Ulua’i Aso
Ianuari 12
1. O LE AMATAGA O LE AUAUNAGA A KERISO
a. O fea na amata ai e Iesu Lana auaunaga i luga o le fogaeleele? Ioane 2:1, 2.
“E le'i amataina e Iesu Lana auaunaga e ala i se galuega tele i luma o le fono a Iutaia i Ierusalema. I se fa'atasiga i se fale i se tama'i nu'u o Kalilaia na fa'aaogaina ai Lona mana e fa'aopoopo ai i le olioliga o le tausamiga o se fa'aipoipoga. Na fa'apena ona Ia fa'ailoaina atu Lona agaalofa i tagata, ma Lona fa'anaunauga e auauna i lo latou fiafiaga. I le vao o fa'aosoosoga, na Ia inumia ai le ipu o auega. Na afio mai ai e foa'i atu i tagata le ipu o le fa'amanuiaga, e ala i Lana fa'amanuiaga e fa'apa'ia ai so'otaga o le ola fa'aletagata.”—The Desire of Ages, p. 144.
b. O le a le mea na tupu i se taimi umi lava a'o le'i o'o i le i'uga o le tausamiga o le fa'aipoipoga? Ioane 2:3.
“[O Maria] na fa'anaunau ina ia fa'amaonia atu e Iesu i le motu o tagata o Ia moni lava o Le ua fa'amamaluina e le Atua. Na ia fa'amoemoe o le a i ai se avanoa mo Ia Na te faia ai se vavega i o latou luma.
“O le masaniga i aso na, mo tausamiga ma sauniga fiafia o le fa'aipoipoga ina ia fa'aauauina mo ni nai aso. I lenei taimi o fiafiaga, a'o le'i fa'amutalia le tausamiga, na iloa ai ua uma le uaina. O lenei tulaga na matua tele ai le le mautonu ma le fa'anoanoa. E le'i masani ai le leai o se uaina i tausamiga fa'apitoa o olioliga ma le fiafia, ma o le leai o se uaina o le a foliga mai o le a fa'ailoa mai ai le leai o se uiga tali malo.”—Ibid., pp. 145, 146.
Aso Gafua
Ianuari 13
2. O KERISO MA LONA TINA
a. O le a se fa'amatalaga a le tina o Keriso, ma o le a Lana tali? Ioane 2:3, 4.
“[Ioane 2:4.] O lenei tali, e foliga mai ia i tatou e fa'afuase'i e le'i fuafuaina, ae e le'i fa'ailoaina mai ai se uiga le fa'auo ma se le fa'aaloalo. O ituaiga upu na fetalai ai le Fa'aola i Lona tina, sa tusa ma aganu'u a atunu'u a Sasa'e Tutotonu. Sa fa'aaogaina aga'i i tagata na i ai le fa'anaunauga ina ia fa'ailoaina i ai le fa'aaloalo. O gaioiga ta'itasi uma lava o le soifuaga o Keriso i le lalolagi sa loto gatasi lelei lava ma poloa'iga na tu'uina mai e Ia lava, ‘Ia e ava i lou tama ma lou tina.’ Esoto 20:12. I luga o le satauro, i Lana gaioiga mulimuli o le alofa aga'i i Lona tina, na toe fetalai atu ai lava Iesu ia te ia i upu lava ia na Ia fetalai atu ai muamua, a'o Ia tu'uina atu lona tina i le tausiga a Lona so'o sili ona fa'apelepele. I le tausamiga o le fa'aipoipoga ma luga o le satauro, o le alofa lea na fa'ailoaina i le leo ma le va'ai ma uiga, na fa'auigaina ai Ana upu.”—The Desire of Ages, p. 146.
b. O le a le fa'amatalaga a le tina o Keriso i auauna—ma e fa'apefea ona fa'atatau upu nei ia i tatou i le taimi lenei? Ioane 2:5.
