Ulua’i Aso
Mati 23
1. TAGATA FIA A'AI
a. E ese mai i le au so'o, o ai isi na fa'atasi ma Iesu ina ua Ia afio a'e i le sami o Kalilaia a'o le'i faia le Paseka? Ioane 6:1, 2.
“O Keriso sa Ia afio ese atu i se nofoaga tu'ufua faatasi ma Ona so'o, peitai o lenei taimi e seasea maua, o le filemu ta'aligoligoa, e le'i umi ae talepeina loa. Na manatu le au so'o na latou o ese atu i se nofoaga o le a le fa'alavelaveina ai i latou; peitai o le taimi lava na misia ai e le motu o tagata le Faia'oga fa'ale-atua, na latou fesili ai faapea, ‘O fea o i ai o ia?’ O nisi i le lotolotoi o i latou na latou iloa le itu na o atu aga'i i ai Keriso ma Ona so'o. E to'atele na savavali ina ia fetaia'i ma i latou, a'o isi na mulimuli i o latou va'a i luga o le vai. O le Paseka na lata mai, ma, mai i nofoaga mamao ma nofoaga lata mai, o fa'apotopotoga o tagata malaga na faimalaga atu i Ierusalema sa latou faapotopoto e va'ai ia Iesu. Sa fa'aopoopo atu tagata i lo latou fuainumera, se'ia o'o ina fa'apotopoto tane e lima afe e ese mai i fafine ma tamaiti. A'o le'i taunu'u atu Keriso i le matafaga, o se motu tele o tagata sa fa'atali mai mo Ia. Peita'i na ia taunu'u atu ma le le iloa e i latou, ma sa latou o ese mai ma mafuta faatasi ma le au so'o mo sina taimi itiiti.”—The Desire of Ages, p. 364.
b. Faamatala le tulaga faaleagaga o tagata sa faapotopoto. Mareko 6:34.
Aso Gafua
Mati 24
2. FA'AILOAINA O LO TATOU NAUNAU I O TATOU MANA'OGA
a. O le a se mea na silafia ma le alofa e Iesu sa manaomia e tagata—ma na faapefea ona Ia faaaogaina lenei avanoa e tofotofo ai le faatuatua o Lona so'o o Filipo? Ioane 6:3–6.
“Na silasila atu [Iesu] mai i le itu o le mauga i luga o le motu o tagata o loo feoa'i, ma o Lona loto na mutimutivale i le alofa. O le fa'alavelaveina faapena o Ia, ma ua le maua ai Sana malologa, e le'i le onosa'i o Ia. Na Ia silafia se manaoga e sili atu e manaomia ai Lana fesoasoani a'o Ia vaavaai atu i tagata o o mai ma o mai pea. 'Na osofia o Ia i le alofa mutimutivale ia i latou, aua sa latou fa'apei o mamoe ua leai so latou leoleo mamoe.’ O Lona tu'ua o le nofoaga o Lana malologa, na Ia maua ai se nofoaga fetaui lelei na mafai ona Ia auauna ai ia i latou. Latou te le'i maua se fesoasoani mai i faitaulaga ma ta'ita'i; peita'i o vai o le ola e faamaloloina ai, na tafe mai ia Keriso a'o Ia a'oa'oina atu le ala o le faaolataga i le motu o tagata. . . .
“O lea aso na foliga mai ia i latou e faapei o le lagi i luga o le fogaeleele, ma sa latou matua le iloa lava le umi talu ona latou aina se meaai.
“A'o aga'i pea i luma le taimi, ua leva le aso. O le la na goto ifo i sisifo, a'o tagata sa nonofo pea. Na galue Iesu i le aso atoa lava e aunoa ma meaai poo se malolo foi. Na sesega o Ia i le vaivai ma le fia 'ai, ma sa fa'atauanau atu le au so'o ia te Ia ina ia malolo mai i Lana galuega mamafa. Peitai e le'i mafai ona maliu ese mai nai le motu o tagata na lolofi mai ia te Ia. . . .
