Domingo
Marzo 20
1. MENSAHE PARA KADATAYO
a. Apay a napateg nga ipakattayo iti bagbagitayo ti mensahe ti Pudno a Sacsi a maiturong iti Laodicea? Apocalipsis 3:14-17; 1 Corinto 8:2; 10:12.
“Ti mensahe a maiturong iti iglesia Laodicea sumangbay kadagiti tattao a saan a mangipakat kadagiti bagbagida.” – CWE, p. 99.
b. Ania ti mangipakita a ti kasasaad ti Laodicea ket addaan iti namnama? Apocalipsis 3:18. Ania ti kasapulan nga aramiden-tayo tapno maipakat ti remedio? 1 Pedro 5:6; Salmo 147:11.
“Ngem ti balakad ti pudno a Sacsi saanna nga irepresentar dagiti tattao nga adda iti apagpatay ti lamiisna, a kas iti awanan namnama a kaso. Adda pay la gundaway a mangiremedio iti kasasaadda, ket napno ti mensahe Laodicea kadagiti pammapigsa; ta ti naglikod nga iglesia mabalinna ti gumatang iti balitoc ti pammati ken ayat, maaddaan iti pagan-anay ti kinalinteg ni Cristo, tapno saan a maiparang ti nacababain a kinalamolamoda. Kinadalus ti puso, kinadalus ti motibo, mabalin nga iladawan dagiti tattao a saan a naimpusoan ken mangikagkagumaan nga agserbi iti Dios ken kuwarta. Mabalinda pay nga ugasan ti pagan-anay ti kababalinda ket aramiden ida a puraw babaen iti dara ti Cordero.” – 7 BC, p. 966.
Lunes
Marzo 21
2. PANGRIING NGA AWAG
a. Ania ti kasapulan nga aramidentayo tapno maaddaantayo iti paset iti pannakaitunda ti kaudian a mensahe iti lubong? 1 Corinto 15:34; Roma 13:11.
“Agbibiagtayo iti pangserra a parang iti pakasaritaan ti daga. Ti padto napaspas a maipatpatungpal. Dagiti oras ti probasyon ket napaspas nga aglabas. Awanen ti oras – wenno kanito a sayangentayo. Saantayo coma a masaracan a matmaturog nga agbanbantay. Awan coma ti mangibaga iti pusona wenno babaen kadagiti ar-aramidna: ‘itantan ti Apoc ti yaayNa.’ Ti mensahe ti asidegen a panagsubli ni Cristo ti maiyallangogan kadagiti napasnec a sasao ni ballaag. Allocoyentayo dagiti lallaki ken babbai sadinoman nga agbabawi tapno malibasan ti pungtot a sumangbay. Riingentayo ida nga agsagana nga insegida, ta bassit ti ammotayo no ania ti adda iti sangotayo. Mapan coma dagiti ministro ken kadawyan a miembro kadagiti maluluom a tay-ac tapno ibaga kadagiti saan a maseknan ken saan a mangikaskaso a sapulendan ti Apo kabayatan a masaracan pay. Masaracan dagiti trabahador ti anienda iti sadinoman a pangiwaragawaganda iti nalipatan a kinapudno iti Biblia. Masaracanda dagiti tattao nga umawat iti kinapudno ket isangratda ti biagda a mangisangbay kadagiti kararua ken ni Cristo.” – 8 T, pp. 252, 253.
b. Ania a trabaho ti maipatungpal iti daytoy a tiempo? Nehemias 2:18; Salmo 94:16.
“Tarigagay ti Apo a bumangon ti iliNa ket aramidenda ti naituding a trabahoda. Ti pagrebbengan a mangballaag ket saan laeng a naipabaclay kadagiti ministro. Dagiti kadawyan a kameng ti iglesia ket makipaset iti trabaho a mangisalacan iti kararua. Babaen kadagiti panagbisita ken babaen iti panagiwaras kadagiti literatura, adu kadagiti pulos a dipay naballaagan ti mabalin a madanon. Maurnos coma dagiti bunggoy a mangsapul kadagiti kararua. Bisitaen coma dagiti kameng ti iglesia dagiti karrubada ket ilukat kadacuada ti Nasantoan a Surat. Sumagmamano ti mabalin a mapan kadagiti ig-igid, ket babaen iti nainsiriban a panagplano, maicasaba ti kinapudno kadagiti amin a distrito. Babaen iti kinapinget iti daytoy a trabaho, ken nasayod a pannakaawat, adu ti makakita iti bunga ti bannogda iti pannakaisalacan dagiti kararua. Ket dagiti naconvertir, agisuroda met iti sabali. Kasta a maimula ti bukel iti nagduduma a disso, ket ti kinapudno maipacdaar iti amin.” – RH, Jan. 25, 1912.
