O Le Papatisoga E Mana’omia e Tagata Uma MAU TAULOTO: “O le fa’atusa fo’i lea ua fa’aola ai nei le papatisoga ia i tatou, (e lē o le fa’ate’aeseina o le eleele o le tino, a’o le tali a le loto fuatia ifo lelei i le Atua), e ala i le toe fa’atuina mai o Iesu Keriso” (1 Peteru 3:21).
Faitauga Fautuaina:
Steps to Christ, pp. 17-22.
“Ou te aioi atu i tagatā ekalesia i aai ta’itasi uma ina ia latou taofi mau atu i le Ali’i i taumafaiga finafinau mo le papatisoga a le Agaga Paia.” – Counsels on Health, p. 548.
1. O LE ALA E TASI O LE FA’AOLATAGA Ulua’i Aso Me 26
a. O le a le fa’amatalaga a Peteru i ana tusitusiga ma ana lauga e fa’atatau i le ala e tasi lava e mafai ona maua ai le fa’aolataga? 1 Peteru 3:18; Galuega 4:10-12.b. Aisea e lē mafai ai e le Atua i Lona alofa ona Ia fa’amagalo ma lavea’i tagata agasala ,e aunoa ma le maliu o Lona Alo? Isaia 26:10 ma le Roma 8:7 fa’atusatusa i le Roma 5:10 ma le Kolose 1:20-22.“I le olaga lē sala o le tagata, na ia talanoa ai ma le olioli ma le [Atua]. . . . Peita’i ina ua mavae lana agasala, e lē’i mafai loa ona ia toe maua le olioli i le olaga fa’apaiaina, ma na ia taumafai loa e lafi mai i le Atua. . . . O le tagata agasala e lē’i mafai ona ia fiafia i le mafutaga ma le Atua; na ia mana’o e lafi mai i le mafutaga ma agelu paia. Ana fa’apea e mafai ona fa’atagaina o ia e ulufale atu i le lagi, semanu o le a leai sona fiafiaga mo ia. O le agaga o le alofa lē fa’apito o loo pule ai iina . . . o le a leai se tali e maua mai ai i totonu o lona loto. O ona manatunatuga, o ona fa’anaunauga, o ana faufauga, o le a matuā ese lava mai i uiga ia o loo galuea’iina ai agelu paia lē sala iina. O le a avea o ia o se leo pa’ulua i le lotolotoi o leo matagofie o le lagi. O le lagi o le a avea ia te ia o se nofoaga o le puapuaga. . . . E lē o se poloa’iga sauā na faia e le Atua le fa’asāina o tagata amioleaga mai i le lagi; ua te’ena i latou ona o lo latou lava lē agava’a mo ona tagata paia. O le mamalu o le Atua o le a avea o se afi e fa’aumatiaina ai, ia i latou.” – Steps to Christ, pp. 17, 18.
2. MAUTINOAGA E ALA I LONA TOE SOIFUA MAI Aso Gafua Me 27
a. E ui lava ina lavea’iina i tatou e ala i le maliu o Keriso, o le a le uiga o loo “lavea’iina ai fo’i i tatou e ala i le toe soifua mai o Keriso”? 1 Peteru 3:21 (vaega mulimuli); 1 Korinito 6:14; 15:22, 23; 1 Tesalonia 4:13-16.b. O le a se mea o loo fa’amatala mai e Peteru po’o ai moni fo’i na fa’ataunu’uina le fa’atonuga a le Tamā ma toe fa’atuina mai Iesu? Fa’atusatusa le Galuega 2:22-24 i le 1 Peteru 3:18.“O Lē na maliu mo agasala a le lalolagi, na fuafuaina e i ai pea i totonu o le tu’ugamau mo le taimi na fuafuaina. Sa i ai o Ia i totonu o lena fale puipui-papa o ia o se pagota o le fa’amasinoga tonu a le Atua. . . . Na Ia tauaveina agasala a le lalolagi, ma e na o Lona Tamā lava na mafai ona fa’asa’olotoina o Ia.” – The Youth’s Instructor, May 2, 1901.“O le toe fa’atuina mai o Keriso e le Tamā nai le oti, na Ia fa’amamaluina ai Lona Alo i luma o leoleo Roma, . . . ma ‘au a Satani, ma luma o le iunivesa fa’alelagi.” – Lift Him UP, p. 102.