Ulua’i Aso
Mati 2
1. TAULA'IINA O LE MAFAUFAU
a. Ina ua uma ona nonofo Iesu ma tagata Samaria i aso e lua, o fea na afio atu i ai Iesu—ma o ai na tosina i lenei tala? Ioane 4:43–46.
“O le tala e faatatau i le toe maliu atu o Keriso i Kana na vave ona salalau solo i Kalilaia, ma aumaia ai le faamoemoe i e sa puapuagatia ma mafatia. I Kapanaumi o tala na tosina i ai le mafaufau o se alii Iutaia o se tagata faigaluega i le auaunaga a le tupu.”—The Desire of Ages, p. 196.
b. Aisea na alu ai le ali'i lea e talanoa ia Iesu? Ioane 4:47.
“O se atalii o le alii lenei sa mafatia i se mafatiaga na foliga mai o se ma'i na le mafai ona togafitia. O foma'i na latou tu'ua o ia ia oti; peitai ina ua faalogo le tama e faatatau ia Iesu, na ia naunau e saili fofo mai ia te Ia.”—Ibid., p. 197.
Aso Gafua
Mati 3
2. O SE FAAILOGA O LE MASALOSALO
a. Faamatala pe na faapefea ona faaalia e Keriso le tiga i totonu o le loto o lea alii na sailia o Ia ina ia faaamalolo i lona atalii i Kapanaumi. Ioane 4:48.
“O le tamaitiiti na matua vaivai lava, ma, na popole, ne'i ia fo'i mai ua maliu; peitai na manatu le alii lea e tatau ona alu pea ia e faailoa le ma'i o lona atalii ia Iesu. Na ia faamoemoe o tatalo ma aioiga a se tama atonu o le a fafaguina ai le agalelei o le Foma'i Silisili.
“O lona taunuu atu i Kana na ia maua ai le motu o tagata o si'omia mai Iesu. O se loto popole na ia fa'aofiofi atu ai agai atu i luma o le Faaola. O lona faatuatua na faavaivaia ina ua ia va'aia na o se tane ofu faigofie, e palapala ma le vaivai i faigamalaga. Na ia faalotolotolua pe mafai e lenei Tagata ona faia le mea lea sa ia sau e ole atu ai ia te Ia; ae sa mafai ona ia faamausaliina se talanoaga ma Iesu, ma ta'u atu le mafuaaga na sau ai, ma aioi atu i le Faaola ia la o atu i lona aiga. Peitai o lona faanoanoa ua uma ona silafia e Iesu. A'o ia le'i tu'ua lona fale, na silafia e le Faaola lona mafatiaga.
“Peitai na Ia silafia foi, sa faia e le tama i totonu o lona lava mafaufau, ni aiaiga e faatatau i lona talitonuga ia Iesu. E se'ivagana ua taliina mai lona manaoga, o le a ia le talia o Ia o le Mesia. . . .
“E ui lava i faamaoniga uma lava e iloa ai o Iesu o Ia o le Keriso, o lenei tama aioi na ia finafinau ina ia faia lona talitonuga ia te Ia o se aiaiga mo le taliina mai o lona manaoga.”—The Desire of Ages, pp.197, 198.
b. A faaosoosoina i tatou ina ia tatou saili mo faailoga, o le a se mea e tatau ona tatou manatua? Mataio 12:38, 39.
“Na tiga Keriso aua o Ona lava tagata, o e na tuuina atu i ai Poloaiga Paia, ua latou le faalogo i le si'ufofoga o le Atua o fetalai mai ia i latou i totonu i Lona Alo.”—Ibid., p. 198.
“O le nu'u sa mananao i se faailoga, e faapei o aso o Keriso. O le taimi lena na fetalai atu le Alii ia i latou e leai se faailoga e tu'uina atu ia i latou. O le faailoga lea e tatau ona faaalia i le taimi lenei ma taimi uma lava, o le galuega lea a le Agaga Paia i le mafaufau o le faia'oga, ina ia faamamafa atu ai le taua o le Upu. O le Upu a le Atua e le o se manatu mate, ma mago, ae o le agaga ia ma le ola. E leai se mea e sili atu ona mana'o i ai Satani nai lo le taula'i ese o mafaufau mai i le Upu, ina ia vaavaai atu ma faatalitali atu ai mo se mea i fafo atu o le Upu ina ia latou lagonaina.”—Selected Messages, bk. 2, p. 95.
Aso Lua
Mati 4
3. UIGA FETE'ENA'I
a. Faamatala le eseesega i le va o tagata Iutaia ma tagata Samaria e faatatau i lo latou talitonuga ia Iesu. Mareko 6:2–6; Ioane 4:40–42.