“O Le na a'oa'oina tagata i le auala e faamausaliina ai le filemu ma le fiafia na Ia manatunatu foi i o latou manaoga fa'aletumau e faapei ona Ia manatunatu i o latou manaoga fa'aleagaga. Sa i ai tina ma pepe i o latou lima, ma tamaiti laiti sa pipi'i atu i o latou laulavalava. E toatele sa tutula'i mo le tele o itula. . . .
“E toatele sa o mai mai i nofoaga mamao, ma e le'i aai talu mai le taeao. I taulaga ma nu'u na si'omia mai sa ono mafai ona latou faatauina ai meaai. . . . Peitai na fetalai mai Iesu, ‘Avatu ia i latou ni meaai latou te aai ai,’ ona Ia liliu atu lea ia Filipo ma fesili atu, ‘O fea o le a tatou faatau ai areto, ina ia aai ai i latou nei?’ O lenei fetalaiga na fuafuaina ina ia tofotofo ai le faatuatua o le so'o.”—The Desire of Ages, p. 364, 365.
b. O le a le tali a Filipo? Ioane 6:7.
“Na vaavaai a'e Filipo i le tele o ulu o tagata, ma ia manatu ai e faapea, o le a matua le mafai lava ona maua meaai e faamalie ai manaoga o se motu toatele faapea o tagata. Na Ia tali mai, o falaoa e faatauina i tenari e lua selau, o le a matua le lava lava e vaevae mo i latou, ina ia tofu le tagata ma sina mea itiiti.”—Ibid.
Aso Lua
Mati 25
3. O LE MEA LAVA NA MAUA
a. O le a le faamatalaga na tuuina atu e Anetere'a ia Iesu—o le a la le faatonuga a Iesu i Ona so'o ia latou faia? Ioane 6:8–10.
“Na fesili atu Iesu poo le a le tele o meaai na mafai ona maua i le lotolotoi o le faapotopotoga o tagata. Na fai mai Aneterea, ‘O loo iinei le tama o loo ia te ia areto karite e lima, ma nai i‘a iti e lua; ae aumā ea ia mea ia i latou e toatele?’ Na faatonu atu Iesu ina ia aumaia ia te Ia. Ona Ia faatonu atu lea o le au so'o ina ia fa'anonofo tagata i luga o le mutia i vaega ta'i lima sefulu pe ta'i selau, ina ia fa'atumauina ai le fa'atulaga lelei, ma ia molimauina ai e tagata uma le mea o le a Ia faia.”—The Desire of Ages, p. 365.
b. Fa'amatala la'asaga na faia e Keriso i le fa'ateleina o meaai—ma o a lesona e mafai ona tatou a'oa'oina mai i nei la'asaga. Mataio 14:19; Mareko 6:37–41; Ioane 6:11.
“E le'i sa'ili Iesu ina ia fa'atosina mai tagata ia te Ia e ala i le so'ona fa'amalieina o le faanaunauga mo mea taugata. I lena motu tele o tagata, vaivai ma fia aai ina ua mavae le aso umi, ma fiafia, o le meaai faigofie o se mautinoaga lea o Lona mana ma Lana tausiga alofa mo i latou i manaoga masani o le olaga. O le Faaola na te le'i folafolaina atu i Ona so'o le olaga taugata so'ona fai ma mea taugata o le lalolagi; o lo latou olaga atonu e si'omia e le mativa ma le le tagolima; peitai o Lana upu ua ta'utino mai o o latou manaoga o le a foa'iina mai, ma ua Ia folafolaina mai le oa e sili atu nai lo le lelei faalelalolagi—o le faamafanafanaga tumau lea a Lona lava Agaga Paia.”—The Ministry of Healing, pp. 47, 48.
“I lenei vavega, na maua e Keriso mai i le Tama; ona Ia avatu lea i le au so'o, ona avatu lea e le au so'o i tagata, ona avatu ai lea e tagata, e le tasi i le tasi. O le a faapena ona maua e i latou uma lava ua fa'atasi atu ia Keriso, le areto o le ola mai ia te Ia, ma fa'asoa atu i isi. O Ona so'o o auala filifilia ia o talanoaga i le va o Keriso ma tagata.”—Ibid., p. 49.
c. O le a le lesona e faatatau i le auaunaga moni ua faamanatu mai ia i tatou iinei? Isaia 61:6.