“Addaantayo kadagiti ballaag a mabalintayo nga ited, trabaho a mabalintayo nga aramiden, ngem mabiiten a narigrigatton ngem iti ipagaruptayo.” – Ev., p. 218.
Martes
Marzo 22
3. PABIAGEN DAGITI NAGANGGANGAN A TULTULANG
a. Iti parparmata a naited ken ni Ezequiel maipapan iti tay-ac dagiti naganggangan a tultulang, ania ti inkari ti Dios nga aramiden kadagiti naganggangan a tultulang? Ezequiel 37:5, 6. Ania ti pagtaudan ti pannacabalin a mangted biag kadagiti tultulang? Versiculo 13, 14.
“Ania a bileg ti kasapulan nga adda kadatayo manipud iti Dios tapno ti nalamiis a puso, nga addaan laeng iti legal a relihion, makitana dagiti naim-imbag a banbanag a maipaay kadacuada – Cristo ken ti kinalintegNa! Mensahe a mangted-biag ti kasapulan a mangted biag kadagiti naganggangan a tultulang.” – 3 SM, p. 177.
“Ngem daytoy a napiguraan a pagsasao maipapan iti naganggangan a tultulang saan laeng a maipakat iti lubong, no di pay ket kadagiti nabendisyonan iti nain-indaclan a lawag; ta kasla da met kadagiti iskeleton iti tanap. Addaanda iti porma ti tao, pakabuclan ti bagi; ngem awananda iti naespirituan a biag. Ti pangarig saanna a panawan ti naganggangan a tultulang a matipontipon a maporma a tattao; ta saan a makaanay nga adda nasukog a langa. Ti anges ti biag ti kasapulan a mangbiag iti bagi tapno makapagtacderda a sililinteg ken makapag-tignay. Dagitoy a tultulang iparangda ti balay ti Israel, ti iglesia ti Dios ken ti namnama ti iglesia isu ti mangpabiag nga inpluensia ti Espiritu Santo. Kasapulan nga angsan ni Jehova dagiti naganggangan a tultulang, tapno agbiagda.” – 4 BC, pp. 1165, 1166.
b. Ania ti iraman ti trabaho a mangpabiag? Apocalipsis 3:19, 20; 2 Timoteo 4:2.
“Dagiti angeles ti Dios mapanda kadagiti nagduduma nga iglesia tapno aramidenda ti pagrebbenganda; ket ni Jesu Cristo agtoctoctoc iti ruangan ti puspusoyo tapno sumrec. Ngem ti wagas a pinartuat ti Dios a mangring iti iglesia tapno mariknana ti naespirituan a kinakurapay ket saan a naipangag. Nangngeg ti timec ti Pudno a Sacsi a mangtubngar ngem saan a natungpal. Pinili dagiti tattao ti bukodda a dalan, imbes a dalan ti Dios, agsipud ta saan a nailansa ti bagida kadacuada. Gapuna a ti lawag addaan laeng iti bassit nga epecto kadagiti puspuso ken panpanunot. ‘Aggagetca ngarud ket agbabawica.’” – RH, Dec. 18, 1888.
“Isuda a mangawit ti mensahe iti lubong siaanepda a mangsapul iti Apo, tapno ti Espiritu SantoNa ket sibubuslon a maiparocpoc kadacuada. Awanen ti tiempo a pukawem. Agkararag para iti pannacabalin ti Dios tapno makapagtrabahoka a sibaballigi para kadagiti adda iti asideg ken iti adayo.” – 1 SM, pp. 92, 93.
Mierkules
Marzo 23
4. PANANGIBAYOG KEN CRISTO
a. Ania ti maysa a banag a mangsagepsep iti imatang dagiti napaungar a mensahero ti Dios? Salmo 17:15; Juan 17:3; 1 Corinto 2:1, 2.
“Nauneg, nabara a kinasanto iti pagtaengan, iti iglesia ken iti karruba, ti mangisangbay kadagiti kararua a mangimatang kadagiti nakakas-kasdaaw a banbanag manipud iti linteg, ken tapno makita ti nagloriaan a kinapudno ni Cristo iti kinalintegtayo. . . .
“Dagidiay nga addaan iti kinapudno a nakalucat iti sangoda para iti daytoy a tiempo awitda ti nadaeg a pagrebbengan. Kasapulan nga ipacdaarda ti panagbabawi ken ni Apo Dios ken pammati ken ni Apotayo a Jesu-Cristo. Kasapulan nga agtaengda iti cruz ni Cristo ket awisen ti imatang ti tunggal kararua nga iturong iti Cordero ti Dios a mangikkat iti basol ti lubong. Ni Cristo iti panangilacsidNa iti Bagina, ni Cristo iti pannakaibabainNa, ni Cristo iti kinadalusNa, iti kinasantoNa, ni Cristo iti awan kapadana nga ayatNa – daytoy ti tema a kasapulan a madakamat iti tunggal panagsao. Naipakita kaniac a kasapulan nga adda naindaclan a panagriing iti ili ti Dios. Adu dagiti saan a naconvertir a nakasurat ti naganda iti libro ti iglesia. Maulit coma dagitoy a sasao babaen kadagiti tattao a naiconsagrar iti trabaho; [naadaw iti Juan 3:16].” – RH, Aug. 13, 1889.