“Na matua sa'ili ma le vilivilitai le au Faresaio ina ia faamaonia o Keriso o Ia o se tagata taufaasese! Na latou mata'itu i Ana upu ta'itasi, ma latou saili ai e faasese ma fa'auigasese Ana fetalaiga uma lava! O le faamaualuga ma le faailoga tagata ma le ita tele na tapunia ai ala uma lava o le loto i le molimau a le Alo o le Atua. Ina ua Ia a'oa'iina manino a latou amioga leaga ma faailoa atu o a latou galuega na faamaonia ai o i latou o fanau a Satani, na latou lafo mai ma le ita tele le tu'ua'iga, fai mai, ‘E le ua tonu ea la matou upu, o Oe o le Samaria, o loo ia te Oe fo'i le temoni?’ ”—Selected Messages, bk. 1, p. 70.
“Na faatusatusa e le Faaola lenei uiga le talitonu tu'ufesili ma le faatuatua faigofie o tagata Samaria, o e e le'i fesili mai mo se vavega poo se faailoga foi. O Lana Upu, le faamaoniga lea i taimi uma lava e iloa ai o Ia o le Atua, sa i ai lona mana e fa'atalitonuina ai lea na o'o atu i o latou loto.”—The Desire of Ages, p. 198.
“E ui lava ona o [Iesu] o Ia o se tagata Iutaia, ae na Ia feoa'i sa'oloto ma tagata Samaria, ma fa'aleaogaina ai aganu'u fa'a-Faresaio a tagata Iutaia e faatatau i lenei nu'u o tagata inosia. Na Ia moe i totonu o o latou fale, sa Ia tausami i a latou laulau 'ai, ma a'oa'o i o latou auala.”—The Acts of the Apostles, p. 19.
b. Faamatala le iloa o le toatele ua tautalagia le upu moni mo le taimi lenei ia i latou o loo ta'utino mai o i latou o tagata o le Atua, i augatupulaga uma. Ieremia 20:8–11.
“O finauga uma lava na una'iina mai ia Keriso, na fafauina uma i faamatalaga sese. Na faapena foi i le mea na tupu ia Setefano, ma Paulo. Peitai o faamatalaga sili ona vaivai ma sili ona le faamaonia na faia i le itu sese sa i ai lona a'afiaga, aua sa matua toatele lava tagata e le'i fa'apaiaina o latou loto, sa manana'o i na faaupuga ina ia moni. O tagata faapena e naunau lava i taimi uma ina ia fa'apipi'i mau atu so'o se sese oi totonu ia i latou e tautalagia atu ia i latou le upu moni lea latou te le fiafia i ai.
“E le tatau ona tatou ofo pe a pu'eina ma le matape'ape'a faamatalaga leaga taumatemate e avea ma mea moni, e i latou e fiafia i le fa'atupuina o faamatalaga taufa'asese. O i latou sa tete'e ia Keriso na fa'anunumiina ma fa'aguguina so'o e le poto o Ana upu; peitai na latou fa'alogo pea ma le vilivilitai i tala fe'avea'i le fa'amaonia, ma latou maua ai se mafua'aga leaga e toe tu'ufesili atu ai ia te Ia i fesili tete'e.”—Selected Messages, bk. 1, pp. 70, 71.
Aso Lulu
Mati 5
4. O SE OLEGA I LE AGAMALU
a. Ina ua taofi mau atu le faatuatua o le auauna alii ia Keriso, na faapefea ona ia toe fa'amamafaina mai lana olega? Ioane 4:49.
“E faapei o le emo a se malamalama, o upu a le Faaola i le tagata na folasia manino mai ai lona loto. Na Ia silafia o ana faufauga i lona sailia o Iesu, o ni faufauga faapito. O lona faatuatua fa'alotolotolua na fa'aalia ia te ia i lona uiga moni. I lona mafatia loloto na ia iloa ai o lona faalotolotolua atonu o le a aveesea ai le ola o lona atalii. Na ia iloa sa i ai o ia i luma o le na mafai ona faitauina manatunatuga, ma o Ia fo'i na mafai ai mea uma. . . . O lona faatuatua na taofimau atu ia Keriso e faapei ona faia e Iakopo, ina ua ia alaga a'o la tauivi ma le agelu, ‘O le a ou le tu'ua lava Oe, seivagana ua E faamanuia mai ia te a'u.’ Kenese 32:26.”—The Desire of Ages, p. 198.
b. O le a se mea e tatau ona tatou a'oa'oina mai i le mea na faia e Iesu e aunoa ma lona afio atu i le fale o le tagata? Ioane 4:50.
“Sa ia Iesu se meaalofa sili atu e foa'i atu. Na Ia finagalo, ina ia le gata ia faamalolo le tamaitiiti, ae ia tofusia ai fo'i le alii lenei ma lona aiga i faamanuiaga o le faaolataga, ma ia tutuina se malamalama i totonu o Kapanaumi, lea o le a vave ona avea ma laufanua o Ana lava galuega. Peitai e tatau ona iloa e le tagata lona manaoga a'o le'i mafai ona ia mana'omia le alofa tunoa o Keriso. O lenei tagata faigaluega a le tupu na faatusalia mai ai le to'atele o tagata o lona malo. Sa latou naunau ia Iesu ona o mafuaaga faapito. Na latou faamoemoe e maua mai ni faamanuiaga faapitoa e ala i Lona mana, ma na latou tuuina atu lo latou faatuatua i le maua mai o lenei faamanuiaga fa'aletumau; peitai latou te le'i iloa lo latou ma'i fa'aleagaga, ma latou te le'i malamalama i lo latou manaomia o le alofa tunoa. . . .
