Ulua’i Aso
Mati 16
1. E TUTUSA MA LE ATUA
a. E ese mai i le faamalologa o le tagata ua pe le tino, i le Sapati, o le a le isi mafuaaga na feita ai tagata Iutaia ia Iesu? Ioane 5:17, 18.
“Na fai mai Iesu e tutusa a La aia ma le Atua. . . .
“O le malo atoa lava o tagata Iutaia na latou fa'aigoaina le Atua o lo latou Tama, o lea na semanu latou te le feita tele ai faapea, pe ana faapea e faatusalia mai e Keriso Ia lava, o loo tulai i le so'otaga lava lea e tasi ma le Atua. Peitai na latou tu'ua'iina o Ia i le upu leaga, ma faailoa mai ai sa latou malamalama ia te Ia i Lona faia o lenei faaupuga i lona uiga silisili lava.”—The Desire of Ages, pp. 207, 208.
b. Na faapefea ona ta'uamiotonuina e Keriso le pule a poloaiga a le Atua e sili a'e nai lo aganu'u faaletagata? Mataio 15:1–9, 13.
“O nei fili o Keriso e le'i i ai ni a latou finauga e fa'amalieina ai upu moni na Ia tu'uina mai i o latou mafaufau. Sa na ona mafai lava ona latou aumaia a latou aganuu ma tu ma aga masani, ma o nei aganuu na foliga mai na vaivai ma le aoga pe a faatusatusa atu i finauga na aumaia e Iesu mai i le upu a le Atua ma le taamilosaga le mafaamutalia a le natura.”—Ibid., p. 208.
Aso Gafua
Mati 17
2. TASI MA LE TAMA
a. Na faapefea ona faamatalaina e Iesu Lana so'otaga ma le Tama? Ioane 5:19, 20.
b. O le a le pule ma le mana e patino i le Tama na faailoa mai e Keriso sa ia te Ia fo'i? Ioane 5:21–23.
“O faitaulaga ma ta'ita'i na latou siitia a'e i latou o ni faamasino e faitioina le galuega a Keriso, peitai na Ia faailoa atu o Ia o lo latou faamasino, ma o le faamasino fo'i o le lalolagi atoa. O le lalolagi ua tu'uina atu ia Keriso, ma ua o'o mai faamanuiaga ta'itasi uma lava mai i le Atua e ala mai ia te Ia i le aiga tagata pa'u. O Ia o le Fa'aola a'o le'i fanau mai i le tino e faapei lava ona avea o Ia ma Faaola ina ua mavae Lona fanau mai i le tino. O le taimi lava na i ai le agasala, sa i ai foi ma le Faaola. Ua Ia foai mai le malamalama ma le ola i tagata uma, ma e tusa ai ma le tele o le malamalama ua foa'iina mai, e faapena fo'i ona faamasinoina ai tagata ta'itasi uma. Ma o Le ua foa'iina mai le malamalama, o Le ua mulimuli i le tagata ma olega sili ona agalelei, ma saili ina ia manumaloina mai i le agasala aga'i atu i le faapaiaina, o Ia lava lea e to'atasi o le fautua ma le faamasino o le tagata.”—The Desire of Ages, p. 210.
c. Fa'amatala le suiga i uiga e tutupu mai a'o tatou iloaina o Keriso o Ia o lo tatou faamasino. Roma 2:1–3; Mataio 7:1.
“O le na te tu'inanau i le faamalieina o se uiga faitio, faamasino, ma sa'ili'ili masei i isi, o loo agasala o ia i le agasala e sili atu ona tele nai lo le tagata lea o loo ia tu'ua'iina, aua e le gata ina ia faia lea lava agasala e tasi, peita'i na te faaopoopo fo'i i ai le fa'amaualuga tele lava ma le so'ona faitio, faamasino ma su'esu'e masei.
