Ulua’i Aso
Ianuari 19
1. O LE MALUMALU UA FA'ALEAGAINA
a. Fa'amatala le tulaga na ta'atele i totonu o le malumalu o Ierusalema i le amataga o le auaunaga fa'alaua'itele a Keriso. Ioane 2:13, 14.
“O tagata Iutaia ta'itasi uma lava na mana'omia ina ia totogiina se 'afa sekeli i tausaga ta'itasi e fai ma ‘totogi mo lona ola.’. . . E ese mai i lenei, e tetele tupe na aumaia e fai ma taulaga ofo fua, ina ia tu'uina atu i totonu o le fale teu oa o le malumalu. Ma sa mana'omia fo'i ina ia suia tupe mai i isi atunu'u mo se tupe (coin) sa fa'aigoaina o le sekeli o le malumalu, lea sa taliaina mo le auaunaga o le malumalu. O fesuia'iga o tupe na maua ai le avanoa mo faiga le fa'amaoni ma le avefa'amalosia i auala leaga, ma sa fa'atuputeleina i le avea ma fefa'ataua'iga fa'alumaina, lea sa avea ma puna o tupe maua i le au faitaulaga.
“O i latou na auai i fefa'ataua'iga na latou mana'omia fa'amalosi tau matua tetele lava mo manu sa fa'atauina, ma sa latou fa'asoaina a latou tupe maua fa'atasi ma le au faitaulaga ma ta'ita'i, o e sa fa'apena ona fa'amau'oaina i latou i tupe a le nu'u.”—The Desire of Ages, 155.
b. Na fa'apefea ona a'afia auaunaga o le malumalu i lenei tulaga? Esekielu 22:26 (vaega mulimuli).
“Na matua tele lava manu sa fasia i le taimi o le Paseka, ma o manu na fa'atauina atu i le malumalu na matua tele lava. O le nunumi na i'u i ai, na fa'ailoa mai ai se maketi pisapisao o manu ae ua le o le malumalu paia o le Atua. Na mafai ona fa'alogoina tauofoga taufa'asese na faia ma le poto leaga, o leo o povi, o le tagi mai o mamoe, o leo malu o lupe, tu'u fa'atasia ma le tatagi mai o tupe ma fefinaua'iga ita. Na matua tele lava le nunumi o lea sa fa'alavelaveina ai i latou sa tapua'i, ma o upu na tautalagia atu i Le e Silisiliese, e le'i lagona ona o le pisapisao o finauga na osofa'ia ai le malumalu.”—Ibid.
Aso Gafua
Ianuari 20
2. AVA I TOTONU O LE FALE O LE ATUA
a. O le a le finagalo o le Atua e fa'atatau i le nofoaga o loo fa'aalia ai Lona fa'atasi mai—ma o le a Lana ulua'i fa'atonuga i le Mauga o Sinai? Esoto 3:1–5; 19:12, 13.
“Ina ua afio ifo Ieova i luga o le Mauga o Sinai, sa fa'apa'iaina ai le nofoaga i Lona fa'atasi mai . . . Na fa'apena ona a'oa'oina le lesona e fa'apea, so'o se mea lava e fa'aalia ai e le Atua Lona fa'atasi mai, e paia fo'i lena nofoaga.”—The Desire of Ages, pp. 155, 156.
b. O le a le finagalo o Keriso i le fa'aleagaina o le malumalu? Ioane 2:15, 16.
“A'o afio atu Iesu i totonu o le malumalu, na Ia maitauina ma malamalama i lea va'aiga atoa lava. Na Ia silasila i fefa'ataua'iga le faamaoni pule faamalosi. Na Ia silasila i le faanoanoa tiga o tagata matitiva, o e sa manatu, a aunoa ma le fa'amaligiina o le toto o le a leai fo'i se fa'amagaloga o a latou agasala. Na Ia silasila atu i le lotoa i fafo o Lona malumalu ua fa'aliliuina i le avea ma nofoaga o fefa'ataua'iga le paia. O le lotoa paia ua avea ma nofoaga tele lava e tasi o fefa'ataua'iga.”—Ibid., p. 157.
