Taulaga Sapati Muamua

O le Faigamalo o tagata o Paraguay o se atunu'u lea e si'omia uma e le eleele i Amerika i Saute, o loo tuaoi ai ma Argentina, Bolivia, ma Brazil. O le faitau aofa'i o tagata e tusa ma le 6.1 miliona, 96.1% o lea fuainumera o tagata latou te fa'ailoaina mai o i latou o tagata lotu Kerisiano (88.3% Katoliko ma le 7.8% o isi fa'atuatuaga Kerisiano); 2.6% e leai ni a latou tapua'iga, a'o le vaega o loo totoe e patino i isi tapua'iga pe latou te le'i fa'ailoaina mai fo'i. O le tamaoaiga o le malo e fa'avae tasi i fa'ato'aga—aemaise ai lava fatu o le la'au o le soy—ma i le 50 tausaga talu ai, ua fa'afaileleina fo'i e Paraguay se pisinisi tele lava o le eletise e ola i le vai.

O ulua'i tagata ekalesia SDA Reform Movement sa taunu'u mai iine'i mai i Hungary i tausaga e amata mai i le 1940, ma o le galuega na fa'alauteleina atili i tausaga e amata mai i le 1950 e ala atu i le auaunaga fa'atau tusi, ma mulimuli ane ai i tausaga o le 1970 e ala i le galuega o le togafitiga o ma'i fa'amisionare. O loo i ai i le tatou nei la matou vaega matagofie lava o tagata ekalesia tumu i le fa'atuatua i aai autu.

E tele ni tausaga sa i ai la matou nofoaga autu o le soifua maloloina fa'alenatura sa fa'agaioia i le laumua i le aai o Asunción, ma sa mafai ai ona matou fa'asoaina atu le tala lelei i le tele o tagata ma a'oa'oina ai le soifuaga o tagata totoe o le Atua. O le fesoasoani a le Atua ma la matou vaega o tagata faigaluega agava'a o tomai eseese, o lea matou te fa'amoemoe ai ina ia toe amatalia le fale o auaunaga i le soifua maloloina—peita'i o le taimi lenei, o le auala mo lea auaunaga ia fa'agaioia ai e avea o se auaunaga fa'atala'i i totonu o le aai, fa'atasi ai ma se toe fa'aopoopoga i le nofoaga i le vao ina ia fa'ataunu'uina ai le poloa'iga a le Atua: “ ‘O ese mai i aai. Ia fa'usia tou falema'i, o a outou a'oga, ma ofisa i nofoaga e mamao ese mai i nofoaga o loo sili ona to'atele ai le aofa'i o tagata.’ ”—Selected Messages, bk. 2, p. 357.

O le manatunatu la i lenei sini, na matou maua ai se fasi eleele i se nofoaga matagofie mamao i tua i le vaega o Paraguarí, e tusa ma le 66 km. (41 maila) mai i le laumua. Ua i ai la matou fale tapua'i ma le fale mo le faifeau i luga o lenei eleele, peita'i ua na o le amataga lava lenei. O le sini o le fausia lea o se fale tutotonu mo auaunaga eseese fa'atasi ai ma se nofoaga fa'avae mo le soifua maloloina, a'oga a le ekalesia, fale tapua'i, ma se fale mo le fausiaina o meaai maloloina e tausia ai e le tagata ia lava.

Matou te ole atu i le loto foa'i o lo tatou au uso i le lalolagi atoa ina ia fesoasoani mai ia i matou ina ia fa'ataunu'uina lenei sini. O lo tatou galulue fa'atasi o le a aumaia ai le fa'amalosiaga ma fa'alototeleina ai i le vaega mulimuli e mana'omia e fa'amae'aina ai le galuega. Tatou te fa'alagolago atu i le mana ma le alofa tunoa ofoofogia o le Atua ma tatou te mautinoa o le a fa'amanuia e le Atua taumafaiga o lo tatou au uso tu'ufa'atasi i le lalolagi atoa ina ia fa'amalosia ma fa'alauteleina tala'iga i totonu o lenei vaega o Lona tovine.

O o Outou uso ma tuafafine mai i le Matagaluega i Paraguay