Domingo
Deciembre 27
1. TI PUNDASYON TI PUDNO A REPORMASYON
a. Kasano a mailasintayo ti nagbaetan ti pudno ken palso a reporma? Isaias 8:20; Filipos 3:9.
“Ti pannakasalacnib ti siciodad ken ti progreso ti reporma agdepende iti nalawag a kaipapanan ken panangbigbig iti kangrunaan a kinapudno. Dagiti prinsipio ti linteg ti Dios ti kasapulan nga agtalinaed iti sango ti ili kas agnanayon ken di agbaliw kas ti kababalin ti Dios. Ti linteg ket nailawlawag kas maysa a pagannurotan ti tignay. . . Ti pagimbagan ti sociodad ken ti pakasalacniban ti tao gutogutenna a marespeto ti linteg. Amin a nalawagan a linteg ket naibangon iti linteg ni Jehova a naiyawat idiay Bantay Sinai.” – HR, Aug. 1, 1878.
“Tunggal pudno a reporma adda saadna iti trabaho ti evangelio ken agduyos iti pannakaitag-ay ti kararua iti baro ken natantan-oc a biag.” – MH, p. 171.
b. Sino ti pangisaadantayo iti talectayo? Salmo 118:8; Proverbio 3:5.
“Aniaman a saad ti biag ti pagsaadantayo, aniaman ti negosiotayo, kasapulan a napakumbabatayo a mangrikna iti panagkasapulantayo iti tulong; kasapulan nga agsanggirtayo a naan-anay kadagiti panursuro ti sao ti Dios, bigbigen ti providenciaNa kadagiti amin a banbanag ket agmatalec a mangisangbay iti kararuatayo nga agkararag.” – 5 T, p. 427.
Lunes
Deciembre 28
2. PUDNO A REPORMA MANGRUGI ITI PUSO
a. Ania ti umun-una iti repormasyon? Joel 2:12, 13; Salmo 51:10; 2 Corinto 7:11.
“Adda basol, dackel unay a basol, naipabaclay kadagiti adu nga agkunkuna a Cristiano. Kinuna ti naindaclan a Mangidawdawat, ti tontontonen iti nataoan a puso ket di naikankano. Umaw-awag ti Dios para ti panagbabawi, para iti repormasyon.” – RH, Dec. 8, 1896.
“Ti panagbabawi iramanna ti panagladingit para iti basol ken iti pananglikud iti daytoy.” – SC, p. 23.
“Ti panagconfesar ket saan nga awaten ti Dios no awan ti napasnec a panagbabawi ken repormasyon. Kasapulan nga adda nalawag a pagbal-baliwan ti biag; kasapulan a mailacsid amin a makapagura iti Dios. Daytoy ti resulta ti pudno a panagladingit para iti basol. Ti trabaho a kasapulan nga aramidentayo ket silalawag a naisaad iti sangotayo: ‘Agbuggocayo, agdaluscayo; yadayoyo ti dakes cadagiti ar-aramidyo manipud iti sangoanan dagiti matac; agsardengcayo nga agaramid iti dakes. Sursuroenyo ti agaramid iti naimbag; sapulenyo ti kinajusticia, saranayenyo dagiti maparigat, icalinteganyo dagiti ul-ulila, salacnibanyo ti balo a babai’ (Isaias 1:16, 17). ‘No ti nadangkes ipulangna ti salda, isublina daydiay innalana a tinacaw, magna cadagiti linlinteg ti biag, saan nga agaramid iti kinadakes, isu agbiagto a di bumurong, saanto a matay’ (Ezequiel 33:15). Kinuna ni Pablo, mangisasao iti trabaho ti panagbabawi: ‘daytoy met laeng a panagladingityo a mayanurot iti Dios, ania ket nga annaden ti pinataudna cadacayo, ania ket a panangipalawagyon iti casasaadyo met laeng, ania ket a pungtoten, ania ket a butengen, ania ket nga essemen, ania ket a regtan, ania ket a kinalinteg ti pammalesen! Iti isu-amin nagparangcayo a nadalus itoy a panggep’ (2 Corinto 7:11).” – Ibid., p. 39.
b. Ania ti nasegga a pukkaw idi panawen ti Pentecostes ti nangbigbig iti naindaclan a personal a kasapulan? Aramid 2:37, 38.
“Kasano ti tao a mapalinteg iti Dios? Kasano a mapalinteg ti managbasol? Babaen laeng ken Cristo a maisangbaytayo a maitunos iti Dios, iti kinasanto; ngem kasano ti yaasidegtayo ken Cristo? Adu ti agdamdamag iti isu met a saludsod kas kadagidi umariwecwec idi Aldaw ti Pentecostes, idi naconvictarda iti basol, impukkawda, Ania ti aramidenmi?’ Ti umuna a balikas a sungbat ni Pedro ket ‘Agbabawicayo’ (Aramid 2:37, 38). Iti sabali a tiempo, kalpasan daytoy, kinunana, ‘Agbabawi. . . . ket agsublicayo, tapno mapunas dagiti basbasolyo’ (Aramid 3:19).” – Ibid., p. 23.