“O so'o [o Keriso] e tatau ona sili atu ma sili atu pea ona avea ma malosi i le folafolaga o le upu moni a'o latou fa'alatalata atu pea i le fa'aatoatoaga o le fa'atuatua ma le alofa mo lo latou au uso. Ua foa'i mai e le Atua le fesoasoani mo mana'oga fa'afuase'i uma lava e le mafai ona tutusa ma o tatou tomai ma mea e mafai ona tatou faia. Na te foa'i mai le Agaga Paia e fesoasoani i faigata ta'itasi, ina ia fa'amalosia lo tatou fa'amoemoe ma o tatou mautinoaga, ina ia fa'amalamalamaina ai o tatou mafaufau ma fa'amamaina ai o tatou loto. Na te finagalo ina ia maua mea e lava lelei mo le galuea'iina o Ana fuafuaga. Ou te fai atu ia te outou ina ia e sa'ilia le fautuaga mai i le Atua. Sa'ili o Ia ma le loto atoa, ma 'so'o se mea lava e fai atu ai o Ia ia te outou, ia outou faia.’ John 2:5.”—Testimonies for the Church, vol. 6, pp. 414, 415.
c. O le a le fa'atonuga a Iesu i le auauna i le fa'aipoipoga, na te faia? Ioane 2:6–8.
“I autafa o le faitoto'a sa i ai fagu vai ma'a tetele e ono, ma sa fetalai atu Iesu i auauna ina ia faatutumu i vai. Ona latou faatutumuina lea. Ina ua mana'omia le uaina ina ia fa'aaogaina i le taimi lava lena, na Ia fetalai mai, 'Ina asu ane ia, ma avatu i lē pule i le tausamaaga.' Ua le o le vai lea sa fa'atutumuina ai fagu, a'o le uaina na tafe atu.”—The Desire of Ages, p.148.
Aso Lua
Ianuari 14
3. O LE UAINA A KERISO
a. Ina ua tufaina atu le uaina, o le a le tali a le sa pule i le tausamiga? Ioane 2:9, 10.
“E le'i iloa e le pule o le tausamiga po'o le au vala'aulia fo'i ua uma le uaina. Ina ua latou tofo atu i le uaina na aumai e auauna, sa iloa ai e le pule o le tausama'aga na sili atu le uaina lea nai lo so'o se isi lava uaina na ia inu ai muamua, ma na matua ese lava mai i le uaina lea sa tufa mai i le amataga o le tausama'aga.”—The Desire of Ages, p. 148.
b. O le a le ituaiga uaina na foa'i atu e Keriso? Isaia 65:8.
“O le uaina lea sa foa'i atu e Keriso mo le tausamiga, ma le uaina lea sa Ia foa'i atu i le 'au so'o e fai ma fa'ailoga o Lona lava tino, o le sua mama lea o le vine. O le uaina lenei o loo fa'atatau i ai le fa'amatalaga a le perofeta o Isaia ina ua ia tautala e fa'atatau i le uaina fou 'i le fuifui vine,' ma fai mai, ’Aua le fa'aumatiaina; aua o loo i ai i totonu se fa'amanuiaga.' Isaiah 65:8. . . .
“O le uaina le fa'amafuina lea sa Ia foa'iina atu mo le au vala'aulia o le fa'aipoipoga, o se vai inu atoatoa ona lelei ma toe fa'amalosia ai. O lona a'afiaga o le aumaia lea o le tofo ia loto gatasi ma se naunauta'iga maloloina o le fia inu.”—Ibid., p. 149.
c. O le a le fa'amatalaga a le Tusi Paia e fa'atatau i le uaina fa'amafu? Fa’ataoto 20:1; 23:29–35.
“O Keriso na Ia tu'uina atu le lapata'iga ia Isaraelu i le Feagaiga Tuai, ‘O le uaina, o le faatauemu lea; o le ‘ava malosi o le fa'apisapisao lea; o i latou uma o e faaseseina ai, e le popoto i latou.’ Proverbs 20:1. Ma Na te le'i foa'iina mai se vai inu fa'apea. O Satani na te fa'aosoosoina tagata ina ia tu'inanau sa'oloto i mea e fa'apogisaina ai le mafaufau ma fa'agase ai le va'ai fa'aleagaga, peita'i ua a'oa'o mai Keriso ia i tatou ina ia tatou pulea ma fa'ato'ilalo le natura maulalo. O Lona soifuaga atoa lava o se fa'ata'ita'iga lea o le fa'afitia e le tagata o ia lava. O le auala e motusia ai le malosi o le tu'inanau o le 'ai ma le inu, na Ia puapuagatia mo i tatou i le tofotofoga sili ona tiga na mafai ona onosa'ia e le aiga tagata. O Keriso na fa'atonu mai ina ia aua ne'i inu Ioane le Papatiso i se uaina poo se vai inu malosi. O Ia fo'i na fa'atonuina mai le le fa'aaogaina o mea ia i le ava a Manoa. Ma na Ia fetalaia mai se mala i luga o le tagata o le a tu'uina atu le fagu i laugutu o lona uso a tuaoi. E le'i fa'afete'ena'iina e Keriso Ana lava a'oa'oga.”—Ibid.