“O le au so'o na latou aumaia ia Iesu mea uma lava sa ia i latou; peitai Na te le'i valaauliaina i latou e o mai e aai. Na Ia faatonu atu ia i latou ina ia auauna i tagata. O meaai ia sa fa'ateleina i Ona aao, ma lima o le au so'o, o le aioi atu ia Keriso, e le'i i ai lava se taimi na le fa'amalieina ai. O le meaai itiiti sa lava lelei mo tagata uma. Ina ua fafagaina le motu o tagata, ona aai ai lea o le au so'o faatasi ma Keriso i le meaai taua na foa'i mai e le lagi.”—Ibid.
Aso Lulu
Mati 26
4. O LE MATAGOFIE O LE FA'ASOA ATU
a. O le a se mea e tatau ona tatou a'oa'oina mai i le faatonuga taua na tuuina mai e Iesu ina ua mavae ona fafagaina le motu o tagata? Ioane 6:12, 13.
“Ina ua fa'aputuina ato o meaai na totoe, o tagata na latou manatunatu e faatatau i a latou uo i o latou aiga. Na latou manana'o ia i latou ina ia latou tofusia i le areto na faamanuiaina e Keriso. O meaai sa i totonu o ato sa tufatufaina i le lotolotoi o le motu o tagata naunau ma aveina atu i vaega fa'ata'amilo o lea atunuu.”—The Desire of Ages, 368.
“Na faatonu atu Iesu i Ona so'o, ‘Ia faapotopoto mai toe'aiga o loo totoe, ina ia aua ne'i i ai se mea e ma'imau.’ Ioane 6:12. O nei upu na sili atu le taua nai lo le na o le tu'uina o meaai i totonu o ato. O le lesona e lua ona vaega. Aua ne'i i ai se mea e ma'imau. Aua ne'i tatou fa'ama'imauina avanoa i le olaga lenei. E le tatau ona tatou fa'atalale i soo se mea lava o le a faamanuiaina ai se tagata. Ia aoao ma fa'apotopoto a'e mea uma lava o le a fesoasoani ai i manaoga o tagata fia aai o le lalolagi. O le fa'aeteete lava lea e tasi e tatau ai ona tatou teufatuina le areto mai i le lagi ina ia faamalie ai manaoga o le agaga. E tatau ona tatou ola i upu ta'itasi uma lava a le Atua. E le tatau ona leiloa ese atu se mea lava e tasi ua fetalaia mai e le Atua. E le tatau ona tatou fa'atalale i se upu e tasi e mo lo tatou fa'aolataga e faavavau. Aua ne'i i ai se upu e tasi e pa'u le aoga i le eleele.”—The Ministry of Healing, p. 48.
b. Tusa lava pe foliga mai e le fetaui pe e le mafai fo'i ona faia, o le a le uiga faakerisiano ua faatonuina i tatou ina ia fausia a'e? Isaia 58:6–8; 1 Peteru 4:9.
“I mea uma lava e tutupu fa'afuase'i e tatau ai lava ona tatou sailia le fesoasoani mai ia te Ia, o Le o loo i ai oa le mafa'amutalia i Lana faatonuga. . . .
“A'o tatou vaaia manaoga o tagata matitiva, o tagata le malamalama, o e puapuagatia, e matua tele lava taimi e faavaivai ai o tatou loto. Tatou te fesili faapea, ‘E fa'apefea ona lava lo tatou vaivai ma a tatou meatotino itiiti e faamalieina ai lea manaoga tele manaomia vave? O le a tatou le faatali ea mo se tasi e sili atu lona malosi na te fa'atonuina le galuega, poo se isi fo'i fa'alapotopotoga na te faia le galuega?’ Ua fetalai mai Keriso, ‘Ia foa'i atu ia i latou meaai e aai ai.’ Fa'aaoga oa, ma le taimi, ma le malosi ua ia te oe. Aumai au areto karite ia Iesu.