“O le savali lemu ifo o Iesu i le sitepu, ma si'itia a'e le sasa faia i maea na ia aveina a'e i Lona ulufale atu i le lotoa, ua Ia fa'atonu atu ai i le vaega o tagata fefa'ataua'i ina ia o ese atu mai i fanua o le malumalu. O le vilivilita'i ma le to'asa tele Na te le'i fa'aalia lava muamua, na Ia fuli atu ai laulau a i latou o loo fesuia'i a latou tupe. Ua pa'u ifo le tupe, ma matua tatagi ai i luga o le foloa ma'a i'ila. E le'i i ai se tasi na loto tele e fesiligia Lana pule. E le'i i ai se tasi na loto tele e fa'atali ina ia fa'aputuputu a'e a latou oa na maua i auala leaga le fa'amaoni. E le sasaina i latou e Iesu i le sasa maea, peita'i, i Lona aao, o lena sasa faigofie e foliga mai e mata'utia e pei o se pelu afi. O le au faigaluega o le malumalu, o faitaulaga fai tala taumatemate e aunoa ma ni fa'amaoniga, o tagata o loo fa'atalanoaina fefa'ataua'iga i le va o i latou e fa'atau atu ma i latou e fa'atau mai, ma i latou e fefa'ataua'i i povi, fa'atasi ai ma a latou mamoe ma povi po'a, ua latou fa'ata'alise ese mai i le nofoaga, ma le manatu e tasi o le sola ese lea mai i le fa'asalaga o Lona fa'atasi ma i latou.”—Ibid., p. 158.
c. O le a le mea na fa'ailoa mai e le gaioiga a Keriso i le fa'amamaina o le malumalu? Malaki 3:1–3.
“O lotoa o le malumalu i Ierusalema, na fa'atumulia i le ta'alili o fefa'ataua'iga le paia, na matua fa'atusalia moni atoa mai ai lava le malumalu o le loto, lea ua fa'aleagaina e ala i le i ai o tu'inanauga o lagona o le tino ma manatu le paia. I le fa'amamaina o le malumalu mai i tagata fa'atau mai ma tagata fa'atau atu, na fa'ailoa atu ai e Iesu le sini o Lana galuega ina ia fa'amamaina le loto mai i le fa'aleagaina i le agasala—mai i fa'anaunauga fa'ale'eleele, o tu'inanauga fa'apito, o masaniga leaga, e fa'aleagaina ai le tagata.”—Ibid., p. 161.
Aso Lua
Ianuari 21
3. O LE FA'ATASI MAI O LE ATUA
a. O le a le ulua'i sini a le Atua i le fa'atuina o Lona afio'aga i le lotolotoi o Ona tagata? Esoto 25:8.
“O le malumalu, lea na fa'atuina e afio ai le Atua, na fuafuaina ina ia avea o se lesona autu mo Isaraelu ma le lalolagi. Na amata mai lava i tausaga o le vavau o le sini lava a le Atua le avea o meaola uma lava na foafoaina, amata mai lava i serafi pupula ma le paia e o'o lava i le tagata, ina ia avea ma malumalu mo le afio ai i totonu o le Atua-foafoa.”—The Desire of Ages, 161.
b. Aisea e fa'aigoaina ai tagata talitonu, o malumalu o le Atua—ma e fa'apefea ona tatau ona tatou fa'atumauina ma le loto atoa le paia o lenei malumalu? 1 Korinito 3:16, 17; Isaia 57:15.
“Talu ai ona o le agasala, o lea na muta ai le avea o le aiga tagata ma malumalu mo le Atua. O le fa'apogisaina ma le fa'aleagaina e le ti'apolo, o le loto o le tagata ua le toe fa'aalia ai le mamalu o le Atua. Peita'i e ala i le fanau mai o le Alo o le Atua i le tino, o le sini a le lagi ua fa'ataunu'uina. Ua afio le Atua i totonu o le aiga tagata, ma e ala i le alofa tunoa e lavea'iina ai, o le loto o le tagata ua toe avea ma Ona malumalu.”—Ibid.
“Afai tatou te talitonu ua lata mai le i'uga o mea uma, 'O a ituaiga tagata e tatau ona i ai outou i talanoaga paia uma ma le amio atua?’
