Ulua’i Aso
Mati 9
1. O VAI E FA'AMALOLOINA AI
a. O le a le mafua'aga na o atu ai le tele o tagata tino vaivai i Ierusalema? Ioane 5:2, 3.
b. O le a le talitonuga sa i ai i tagata e faatatau i le vai ta'ele o Petesa? Ioane 5:4.
“I tau faapitoa o le tausaga, o vai o lenei vai ta'ele sa gaepuina, ma sa masani lava ona talitonuina e faapea, o le i'uga lea o malosi fa'ale-atua, ma so'o se tasi lava e muamua o'o i totonu o le vai ina ua mae'a ona gaepuina, o le a faamaloloina mai i soo se fa'ama'i lava sa ia te ia. E selau ma selau tagata mama'i na asiasi atu i lea nofoaga; peitai na matua toatele lava le motu o tagata ina ua gaepu le vai, o lea na latou fa'ataalise atu ai agai i luma, ma soli atu ai i o latou vae tane, fafine, ma tamaiti e sili atu ona vaivai nai lo i latou. E to'atele e le'i mafai ona o'o atu i tafatafa o le vai. O le toatele o i latou na mafai ona o'o atu i ai, na feoti i ona auvai. O fale sa fa'atuina solo i lea nofoaga, ina ia mafai ona puipuia tagata mama'i mai i le vevela i le ao ma le malulu o le po. Sa i ai nisi na momoe ai i le po i nei fa'apaologa, ma tolotolo atu i auvai o le vai mai i lea aso i lea aso, i le faamoemoe le aoga o le fia faamaloloina.”—The Desire of Ages, p. 201.
c. Na faapefea ona amata le talanoaga i le va o Iesu ma le tasi tagata i le vaitaele? Ioane 5:5–7.
Aso Gafua
Mati 10
2. O ITUAIGA ESEESE O TINO MAMA'I UA LE MAFAI ONA FA'AGAIOI
a. O le a le galuega e le mafai ona faia e le tagata na faatonu atu Iesu i le tagata ma'i e le mafai ona gaioi, na te faia—ma o a iuga? Ioane 5:8, 9 (vaega muamua).
“E le o aioi atu Iesu i lenei tagata ma'i ina ia faatino lona faatuatua ia te Ia. E na ona Ia fetalai atu lava, ‘Ina tula'i ia, ave lou moega, ma ia e savali.’ Peita'i o le faatuatua o le tagata sa taofi mau atu i lena upu. O neura ta'itasi ma maso ta'itasi uma na faatumulia i le ola fou, ma o gaioiga maloloina na o'o mai i ona vae ma ona lima pepe. E aunoa ma se fesili na filifili ai lona loto ina ia usita'i i le poloaiga a Keriso, ma o maso uma o lona tino na tali mai i le filifiliga a lona loto. O lona tula'i a'e i ona vae, na ia iloa ai o ia o se tagata malosi.
“E le'i tuuina atu e Iesu ia te ia se mautinoaga o le fesoasoani a le Atua. Sa ono mafai ona faatali le tagata ina ia masalosalo, ma leiloa ese ai lona avanoa e tasi lava o le faamalologa. Peitai sa ia talitonu i le upu a Keriso, ma o lona gaioi i le upu na ia maua ai le malosi.”—The Desire of Ages, 202, 203.
b. O le a le tulaga faaleagaga e o'o i ai tagata ua vavae ese mai ia Keriso? Isaia 1:5, 6; Roma 7:24.
“O le agasala ua vavaeeseina ai i tatou mai i le ola o le Atua. O o tatou ola ua mama'i. O lo tatou lava malosi e le sili atu ai ona mafai ona tatou ola i se olaga faapaiaina, nai lo le tulaga e mafai ai e le tagata tino vaivai ona savali. O loo toatele o loo iloaina le leai o so latou fesoasoani, ma o loo latou fa'anaunau mo lena olaga faaleagaga o le a aumaia ai i latou i le loto gatasi ma le Atua; o loo latou taumafai ma le le aoga ina ia latou maua.”—Ibid., p. 203.
c. O le a le fofo e tasi lava mo se tulaga faapea? Galuega 9:34.