“O Keriso e na o Ia lava le tapula'a moni o le amio, ma o le tagata na te faatuina a'e o ia e fai ma tapula'a mo isi, o loo ia tu'uina o ia i le tulaga o Keriso. Ma, talu ai ona ua 'uma ona tu'uina atu e le Tama le faamasinoga uma i le Alo’ (Ioane 5:22), so'o se tasi lava e le fefe e faamasino mafuaaga o gaioiga a isi, o loo ia ave faamalosia le aia a le Alo o le Atua. O nei tagata-fia-fa'amasino, faitio, o loo latou tu'uina i latou i le itu a le anetikeriso, 'o le e tete'e atu ma faamaualugaina o ia e ia e sili nai lo mea uma e ta'u-atuaina, poo mea uma fo'i e ifo i ai; o lea ua nofo ai o ia e faapei o le Atua i totonu o le malumalu o le Atua, ma fa'ailoa mai o ia lava o le Atua.’ 2 Tesalonia 2:4.”—Thoughts from the Mount of Blessing, pp. 125, 126.
“E le mafai ona tatou faitauina le loto. O i tatou lava e sese, tatou te le agavaa i lo tatou faamasino i isi. O tagata e muta lo latou ola, e na o le va'aiga i fafo e mafai ona latou faamasinoina. E na o Ia lava Na te silafia vaipuna lilo o gaioiga, ma Na te a'oa'i ma le alofa ma le mutimutivale, ua tuuina atu i ai Na te filifilia le iuga o tagata ta'itasi uma.”—Ibid., p. 124.
Aso Lua
Mati 18
3. O LE MAUTINOAGA SILI ONA TAUA
a. O le a le mautinoaga ua tuuina atu i tagata talitonu naunau ta'itasi uma i totonu ia Keriso? Ioane 5:24.
“I faatonuga ta'itasi uma ma folafolaga ta'itasi uma a le upu a le Atua, o loo i ai le mana, o le ola tonu lava o le Atua, lea e mafai ona faataunuuina ai le faatonuga ma le folafolaga. O le na te talia le upu e ala i le faatuatua o loo ia taliaina le ola tonu lava ma le amio a le Atua.”—Christ’s Object Lessons, p. 38.
“O le galuega tele ua faia mo le tagata agasala ua pona ma faaleagaina e le agasala, o le galuega lea o le ta'uamiotonuina. Ua ta'uamiotonuina o ia e Le na te fetalaia maia le upu moni. E foa'i mai e le Alii i le tagata talitonu le amiotonu a Keriso ma ta'uamiotonuina o ia i luma o le iunivesa. Na te tauaveina atu ana agasala ia Iesu, le sui o le tagata agasala, puluvaga ma lona mautinoaga. Na te tu'uina i luga o Keriso le amio leaga a tagata ta'itasi uma lava e talitonu. ‘Ua Ia faia o Ia ma agasala mo i tatou, o Le na le'i iloa le agasala; ina ia faia i tatou ma amiotonu a le Atua i totonu ia te Ia’ (2 Korinito 5:21). . . .
“E ui lava ina tatou i lalo o le faasalaga a le tulafono i le avea o i tatou ma tagata agasala, peitai o Keriso i Lona usitai i le tulafono, ua Ia maua ai le amio faapaiaina o Lana lava amiotonu. O le auala e maua ai le amiotonu a Keriso, e tatau i le tagata ona ia iloa poo le a lena salamo lea e galuea'iina ai se suiga loloto o le mafaufau ma le agaga ma gaioiga. O le galuega o le liuaga e tatau ona amata i le loto, ma faaalia ai lona mana e ala i tomai ta'itasi o le tagata ola; peitai e le mafai e le tagata ona ia amatalia e ia lava se salamo fa'apenei, ma e faato'a mafai lava ona ia iloaina e ala atu ia Keriso, o Le na afio a'e i luga, ma ta'ita'i faatagata o taua, ma foa'i meaalofa i tagata.”—Selected Messages, bk. 1, pp. 392, 393.
b. O a aia fa'apitoa ia sa fa'aalia e Keriso sa ia te Ia? Ioane 5:25–29.