“Ona fa’alogoina lea o le agelu malosi, ma lona leo na mafua ai ona lūlū le eleele: Iesu o Oe le Alo o le Atua, ua vala’au Lou Tamā ia te Oe! Ona sau ai lea i fafo o Ia lē na mauaina le mana e fa’ato’ilaloina ai le oti ma le tu’ugamau.” – The Present Truth, February 18, 1886.“O le Atua e ofu i le mana; e mafai ona Ia aveina ē ua oti i soligatulafono ma agasala, ma o le galuega a le Agaga lea na toe fa’atuina mai Iesu nai le oti, Na te liua ai le amio fa’aletagata, ma toe fa’afo’i mai i le tagata le fa’atusa o le Atua na leiloa.” – The Youth’s Instructor, February 7, 1895.c. O ai o le a toe fa’atuina mai le au paia uma lava i le tino e ola pea i le toe fo’i mai o Keriso, ma o le a le aiaiga e tasi lava o le a mafai ai ona faia lena tulaga? Roma 8:9-11.“O tino e oti ua toe fa’aolaina mai e le Agaga o loo nofo i totonu ia te outou. . . .“O le mana o le Agaga o Keriso e toe fa’aola ai o loo nofo i totonu o le tino e oti, e fusia atu ai tagata talitonu ta’itasi uma lava ia Iesu Keriso. . . .“O Lē na te foa’iina mai le ola o le a Ia fafaguina a’e Ona tagata na Ia fa’atauina mai i le ulua’i toe tu. . . . E ala i le mana o le Fa’aola lea na afio i totonu ia i latou a’o latou feola ma, talu ai ona sa latou tofusia i le natura fa’alelagi, o lea e toe fa’aolaina mai ai i latou nai le oti.” – Selected Messages, bk. 2, p. 271.“O le oti o le moe lea i le silafaga a Keriso – o le moe lē leoa, i le pogisa. Na te fetalai e fa’atatau i le oti lea e peisea’i e na o sina taimi pu’upu’u. . . . Ma, i le tagata talitonu la, o le oti e na o se moe itiiti lava lea. Ia te ia, o le oti, o lona moe lea.“O le mana lava lea na toe fa’atuina mai Keriso nai le oti o le a toe fa’aolaina mai fo’i Lana ekalesia.” – My Life Today, p. 295.
3. O LE “MANA” I TUA O LE TALA LELEI Aso Lua Me 28
a. O ai na fa’aaoga e Iesu e tala’iina le tala lelei, ma aioi atu i le aigā tagata pa’ū i taimi o le Feagaiga Tuai? 1 Peteru 3:18 (vaega mulimuli), 19, 20. O le auala e malamalama ai i “agaga i totonu o falepuipui,” fa’atusatusa lenei fa’aupuga i le Fa’ata’oto 5:22; Isaia 42:6, 7; 61:1.“O le Atua o loo Ia ole mai pea i taimi uma lava i le loto o le tagata, ma fa’atonu mai ina ‘ia ia iloa Lona alofa ma Lona onosa’i mutimutivale. . . . Ua fa’apena ona Ia aioi mai i le aigā tagata i augatupulaga uma lava. I aso o Noa na fetalai mai ai Keriso i tagata e ala mai i se meafaigaluega fa’aletagata ma lauga mai ia i latou sa nofo pologa i le agasala.” – This Day With God, p. 278.“A’o le’i o’o i le taimi lea, sa i ai lava le Agaga i le lalolagi; talu mai lava le amataga o le galuega o le fa’aolataga sa ia musumusu ai lava i loto o tagata.” – The Desire of Ages, p. 669.b. Ina ua mavae le afio a’e o Iesu i le lagi, o ai na auina atu e Keriso e tu’uina atu le mana i aposetolo ina ia fa’aauauina le galuega o le tala lelei? Ioane 14:12, 16, 17; 20:21, 22; Galuega 1:2.“A’o i ai Keriso i luga o le fogaeleele, e lē’i mana’omia ai e le au so’o se isi lava fesoasoani. Ana lē aveesea lava Iesu mai ia i latou, o lea na latou fa’ato’a lagonaina ai loa lo latou mana’omia o le Agaga, ma na afio mai loa le Agaga.