“O tagata ta'itasi uma lava e talitonu moni i le upu moni o le a ia te ia fo'i galuega o lona talitonu moni i le upu moni. O i latou uma o le a finafinau ma ava, ma le le vaivai i a latou taumafaiga ina ia manumaloina tagata ia Keriso. Afai e ulua'i totoina loloto le upu moni i totonu o o latou lava loto, o le a latou sa'ili fo'i e totoina le upu moni i totonu o loto o isi tagata. O le upu moni o loo tele lava ina teuina i totonu o le lotoa aupito i fafo. Aumai le upu moni i totonu o le malumalu aupito i totonu o le loto, ia teu le upu moni i le ogatotonu o lou loto, ma ia puleaina ai le olaga. O le upu a le Atua e tatau ona su'esu'eina ma usita'ia, ona maua loa lea e le loto le malologa ma le filemu ma le olioli, ma o fa'anaunauga o le a taula'i aga'i i le lagi; peita'i a tu'uesea loa le upu moni mai i le olaga, i totonu o le lotoa aupito i fafo, e le o fa'amafanafanaina fo'i le loto i le afi susulu o le agalelei o le Atua.
“O le tapua'iga a Iesu, e tu'ueseina e le to'atele mo ni aso fa'apitoa, poo ni mea tutupu fa'apitoa fo'i, a'o isi taimi e tu'ueseina ma fa'atalale i ai. O le tapula'a tumau o le upu moni e le mo ni nai itula itiiti i le Sapati, poo ni nai gaioiga laiti fo'i o le alofa, peita'i e tatau ona aumaia i totonu o le loto, ma fa'alelei atili ai ma fa'apaiaina ai le amio."—Testimonies for the Church, vol. 5, p. 547.
Aso Lulu
Ianuari 22
4. O LE FA'AMAMAINA O LE MALUMALU OLA
a. O le a se mea e tatau ona tatou iloa e fa'atatau i lo tatou tulaga leai se fesoasoani i lo tatou sa'ili ina ia fa'amamaina le malumalu? Ieremia 2:22; Iopu 14:4.
“E leai se tagata e mafai ona tulia i fafo i lona lava malosi, le vaega tele lava o agaga leaga ua nonofo i totonu o le loto.”—The Desire of Ages, p. 161.
b. O le a le mea lilo e mafai ai ona tula'i i luma o se Atua paia ma se loto ua fa'amamaina? Esekielu 36:25–27; Sakaria 3:3–5.
“O Iakopo na agasala i se agasala tele lava i lana amio ia Esau; peita'i na ia salamo. O lana solitulafono na fa'amagaloina, ma o lana agasala na fa'amama'eseina; o lea na mafai ai ona ia onosa'ia le fa'aaliga o le fa'atasi mai o le Atua. Peita'i so'o se nofoaga lava na o mai ai tagata i luma o le Atua a'o latou fa'apelepeleina ma le loto, le agasala, na fa'aumatiaina lava. I le afio fa'alua mai o Keriso o le a fa'aumatiaina ai tagata amio leaga ‘i le Manava o Lona fofoga,’ ma fa'aumatia ‘i le pupula o Lona afio mai.’ 2 Tesalonia 2:8. O le malamalama o le mamalu o le Atua, lea e foa'iina mai le ola i e amiotonu, o le a fa'aumatiaina ai tagata amioleaga.
“I aso o Ioane le Papatiso, na sauni ai Keriso e fa'aali mai o Ia o Le na te fa'aalia le amio a le Atua. O Lona lava fa'atasi mai o le a fa'aalia ai i tagata a latou agasala. Ana latou le naunau lava ina ia fa'amamaina i latou mai i le agasala, o lea na mafai ai ona latou ulufale atu i le mafutaga ma Ia. E na o i latou lava e mama o latou loto na mafai ona tumau i Ona luma.”—Ibid., p. 108.