“O le Faaola e le mafai ona Ia vavae ese mai i le tagata e pipi'i atu ia te Ia, ma aioi mai mo lona manaoga tele. ‘Alu ia oe,’ o Lana fetalaiga lea; ‘ua ola lou atalii.’ Na tu'ua e le tagata le Fa'aola ma se filemu ma se olioli na te le'i iloa lava muamua. E le'i gata sa ia talitonu o le a fa'amaloloina lona atalii, peita'i o le mautinoaga malosi lava na ia talitonu ai ia Keriso o Ia o le Fa'aola.”—Ibid., pp. 198, 199.
“Tatou te manaomia uma lava tali vave tu'usa'o i a tatou tatalo, ma e faaosoosoina i tatou ina ia tatou faavaivai pe a fa'atuai mai le tali pe o'o mai fo'i i se tulaga tatou te le'i manatunatu i ai. Peitai e matua poto lava le Atua ma matua lelei lava o lea Na te le taliina mai ai a tatou tatalo i taimi uma lava i le taimi tonu lava tatou te manana'o ai ma le uiga moni tatou te manana'o ai. O le a Ia faia mea e tele atu ma sili atu ona lelei mo i tatou nai lo le na o le faataunuuina o o tatou manaoga uma lava. . . . O nei mea uma e tofotofoina ai lo tatou faatuatua e mo lo tatou lelei.”—The Ministry of Healing, pp. 230, 231.
Aso Tofi
Mati 6
5. FOFO MA LE FAAOLATAGA
a. Na faapefea ona faamalolo e Iesu le atalii o le tagata? Ioane 4:51–53. O le a le mea moni e faamanatu mai e lenei faamalologa? Efeso 3:20, 21.
“O le sekone tonu lava na taofimau atu ai e le faatuatua o le tama le mautinoaga lea, ‘Ua ola lou atalii,’ na pa'i atu ai foi le alofa fa'alelagi i le tamaitiiti o le a oti.”—The Desire of Ages, p. 199.
“O le itula lava lena o i latou sa leoleo i tafatafa o le tamaitiiti o le a oti i totonu o le fale i Kapanaumi, na latou vaaia ai se suiga faafuase'i uiga ese. O le pogisa o le oti na si'itia ese mai i foliga o le tamaitiiti puapuagatia. O le vevela o le fiva na suitulaga ai le pupula matagofie o le ola maloloina ua toe faafo'isia. O mata vaivai ua toe pupula mai i le poto, ma o le malosi ua toe fo'i mai i le tino vaivai, pae'e. E le'i i ai ni fa'ailoga o le ma'i na toe tumau i le tamaitiiti. O lona tino vevela ua toe malu ma susu, ma na ia moe ai loa i se moe filemu. Na tu'ua e le fiva o ia i le taimi tonu lava o le vevela o le aso. Sa matua ofo le aiga, ma sa matua tele le olioliga.”—Ibid.
b. E faapefea ona tali Iesu i so'o se tasi e aioi mo le fesoasoani? Mataio 11:28–30.
“E le mafai ona vavae ese le Faaola mai i le tagata e pipi'i atu ia te Ia, ma aioi atu mo lona manaoga tele.”—Ibid., p. 198.
“E te manatu ea e faapea, talu ai ona o oe o le tagata agasala e le mafai ona e faamoemoe e te mauaina le faamanuiaga mai i le Atua? Manatua na afio mai Keriso i le lalolagi ina ia lavea'i i tagata agasala. E leai so tatou lelei e ta'uleleia atu ai i tatou i le Atua; o le aioiga e mafai ona tatou aioiina atu i le taimi lenei ma taimi uma, o lo tatou tulaga matua leai lava so tatou fesoasoani, lea e tatau ai ona tatou maua Lona mana e toe fa'atauina mai ai. O le lafoa'ia o le faalagolago atoa ifo o le tagata ia te ia lava, e mafai ai ona tatou va'avaai atu ia Iesu ma fa'apea ifo:
“ ‘E leai se tau o o'u aumaia; Ua na ona ou pipi'i mau atu ia te Oe.’ ”—The Ministry of Healing, p. 65.
Aso Faraile
Mati 7
FESILI TOE FAAMANATU
1. Aisea e masani ai lava ona le taliaina lelei perofeta i o latou lava nuu?
2. O a upu a le tagata na fa'aalia ai lona le talitonu?
3. O le a le finagalo o Keriso i le le talitonu o tagata?
4. O ai na fa'aalia atu le faatuatua e sili atu i totonu ia Iesu—o tagata Iutaia poo tagata o Nu'u ese?
5. O le a se mea ua folafola mai e Iesu i tagata uma e taliaina Lana valaaulia?