1. O SE KERISIANO MONI UA FA’AMATALAINA Ulua’i Aso Me 19

a. O fa’apefea ona fa’aataina mai e Peteru se kerisiano moni? 1 Peteru 3:8. “O le aogā o le fa’aaloalo o loo matua itiiti lava lona fa’atāuaina. O le to’atele o i latou e agalelei o latou loto, e le o fa’apena le agalelei o ō latou uiga. O le to’atele o i latou e mauaina le fa’aaloalo e ala i lo latou loto fa’amaoni ma lo latou amiotonu, o se tulaga fa’anoanoa, latou te lē o mauainauiga tali mālō. O lo latou lē mauaina o lenei uiga ua fa’aleagaina ai lo latou lava fiafia ma fa’avaivaia ai i latou mai i la latou auaunaga i isi.” – Education, p. 240. b. O le a le uiga ese fa’a-Keriso o loo fa’amamafa fa’apitoa mai lava e Peteru? 1 Peteru 3:9; Mataio 5:44. “O tagata uma e tatau ona fa’aalia i ai uiga ua fa’aleleia ma le alofa, e fa’apei o atali’i ma afafine o le Atua.“O le fa’akerisiano o le a faia ai se tane e avea o se tane fa’aaloalo amio lelei. O Keriso sa fa'aaloalo, e o’o lava ia i latou na sauāina o Ia; ma o Ona so’o moni o le a latou fa’aalia le agaga lava lea e tasi.” – The Ministry of Healing,p. 489.“O lenei tapua’iga e a’oa’oina ai i tatou ina ia tatou fa’atinoina le onosa’i ma le umi-ona-puapuagatia, pe a aumaia i tatou i nofoaga o le a agaleagaina ai i tatou ma faia mai i ai uiga lē tonu. . . .“O loo mana’omia lava i taimi uma le onosa’i, agalelei, fa’afitia e le tagata o ia lava, ma le fa’asatauroina e le tagata o ona lava mana’o i le fa’atinoina o le tapua’iga fa’ale-Tusi Paia.” – God’s Amazing Grace, p. 248.

---

2. MATAALA I A TATOU UPU Aso Gafua Me 20

a. O le a le tapula’a tāua na toe fa’amamafaina mai e Peteru o le aiaiga lea o se olaga fiafia iinei, ma le olaga oi lumana’i? Salamo 34:12, 13; 1 Peteru 3:10. “O Satani o loo galue i totonu o ekalesia ta’itasi uma lava ina ia fa’aleaga le lafu a le Atua. . . . Ua fa’atonuina a’u ina ia ou fai atu i tagata ta’itasi uma o loo fai mai o ia o le so’o o Keriso, ‘Ia ē taofi i lou laulaufaiva mai i le leaga, ma ou laugutu, ina ia lē tautala i se upu leaga.’ E ala i le fa’amaualugaina e le tagata o ia lava, e galue ai Satani ina ia fa’afanoina le tagata, ma o lana galuega e mafai ona va’aia i totonu o ekalesia ta’itasi uma lava. O’u tuaganē ma o’u uso, ia outou matuā leoleo ma’oti lava i ō outou agaga. Ia puipui i au upu, ne’i ta’ita’ia oe e Satani ina ia toe fa’aluaina lona lava tala’aga.” – The Upward Look, p. 114. b. Aumai fa’ata’ita’iga o tagata na solia lenei tapula’a, ma na fa’apefea fo’i ona osofia ai le mā ma le fa’alumaina, aemaise ai lava mo lē na tautalagia ia upu. 1 Samuelu 14:24-27, 43-45; Eseta 6:6-10. “Aua lava ne’i alu atu mai i ou laugutu se upu e tasi o le lē onosa’i, lē fa’amagalo, poo le ita fo’i. O le alofa tunoa o Keriso o loo fa’atali mai mo lou ole atu. O Lona Agaga o le a pulea lou loto ma lou mafaufau, ma pulea ai au upu ma au gaioiga. Aua lava e te lafoa’ia lou fa’aaloalo o oe ia te oe lava e ala i upu fa’ata’alise, lē manatunatu lelei i ai. Ia mautinoa o loo mamā au upu, ma paia lau talanoaga.” – Child Guidance, p. 219. c. O le a fa’apefea ona taofia le to’atele mai i le foa’iina atu i ai o le ola e fa’avavau ona o le solia o lenei tapula’a? 1 Peteru 3:10 (vaega mulimuli) fa’atusatusa atu i le Fa’aaliga 14:5; 21:27. “A feiloa’i fa’atasi nei tagata inu ti ma inu kofe mo le fa’afiafiaina o i latou, . . . ona sa’oloto lea o ō latou laulaufaiva, ma latou amatalia ai loa le galuega leaga o le talanoa e fa’atatau i isi. O a latou upu e lē itiiti pe filifilia lelei fo’i. O tala manaia o muimuiga ua pasi solo atu, o le tele lava o taimi o le vai ‘ona fo’i lea o tala sese ma le lē moni, e fa’ata’uvaleaina ma fa’aosofia ai le ita o tagata lautele i lē o loo muimuiina. O nei tagata muimui lē manatunatu lelei, e galo ia i latou o loo i ai lē o loo molimauina a latou muimuiga. O Lē e lē o va’aia o loo tusia a latou upu i totonu o tusi a le lagi. O nei faitioga agaleaga uma, o nei ripoti so’ona fa’atelēina, o nei lagona matau’a loto leaga, lea na fa’ailoaina i lalo o le lagona osofia e le ipu ti, ua tusia e Iesu e peisea’i ua faia atu ia te Ia lava.” – Counsels on Diet and Foods, p. 423.