“O le Faaola o loo silasila mai ia i latou na faatauina i Lona toto, ma fetalai mai ma le alofa ma le agalelei le mafaamatalaina, ‘E te fia malolo ea?’ Na te fetalai atu ia te oe ina ia e tulai a'e i le ola maloloina ma le filemu. Aua e te faatali se'i e lagona ua faamaloloina oe. Talitonu i Lana upu, ma o le a faataunuuina. Tu'u atu le malosi fai filifiliga o lou loto i le itu a Keriso. Filifili e auauna ia te Ia, ma o lou gaioi e faataunuuina Lana upu o le a e maua ai le malosi. Tusa lava poo le a le faatinoga leaga, le tu'inanauga sili ona leaga o loo fusifusia ai le agaga ma le tino e ala i le umi ona faamalieina, e mafai e Keriso ma o loo Ia naunau mai e lavea'i. O le a ia foa'i mai le ola i le tagata ua 'oti i soligatulafono.’ Efeso 2:1. O le a Ia fa'asaolotoina le tagata pologa o loo taofia e le vaivai ma faigata ma filifili o le agasala.”—Ibid.
Aso Lua
Mati 11
3. SAVALI I LE OLAGA FOU
a. E faapefea ona fesoasoani Keriso ia i tatou ina ia tatou manumalo? Efeso 2:1–6.
“O le tagata e naunau faalenatura lava o ia ina ia mulimuli i musumusuga a Satani, ma e le mafai ona ia te'ena fa'amanuiaina le fili mata'utia tele seivagana ua afio Keriso le toa silisili manumalo, i totonu ia te ia, ma ta'ita'ia ai ona mana'oga, ma foa'i atu ia te ia le malosi. . . . E sili atu le iloa o Satani nai lo tagata o le Atua, e faatatau i le mana e mafai ona latou maua e faatoilalo ai ia te ia pe a i ai lo latou malosi i totonu ia Keriso. A latou aioi atu ma le loto maulalo i le Toa malosi mo le fesoasoani, o le tagata e sili ona vaivai i le upu moni, a faalagolago mausali atu ia Keriso, e mafai ona ia tulia manumalo Satani ma ana 'au uma lava.”—Testimonies for the Church, vol. 1, p. 341.
“E tatau ona tatou a'oa'o mai ia Keriso. E tatau ona tatou iloa poo ai o Ia ia i latou ua Ia toe faatauina mai. E tatau ona tatou iloa, e ala i le talitonuga ia te Ia, o lo tatou avanoa sili ona taua lo tatou tofusia i le natura o le Atua, ma faapena ona tatou sosola ese ai mai i le amio leaga o loo i le lalolagi e ala i le tuinanau. Ona fufuluina ai lea o i tatou mai i agasala uma, o mea leaga uma o le amio. E le tatau ona tatou faatumauina se uiga agasala e tasi. . . .
“A'o tatou tofusia i le natura o le Atua, ua vavaeeseina loa mai i le amio, uiga o le amio sese na tatou fananau mai ma i tatou ma uiga leaga na fausia a'e e i tatou lava, ma ua faia i tatou o se mana ola mo le lelei. O lo tatou a'oa'o e le aunoa mai i le Faia'oga faaleatua, ma tofusia ai i aso ta'itasi i Lona natura, tatou te galulue faatasi ai ma le Atua i le faatoilaloina o faaosoosoga a Satani. E galue le Atua, ae galue foi le tagata, ina ia tasi le tagata ma Keriso e faapei ona tasi Keriso ma le Atua. Ona tatou nonofo faatasi ai lea ma Keriso i nofoaga faalelagi. O le mafaufau ua malolo i le filemu ma le mautinoaga i totonu ia Iesu..”—The Review and Herald, April 24, 1900.
b. Faamatala le filemu e o'o mai e ala i le malosi mai ia Keriso. . Roma 8:3–6.
