SAPATI, APERILA 6, 2024 O le feau a le Fa’agaioiga Toe Fuata’i Aso Lona Fitu O Le Toe Afio Mai, na ulufale atu i Pakistan i le vaega mulimuli o le seneturi lona lua sefulu. O le fuaitau aofa’i atoa o tagata o Pakistan e 241.5 miliona ma o le tapua’iga a le vaega sili ona to’atele o ia tagata, o le Islam (96.47%), ona soso’o atu ai lea ma le tapua’iga o le Hinduism (2.14%) Tapua’iga Kerisiano (1.27%), ma isi tapua’iga (0.11%). O lo matou atunu’u e si’omia e Afghanistan, China, India, Sami o Arabia ma Iran. O fa’ato’aga e maua ai le tusa ma le 20.9% o le aofa’i o le tupe maua mai i oloa ma auaunaga uma e fa’atauina mulimuli lava i le i’uga o se taimi fa’atapula’aina i totonu o le atunu’u atoa. O le fa’atulagaga o loo fausia ai oloa ma auaunaga fa’atau atu, ma fa’atau mai i totonu o Pakistan, ua fa’avasegaina o se fa’atulagaga lea a se atunu’u tauatia’e e maulalo lana tupe maua mai. O le atunu’u e mativa lava lona fa’avasegaina i le tele o fa’ailo o atina’e ua fa’atuina e le Polokalame O Atina’e a Malō Au Fa’atasi ma le Fale Tupe a le Lalolagi. O le aai o Narang Mandi e i le itumalo o Muridke i totonu o le setete o Punjab. O le fuaitau aofa’i atoa o tagata o lenei itumalo, e sili atu ma le 500,000. I tausaga ta’i sefulu ua mavae atu, na matou faia ai ni fa’atasiga, semina o a’oa’oga, ma isi gaioiga mo le atia’eina o a’oa’oga fa’apena i ekalesia i le lotolotoi o lo tatou au uso i Pakistan. E ui lava i le lotolotoi o faigata e fetaia’i ma i matou, o loo mafai pea ona matou fa’atumauina lo matou fa’atuatua i totonu ia Keriso. O le taimi nei la, o a matou galuega ua salalau solo i totonu o lo matou atunu’u. O loo matou aga’i i luma ina ia atina’eina vaega eseese o le galuega a le Atua e fa’apei o tala’iga fa’amisionare, a’oa’oga e fa’atatau i le ola maloloina, a’oa’oga ia avea ma ta’ita’i, fa’atuina o nofoaga tutotonu o a’oa’oga, ma le toe fa’aleleia o a matou fale tapua’i tuai i totonu o Pakistan. “O loo fetalai mai le Ali’i i Ona tagata i le taimi lenei, e fa’apea, Ia faia ni fuafuaga e mafai ai ona ulufale atu i aai, ma tala’i atu le upu moni i le tulaga faigofie ma le fa’atuatua. O le Agaga Paia o le a galue e ala atu i a outou taumafaiga ina ia tumau i loto. Aua le aumaia ni a’oa’oga uiga ese i lau feau, ae ia ē tautalagia upu faigofie o le tala lelei a Keriso, lea e mafai ona malamalama i ai le fanau iti ma tagata matutua. O tagata e lē’i a’o’oga ma i latou na a’o’oga, e tatau ona latou malamalama uma i upu moni o le feau a le agelu lona tolu, ma e tatau ona a’oa’oina i latou i le tulaga faigofie lava. Afai tou te manana’o e fa’alatalata atu i tagata i se auala latou te taliaina ai outou, ia fa’amaulalo o outou loto i luma o le Atua ma ia outou a’oa’oina Ona ala.” – Medical Ministry, p. 299. O a tatou taulaga ofo uma e tatau ona tu’uina atu ma le loto fiafia; o mana’oga o le Atua o le a talia ma le fiafia ma o Lana galuega o le a manatu i ai, e i ai lana aiā tonu lava i se vaega o tupe ua Ia tu’uina mai i o tatou lima. O uso ma tuafafine mai i le Misiona i Pakistan o loo fa’afetai atu ia te outou, o tatou uso, tuafafine ma talavou pele mo lau foa’i tele mo Lana galuega i totonu o lenei vaega faigata o le lalolagi . . . “auā e alofa le Atua i lē e foa’i ma le loto fiafia” (2 Korinito 9:7). O ō outou uso ma tuafafine mai i le Ekalesia i Pakistan