---

3. SA’ILIA O LE FILEMU Aso Lua Me 21

a. O a isi tapula’a tāua o le olaga kerisiano ua fa’amanatu mai e Peteru ia i tatou? 1 Peteru 3:11; Isaia 1:16, 17. b. E fa’apefea ona mafai ona tatou “alo ese mai i le leaga ma faia le lelei”? Ieremia 13:23 fa’atusatusa i le 1 Korinito 6:9-11; Ioane 3:5; Iakopo 4:7. “[O i latou o loo tusi atu i ai le aposetolo o Paulo] e tatau ona latou fa’aalia i o latou olaga le suiga ofoofogia ua faia i totonu ia i latou e le alofa tunoa e liua ai, o Keriso. . . . E le’i mafai ona latou suia o latou lava loto. Ma ina ua ta’ita’ieseina tagata mai i le itu a Satani ina ia latou tula’i mo Keriso, e ala i a latou taumafaiga, e lē’i tatau ona latou aveina le vi’iga mo le liuaga ua galuea’iina. . . .“O le mana o le Atua o le vaega e tasi lea o le agava’a i le galuega tele o le mauaina o le manumalo i le lalolagi, i le tino, ma le ti’apolo. . . . E leai se mea e mafai ona fa’ataunu’uina e le tagata e aunoa ma le Atua, ma ua fa’atulagaina e le Atua Ana fuafuaga ina ia aua lava ne’i fa’ataunu’uina se mea e tasi i le toe fanaufouina o le aigā tagata, e aunoa ma le galulue fa’atasi o le tagata ma le Atua. O le vaega ua mana’omia e faia e le tagata e matuā itiiti lava lona lē mafuatia, peita’i i le fuafuaga a le Atua o le vaega tonu lava lena o loo mana’omia ina ia fa’amanuiaina ai le galuega.“O le suiga tele lea ua va’aia i le olaga o se tagata agasala ina ua mavae ona liua, e lē o faia e so’o se uiga lelei fa’aletagata.” – God’s Amazing Grace, p. 319. c. O le a le fa’amoemoe ma le folafolaga ua tu’uina mai ia i latou ua gaua’iina atu i latou lava i le mana-e-liua-ai, o le Tala Lelei, peita’i o loo fa’ato’ilaloina pea i latou e fa’aosoosoga eseese? 1 Peteru 3:12; Ioane 14:13, 14. “O le fa’atuatua ma le tatalo e mafai ai ona ausia e tagata uma mana’oga o le tala lelei. E leai se tagata e mafai ona fa’amalosia ina ia solia le tulafono. O lona lava loto malie e tatau ona mauaina muamua; o le loto e tatau ona sini muamua i le gaioiga agasala a’o le’i mafai ona manumalo le tu’inanau i le mafaufau fai filifiliga poto, a’o le’i manumalo fo’i le amioleaga i le malosi fai filifiliga o le mafaufau. O le fa’aosoosoga, tusa lava po’o le a le malosi, e lē o se alofaga lava lea mo le agasala. ‘O fofoga o Ieova o loo i luga o ē amiotonu, e fa’afofoga mai fo’i Ona taliga i a latou tatalo.’ Alaga ia Ieova, le tagata fa’aosoosoina e. Lafo atu oe, e leai sou fesoasoani, lē aogā, i luga ia Iesu, ma ia ē ole atu mo Lana folafolaga tonu lava lea. O le a fa’afofoga mai o Ia. Na te silafia le malosi o lagona o le loto fa’alenatura, ma o le a Ia fesoasoani i taimi uma lava o fa’aosoosoga.“Ua ē pa’ū ea i le agasala? Ia sa’ilia nei loa le Atua e aunoa ma le fa’atuai mo le alofa tunoa ma le fa’amagaloga.” – Testimonies for the Church, vol. 5, p. 177

