Pauna a Sarita

Ita, nakarkaro ngem idi, ti lubong kasla kankanayon a mabalbaliwan. Naimpusoan a tarigagay para iti bang-ar manipud pannakaidadanes, nataoan a panagsagaba ken leddaang, umaw-awag iti pannakareproma kadagiti pagannurotan ti gobierno, linteg, institusyon ken modo. Nupay kasta, ipakita ti pakasaritaan a ti kasta nga awag, nalapdan gapu iti bukod nga interes wenno limitasyon, nalabit napaay wenno nagkurang iti nairanta a panggep.

Ti pudno a repormasyon ad-adda nga immun-uneg ngem iti akinruar a rukod. Mangrugi iti indibidual. Iramanna ti naun-uneg a panagbalbaliw a mangarakup iti sibubukel a tao, ken iti tunggal sabali nga aspeto iti biagna. Ti kastoy a kita ti reporma – Dios laeng ti makaipatungpal – maysa a naespirituan a repormasyon. Ngem tapno maipatungpal ti kasta a repormasyon, kasapulan a marikna ti tao a kasapulanna ti mareporma. Daytoy a trabaho intalec ti Dios kadagiti pudno a repormador – lallaki ken babbai a sipupuso a makipagtrabaho Kencuana tapno maisangbay ti pudno a repormasyon kadagiti bagbagida ken kadagiti tattao a serbianda.

Ti Biblia ket napno kadagiti ehemplo ti kasta a repormador. Dua nga agkakatan-oc idi panawenda ket da Elias ken Juan Bautista. Ni Elias situtured a nangtubngar kadagiti basbasol ti ili ti Dios ket inayabanNa ida nga agtacderda para iti Dios. Naayaban met ni Juan a mangisagana iti dalan para iti umuna a yaay ni Cristo. Ti biagna kas iti biag ni Elias, a maysa a tubngar iti kinabarayoboy iti aglawlawna. Ti panursurona sumarot iti puso.

Kas agkunkuna nga ili ti Dios ita, naayabantayo a mangitag-ay iti panagbiag a naiduma iti lubong ken isuro ti mensahe a mangbalbaliw iti biag. Isaganatayo ti dalan para iti maikadua a yaay ni Cristo. Nangipaay ti Dios iti mensahe iti iglesia a mangriing kadacuada nga agtignay, a simamatalec coma a mangipaay iti mensaheNa para iti lubong.

“Kasapulantayo ti naan-anay a repormasyon kadagiti amin nga iglesiatayo. Kasapulan a sumrec iti iglesia ti mangbalbaliw a bileg ti Dios. Sipapasnec a sapulen ti Apo, ilacsid amin a basolyo, ket agyan iti Jerusalem agingga a mapnokayo iti bileg manipud ngato. Palubosanyo ti Dios a mangisaad kadacayo iti trabaho. Dalusanyo dagiti kararuayo babaen iti panagtulnog iti kinapudno. Ti pammati nga awanan ar-aramid ket natay. Saan nga ikkaten ti aldaw a panagsagsagana. Saan a maturog iti kasasaad a saan a nakasagana, nga awanan ti lana iti vaso ken pagsilawanyo. Awan coma ti mangpanaw iti talged para iti kina-agnanayon. Saan coma nga agtalinaed ti saludsod iti nakaam-amac a saan a manamnama. Salodsodenyo kadagiti bagbagiyo a sipapasnec, maysaak kadi kadagiti maisalacan? Makapagtacderac ngata wenno saan? Isuna laeng nga addaan iti nadalus nga ima ken natarnaw a puso ti makapagtacder iti dayta nga aldaw.” – TM, p. 443.

Kayat ti Dios a tunggal maysa ken kas maysa nga iglesia arakupentayo daytoy a trabaho. KayatNa a repormaentayo ti biagtayo, ti pamiliatayo ken ti iglesiatayo. Agriingtayon iti pannakailibaytayo. Agpatuloytayo a sipapakumbaba ken sibababawi ket aramiden ti trabaho nga adda iti sangotayo. Bayat ti panagpatuloy ti reporma, agtrabaho ti Dios a sibibileg, a mangnayon iti bileg iti maudi a ballaag. Makipasettayo coma iti kaudian a tignay ti reporma iti kasta mapadaras ti yaay ti Apo.

Ti Departamento ti Eskuwela Sabatina ti Conferencia Heneral