“O le Agaga Paia o le sui lea o Keriso, peita’i na aveesea mai ia te ia uiga fa’aletagata, ma o lea e tuto’atasi ai lava ia. O le taofia o Keriso i le tino tagata, o lea e le’i mafai ai ona i ai o Ia i nofoaga uma. O lea, e mo lo latou manuia lona alu atu i le Tamā, ma auina mai le Agaga e avea ma Ona sui i luga o le fogaeleele. E leai la se tasi na sili atu lona fa’amanuiaina ona o lona nofoaga poo lana mafutaga vavalalata fo’i ma Keriso. E ala i le Agaga, o le a mafai ai ona maua e tagata uma lava le Fa’aola. I lenei uiga o le a sili atu ai ona Ia latalata ia i latou nai lo le tulaga e i ai pe ana fa’apea e lē afio a’e o Ia i le lagi.” – Ibid.c. O le a le folafolaga a le Atua o le a toe fa’ataunu’uina i le taimi o le i’uga, i se tulaga e sili atu nai lo le taimi o le au aposetolo? Ioelu 2:28-31; Hosea 6:3.“O le galuega tele o le tala lelei e lē fa’amuta i fa’aaliga itiiti ifo o le mana o le Atua nai lo lea na fa’ailogaina ai lona amataga.” – The Great Controversy, p. 611.
4. O LE PAPATISOGA E MANA’OMIA E TAGATA UMA Aso Lulu Me 29
a. Fa’amatala le papatisoga atoatoa e mana’omia mo le fa’aolataga. Mareko 1:7, 8; Ioane 3:3, 5.“O lagona i totonu o le ekalesia e matuā lē lelei lava. . . . O le mafanafana o lo latou ulua’i alofa ua liu aisa nei, ma se’ivagana la ua fa’aliusuavaiina e ala i le papatisoga a le Agaga Paia, o la latou tu’ugalamepa o le a aveesea mai i lona nofoaga, se’ivagana ua latou salamo ma faia a latou ulua’i galuega.” – Testimonies to Ministers, pp. 167, 168.b. Aisea e faigata ai i le to’atele o kerisiano ona tausia a latou ta’utinoga na faia i la latou papatisoga i le vai? Eperu 5:11, 12; 6:1, 2.“E to’atele e lē o tu’uina mai se fa’amaoniga mausali e iloa ai o loo latou fa’amaoni i a latou tautoga o le papatisoga. O lo latou vilivilita’i ua fa’aliuaisaina e tapua’iga fa’afoliga, o fa’anaunauga fa’alelalolagi, fa’amaualuga fa’alialiavale, ma le alofa o le tagata ia te ia lava.” – Testimonies for the Church, vol. 9, p. 155.“E matuā tele le mana’omia e le au faigaluega o le papatisoga a le Agaga Paia, ina ia avea moni ai i latou ma misionare moni mo le Atua.” – Counsels on Sabbath School Work, p. 155.“O la tatou galuega i le taimi lenei le gaua’iina o ō tatou loto ia Keriso, ina ia saunia ai i tatou mo le taimi o le fa’afouga mai i luma o le Atua – saunia mo le papatisogaa a le Agaga Paia.” – Evangelism, p. 702.c. O ai Lē e to’atasi e mafai ona fa’amamāina o tatou loto ina ia faia a tatou ta’utinoga o le papatisoga o se “tali moni a se loto fuatia ifo lelei i le Atua”? Fa’atusatusa le 1 Peteru 3:21 i le Eperu 9:14; Roma 8:9, 10.“O le mea tatou te mana’omia o se loto lea e toe fa’aolaina e le Agaga o le Atua; auā o le to’atele o tagata, o le malamalama’aga ua lē mafai ona manatunatu lelei ona o le tu’inanau sa’oloto i le agasala ma le lē talitonu. E tatau ona tatou iloa po’o le a le tapua’iga, ma ia tatou iloa e tatau ona i ai sa tatou so’otaga ola ma le Atua o le lagi.” – The Signs of the Times, July 25, 1892.“E leai se isi a ua na o le Agaga Paia Na te fa’ailoa mai i le mafaufau le tapula’a fa’aleagaga o le amiotonu ma fa’ailoa mai le agasala, ma fa’atupulia ai le fa’anoanoa fa’ale-Atua e galuea’iina ai le salamo lea e lē toe mana’omia e toe salamo ai, ma fa’aosofia ai le fa’atinoina o le fa’atuatua ia te Ia Lē e to’atasi e mafai ona lavea’i mai i agasala uma.” – Selected Messages, bk. 3, pp. 137, 138.