Aso Lulu
Ianuari 15
4. O LE FA'ATA'ITA'IGA A KERISO I FA'ATASIGA MA ISI
a. O a sini na fa'ataunu'uina e ala i le fa'atasi ai o Keriso ma Lana vavega i le tausamiga o le fa'aipoipoga, ae e mo i tatou fo'i i le taimi lenei? Ioane 2:11.
“Na silafia e Keriso mea uma; na Ia silasila aga'i mai i augatupulaga i o tatou lava taimi, ma sa Ia silafia le tulaga o le aiga tagata o le a i ai i le tapunia o le tala'aga o le lalolagi. Na Ia silafia le afe ma afe o tagata o loo fano i le fa'aaogaina o le uaina ma le ava malosi. O le a aga'i lemu lava le lalolagi i le tulaga lava lea e tasi e fa'apei ona i ai i aso a'o le'i o'o mai le lolo. Peita'i ua si'itia e le lagi se lapata'iga mata'utia, ina ia talia e tagata le lapata'iga, ma galulue fa'atasi ai ma le Atua mo le puipuiga o i latou e i latou lava. Ua Ia tu'uina mai ia i tatou fa'ata'ita'iga o le fa'afitia atoatoa e le tagata o ia lava, ma ua Ia tu'uina mai fa'atonuga ia, afai e mulimulita'ia, o le a i'u i le foafoaga ma le fa'atumauina o le malosi, tomai, ma le atoaga o a tatou fanau.”—The Signs of the Times, April 16, 1896.
b. Fa'amatala le ituaiga uiga e toe fa'afouina ai, lea sa fa'ata'ita'iina mai e Keriso i Lana auaunaga atoa. Mataio 11:29.
“Na amata e Iesu le galuega o le toe fuata'iga e ala i Lona fa'alatalata mai ma le agaalofa i le aiga tagata. A'o Ia fa'ailoaina mai le ava silisili mo le tulafono a le Atua, na Ia a'oa'iina le amio atua fa'afoliga a le au Faresaio, ma taumafai ina ia fa'asa'oloto mai tagata mai i tulafono leai ni uiga na saisaitia ai i latou. Na Ia sa'ili e talepe i lalo pa puipui na vaevaeina i ai vasega eseese o tagata, ina ia mafai ai ona Ia aumaia fa'atasi tagata o i latou o fanau o le aiga e tasi. O Lona auai i le tausama'aga o le fa'aipoipoga na fuafuaina e avea ma la'asaga aga'i i le fa'ataunu'uina o lenei sini.”—The Desire of Ages, p. 150.
“Na a'oa'iina e Iesu le fa'amalieina e le tagata o ona lava tu'inanauga i ona foliga uma lava, ae o Lona natura na Ia fiafia e mafuta ma talanoa ma isi. Na Ia taliaina le agalelei a vasega uma lava o tagata, i Lona asiasi atu i aiga o tagata mauoa ma tagata matitiva, o e na a'oa'oina ma i latou e le'i a'oa'oina, ma Ia saili ai e si'itia a'e o latou mafaufau mai i fesili e fa'atatau i mea masani o le olaga aga'i a'e i mea fa'aleagaga ma e tumau e fa'avavau. Na te le'i fa'atagaina le uiga fa'atautala, ma e le'i i ai fo'i se ata pogisa o le uiga manatu mama fa'aulaula na fa'aleagaina ai Lana amio; ae na Ia maua le fiafia i va'aiga o fiafiaga mama, ma o Lona fa'atasi mai na fa'atagaina ai le fa'atasiga o tagata. O se fa'aipoipoga fa'a-Iutaia o se sauniga lea e taua tele lona a'afiaga, ma o lona olioliga e le o se mea leaga lea i le Atalii o le tagata. O le fa'atasi atu o Iesu i lenei tausama'aga, na fa'amamaluina ai e Iesu le fa'aipoipoga o se sauniga na fa'atuina e le Atua.”— Ibid., pp. 150, 151.