Martes
Deciembre 29
3. DAGITI BUNGBUNGA TI PUDNO A REPORMA
a. Kasano a nailadawan dagiti repormador kadagiti maud-udi nga al-aldaw? Isaias 58:12, 13.
“[Isaias 58:8, 9, 12–14, naadaw.] Ditoy a nadakamat dagiti kababalin dagiti agbalin a repormador, a mangawit iti bandera ti maikatlo a mensahe, dagiti mangpasingked kadagiti bagbagida nga ili ida ti Dios a mangsalsalimetmet iti bilbilinNa, ken mangdayaw Kencuana ken iti imatang ti amin nga universo, sipapasnecda a mangibangon kadagiti cadaanan a disso a narba. Sino daydiay nangayab kadacuada, Managtarimaan iti gutbaw, Mangpabaro kadagiti daldalan tapno pagnaedan? – Isu ti Dios. Naisurat dagiti nagnaganda sadi langit kas repormador, managtarimaan, mangibangon kadagiti pamuon dagiti adu a caputotan.” – RH, Oct. 13, 1891.
b. Ania dagiti nalawag a pammanecnec ti reporma ti makita iti biag? Mateo 3:8.
“Awan ti pagkurangan ti napabaro a biag – bungbunga a maicari iti panagbabawi – mangpennec kadagiti gutgutoten ti Dios. No awan ti kasta, awan maayna ti ibunbunannagtayo a pammati.” – ST, July 7, 1887.
“Awan ti pudno a panagbabawi a saan a mangitrabaho iti repor-masyon. Ti kinalinteg ni Cristo ket saan a cabal a mangabbong iti saan a nailacsid a basol; maysa daytoy a prinsipio ti biag a mangbalbaliw iti kababalin ken mangkontrol iti ugali. Ti kinasanto ket kinaan-anay para iti Dios, naan-anay a panangisuko iti puso ken biag tapno taengan dagiti prinsipio ti langit.” – DA, pp. 555, 556.
“Insina ni Juan ti bagina kadagiti gagayyem ken kinagarbo iti biag. Ti kinasimple ti cawwesna, aruat a naabel iti dotdot ti camelio, nalawag a tubngar iti kinabarayoboy ken pammarang dagiti papadi a Judio ken iti sapasap nga ili. Ti taraonna, puro a natnateng, bungbunga ti kayo ken atap a diro, tubngar iti napalugodan a raman ken kinarawet nga agraraira sadinoman . . . . Dagiti mangisagana iti dalan para iti maikadua a yaay ni Cristo ibagi ida ni namatalec nga Elias, kas ti yaay ni Juan iti espiritu ni Elias a nangisagana iti dalan para iti umuna a yaay ni Cristo. Makibor coma ti naindaclan a topico ti reporma. . . . Panagteppel kadagiti amin a banbanag ti naikabit iti mensahe, tapno agbaw-ing ti ili ti Dios manipud panagdidiosenda, kinarawetda ken kinabarayoboyda iti cawwes ken sabali pay a banbanag.
“Siasinoman a mangsalungasing iti obligasyon moral iti pannangan ken panagcawwes isaganada ti dana mangsalungasing kadagiti tontontonen ti Dios mainaig iti agnanayon a pakasecnan.” – 3 T, pp. 62, 63.
Mierkules
Deciembre 30
4. BANDERA TI REPORMASYON – KINAPUDNO KEN WAYAWAYA
a. Babaen kadagiti ania a wagas a mabigbigko no ania ti kasapulan a repormaen? Salmo 119:142; Juan 17:17; 14:6.
“Gutoguten ti Dios kadagiti amin a mangibunbunannag iti naganNa ti nainget a panangipangag iti kinapudno. Kas ti asin daytoy a saanna a napukaw ti ramanna, kas ti lawag iti baet ti sipnget moral ken allilaw iti lubong.” – 4 T, p. 356.
“Ti prinsipio nga itag-aytayo iti daytoy a tiempo maipada met laeng iti napagtalinaed idi babaen kadagiti nangipangag iti evangelio iti naindaclan a Repormasyon. . . .