“E ui lava ina atonu e le lava au meaai e fafaga ai le to'a afe o tagata, ae atonu e lava lelei e fafaga ai le tagata e to'atasi. Peita'i, i le aao o Keriso e mafai ona fafagaina ai tagata e to'atele. E faapei o le au so'o, foa'i atu mea ua ia te oe. O Keriso o le a Ia fa'atuputeleina le meaalofa. O le a Ia tauia le faalagolago faamaoni, faigofie atu i luga ia te Ia. O le meaai na foliga mai o se meaai faatauva'a, o le a faamaonia o se taumafataga tamaoaiga.”—Ibid., pp. 49, 50. [Author’s emphasis.]
Aso Tofi
Mati 27
5. O LO TATOU ATUA-FOAFOA O LE NA TE FOA'I MAI
a. O le a le uiga matagofie o le Atua e le tatau lava ona tatou fa'agaloina? Salamo 37:25, 26; Filipi 4:19.
“O le alofa tunoa o le Atua i mea iti lea e fa'alava atoatoa ai. E mafai e le aao o le Atua ona fa'atuputeleina fa'aselau. Mai i Ana oa uma e mafai ai ona Ia fofolaina se laulau i le vao. O le pa'i a Lona aao e mafai ai ona Ia fa'atuputeleina le meaai itiiti ma fa'alava atoatoa ai mo tagata uma. O Lona mana lea sa fa'ateleina ai areto ma saga i lima o le atalii o perofeta. . . .
“Ina ua faatonu atu Iesu i Ona so'o ina ia foa'i atu i le motu o tagata latou te aai ai, na latou tali mai, ‘E leai se isi a tatou meaai ae ua na o areto e lima ma i'a e lua; se'iloga tatou te o e faatau mai meaai mo nei tagata uma.’ Luka 9:13. Ae aumā ea ia mea ia i latou e toatele?
“O le lesona e mo le fanau a le Atua i augatupulaga ta'itasi uma. A tu'uina mai e le Alii se galuega e tatau ona faia, aua ne'i fa'atali tane ina ia fesili i le ta'uamiotonuina o le faatonuga poo le iuga fo'i o le a i ai, o a latou taumafaiga ina ia usitai. O mea ua i o latou lima atonu e matua itiiti ifo nai lo le manaoga e tatau ona faamalieina; peitai i aao o Ieova o le a faamaonia e sili atu nai lo le matua lava lelei. . . .
“O se iloaina sili atu ona atoatoa o le so'otaga a le Atua ia i latou ua Ia faatauina i le meaalofa o Lona Alo, o se faatuatua sili atu ona tele i le agai i luma o Lana galuega i le laueleele—o le manaoga tele lenei o le ekalesia i le taimi lenei. Aua lava ne'i fa'ama'imauina e se tasi le taimi i lona matua le fiafia ma faanoanoa ona o le le lava ma le leai o ni a latou meatotino va'aia. O le va'aiga i fafo atonu e foliga mai e le manuia, peitai o le malosi ma le talitonu faatuatua i le Atua o le a foafoaina ai mea e manaomia. O le meaalofa e aumaia ia te Ia ma le faafetai ma le tatalo mo Lana faamanuiaga, o le a Ia faateleina e faapei ona Ia faateleina meaai na foa'iina atu i atalii o perofeta ma le motu e toatele o tagata vaivai.”—Prophets and Kings, pp. 241–243.
Aso Faraile
Mati 28
FESILI TOE FAAMANATU
1. Fa'amatala uiga o tagata i lo latou faalogo atu i upu a Keriso.
2. Na faapefea ona foa'i e le Alii a latou meaai faaletino?
3. O le a se mea tatou te a'oa'oina mai i le auala na faatulaga lelei ai e Keriso le motu o tagata?
4. O le a se mea e tatau ona ou manatua i so'o se taimi lava e fa'atonuina pe fautuaina ai fo'i a'u, “Ia outou avatu ia i latou meaai latou te 'aai ai”?
5. Ta'u mai taimi na matua iloga ai lava le foa'i a le Atua mo oe.