Domingo
Marzo 13
1. TI ALDAW A PANAGINANA– GUTBAW ITI LINTEG TI DIOS
a. Ania a kaipapanan ti adda iti panangtarimaan iti gutbaw a naaramid iti Linteg ti Dios? Isaias 58:12; 1 Ar-ari 18:30; Nehemias 2:17.
“Iti tiempo ti kanibusanan tunggal nadiosan nga institusyon maisubli. Ti gutbaw a naaramid iti linteg iti panawen a ti Aldaw a Panaginana binaliwan ti tao, matarimaan. Ti natda nga ili ti Dios, agtactacder iti sangoanan ti lubong kas repormador, ipakitada ti linteg ti Dios kas pundasyon ti amin a makaandor a reporma, a ti Sabbat ti maikapat a bilin agtacder kas pakalaglagipan ti panagparsua, agtultuloy a mangipalagip iti pannacabalin ti Dios. Iti nalawag, mailasin a linya iparangda ti kinasisita ti panagtulnog kadagiti amin nga allagaden ti Sangapulo a Bilbilin.” – PK, p. 678.
“Ti bilin maipapan ti Aldaw a Panginana naisaad iti tengnga dagiti Sangapulo a Bilbilin, ket naipasdec idiay Eden iti isu met la a tiempo nga impasdec ti Dios ti ralasyon ti kallaysa. Inted ti Dios ti Sabbat kas tanda ti nagparsua a pannacabalin ken ar-aramid. . . Inaramidna ti pannaka-salimetmetna a kapilitan iti tao, tapno maut-utobna dagiti ar-aramid ti Dios, agtaeng iti kinaimbagNa, asi ken ayatNa ket babaen iti nakaparsuaan kumita iti Dios ti nakaparsuaan. No ti maysa a tao naynay a salimetmetanna ti Aldaw a Panaginana, pulos coma nga awan ti saan a mamati, wenno ateista iti lubong,” – ST, Feb 13, 1896.
Lunes
Marzo 14
2. KALLAYSA KEN TI YUNIT TI PAMILIA
a. Ania ti orihinal a panggep ti Dios mainaig iti kallaysa? Genesis 2:24; Mateo 19:4-6.
“Idi a dagiti Fariseo. . . nagsaludsodda Kencuana maipapan iti linteg ti divorcio, intudo ni Jesus kadacuada ti kallaysa a naipasdec idi damona. ‘Gapu iti tangken dagiti puspusoyo,’ kinunaNa, ‘impalubos ni Moises cadacayo a pagtalawenyo dagiti assawayo; ngem idi damo saan a casta’ (Mateo 19:8). DinakamatNa kadacuada ti nabendito nga al-aldaw idiay Eden idi impacdaar ti Dios a ‘nakaim-imbag’ dagiti amin a banbanag. Ket napataud ti kallaysa ken ti Aldaw a Panaginana, singin nga institusyon para iti dayag ti Dios ken pagsayaatan ti sangkataoan. Bayat a pinagtipon ti Namarsua dagiti im-ima ti nasantoan a paris iti kallaysa, kinunana, ‘Gapuna ti lalaki panawannanto ti amana ken ti inana ket tumiponto iti asawana, ket agbalindanto a maymaysa a lasag,’ Impacdaarna ti linteg ti kallaysa para kadagiti amin nga annac ni Adan agingga iti panagserra ti tiempo (Genesis 2:24). Dayta impacdaar ti agnanayon nga Ama a naimbag isu ti linteg nga addaan kangatoan a bendisyon ken nasukog para iti tao.” – AH, pp. 340, 341.
“Ti kallaysa ket sipud pay di panagparsua, impasdec ti Dios a maysa a nadiosan nga ordinansa. Ti institusyon ti kallaysa ket naaramid idiay Eden. Ti Sabbat ti maikapat a bilin ket naipasdec idiay Eden. Idi naisaad dagiti pundasyon ti lubong, idi a dagiti baggac ti agsapa nagkantada a nagkaykaysa, ken amin nga annac ti Dios nagdir-ida iti ragsac. Iti kasta daytoy impasdec ti Dios nga institusyon ti kallaysa agtacder iti sangoyo kas katibker ti Sabbat iti maikapat a bilin.” – 1 MR, pp. 160, 161.
b. Kasano a ti nadiosan a pasdec ti kallaysa ken ti relasyon ti pamilia ket maisublinto iti maudi nga al-aldaw? Malakias 4:5, 6; Mateo 17:11; Aramid 3:20, 21.