“O tamaiti ta'itasi uma e ola i le ola o lona tama. Afai o outou o fanau a le Atua, ua fanau mai e Lona Agaga, ua outou ola i le ola o le Atua. . . . [Ma] o le ola o Iesu ua faaalia 'i o tatou tino augavale’ (2 Korinito 4:11). O lena ola i totonu ia te oe o le a fanau mai ai le amio lava lea e tasi ma faaalia ai galuega lava ia e faapei ona faia i totonu ia te Ia. O le a faapena ona e loto gatasi ma poloaiga ta'itasi uma lava o Lana tulafono; aua 'o le tulafono a Ieova e atoatoa ona lelei, e toe faafo'isia ai le agaga.’ Salamo 19:7. E ala i le alofa, ‘o le amiotonu a le tulafono’ o le a ‘faataunu'uina i totonu ia i tatou, o e e le o savavali i la le tino, ae i la le Agaga.’ Roma 8:4.”—Thoughts from the Mount of Blessing, p. 78.
Aso Lulu
Mati 12
4. O LE ITA O FARESAIO
a. O le le amanaiaina o le faamanuiaga na foa'iina atu i le tagata ma'i, aisea na feita ai le au Faresaio? Ioane 5:9 (vaega mulimuli), 10.
“A'o faataalise atu [le tagata pipili ua toe faamaloloina] i lona ala i laasaga mausali sa'oloto, ma vivii i le Atua ma olioli i lona malosi fou ua maua, na ia fetaia'i ma nisi o le au Faresaio, ma na ia ta'u atu loa ia i latou lona faamalologa. Na ia matua ofo i le uiga faaleano na latou faalogo mai ai i lana tala.
“O muaulu faanunumi na latou fa'alavelave mai ai ia te ia, ma fesili pe aisea ua ia aveina ai lona moega i le Aso Sapati. Na latou faamanatu atu ma le saua ia te ia e faapea, e le'i tusa ma le tulafono le tauaveina o avega i le aso o Ieova. I lona olioli na galo ai i le tagata o le Sapati le aso lea; ae na te le'i lagonaina se lagona o le fa'asalaga mo lona usitai i le faatonuga a Le sa i ai lea ituaiga mana mai i le Atua. Na ia tali atu ma le loto tele, ‘O Le na faamalolo mai ia te a'u, o Ia lava na fetalai mai ia te a'u, Ave lou moega, ma ia e savali.’ Na latou fesili poo ai na faia lenei mea, peita'i na te le'i mafai ona ta'u atu. O nei ta'ita'i na latou iloa lelei lava e na o le To'atasi lava na fa'ailoaina mai na mafai ona Ia faia lenei vavega; peitai na latou mananao i faamaoniga tu'usa'o e iloa ai o Iesu, ina ia mafai ai ona latou fa'asala ia te Ia e faapei o se tagata soli Sapati. I la latou faamasinoga e le'i gata ina Ia talepeina le tulafono i Lona faamaloloina o le tagata ma'i i le Sapati, ae ua Ia faia fo'i le solitulafono o le le migao i Lona faatonu atu ia te ia ina ia ave lona moega.”—The Desire of Ages, p. 203, 204.
b. O le a se mea ua fa'aliliuina i ai e tagata Iutaia le Sapati? Mataio 23:4.