5. TAULA’IINA O Ō TATOU MANATUNATUGA Aso Tofi Me 30
a. O fea o loo toe fa’asino atu i ai Peteru i le ta’ita’iina atu o i tatou i le fa’aolataga? 1 Peteru 3:21 (vaega mulimuli), 22; Eperu 8:1.“[O le Ali’i o Iesu] o loo nofo i le itu taumatau o le Atua ma Ia mauaina le mamalu silisili i le avea o ia ma Atua, o le mamalu lava lea sa ia te Ia a’o le’i faia le lalolagi. Na te tufatufaina atu Ana meaalofa ia i latou uma lava o le a ole atu ai ia te Ia e ala i le fa'atuatua. . . .“O loo ia i tatou se faleoa lē mafa’amutalia, o se sami o le alofa i totonu o le Atua o lo tatou fa’aolataga.” – That I May Know Him, p. 338.“Na Ia tula’i mai nai le tu’ugamau o ufitia e se ao o agelu i le mana ofoofogia ma le mamalu – o le Atua ma le tagata ua tu’ufa’atasia. Na Ia toe taofimauina le lalolagi lea na fai mai Satani na ia pule ai, e avea ma vaega o lana pule’aga fa’aletulafono, ma o Lana gaioiga ofoofogia i le foa’iina mai o Lona soifua, na Ia toe fa’afo’isia ai le aigā tagata atoa lava i le leleiga ma le Atua.“Aua ne’i talitonu se tasi i le manatu pumo’omo’o, vāiti, e fa’apea, so’o se galuega lava a le tagata, e mafai ona fesoasoani ai i se auala e sili ona itiiti e fa’alēaogaina ai le aitalafu o ana solitulafono. O se fa’aseseēga mata’utia lava lea. Afai o le a ē malamalama i ai, e tatau ona fa’amuta nei lou finau malosi i ou lava manatu fa’apelepeleina, ma o loto fa’amaulalo ia outou su’esu’eina ai le togiola. O lenei mataupu o loo matuā lē manino lava le malamalama i ai, o lea, o le afe ma afe o ē o loo fai mai o i latou o fanau a le Atua, o i latou moni o fanau a le‘ti'apolo, auā o le a latou fa’alagolago i a latou lava galuega. Na mana’omia lava e le Atua galuega lelei i taimi uma lava, e mana’omia fo’i e le tulafono galuega lelei, peita’i talu ai ona sa tu’uina e le tagata ia lava i le agasala, o lea ua leai ai se aoga o ana galuega lelei, e na o le amiotonu lava a Iesu e mafai ona lavea’iina ai. E mafai e Keriso ona lavea’i atoatoa auā o loo soifua pea o Ia e fautua mo i tatou. Na pau lava le mea e mafai ona faia e le tagata i lona lava fa’aolataga, o le talia lea o le vala’aulia. . . . E leai se agasala e mafai ona faia e le tagata e lē’i fa’amalieina i le maliu o Iesu. E fa’apena, ona fa’aauau ona ofo mai ai e Keriso i le tagata agasala i taimi uma i olega finafinau lava, se togiola mae’ae’a.” – Selected Messages, bk. 1, p. 343.
FESILI TOE FA’AMANATU Aso Faraile Me 31
1. E fa’apefea ona mafai ona ou maua le olioli sili atu i lo’u talanoa ma manatunatu e fa’atatau ia Iesu ma Lana Upu?2. O le a se fa’amaoniga o i ai o le galuega a le Agaga Paia i totonu ia te a’u?3. O le a se mea o le a fa’aleleia atili ai le fa’alauteleina o le galuega a le Agaga Paia Na te fa’aaogaina ai a’u i auaunaga?4. E fa’apefea ona mafai ona ou iloa le papatisoga a le Agaga Paia i lona atoaga?5. O le a se mea e masani lava ona mafua ai ona tatou lē iloa atu Iesu ma fa’apena ona leai ai fo’i ma so tatou fa’atuatua?