“Talu ai ona sa Ia tofo i toega o le ipu o puapuaga ma faaosoosoga faaletagata, ma malamalama ai i vaivaiga ma agasala a tagata; talu ai ona sa Ia te'ena ma le manumalo mo i tatou, fa'aosoosoga a Satani, ma o le a Ia a'oa'i ma le amiotonu ma le alofa i tagata na faamaligiina Lona lava toto ina ia lavea'i—talu ai ona o lenei, o lea ua filifilia ai le Atalii o le tagata Na te faia le faamasinoga.”—The Desire of Ages, p. 210.
“O Keriso ua tu'uina atu i ai le mana e foa'i mai ai le ola i mea ola uma na foafoaina.”—Selected Messages, bk. 1, p. 249.
Aso Lulu
Mati 19
4. IESU, LE AUTU O LE TUSI PAIA
a. Na faapefea ona faamatala e Iesu le mafuaaga o le le talitonu o tagata Iutaia? Ioane 5:37, 38.
“E aunoa ma Lona faatoese mo le gaioiga na latou faitio i ai, poo le faamatalaina foi o Lana sini i Lona faia faapea, na liliu atu Iesu i ta'ita'i, ona avea ai lea o Le na faitioina, ua avea ma Le ua faitio atu. Na Ia a'oa'iina i latou ona o le ma'a'a o o latou loto, ma lo latou le iloaina o upu o le Tusi Paia. Na Ia faailoa atu sa latou te'ena le upu a le Atua, ona o lo latou te'ena o Le na auina mai e le Atua.”—The Desire of Ages, p. 211.
b. Aisea na le malamalama ai tagata Iutaia i le Tusi Paia? Ioane 5:39, 40.
“I laupepa ta'itasi uma lava, pe o le talaaga, poo poloaiga, poo le valoaga fo'i, o Tusi o le Feagaiga Tuai ua faamalamalamaina i le pupula o le Alo o le Atua. Talu ai ona o le Tusi o le Tusi Paia na fa'amausaliina e le Atua, o le faatulagaga atoa lava o le tapuaiga faa-Iutaia o se valoaga tu'ufa'atasia lea o le tala lelei. O Keriso 'o loo molimau i ai perofeta uma lava.’ Galuega 10:43. Amata mai lava i le folafolaga na tu'uina atu ia Atamu, e aga'i mai i lalo i le fa'asologa o le au pateriaka ma le tamaoaiga faaletulafono, na faamanino mai e le malamalama o le lagi la'asaga o le Fa'aola. O tagata va'ai na latou va'aia le Fetu o Peteleema, o Sailo o le a maliu mai, a'o pasi faataalise ane mea tutupu o le lumana'i i o latou luma i fa'asologa uiga lilo. O manu ta'itasi uma lava na fasia sa faailoa mai ai lava le maliu o Keriso. I asu ta'itasi uma lava o mea manogi na alu a'e ai fo'i i luga Lana amiotonu. O leo o pu o iupeli ta'itasi uma lava na fa'ailoa mai ai Lona suafa. O le mea lilo mata'utia o le nofoaga sili ona paia na afio ai iina Lona pupula.
“O tagata Iutaia sa i ai ia i latou le Tusi Paia, ma sa latou manatu e faapea, o lo latou iloa i le vaaiga i fafo e faatatau i le upu na latou maua ai le ola e faavavau. Peitai na fetalai atu Iesu, ‘E le o nofo Lana upu i totonu ia te outou.' O lo latou te'ena o Keriso i Lana upu, na latou te'ena moni ai fo'i o Ia. Na Ia fetalai mai, ‘Tou te le fia o mai ia te A'u ina ia outou maua ai le ola.’
“O ta'ita'i Iutaia na latou su'esu'eina a'oa'oga a perofeta e faatatau i le malo o le Mesia; peita'i latou te le'i faia lenei tulaga ma se faanaunauga moni ina ia latou iloa le upu moni, ae na latou faia ma le sini o le mauaina o faamaoniga ina ia lagolago ai o latou faamoemoega fa'asausili. Ina ua afio mai Keriso i se uiga na matua fete'ena'i lava ma o latou mana'oga, latou te le'i manana'o e talia o Ia; ma o le auala e ta'uamiotonuina ai i latou, na latou taumafai ina ia faamaonia o Ia o se tagata taufa'asese. Ina ua latou faamausaliina o latou vae i lenei ala, na faigofie mo Satani lona fa'amalosia o lo latou tete'e ia Keriso. O upu tonu lava ia sa tatau ona talia o ni faamaoniga o Lona natura Atua, na faauigaina ina ia tete'e ai ia te Ia. Na faapena ona latou liliuina le Upu Moni a le Atua i se pepelo.”—Ibid., pp. 211, 212.