“Adda dua nga institusyon a naibangon idiay Eden a saan a napukaw kalpasan ti Pannakatnag – ti Sabbat ken ti relasyon ti kallaysa. Dagitoy ket intugot ti tao iti labes dagiti ruangan ti paraiso. Isuna nga agayat ken mangsalimetmet iti Sabbat, ken mamagtalinaed iti kinatarnaw ti institusyon ti kallaysa, panecnecanna ti bagina a gayyem ti tao ken gayyem ti Dios. Isuna a babaen iti pagalagadan ken ehemplo kuranganna ti obligasyon dagitoy sagrado nga institusyon ket kabusor ti Dios ken tao, ken ar-aramatenna ti inpluensiana ken dagiti inted ti Dios a talentona a mangisangbay iti nariro a kasasaad ken rugit moral.”– ST, Feb. 28, 1884.
Martes
Marzo 15
3. ISANSANAY TI NAPARBENG A PANAGTARAON
a. Ania a kita ti estilo ti biag ti pagtalinaeden dagiti agsagsagana para iti asidegen a panagsubli ni Jesus? 1 Corinto 9:25; 10:31; Lucas 4:2-4.
“Napan ni Juan Bautista iti espiritu ken pannacabalin ni Elias, nangisagana iti dalan ti Apo ken tapno pasublienna ti ili iti sirib dagiti nalinteg. Isuna ti mangibagi kadagiti agbibiag iti maudi nga alaldaw, a nangitalcan ti Dios kadagiti sagrado a kinapudno a maiparang iti sango ti ili, tapno maisagana ti dalan para iti maikadua a panagparang ni Cristo. Ket isu met la a prinsipio ti panagteppel nga insanay ni Juan ti aramiden dagiti tattao iti aldawtayo a mangballaag iti lubong iti yaay ti Anac ti tao.” – CTBH, p. 39.
“Kas ti pannakapukaw dagiti immuna a nagannactayo iti Eden gapu iti panangpalugod iti raman, ti laeng namnamatayo a mangpasubli iti Eden ket babaen iti natibker a panangilacsid iti raman ken rikna. Kinaparbeng iti taraon ken kontrol iti amin a rikna ti mangpreserbar iti sirib ken mangted iti siglat panunot ken moral, mamagbael iti tao a mangisangbay iti amin a pagduyosanna iti babaen ti kontrol ti nangatngato a pannacabalin ken tapno mailasin ti nagbaetan ti dakes ken biddut, ti sagrado ken kadawyan.” – 3 T, p. 491.
b. Ania a kita ti taraon ti kaunaan a naited kada Adan? Genesis 1:29; 3:18.
“Kasapulan nga adalentayo ti orihinal a plano ti Dios para iti taraon ti tao. Isuna a nangparsua iti tao ken makaammo iti kasapulan ti parsuaNa intudingNa ti taraon ni Adan. ‘Adtoy,’ kinunaNa, iniccancayo iti isu-amin a roroot nga addaan bukel, nga adda iti rabaw ti amin a daga; ken isu-amin a cayo nga addaan bunga nga agpataud iti bin-i; maipaaydanto a canenyo’ (Genesis 1:29). Apaman a pimmanawda idiay Eden tapno agsapulda ti pagbiaganda babaen iti pananggamulo iti daga a nailunod gapu iti basol, napulobosan ti tao a mangan pay iti ‘natnateng ti daga’ (Genesis 3:18).
“Bukbukel, prutas, nagita a macan ken natnateng ti mangbukel iti taraon a pinili ti Namarsua para kadatayo. Dagitoy a taraon a naisagana a simple ken natural, isuda ti makapasalun-at ken mangipaay sustansia. Mangipaayda iti pigsa, bileg nga agandor ken sirib ti isip a saan a maipaay ti aglalaoc ken makaparugso a taraon.” – MH, pp. 295, 296.
b. Ania nga ayo mainaig iti taraon ti makadangran iti naespirituan a kapadasan? Isaias 22:13, 14.
Mierkules
Marzo 16
4. MAYSA A NABALIWAN A PUSO
a. Sacbay a rugian ti Dios ti trabaho a panangisubli iti tunggal maysa kadatayo, ania ti kasapulan a maaramid nga umuna? Proverbio 28:13; Salmo 32:5; 1 Juan 1:9.