“E na o Keriso lava na mafai ona fa'amamaina le malumalu o le loto. Peita'i o le a Ia le fa'amalosia Lona ulufale mai. Na te le afio mai i totonu o le loto e fa'apei ona Ia ulufale atu i le malumalu anamua; peita'i Na te fetalai mai, ‘Fa'auta, Ou te tu i le faitoto'a ma tu'itu'i atu: ai se fa'alogo mai i Lo'u leo, ma tatala mai le faitoto'a, o le a ou ulufale atu ia te ia.’ Fa'aaliga 3:20. O le a Ia afio mai, e le mo na o se aso e tasi; aua ua Ia fetalai mai, ‘O le a Ou nofo i totonu ia i latou, ma Ou savali i totonu ia i latou; . . . o le a fai fo'i i latou Mo'u tagata.’ ‘O le a Ia fa'ato'ilaloina a tatou amioleaga; o le a E lafoa'iina fo'i a latou agasala uma i mea loloto o le sami.’ 2 Korinito 6:16; Mika 7:19. O Lona fa'atasi mai o le a fa'amamaina ma fa'apaiaina ai le tagata, ina ia avea ma malumalu paia mo le Alii, ma 'se afio'aga o le Atua e ala i le Agaga.’ Efeso 2:21, 22.”—Ibid., pp. 161, 162.
“A'o auauna Iesu i totonu o le malumalu i luga, o Ia lava, e ala i Lona Agaga, o le auauna a le ekalesia i luga o le fogaeleele.”—Ibid., p. 166.
Aso Tofi
Ianuari 23
5. FA'AMAMAINA O LE MALUMALU I LE TAIMI LENEI
a. E fa'apefea ona mana'omia e le Atua ta'ita'i o Ona tagata ina ia latou fa'atumauina ma le vilivilita'i le paia o Lona fale? Sapakuka 2:20; Esekielu 44:23.
“O vaega eleele uma o le malumalu o le Atua sa tatau ona manatu e paia. Peita'i i fete'ena'iga mo oa e maua mai, o nei malamalama'aga uma na fa'agaloina uma.
“O faitaulaga ma ta'ita'i na vala'auina ina ia avea ma sui o le Atua i le malo; sa tatau ona latou fa'asa'oina mea sese sa faia i totonu o le lotoa o le malumalu. Sa tatau ona latou tu'uina atu i tagata se fa'ata'ita'iga o le fa'amaoni ma le uiga mutimutivale.”—The Desire of Ages, p. 156.
“E matua moni lava, o le ava mo le fale o le Atua ua toeitiiti lava a mou atoatoa ese atu. O mea paia ma nofoaga paia ua le iloa; o mea paia ma mea fa'asilisiliina fa'alelagi ua le fa'atauaina. . . . Na tu'uina mai e le Atua tulafono o fa'atulagaga, e atoatoa ona lelei ma ma'oti, i Ona tagata anamua. Ua suia ea Lana amio? E le o Ia ea o le Atua Silisiliese ma le malosi e pule i le lagi o lagi? O le a le lelei ea mo i tatou lo tatou faitauina so'o o fa'atonuga ua tu'uina atu e le Atua lava Ia, i tagata Eperu, ina ia mafai ai e i tatou, o e ua mauaina le malamalama o le upu moni mamalu o loo susulu mai i luga ia i tatou, ona tatou fa'ata'ita'iina lo latou ava mo le fale o le Atua?”—Testimonies for the Church, vol. 5, pp. 495, 496.
b. Fa'amatala le manumalo taua e tatau ona maua i le malosi o Keriso. Mataio 5:8; 1 Ioane 3:1–3.
“Ou te vala'au atu i tagata ta'itasi uma o loo fai mai o ia o se atalii o le Atua ina ia aua lava ne'i fa'agaloina lenei upu moni tele, le upu moni lea, tatou te mana'omia le Agaga o le Atua i totonu ia i tatou ina ia mafai ai ona tatou ausia atu le lagi, ma le galuega a Keriso i fafo atu o i tatou ina ia maua ai e i tatou se aia i le tofi o le olaga e fa'avavau.”—Testimonies to Ministers, p 442.
Aso Faraile
Ianuari 24
FESILI TOE FAAMANATU
1. O ai ta'ita'i o fefa'ataua'iga agasala i totonu o le malumalu?
2. O le a le uiga e tatau ona i ai i so'o se tasi e alu atu i luma o le Atua?
3. Fa'amatala le taua fa'aleagaga sa tatau ona i ai i le malumalu i Ierusalema.
4. O le a se mea na fa'ailoa mai e Keriso i le fa'amamaina o le malumalu?
5. O le a le auala e tasi e mafai ona fa'amamaina ai o tatou loto?