“Maysa nga interes ti mangabac, maysa a soheto ti mangalon-on iti amin a sabsabali, Cristo ti Kinalintegtayo.” – PC, p. 342.
b. Kasano nga agtignay ti napaungar nga adipen ti Apo, iti lacsid ti panangsuppiat iti mensahe ti ballaag? Job 2:17; Roma 12:12; Efeso 6:18.
“Kankanayon nga isangbay ti Dios para iti iliNa iti kaindaclan a panagkasapulanda, no adda ti kasla kabassitan a namnama a madadael, mabalin a liklikan. Dagiti panggep dagiti nadangkes a tattao, dagiti kabusor ti iglesia ket iturayan ti bilegNa ken ti mangituray a providencia. Makapagtignay iti puso dagiti estadista; ti pungtot ti nariri ken saan a mapnec, dagiti gumurgura iti Dios, iti kinapudnoNa ken iti iliNa ket mabalin a maipaigid, kas ti pannakaiyalis ti dandanum ti karayan, no ibilinNa a kasta. Dagiti karkarag tignayenna ti tackiag ti Mannakabalin Amin. Isuna a nangintar kadagiti bitbituen tapno naurnosda sadi langit, a ti saoNa tengngelna dagiti dalluyon ti taaw, isu met la a Namarsua ti agtrabaho gapu man la iti iliNa no umawagda Kencuana a sipapammati. LapdanNa dagiti puwersa ti sipnget agingga a maited ti mensahe iti lubong ket amin a mangipagag nakapagsagana para iti susic.” – 5 T, pp. 452, 453.
Hueves
Marzo 24
5. KUMITKITA ITI DAYTA NAGASAT A NAMNAMA
a. Ania ti naindaclan a pribilihio ti adda kadatayo iti panagsagana para iti asidegen a panagsubli ni Cristo? Lucas 8:16; Isaias 60:1.
“Pribilihio ti tunggal kararua ti agbalin a sibibiag a kalasugan tapno maiyammo ti Dios iti lubong dagiti gameng ti paraborNa, ti saan a masukisok a kinabacnang ni Cristo. Adda ti awan kadagiti kalikaguman unay ni Cristo nga ahencia a mangiparang iti Espiritu ken kababalinNa iti lubong. Awanen ti kasapulan unay ti lubong a kas ti pannaka-iparangarang ti ayat ti Mannubbot iti sangkataoan. Amin a langit ket agur-uray para kadagiti kalasugan a maaramat para iti pannakaiparocpoc ti nasantoan a lana tapno agbalin a rag-o ken bendisyon kadagiti nataoan a puso.” – COL, p. 419.
b. Iti buya ti asidegen a yaay ni Cristo, kasano ti panagbiagtayo ita? 2 Pedro 3:11, 12; Tito 2:11-13.
“Inaramid ni Cristo ti amin a sagana tapno ti iglesiaNa ket agbalin a bagi, nagangtan iti Silaw ti lubong, addaan dayag ni Emmanuel. PanggepNa a tunggal Cristiano ket mapalawlawan iti naespirituan a law-ang ti lawag ken cappia. TarigagayNa nga ipalgactayo iti biagtayo ti bukodNa a rag-o.” – COL, p. 419.
“Um-umayen ti Apo. Itangadyo dagiti uloyo ket agrag-o. . . Daytoy ti naimbag, naragsac a padamag a mangpabileg iti tunggal kararua, a rumbeng a maulit-ulit iti pagtaengantayo ket ibaga kadagiti masabattayo iti kalsada. Ania ti ad-adda a makaparagsac a damag ti mabalin nga isao!” – Ev., p. 218.
Viernes
Marzo 25
PERSONAL A PANGREPASO A BASBASAEN
1. Kasano a ti mensahe ti Laodicea ket napno iti makapapigsa para kadatayo?
2. Ania dagiti sumagmamano a practikal a wagas tapno dagiti kadawyan a kameng ket madanonda dagiti kararua iti aglawlawda.
3. Kasano a ti parparmata iti naganggangan a tultulang maipakat kadagiti tattao nga addaan naindaclan a lawag?
4. Kadagiti ania a wagas a daeran ti Dios dagiti bileg ti sipnget, bayat nga agkararag ti iliNa a sipapammati?
5. Iti ania a wagas nga irakurac ti ili ti Dios ti mensahe ti ragsac para iti daytoy a tiempo?