“No nagbasoltayo maibusor iti Apo, pulos a saantayo a maaddaan iti kappia ken pannakaisubli iti paborNa no awan ti naan-anay a panagconfesar ken repormasyon mainaig kadagiti banbanag a naliwayantayo. Agingga a saantayo a nausar ti tunggal wagas nga adda iti bilegtayo a mangtarimaan iti dakes, saanNatayo nga anamongan ken bendisyonan ti Dios. Ti dana ti panagconfesar ket nakababain, ngem isu laeng ti dalan a makaawattayo iti pigsa tapno agballigi. Amin a natinnag a dait mabalin a pulos a saan a napidot tapno ti trabahotayo ket saan a kas kaperpecto ken makaay-ayo iti Dios kas rebbengna; ngem tunggal peksa maipakat coma a mangaramid iti daytoy agingga a mabalin nga ipatungpal.” – PP, p. 239.
b. Ania ti inkari ti Dios nga aramiden kadagiti puspuso dagiti agtarigagay nga agservi Kencuana? Ezequiel 36:26.
k. Kasano a makasagepsep iti amin ti kinapudno iti naconvertir a Cristiano? Roma 10:10; Marcos 12:30. Anianto ti kankanayon a kararag? Salmo 139:23, 24.
“Ti kinapudno kasapulan nga agbalin a kinapudno iti umawat, kadagiti amin a gagar ken panggep. Maimalditda iti puso. . . . Ti puso ti castilyo ti kinatao, ket agingga a naan-anay nga adda iti sibay ti Apo, ti kabusor agtultuloy a makagun-od iti balligi a mangparmec kadatayo babaen kadagiti nasikap a sulisogna.” – HP, p. 140.
“Kumita ti Dios iti puso; ‘dagiti isu-amin a banag addada a lamolamo ken agdadata cadagiti mata daydiay a pagidatagantayo’ (Hebreo 4:13). Mapnec kadi Isuna iti aniaman a banag no di ti kinapudno iti akin-uneg a paset? Tunggal pudno a naconvertir a kararua isangbayna ti nakallalagip a marka a naparukma ti linalasag a panunot.” – 1 T, p. 163.
Hueves
Marzo 17
5. MAYSA A MAKAANDOR A MENSAHE
a. Kasano nga ibilang dagiti nalinteg ti mensahe ti kinapudno maisupadi kadagiti nadangkes? Proverbio 4:19, 18; 2 Pedro 3:18.
“Ti napasanto a kararua saan a kontento nga agtalinaed nga ignorante no di ket tarigagayanna ti magna iti lawag ken sapulenna ti nain-indaclan a lawag. Kas ti minero nga agkali iti balitoc ken pirac, kasta met ti pasurot ni Cristo a sapulenna ti kinapudno kas nailemmeng a gameng ket agpatuloy manipud iti lawag agingga iti nain-indaclan a lawag, umad-adu nga umad-adu iti pannakaammona. Agtultuloy a dumackel iti parabor ken iti pannakaammo iti kinapudno. Kasapulan a mapagballigian ti bagi. Tunggal depekto ti kababalin kasapulan a mailasin iti naindaclan a sarming ti Dios.” – 1 SM, p. 317.
b. Kasano kabayag nga agandor ti kinapudno? Salmo 100:5; 117:2; Proverbio 12:19. Kasano kabayag nga agtultuloy ti trabaho ti repormasyon?
“Ti Repormasyon ket saan a nagpatingga ken Luther kas ipagarup ti kaaduan. Agtultuloy daytoy agingga iti panagserra ti pakasaritaaan ti lubong. Addaan ni Luther iti naindaclan a trabaho nga iyanninaw iti sabali ti lawag nga impalubos ti Dios nga agranyag kencuana; ngem saanna a naawat amin a lawag a maited iti lubong. Manipud iti dayta a tiempo agingga ita, baro a lawag ti agtultuloy nga agraniag iti Nasantoan a Surat, ket baro a kinapudno ti agtultuloy a maipalgac.” – SR, p. 353.
Viernes
Marzo 18
PERSONAL A PANGREPASO A SALSALUDSOD
1. Kaano a naited ti Aldaw a Panaginana iti sangkataoan ken ania ti panggepna?
2. Ania ti mapasamac iti sociodad no saan nga ikankano dagiti tattao ti Aldaw a Panaginana ti Dios ken ti panggepNa para iti kallaysa?
3. Kasano a ti panagteppel wenno ti nakurang a teppel apektaranna ti panagpilitayo?
4. Ania ti maamiristayo maipapan iti kasasaad ti pusotayo no masansan a mapaaytayo no masulisog?
5. No pudno a mapasantotayo, anianto ti ayotayo iti lawag, wenno iti pannakaammo?