Aso Tofi
Ianuari 16
5. O FEFA'ASOAA'IGA MALOLOINA I FA'ATASIGA MA ISI
a. O le a se mea e tatau ona tatou a'oa'oina mai i le fa'ata'ita'iga a Keriso lea sa ese mai ai o Ia mai i ta'ita'i fa'aletapua'iga o Ona taimi? Fa’ataoto 18:24.
“O le auaunaga a Keriso na matua iloga lava lona eseesega mai i le auaunaga a toea'i'ina Iutaia. O lo latou fa'atauaina o aganu'u ma tu ma aga na fa'aumatiaina ai le sa'olotoga moni uma o manatu poo gaioiga. Sa latou ola i le mata'u ma le popole i taimi uma ne'i fa'aeleeleaina i latou. O lo latou 'alo ese mai i lo latou fetaia'i ma i latou e 'eleelea', o lea na latou nonofo ese ai, e le'i gata ina latou vavae ese mai i tagata o nu'u ese, ae na fa'apena ai fo'i mai i le to'atele o o latou lava tagata, ma latou le sa'ili ai ina ia faamanuiaina i latou poo le manumaloina mai fo'i o lo latou agaga fa'auo. O lo latou manatunatu i taimi uma e fa'atatau i nei mataupu, na latou fa'aaviluina ai o latou mafaufau ma fa'apumo'omo'oina ai le ta'amilosaga o o latou olaga. O le latou fa'ata'ita'iga na lagolagoina ai le so'ona manatunatu ifo o le tagata ia te ia lava ma le musu e taliaina pe fa'aaloalo fo'i i manatu po'o talitonuga e ese mai i o latou talitonuga, i le lotolotoi a vasega uma o tagata.”—The Desire of Ages, 150.
b. O le a le tatou sini e tatau ona i ai i talanoaga uma ma isi? Fa’ataoto 11:30.
“E mafai ona tatou fa'aalia le afe o tama'i gaioiga iti i upu agalelei ma foliga fiafia, lea o le a toe lafoia mai i luga ia i tatou. O kerisiano e le manatunatu lelei, latou te fa'aalia e ala i lo latou fa'atalale i isi, latou te le o fa'atasi ma Keriso. E le mafai ona fa'atasi ma Keriso, ma le agalelei ai i isi ma fa'agalo ai a latou aia tatau.
“E tatau ona avea uma lava i tatou ma molimau mo Iesu. O le malosi ta'ito'atasi lea e mafai ona a'afia ai isi, a fa'apaiaina e le alofa tunoa o Keriso, e tatau ona fa'aleleia atili i le manumaloina mai o tagata i le Fa'aola. Ia va'ai le lalolagi tatou te le o manatunatu fa'apito i o tatou lava fa'anaunauga, peita'i tatou te naunau i isi ina ia latou tofusia i o tatou fa'amanuiaga ma avanoa sili ona taua. Ia latou va'ai o la tatou tapua'iga e le faia ai i tatou ia tatou le amanaia lagona o isi pe faia fo'i ni mana'oga fai fa'amalosi. Ia auauna i latou uma lava ua ta'utino mai ua latou maua Keriso, e fa'apei ona Ia auauna mo le lelei o tagata. E le tatau lava ona tatou tu'uina atu i le lalolagi le manatu sese e fa'apea, o Kerisiano o ni tagata atuatuvale, fa'anoanoa.”—The Adventist Home, p. 428.
Aso Faraile
Ianuari 17
FESILI TOE FAAMANATU
1. Fa'amatala fua fa'aleagaga na fua mai e le vavega a Keriso i Kana.
2. Fa'amatala le so'otaga i le va o Keriso ma Lona tina.
3. Aisea na fa'ailoa mai ai e le pule o le tausama'aga le ofo tele?
4. O le a le ituaiga uaina e fetaui lona fa'atusaliaina ai o le toto o Keriso?
5. I fa'atasiga ma isi tagata, o le a se mea e tatau ona tatou manatua mai i le fa'ata'ita'iga a Iesu?