Ulua’i Aso
Fepuari 23
1. OLA FOU, O AUTU FOU E SILI ONA TAUA
a. O le iloaina e le fafine Samaria o Iesu o le Mesia lea, o le a le mea na ia faia i le taimi lava lea? Ioane 4:28, 29.
“Na faatumulia le fafine i le olioli tele a'o ia faalogo atu i upu a Keriso. O lea faaaliga ofoofogia na toeitiiti lava a le mafai ona ia onosa'ia. O lona tuua o lana fagu e utu ai vai, o lea na toe fo'i atu ai i le aai, ina ia avatu le feau i isi. Na silafia e Iesu le mafuaaga na ia alu ai. O le tuua o lana fagu vai na tautala manino mai lava i le aafiaga o Ana upu. O le faanaunauga finafinau lava o lona loto, le mauaina mai o le vai ola; o lea na galo ai ia te ia le mafuaaga na alu ai i le vaieli, na galo ia te ia le fia taumafa o le Faaola, lea sa ia manao e faamalieina. O lona loto na faatumulia i le fiafia, o lea na ia faataalise atu ai i lona ala, ina ia fa'ailoa atu i isi le malamalama taua na ia maua.”—The Desire of Ages, p. 191.
b. O le a le mea na faia e tagata o Sukara ina ua latou faalogo i le molimau a se tasi o o latou tagata nu'u? Ioane 4:30.
“O upu [a le fafine] na pa'i atu i o latou loto. Sa i ai ni uiga fou i ona foliga, o se suiga i lona tagata va'aia atoatoa lava i fafo. Na latou naunau e vaai ia Iesu.”—Ibid.
Aso Gafua
Fepuari 24
2. O LE SELESELEGA MA I LATOU E SELESELEINA
a. A'o silasila atu Iesu i tagata o Sukara o o mai, o le a sana fetalaiga i Ona so'o? Ioane 4:35–38.
“ ‘O le e selesele,’ o Lana fetalaiga lea, ‘na te maua le totogi, ma faapotopoto mai fua e o'o atu ai i le ola e faavavau: ina ia olioli faatasi ai le e lulu ma le e selesele. Ma o iinei ua moni ai lenei faaupuga, o le Tasi e lulu, a'o le isi e selesele.’ O iinei ua faasino mai ai e Keriso le auaunaga paia o loo nofo aitalafu ai i le Atua i latou e taliaina le tala lelei. E tatau ona avea i latou ma Ana mea faigaluega ola. Na te manaomia le latou auaunaga ta'ito'atasi. Ma, pe tatou te lulu pe selesele foi, o loo tatou galulue mo le Atua. O le tasi na te faasalalauina le fatu; a'o le isi na te faaputuina mai i totonu le seleselega; ma o le e lulu ma le e selesele la te maua uma o la totogi. La te olioli faatasi i le taui o a la galuega.”—The Desire of Ages, pp. 191, 192.
b. O le a le aafiaga o le molimau a le fafine e faatatau ia Keriso—ma o le a se mea e mafai ona tatou a'oa'oina mai i le aafiaga na faia ai? Ioane 4:39.
“A faatasia atu i tatou ia Keriso, ua ia i tatou le mafaufau o Keriso. O le olaga mama ma le alofa e susulu mai i le amio, o le agamalu ma le upu moni e puleaina le olaga. O uiga tonu lava o foliga ua suia. O Keriso o loo afio i totonu o le loto Na te aumaia se mana e liua ai, ma o foliga i fafo na te molimau atu i le filemu ma le olioli o loo pule aoao i totonu. Tatou te inuina le alofa o Keriso, e faapei ona aumaia e le lala le meaai mai i le vine. Afai ua faapipi'i atu i tatou i totonu ia Keriso, afai o le filo i lea filo ua fa'atasia atu ai i tatou i le Vine Ola, o le a tatou tu'uina atu le faamaoniga o lena tulaga e ala i le fuaina o taufuifui taumasuasua o fua ola. Afai o loo tatou feso'ota'i atu i le Malamalama, o le a avea i tatou ma auala o le malamalama, ma o a tatou upu ma galuega o le a tatou lafoia atu ai le malamalama i le lalolagi. . . .
“O lo tatou vaavaai tatou te liua ai; ma a'o tatou manatunatu i le atoatoaga o le Tapula'a fa'alelagi, o le a tatou fa'anaunau ina ia tatou liua atoatoa, ma faafouina i le faatusa o Lona olaga mama. O le faatuatua i le Alo o le Atua lea e faia ai le liuaga i le amio, ma o le tamaitiiti o le toasa ua avea ma atalii o le Atua. Ua ia pasi mai i le oti agai atu i le ola; ua avea o ia ma tagata fa'aleagaga ma ua iloaina mea faaleagaga. O le poto o le Atua e faamalamalamaina ai lona mafaufau, ma na te silafia mea matagofie i totonu o Lana tulafono. A'o liua se tagata ona o le upu moni, o le galuega o le liuaga o le amio e aga'i pea i luma.”—Selected Messages, bk. 1, pp. 337, 338.
