Taulaga Sapati Muamua

E le mafa'afesiligia, o taua, tala e fa'atatau i taua, o fa'alavelave tutupu mata'utia, mala la, lologa, afa, mafui'e, afi, ma fa'ama'i o loo matua fa'atuputeleina fa'ata'alise i se tulaga mata'utia i le lalolagi atoa—i le fa'ataunu'uina uma o valoaga o le Tusi Paia o loo tatou su'esu'eina. E mautinoa lelei, i nei fa'alavelave leaga, tatou te iloa manino ai lava la'asaga o le Atua ua latalata mai. E tele le afe ma afe o loo matua puapuagatia lava mai i nei faigata mata'utia, ma valaau mai mo ituaiga fesoasoani eseese mai i sui o Iesu Keriso ina ia latou fa'aaogaina le fa'amalologa o le pulu pasama o Kiliata.

I nei lu'i tiga, ua fa'asoaina ai e le Matagaluega o le Ola Maloloina a le Koneferenisi Aoao fa'amanuiaga na aumaia mai i la tatou teugatupe e ala mai i taulaga foa'i na auina mai e outou, lo tatou au uso i le lalolagi atoa. O nei taulaga o loo auina mai e tagata ta'itasi i se auala fa'apitoa e fa'amalieina ai mana'oga, ae e ala mai fo'i i Taulaga Sapati Muamua o kuata ta'itasi. Le au uso e, o a outou taulaga ofo ua avea ma fale mo i latou ua fa'aumatia o latou fale i fa'alavelave tutupu fa'alenatura; ua foa'i ai meaai mo le selau ma selau o aiga o loo tausia fanau e leai ni o latou matua ma fafine ua oti a latou tane, ma fa'alauteleina atu ai le auala o le fa'atumauina o le ola ma le fesoasoani ia i latou. O nei taulaga ofo ua fesoasoani fo'i i matua i le fa'atauina mai o fatu e toto ma fafaga ai o latou aiga pe amata ai fo'i se tama'i pisinisi ina ia mafai ai ona maua e le to'atele o tagata le mafaitaulia o lo tatou fa'atuatuaga, se alaga tupe maua mai ma galuega, lea semanu e le mafai ona maua mo i latou.

Fa'afetai i le Atua, o nei taimi o tofotofoga, e to'atele ua musuia ina ia tu'u a latou tupe ofo fua i luga o le fata a le Alii. Mo i latou o loo mauaina fesoasoani mai i nei taulaga ofo, matou te fa'afetai tele atu mai i le ta'ele o o matou loto!

Ae ui i lea, o mana'oga e le muta—e matua le muta lava, o loo fa'atuputeleina i aso ta'itasi, o lau foa'i la e matua tele lava le fesoasoani e maua ai.

“O le satauro o Keriso e ole mai i le loto foa'i o so'o ta'itasi o le Fa'aola paia. O le tapula'a o loo fa'aata mai ai iina o le foa'i, foa'i. O lenei tapula'a, a fa'atinoina i le agalelei loto foa'i moni lava ma galuega lelei, o le fua moni lea o le olaga kerisiano.”-—Counsels on Stewardship, p. 14.

O le aso lenei, a'o e tu'uina atu lau taulaga ofo fa'apitoa mo le Sapati muamua, fa'amolemole ia e faia le mea e sili ina ia vi'ia ai le Atua. Pe itiiti pe tele, o tagata uma e mafai ona latou faia le mea sili latou te mafaia. Mai i le atoaga atoa o lenei alofa fa'asoaina, o le a fa'aauau ai ona tatou tufatufa atu fa'amanuiaga i o tatou au uso i le lalolagi atoa. “O le e foa'i atu i e matitiva na te fa'amanuiaina isi, ma o ia lava e fa'amanuiaina i se tulaga e sili atu” (Ibid., p. 13). Tau ina ia fa'amanuia tele le Atua ia te outou!

Matagaluega a le Koneferenisi Aoao mo le Manuia o Tagata