Lē e lē mafuatia Lona poto, Na te silafia mea uma lava i le foafoaga, ma Na te pulea mea uma lava i Lona finagalo ma Lana upu, Na te mafai, ma o le a Ia fa’afofoga mai i la tatou alaga, ma o le a Ia fa’asusuluina mai le malamalama i o tatou loto. E ala i le tatalo fa’amaoni e aumaia ai i tatou i le so’otaga ma le mafaufau o le Atua lē mafuatia. Atonu e lē o ia i tatou ni fa’amaoniga iloga i le taimi e silasila mai ai fofoga o lo tatou Fa’aola ia i tatou, i le agaga mutimutivale ma le alofa, peita’i o le tulaga moni lava lea o loo Ia faia. Atonu tatou te lē o lagonaina Lona pa’i mai i le va’aiga o mata, peita’i o Lona aao o loo i luga ia i tatou i le alofa ma le mutimutivale agalelei. . . .“O le finafinau i le tatalo, ua faia lea e avea ma aiaiga o le mauaina mai. E tatau ona tatalo i taimi uma pe afai tatou te manana’o tatou te tutupu a’e i le fa’atuatua ma le iloa. . . . Ua apoapoa’i mai Peteru i tagata talitonu ina ia ‘fa’autauta, ma ia mataala i le tatalo.’ 1 Peteru 4:7. . . . O le tatalo lē muta o le so’otaga lē muta lea a le loto ma le Atua, ina ia tafe mai ai le ola mai i le Atua i totonu o lo tatou ola; ma toe tafe atu ai i le Atua le olaga mamā ma le fa’apaiaina mai i o tatou olaga.” – Steps to Christ, pp. 96-98.“O upu a le aposetolo na tusia mo fa’atonuga mo le au talitonu i augatupulaga ta’itasi uma, ma e i ai lo latou tāua fa’apitoa lava mo i latou e ola i le taimi ‘e o’o mai ai le i’uga o mea uma.’ O ana apoapoa’iga ma lapata’iga, ma ana upu o le fa’atuatua ma le loto tele, o loo mana’omia e tagata ta’itasi uma lava.” – The Acts of the Apostles, p. 518.

FESILI TOE FA’AMANATU Aso Faraile Iuni 7

1. O fea e tatau ona ou “alu” i ai e ala i le fa’atuatua pe a fa’apuapuagatiaina a’u ma ou fa’anoanoa ai– ma aisea fo’i? 2. O le a le sini e mafua ai ona ta’ita’ia atu i tatou e le Atua ia ui atu i mafatiaga ma puapuaga? 3. O o’u nofo pologa pea ea i o’u tu’inanauga fa’alelalolagi ua mavae? Afai o le tali o le ioe, o le a le umi o loo o’u fuafua e fa’atuai ai lo’u gaua’i atoa atu? 4. O le a lo’u uiga e tatau ona i ai ia i latou e tauemu mai ia te a’u? 5. O le a se mea atonu o loo fa’alavelaveina ai a’u mai i lo’u mauaina o se olaga e matuā tumu i le tatalo e fa’apei o le tulaga e tatau ona ou maua?