---

4. FAIA O AUAUNAGA LELEI E AUNOA MA LE MATA’U Aso Lulu Me 22

a. O le a le fautuaga fa’atinoina ua tu’uina mai e Peteru, a mulimulita’iina, e mafai ona fesoasoani ai ia i tatou i le fofōina o le tele o fa’afitauli i feso’ota’iga? 1 Peteru 3:13; Fa’ata’oto 15:1. “O upu e tautalagia i le tali atu i lē o loo ita, e masani lava ona gaioi e fa’apei o se sasa, e sasa atu ai le ita i le avea ma to’asa tele. Peita’i o le ita e fetaia’i ma le gugū e vave lava ona mate ifo. Ia nonoa e le kerisiano lona laulaufaiva, ma ia filifili ma le mausali na te lē tautalagia lava upu sauā, ma le lē onosa’i.” – Messages to Young People, p. 136. b. O le a la tatou filifiliga e tatau ona faia i tagata e foliga mai e lē mafai ona fa’amalieina e ui lava i a tatou lapata’iga agamalu ia i latou? 1 Peteru 3:14, 16, 17. “O Iesu lava Ia na te lē’i fa’atauina lava le filemu e ala i Lona ioe i ni maliega. . . . O auauna a Keriso ua vala’auina i latou i le galuega lava lea e tasi, ma e tatau ona latou mataala, ne’i latou lafoa’ia le upu moni, e ala i lo latou sa’ili ia aua ne’i tula’i mai ni fe’ese’esea’iga. . . . O le filemu moni lava e lē mafai lava ona fa’amausalīina e ala i le loto malie ia tu’u i lalo tapula’a. Ma e leai fo’i se tasi e mafai ona fa’amaoni e aunoa ma le fa’aosofiaina o itu tete’e mai. O se fa’a-Kerisiano e fa’aleagaga, o le a te’ena e fanau a le lē usita’i. Peita’i na fa’atonu atu Iesu i Ona so’o, ‘Aua tou te matata’u ia i latou e fasiotia le tino, peita’i e lē mafai ona latou fasiotia le agaga.’ O i latou e fa’amaoni i le Atua e lē mana’omia lo latou matata’u i le malosi o tagata po’o le ita o Satani. Ua mausali lo latou ola e fa’avavau i totonu ia Keriso. E tasi lava le mea e tatau ona latou matata’u i ai o lenei, ne’i latou lafoa’ia le upu moni, ma fa’apena ona latou fa’alataina ai le talitonuga ua fa’amamaluina ai i latou e le Atua.” – The Desire of Ages, p. 356. c. O le a le puna e tatau ona sau ai a tatou galuega lelei uma lava ma a tatou upu agalelei uma lava? 1 Peteru 3:16 (vaega muamua); Galuega 24:16; Eperu 9:14. “I totonu o le Upu a le Atua, tatou te faitau ai o loo i ai malosi fai filifiliga lelei ma leaga, ma, talu ai ona o lou malosi fai filifiliga na te lē o ta’usalaina oe i lou lē tausia o le tulafono a le Atua, e lē o fa’amaonia mai ai e fa’apea, e lē o ta’usalaina oe i Lana silafaga. Ave le malosi fai filifiliga o lou mafaufau i le Upu a le Atua ma ē vaai po’o tusa lou olaga ma lau amio ma le tapula’a o le amiotonu ua fa’aalia ai iina e le Atua.” – The Review and Herald, September 3, 1901.