Aso Lua
Fepuari 25
3. O LE I AI O IESU I SAMARIA
a. O le a le olega na tuuina atu e tagata Samaria ia Iesu—ma aisea? Ioane 4:40.
b. Fa'amatala le iuga o le taimi sa i ai Keriso i Samaria. Ioane 4:41.
“I upu na fetalaia atu i le fafine i le vaieli, sa luluina ai fatu lelei, ma na matua vave lava ona maua le seleselega. O tagata Samaria na o mai ma faalogo ia Iesu, ma talitonu ia te Ia. O lo latou lolofi faataamilo atu ia te Ia i le vaieli, na latou tu'ufesili atu ia te Ia, ma na latou talia ma le naunau Lona fa'amatalaina o mea e tele sa lilo ia i latou. A'o latou faalogo, na amata ona matafi ese lo latou nunumi le malamalama. O i latou sa faapei o ni tagata sa i totonu o le pogisa tele lava na latou mulimuli a'e i se ave faafuase'i o le malamalama se'ia o'o ina latou o'o i le ao. Peita'i e le'i faamalieina i latou i lenei talanoaga. Na latou mananao ina ia fa'alogo atu pea i Ana fetalaiga, ma ia faalogo foi a latou uo i lenei faia'oga ofoofogia. Na latou valaauliaina o Ia ia maliu atu i lo latou aai, ma aioi atu ia te Ia ia nonofo pea ma i latou. E lua aso sa nofo ai o Ia i Samaria, ma e matua to'atele atu isi tagata na talitonu ia te Ia.”—The Desire of Ages, p. 192.
“Na faaalia atu e Keriso le Atua i Ona so'o i se auala na faataunuuina ai i totonu o o latou loto se galuega faapitoa, e faapei o le galuega lea ua leva ona Ia augani mai ia i tatou ia tatou faatagaina o Ia Na te faia i totonu o o tatou loto. O loo toatele ua leiloa ese mai ia i latou le iloa e faatatau i le mana ola o le faataitaiga a le Faaola. Ua latou le iloa o Ia, o se tagata faigaluega agamalu, ma le faafitia o ia e ia lava. O le mea latou te manaomia o lo latou vaavaai lea ia Iesu. Tatou te manaomia i aso taitasi le faaaliga o Lona faatasi mai.”—Reflecting Christ, p. 302.
c. O le a se mea na faailoa mai e le toatele o tagata Samaria ina ua uma ona latou talia Iesu o Ia o le Mesia? Ioane 4:42.
“Na inoino Faresaio i le olaga faigofie o Iesu. Na latou le amanaia Ana vavega, ma na latou manana'o mai mo se faailoga e iloa ai o Ia o le Alo o le Atua. Peitai o tagata Samaria latou te le'i manana'o i se faailoga, e le'i faia foi e Iesu ni vavega i le lotolotoi o i latou, se'ivagana ai le fa'aalia atu o mea lilo o le olaga o le fafine ia te ia i le vaieli. Ae e toatele na talia o Ia. I lo latou olioliga fou na latou fai atu ai i le fafine, ‘O lenei ua matou talitonu, e le ona o lau upu: aua ua matou faalogo lava i matou ia te Ia, ma ua matou iloa o le Keriso lava lenei, le Faaola o le lalolagi.’ ”—The Desire of Ages, pp. 192, 193.
Aso Lulu
Fepuari 26
4. O LE MANA O VALOAGA
a. O le a le valoaga na faavae i ai e tagata Samaria lo latou faatuatua i le Mesia na folafolaina mai? Kenese 49:10.
“Sa talitonu tagata Samaria o le a afio mai le Mesia o Ia o le Faaola, e le gata o Ia o le Faaola o tagata Iutaia, ae o Ia fo'i o le Faaola o le lalolagi. Na valoia mai o ia e le Agaga Paia e ala mai ia Mose e faapea o Ia o le perofeta na auina mai i le Atua. Na faailoa mai e ala mai ia Iakopo e faapea, o le a faapotopoto atu tagata ia te Ia; ma sa faailoa mai foi e ala mai ia Aperaamo, oi totonu ia te Ia o le a manuia ai malo uma o le lalolagi. O mau nei sa faavae ai le faatuatua o tagata o Samaria i le Mesia. Talu ai ona o tagata Iutaia na latou faauigaseseina perofeta na mulimuli atu, ma latou fa'atatauina ai le mamalu o le toe afio fa'alua mai o Keriso i Lona ulua'i afio mai, o lea na ta'ita'ia ai tagata Samaria ina ia latou faaleaogaina tusitusiga paia uma lava seivagana ai tusitusiga na tuuina mai e ala mai ia Mose. Peitai a'o tafiesea e le Faaola nei fa'auigaga sese, e toatele na taliaina valoaga mulimuli ane ma upu a Keriso lava Ia e faatatau i le malo o le Atua.”—The Desire of Ages, p. 193.
b. O le a se mea e mafai ona tatou a'oa'oina i le taimi lenei mai i le uiga loto matala o tagata Samaria i le upu moni? Failaūga 11:4, 5.
