Upu Tomua

O le tausaga lenei, o le a tatou su'esu'eina ai lesona o kuata e fa e fa'atatau i le Tala Lelei e Tusa Ai Ma Le Molimau a Ioane. Talu ai ona o lona agamalu, o le tusitala o le tusi lona fa, na te le o fa'ailoaina mai o ia lava, na te le o faia fo'i se fa'amatalaga e fa'atatau ia te ia lava, e fa'apea, o ia o le tasi o so'o e to'a lua ia sa muamua lava mulimuli ia Iesu (Ioane 1:37). Peita'i, o loo ia fa'aigoaina o ia o "le isi so'o," "o le so'o lena," “o le so'o . . . na ia alofa i ai,” “o le so'o sa alofa i ai Iesu,” ma “le so'o na molimau i nei mea uma” (Ioane 18:15; 19:26; 21:20, 23, 24). Talu ai ona o lo o ta'uina mai igoa o isi so'o iloga a'o le igoa o Ioane e le o ta'uina mai, e foliga mai o loo fa'ailoa mai ai o ia na tusia lena tusi.

E tusa ai ma le fa'amatalaga a le Agaga o Valo'aga, o le tusitala o le tala lelei lona fa, o Ioane lea, “le so'o e alofa i ai Iesu.” O ia o le tasi o so'o e to'a tolu lea sa molimauina le mamalu o Keriso i luga o le mauga sa liua ai o Ia, ma Ona tiga i le togala'au i le taimi na soso'o tonu lava ma Lona moliaga. O lona olaga o se fa'ata'ita'iga maoa'e lea o lo o fa'ailoa mai ai, e mafai e le mana o le Atua ona liua atoatoa se “atali'i o le faititili” e avea o se tane uiga alofa ma loloto lona iloa fa'aleagaga.

“O Ioane sa ia pipi'i ia Keriso e fa'apei ona pipi'i o le vine i le poutu maualuga. Na ia onosa'ia lamatiaga o le fale fa'amasino mo Lona Matai, ma sa ia fa'atalitali fa'ata'amilo ai i le satauro, ma ina ua ta'uina mai le tala e fa'apea ua toe soifua mai Keriso, na ia fa'ata'alise atu i le tu'ugamau, o lona vilivilita'i na ia muamua atu ai nai lo Peteru oso vale.

“O le alofa fa'alia ma le finafinau le fa'apito na fa'aalia i le olaga ma le amio a Ioane, o loo fa'atusalia mai ai lesona e le mafa'amatalaina lo latou taua i le ekalesia kerisiano. E le'i maua fa'alenatura e Ioane le amio matagofie lea sa fa'aalia e lona olaga mulimuli ane. O lona uiga fa'alenatura, sa i ai ona vaivaiga leaga lava. E le'i gata ina ia fa'amaualuga, fai taua, ma fa'anaunau mo le mamalu, ae e le fa'autauta fo'i, ma loto tiga pe a fa'amanu'alua. O ia ma lona uso na fa'aigoaina o 'atali'i o le faititili.' O le ita leaga, o le fa'anaunauga mo le tauimasui, o le uiga o le faitio, sa i ai uma lava i le so'o pele. Peita'i i lalo o nei uiga uma, na silafia ai e le Faia'oga fa'alelagi le vilivilita'i, fa'amaoni, ma le loto alofa. Na a'oa'i e Iesu lenei uiga sa'ili'ili mo ia lava, fa'ato'ilaloina ona fa'anaunauga, ma tofotofoina lona fa'atuatua. Peita'i na Ia fa'aalia atu ia te ia le mea lea sa fa'anaunau i ai lona loto—o le matagofie o le fa'apaiaina, le mana e liua ai, o le alofa.”—The Acts of the Apostles, 539, 540.

O tagata tusi tala iloga uma anamua o loo latou fai mai o le tusi o le tala lelei a Ioane, na tusia i Efeso e tusa ma le T.A 90 po'o tua atu. O le so'o sa tu'uina i totonu o se ulo ga'o sa pupuna ma sa ia le oti ai i se uiga fa'alenatura, ma na mulimuli ane ona tulia ese atu ai lea o ia i le motu o Patamo (Fa'aaliga 1:9). O iina sa ia tusia ai le Fa'aaliga. O le soloa'i atu o Nerva e fai ma tupu i le nofoali'i i le (T.A. 96) na mafai ai ona toe fo'i atu Ioane i Efeso, o iina o lo o talitonuina sa fa'aauau ai ona ia nofo ai se'ia o'o i lona maliu i le taimi o le nofoa'iga a Trajan (T.A. 98–117).

Tau ina ia ta'ita'iina e le Agaga o Keriso a tatou su'esu'ega i lenei kuata, ma pa'i mai i o tatou loto i le tali atu i Lona alofa!

O le Matagaluega o le A'oga o le Sapati a le Koneferenisi Aoao