---

5. ILOAINA PO’O FEA O TATOU TUTU AI Aso Tofi Me 23

a. O a mafua’aga autu e tatau ai ona tatou su’esu’eina le upu a le Atua i aso ta’itasi? Iosua 1:8; Salamo 119:11; 1 Peteru 3:15; 2 Timoteo 2:15 b. O le a le lamatiaga tele o loo i ai le to’atele i le taimi lenei o loo fai mai latou te talitonu i le upu moni mo le taimi lenei? Hosea 4:6. “O i ai ea le autalavou i se tulaga e mafai ai ona latou tu’uina atu ma le agamalu ma le mata’u, se tali i tagata ta’itasi uma e fesili mai ia i latou i le mafua’aga o lo latou fa’amoemoe? Na ou va’ai o talavou e matuā to’ilalo lava i lo latou malamalama’aga i lo tatou talitonuga. O va’aiga mata’utia o loo i o latou luma tonu lava, o se taimi lea o puapuaga o le a tofotofoina ai le tāua o le amio.” – Testimonies for the Church, vol. 1, pp. 507, 508.“O le feau mo le taimi lenei – o le ta’uamiotonuina e ala i le fa’atuatua – o se feau lea mai i le Atua. . . .“Tatou te lē o saogalemu pe afai tatou te fa’atalalē i le su’esu’eina o le Tusi Paia i aso ta’itasi mo le malamalama ma le iloa. . . . E lē o i ai se tagata e to’a tasi mai i le to’a selau o loo malamalama mo ia lava, i le upu moni o le Tusi Paia e fa’atatau i lenei mataupu lea e matua aoga lava i lo tatou manuia i le taimi nei ma le olaga e fa’avavau.” – Selected Messages, bk. 1, p. 359.“E to’atele e va’ava’ai atu i a latou faifeau na te aumaia ia i latou le malamalama mai i le Atua. . . . O tagata fa’apenei e tele le malamalama latou te lē maua. Afai o le a latou mulimuli ia Keriso i aso ta’itasi . . . e mafai ona latou maua se iloa manino lava e fa’atatau i Lona finagalo, ma fa’apena ona latou maua ai se iloa taua lava. O lo latou lē maua o lenei iloa tonu lava, o le au uso o loo fa’atagā tautalatala mai i le upu moni, latou te savavali i aloiafi na tutuina e isi; latou te lē iloa le Agaga o le Atua ma e leai so latou iloa e fa’atatau i Lona finagalo, ma o lea e faigofie ai lava ona aveeseina i latou mai i lo latou fa’atuatua. O i latou o tagata lē mausalī, auā na latou fa’alagolago i isi e maua mai ai se iloa mo i latou.” – Testimonies for the Church, vol. 2, p. 644.

FESILI TOE FA’AMANATU Aso Faraile Me 24

1. O le a lo’u uiga aga’i i lo’u to’alua, fanau, le au uso, ma o’u uso a faigaluega? 2. Ta’u mai ni la’asaga autu e fa’amalosia ai i tatou i le auala e puleaina ai o tatou laulaufaiva. 3. O le a se mea e tatau ona ou faia pe afai e fa’ato’ilaloina a’u e se fa’aosoosoga? 4. Fa’amatala le eseesega i le va o galuega lelei ma upu agalelei e sau mai i se malamalama’aga mamā, i le fa’atusatusa atu i faufauga fa’apito i se taumafaiga ina ia fausia a’e se igoa ta’uleleia. 5. E fa’apefea ona mafai ona ou maua se malamalama’aga sili atu ona loloto e fa’atatau i talitonuga o lo o o’u ta’utinoina?