“O tagata Iutaia na latou matua fa'aleagaina lava le tulafono o lea ua latou faia ai le tulafono o se amo o le pologa. O o latou manaoga e leai ni uiga na avea ma faatusa i le lotolotoi o isi malo. Na faapitoa lava ona si'omia le Sapati e ituaiga tulafono eseese e leai ni uiga na fa'asaina ai. E le'i avea le Sapati o se fiafiaga ia i latou, o le aso paia o Ieova, ma mamalu. O tusi upu ma faresaio sa latou faia le tausiaina o le Sapati o se avega mamafatu e le mafai ona tauaveina. O se tagata Iutaia e le'i faatagaina e tutuina se afi po'o se moliga'o foi i le Sapati. O lona iuga, na faalagolago ai le nuu i tagata o nu'u ese mo le tele o sauniga ia sa fa'asa e a latou tulafono ona latou faia mo i latou lava. Latou te le'i manatunatu loloto ma le faautauta faapea, afai na agasala nei gaioiga, o i latou sa fa'afaigaluegaina isi e faatino nei gaioiga, sa tutusa lava lo latou agasala e peiseai na latou faia e i latou lava le galuega. Sa latou manatu o le faaolataga e mo na o tagata Iutaia, ma o olaga o isi tagata uma, lea ua leai se faamoemoe, e le'i mafai ona loloto ifo le fa'aleagaina nai lo le leaga ua i ai. Peitai e le'i tu'uina mai e le Atua se poloaiga e le mafai ona usita'ia e tagata uma. O Ana tulafono e le faatagaina ai se tulafono e leai sona mafuaaga pe faapito fo'i.”—Ibid., p. 204.
Aso Tofi
Mati 13
5. O LE SAPATI MA LONA SINI
a. Na faapefea ona fesoota'i atu Iesu i le tulafono a le Atua ma le Sapati fo'i? Isaia 42:21.
“Na afio mai Iesu e 'si'itia le tulafono, ma ia faamamaluina.’ E le'i afio mai e faaitiitia lona mamalu, ae ia siitia fa'asilisiliina. . . . Na Ia afio mai e faasa'oloto le Sapati mai i na manaoga mamafatu lea ua faia ai le Sapati ma malaia ae ua le o se faamanuiaga.”—The Desire of Ages, p. 206.
b. O a mea e tatau ona fai, ma mea e le tatau ona faia i le Sapati? Esoto 20:8–11.
“I le lotolotoi o tagata puapuagatia i le vaitaele, na filifilia ai e [Keriso] le ma'i sili ona leaga e faatino i ai Lona mana fa'amalolo, ma faatonu atu i le tagata ina ia ave atu lona moega i totonu o le aai ina ia fa'asilasila aloaia atu ai le galuega tele ua galuea'iina ia te ia. O lenei tulaga o le a fa'atuina mai ai le fesili e faatatau i mea na fa'ataga ona faia i le Sapati, ma o le a tatalaina ai le ala mo Ia Na te fa'aleaogaina ai tulafono a tagata Iutaia e faatatau i le aso o le Alii, ma fa'ailoa atu ai le le aoga o a latou aganuu.
“Na fa'ailoa atu e Iesu ia i latou o le galuega o le fa'amaloloina o tagata mama'i sa loto gatasi ma tulafono o le Sapati. Sa loto gatasi ma le galuega a agelu a le Atua, o e o loo o ifo ma a'ea'e i le va o le lagi ma le lalolagi e auauna i le aiga tagata puapuagatia. . . .
“Ma e i ai foi le galuega a le tagata e faatino i lenei aso. O mea e aoga mo le ola e tatau ona faia, o tagata mama'i e tatau ona tausia, o manaoga o e mafatia e tatau ona foa'iina i ai. O le a le fa'asaoina lava le tagata e faatalale i le fesoasoani i mafatiaga i le Sapati. O le aso paia malolo o le Atua na faia mo le tagata, ma o gaioiga o le alofa e matua loto gatasi lava ma le mafuaaga na faia ai. E le finagalo le Atua i Ana meaola uma na faia ina ia puapuagatia i le tiga i se itula e tasi lea e mafai ona fesoasoani i ai i le Sapati poo so'o se isi fo'i aso.”—Ibid., pp. 206, 207.
Aso Faraile
Mati 14
FESILI TOE FAAMANATU
1. O le a le talitonuga sa ta'atele e faatatau i le vaita'ele o Petesa?
2. O le a le ma'i faapitoa na tosina i ai le finagalo o Keriso?
3. E faapefea ona mafai ona faamaloloina lo tatou vaivai faaleagaga?
4. O le a se mea na matua feita tele ai tagata Iutaia e faatatau i le faamalologa faavavega?
5. O a galuega e loto gatasi ma le poloaiga o le Sapati?