“O itu uma o le lalolagi o tane ma fafine o loo va'avaai a'e ma le faanaunau i le lagi. O tatalo ma loimata ma fesili o loo alu a'e i luga mai i tagata o loo saili mo le malamalama, mo le alofa tunoa, ma le Agaga Paia. E toatele ua latalata ina ulufale atu i le malo, o loo na ona fa'atalitali lava ina ia fa'apotopotoina mai i totonu.”—The Acts of the Apostles, p. 109.
c. O le a se tulaga e o'o i ai tagata ta'ito'atasi pe a latou talia moni lava Keriso? Aumai faataitaiga. Mareko 5:18–20; 7:31–37.
“O le Agaga o [Keriso] o le a fausiaina ai i totonu o le tagata malosi uma lava o le a faaleleia ai le amio ma faamamaluina ai le natura. O le a fausiaina a'e ai i luga le tagata mo le viiga o le Atua i le tino ma le loto ma le agaga. . . . Ma o tagata ua faaleagaina i le avea ma meafaigaluega a Satani, o loo faaliliuina pea e ala i le mana o Keriso ia avea ma avefeau a le amiotonu, ma auina atu e le Alo o le Atua e ta'u atu 'mea tetele ua faia e Ieova mo oe, ma ua Ia alofa atu ia te oe.’ ”—The Desire of Ages, p. 341.
Aso Tofi
Fepuari 27
5. MISIONARE KERISIANO
a. O a lesona tatou te a'oa'oina mai i le fafine Samaria? 1 Ioane 1:1–3; 2 Korinito 5:14 (vaega muamua).
“O le taimi lava na maua ai e le fafine Samaria le Faaola, na ia aumaia loa isi tagata ia te Ia. Na ia faamaonia o ia o se misionare sili atu ona aoga nai lo Ona lava so'o. E le'i i ai ma se mea na vaaia e le au so'o i Samaria e faailoa mai ai o se laueleele lea e faalototeleina ai. O o latou manatu sa taulai atu i se galuega tele e tatau ona faia i le lumanai. Latou te le'i iloa, o o latou itu uma o se seleselega lea e tatau ona faapotopotoina mai. Peitai, e ala atu i le fafine lea sa latou inosia, na aumaia ai se aai atoa lava e faalogo atu i le Faaola. Na ia avatua le malamalama i le taimi lava lena i tagata o lona malo.
“O lenei fafine o loo faatusalia mai le galuea'iina o se faatuatua faatinoina i totonu ia Keriso. O so'o moni ta'itasi uma lava, ua fanau atu i totonu o le malo o le Atua e avea ma misionare. O le e inu i le vai ola ua avea fo'i o ia ma vaipuna o le ola. O le ua taliaina le vai ola ua avea fo'i o ia o se tasi na te foa'iina atu le vai ola. O le alofa tunoa o Keriso i totonu o le loto e faapei o se vaipuna i totonu o le eleele toafa, o loo puna a'e e toe faafouina ai tagata uma, ma vilivilitai ai i latou ua sauni e fano, ina ia latou inu i le vai o le ola.”—The Desire of Ages, p. 195.
b. E faapefea ona tatau ona faamalosia i tatou i le aso lenei i lenei tulaga? Failaūga 11:6.
“Tatou te le manaomia tatou te o i atunuu ese ina ia avea ai i tatou ma misionare mo le Atua. O i latou uma lava o loo i o tatou itu uma o laufanua ia ua 'papa'e uma ina ia seleseleina,’ ma, so'o se tasi lava e mana'o ai, e mafai ona ia faapotopoto mai ‘fua e o'o atu ai i le ola e faavavau.’ Ua valaau le Atua i le toatele i Battle Creek o e o loo aga'i ina feoti i le paie faaleagaga ina ia latou o i nofoaga o loo mana'omia ai la latou galuega i totonu o Lana galuega. Ia outou o ese ma siitia ese mai i Battle Creek, tusa lava pe afai e te manaomia ai lou faasatauroina o oe lava i mea tau tupe. Alu i se isi nofoaga ina ia faia ai oe o se faamanuiaga i isi. Alu i se nofoaga e mafai ona e faamalosi ai i se ekalesia vaivai. Ia fa'aaoga malosi ua foa'i atu e le Atua ia te oe.”—Testimonies for the Church, vol. 5, p. 187.
Aso Faraile
Fepuari 28
FESILI TOE FAAMANATU
1. O le a le mea na faia e le fafine ina ua ia iloa o Iesu e na o Ia lava le Faaola?
2. Faamatala poo le a le uiga o fanua ua pa'epa'e mai mo le seleselega.
3. E fia aso na nofo ai Iesu faatasi ma tagata Samaria?
4. O le a le molimau na faia e tagata Samaria e faatatau ia Iesu?
5. O le a le mea e tupu i tagata i le taimi lava latou te talia ai Iesu i o latou olaga?