“Ti bandera ti kinapudno ken narelihionan a wayawaya nga itag-ay dagitoy a repormador iti daytoy maudi a susic ket naikumit kadatayo. Ti pagrebbengan para iti daytoy naindaclan a sagot naisaad kadagiti tattao a binendisyonan ti Dios iti pannakaammo iti saoNa. Awatentayo ti sao ti Dios kas kangatoan a turay. Kasapulan nga awatentayo ti kinapudno para iti bagbagitayo. Maapreciartayo laeng ti kinapudno no sukisokentayo ida babaen iti personal a panagadal. . . . Ti panangbigbig iti kinapudno iti sao ken iti aramid isu ti panangiconfesartayo iti pammati. Babaen laeng iti kasta a maammoan ti sabali a mamatitayo iti Biblia.” – 6T, pp. 402, 403.
b. Ania ngarud ti pagnanaigan ti wayawaya, pannakapasanto ken linteg ti Dios? Salmo 119:44, 45; Santiago 1:25; Juan 8:31, 32.
“Naan-anay nga itutunos iti pagayatan ti Amatayo nga adda sadi langit isu laeng ti pannakapasanto, ken ti pagayatan ti Dios a naipeksa iti nasantoan a lintegNa. Ti panangsalimetmet iti amin a bilbilin ti Dios ket pannakapasanto. Panangpanecnec ita bagim a natulnog nga anac iti Sao ti Dios ket pannakapasanto. Ti Sao ti Dios coma ti bagnustayo, saan a dagiti kapanunotan ken pagarup dagiti tattao.” – 3SM, p. 204.
“Ti peke a pannakapasanto directa a mangiyado iti Biblia. Ti relihion napagbalin a parabola. Rikna ken impresyon ti nagbalin a pagibasaran. Idinto nga ibunannagda nga awananda iti basol ken itangsitda ti kinalintegda, isuro dagiti agtontonton iti pannakapasanto a nawaya dagiti tattao a mangsalungasing iti linteg ti Dios ken kasta met a dagiti agtultulog iti pagannurotanna natnagda manipud iti parabor. Ti panangiparag kadagiti tontontonenna riingenna ti suppiat ken kiburenna ti gura ken busor. Ngarud naipakita ti kababalinda, ‘ta ti nakem a linalasag maibusor iti Dios; ta saan a paiturayan iti linteg ti Dios, ket dina met cabaelan a pulos’ (Roma 8:7).” – RH, Oct. 5, 1886.
Hueves
Deciembre 31
5. INDIBIDUAL A REPORMA
a. Kasano a marepormaac? Roma 1:16; 2 Timoteo 3:15.
“Maisina iti nadiosan a bileg, awan ti pudno a pannakareporma. Dagiti nataoan a pawil maibusor iti kadawyan ken naipaugalin a pagduyosan ket kasla turod ti darat a mangbangen iti napegges a layos. Inton a ti biag ni Cristo agbalin a mangpapigsa a bileg iti biagtayo – mabalintayon a pagkedkedan dagiti sulisog a mangdupar kadatayo iti man uneg wenno iti ruar.” – ST, Dec. 1, 1914.
“Ti kinaCristiano igakatna ti pannakareporma ti puso. No ania ti itrabaho ni Cristo iti uneg, maitrabaho babaen iti panangidictar ti naconvertir nga isip. Ti plano a panangrugi iti ruar ken padpadasen nga itrabaho iti uneg ket kanayon a napaay ken kankanayon a mapaay. Ti plano ti Dios kenca ket mangrugi iti mismo a sentro ti amin a rikrikot, ti puso, ta aggapu iti puso ibanagna dagiti prinsipio ti kinalinteg; ti pannakareporma ket makita iti ruar kasta met iti uneg.” – CDF, p. 35.
b. Kasano nga agbalinnac nga aktibo a repormador? Galacia 6:9, 10; 1 Juan 1:3.
“‘Dagidiay a mangidayaw Caniac, dayawecto’ (1 Samuel 2:30). Manipud iti kasta a pagtaengan ti ama mapan iti inladaw a pagrebbenganna a kaduana ti espiritu a napalukneng ken naisuko babaen iti pannakisasao iti Dios. Cristiano isuna, saan laeng iti sao, no di pay iti aramid ken iti amin a pannakinegosiona. Aramidenna ti trabahona a sipupudno, ta ammona a ti mata ti Dios adda kencuana.
“Iti iglesia ti bosesna ket saan a naulimec. Addaan isuna kadagiti sao ti panagyaman ken makapabileg nga ipeksa; agsipud ta dumacdackel a Cristiano isuna nga addaan iti sadiwa a kapadasan iti inaldaw. Managtulong isuna, aktibo a trabahador iti iglesia, gtrabtrabaho para iti dayag ti Dios ken iti pannakaisalacan ti padana a tao.” –5T, pp. 424, 425.
Viernes
Enero 1
PERSONAL A PANGREPASO A SALSALUDSOD
1. Ania ti ipatungpal ti pudno a reporma iti biag ti mamati?
2. Kasano ti pannakikuyog ti panagbabawi iti repormasyon?
3. Iti ania a disso ti kasapulan ti amin a mareporma?
4. Kasano nga agbalintayo a lawag iti baet ti moral a kinasipnget?
5. Kaano a maaddaantayo iti pudno a reporma iti biagtayo?