Aso Tofi
Mati 20
5. O LE MAMALU O LE ATUA
a. O le a se mea na ta'ita'ia ai tagata Iutaia ina ia latou te'ena Iesu ma latou saili ai mo faia'oga sese? Ioane 5:41–44.
“Na fetalai atu Iesu, ‘Ou te le mana'o i le viiga mai i tagata.’ E le o le a'afiaga o le fono a Iutaia, e le o la latou fa'atagaga lea na Ia fa'anaunau i ai. Na le'i mafai ona Ia maua se mamalu mai i la latou viiga. Na tu'uina atu ia te Ia le mamalu ma le pule a le Lagi. Ana faapea Na te mana'o i ai, semanu e o mai agelu e ifo mai ia te Ia; semanu e toe molimau mai le Tama e fa'atatau i Lona natura Atua. Peitai, mo i latou lava, ma le malo o loo avea ai i latou ma ta'ita'i, na Ia finagalo i ta'ita'i Iutaia ina ia latou iloa Lana amio, ma ia latou maua fa'amanuiaga na Ia afio mai e foa'i ia i latou.
“ ‘Ua Ou sau i le igoa o Lo'u Tama, ma ua outou le talia A'u: afai o le a sau se isi i lona lava igoa, o le a outou talia o ia.’ O Iesu na Ia afio mai i le pule a le Atua, ma tauaveina Lona faatusa, fa'ataunu'uina ai Lana upu, ma saili mo Lona viiga; peita'i e le'i talia o ia e ta'ita'i i Isaraelu; ae a o mai isi tagata, ma faafoliga mai i le amio a Keriso, ae e faagaioia i latou e o latou lava loto ma saili mo lo latou lava mamalu, o le a latou taliaina. Ma aisea? Aua o le tagata o loo saili mo lona lava mamalu, e fa'atosina atu i le faanaunauga mo le uiga fa'afefeteina e le tagata o ia lava, i totonu o isi. O olega faapea na mafai ona tali mai i ai tagata Iutaia. Na latou manana'o e talia le faia'oga sese aua na ia fa'avi'ivi'iina lo latou fa'alialiavale faamaualuga e ala i lona fa'atagaina aloa'ia o o latou manatu ma aganu'u fa'apelepeleina. Peitai o a'oa'oga a Keriso e le'i fetaui ma o latou manatu. O a'oa'oga a Keriso sa fa'aleagaga, ma na mana'omia ai le fa'asatauroina e le tagata o ia lava; o le mafuaaga lea na latou le manana'o ai e taliaina. Latou te le'i masani ma le Atua, ma, ia i latou, o Lona siufofoga e ala mai ia Keriso o le leo lea o le tagata ese.
“E le o le mea ea lea e tasi o loo toe faia i o tatou taimi? E le o to'atele ea, e o'o lava i ta'ita'i fa'aletapua'iga, o loo fa'ama'a'aina o latou loto i le Agaga Paia, ma le mafai ai e i latou ona iloa le siufofoga o le Atua? Latou te le o te'ena ea le upu a le Atua, ina ia mafai ai ona latou tausia a latou lava aganu'u?”—The Desire of Ages, pp. 212, 213.
Aso Faraile
Mati 21
FESILI TOE FAAMANATU
1. O le a le pule ma aia na fa'ailoa mai e Keriso?
2. O le a le sootaga sa i ai i taimi uma lava i le va o Iesu ma le Tama?
3. O le a le mana-e maua ai le ola, o loo ia Keriso?
4. Fa'amatala le Ioane 5:39.
5. Faamatala le i'uga o le te'ena o Iesu e le malo o Iutaia, e fa'apea o Ia o le Mesia.