Domingo
Pebrero 21
1. TI KASASAAD TI LAODICEA
a. Ania nga ayo ti agraira iti lubong dagiti agkunkuna a Cristiano ita? Isaias 4:1.
b. Ania ti napeggad a kasasaad ti iglesia kabayatan ti panawen ti Laodicea? Apocalipsis 3:17.
“Adu dagiti mangitangsit kadagiti bagbagida iti naespirituan a kinabacnangda, iti pannakaammoda iti kinapudno, ngem agbibiag a nacabasol iti panangallilaw iti bagi. No dagiti kameng ti iglesia ipakumbabada dagiti bagbagida iti sangoanan ti Dios babaen iti napasnec, saan a kagkagudua, awanan biag a tignay, awaten ti Apo ida.” – RH, Dec. 23, 1890.
“Saan nga awaten ni Cristo ti nagan dagiti tattao a mapnec iti bukodda a kinaan-anay. SaanNa a maidawdawatan dagiti tattao a saan a makarikna a masapulda ti tulongNa, tattao a mangtontonton nga ammoda ken addaanda iti amin a banbanag.” – 7 BC, p. 964.
Lunes
Pebrero 22
2. TI NALINTEG A TESTIMONIA A MAITURONG ITI LAODICEA
a. Ania ti nakakigkigtot a panangcondinar ti impaay ni Cristo iti agibunbunannag nga iliNa? Apocalipsis 3:15, 16.
“Ti mensahe a maiturong iti iglesia ti Laodicea ket nakakigkigtot a panangcondinar ket maipakat iti ili ti Dios iti agdama a tiempo.” – RH, Sept. 16, 1873.
b. Ania a mensahe ti nairanta a mangator iti daytoy a kasasaad a narejectar idi 1888 Conferencia Heneral a naangay idiay Minneapolis? Apocalipsis 3:18; 18:1.
“Ti mensahe nga inted da A.T. Jones ken E. J. Waggoner ket mensahe ti Dios a naiturong iti iglesia Laodicea, ket ay-ay pay ti siasinoman a mangibunbunannag a mamati iti kinapudno a saan met a makaiyanninaw iti sabali kadagiti raya nga inted ti Dios.” – 15 MR, p. 92.
“Ti mensahe ken dagiti mensahero ket saan a naawat no di ket naumsi. Kalikagumko a dagiti naindaclan nga agkasapulan iti mensahe ti nadiosan nga ayat mangngegda coma ti panagtoktok ni Cristo iti ruangan ti pusoda, ket pastrekenda ti nainlangitan a bisita. Ngem ti puso dagiti sumagmamano a nagtoktokan ni Jesus napaay. Iti panangrejectar iti mensahe a naited idiay Minneapolis, nakabasol dagiti tattao. Nakaaramidda ti adayo a nakarkaro a basol iti panangitultuloyda iti gurada kadagiti mensahero ti Dios iti adu a tawtawen, babaen iti panangrejectarda iti kinapudno nga igunamgunam ti Espiritu Santo. – E. G. White 1888 Materials, p. 913.
“Ti panawen ti suot ket addan kadatayo, ta nangrugin ti natbag pukkaw ti maikatlo nga angel iti pannakaipalgac ti kababalin ni Cristo, ti Mannubbot a mamakawan iti basol. Daytoy ti pangrugian ti lawag ti angel a ti dayagna punoenna ti sibubukel a daga.” – 1 SM, p. 363.
“Ti saan a kinaannugot a mangisuko kadagiti sigud a kapanunotan, tapno awataen ti kinapudno, isaadna ti pundasyon ti nalawa a paset ti opsisyon a naiparangarang idiay Minneapolis maibusor iti mensahe ti Apo babaen kada kakabsat E. J. Waggoner ken A.T. Jones. Babaen iti panangsugsog iti dayta nga oposisyon, nagballigi ni Satanas a nangiyadayo iti ilitayo, iti naindaclan a rukod, ti naisangsangayan a bileg ti Espiritu Santo a sigagagar nga ipaay ti Dios kadacuada. Linapdan ida ti kabusor a manggun-od iti dayta a laing a matagicuada coma iti panangisangbay iti kinapudno iti lubong, kas ti panangipacdaar dagiti apostoles kalpasan ti aldaw ti Pentecostes. Ti silaw a manglawag iti sibubukel a daga babaen iti dayagna ket napagkedkedan, ket babaen iti tignay ti bukodtayo a kakabsat iti dackel a rukod naiyadayoda iti lubong . – Ibid., pp. 234, 235.
Martes
Pebrero 23
3. PAGTALINAEDEN A NAKAGANGAT TI PAGSILAWAN
a. Ania a ballaag ti naited kadatayo ita? Apocalipsis 2:5; Job 18:5, 6; Jeremias 25:10
“No agsardengtayo a mangipatungpal iti misyontayo, no ti pagsilawan agkedked a mangiyanninaw iti lawagna, ket ti naindaclan a kinapudno a naitalec iti tunggal maysa cadatayo para iti lubong ket saan a maipaay kadacuada, iti kasta ti pagsilawan maikkatto.” – RH, June 7, 1887.
“Addaantayo iti mensahe a mangballaag iti iglesia. Kinuna ti Dios kenca, ‘Aggagetca ket agbabawica.’ ‘Umayacto kenca, ket iccatecto ti pagsilawam iti yanna, malacsid no agbabawica’ (Apocalipsis 2:5). Napateg a tiempo ti nasayang nga isu coma ti panangisangbaymo kadagiti kararua ken Cristo – dagiti kararua a gapu iti panagayatmo iti nam-ay, itan napukawdan. Tunggal kameng ti iglesia mariingen iti pagrebbengan. Tulongannacayo coma ti Dios a mangawit iti pagrebbengan. Agkararag, agayonar ken mamati coma dagiti kameng ti iglesia. Isubli coma ti puso dagiti nagannac cadagiti annacda, ken ti puso dagiti annac kadagiti nagannacda; ‘di la ket ta umayac’ kinuna ni Jehova, ‘ket cabilec ti daga iti panangilunod.’” – HS, pp. 286, 287.
“Ti sibibiag a Cristiano isu ti tao a saan a mangpanaw iti umuna nga ayatna, ket ti pagsilawanna saan a maikkat iti lugarna.” – RH, Nov. 1, 1892.
b. Ania ti aramidentayo iti silaw nga adda cadatayo? Mateo 5:16; Lucas 11:33. Ania ti kasapulantayo tapno agraniag ti pagsilawantayo? Mateo 25:4.
“Kumitatayo ken Jesus, tapno gammatan ti EspirituNa, tapno agbiag iti lawag ti kinaimbag ken ayatNa ken tapno maiyanninaw ti dayagNa iti sabali.” – MLT, p. 200.
“Bumangon coma ti iglesia ket agranyag. Isanay coma ti tunggal pamilia ti panangilacsid iti bagi, aramiden amin a cabaelanda a mangpasayaat iti bukodda a kasasaad. Dagiti sipupudno nga adda iti sibay ti Dios ket manangilacsid ken manangisacrificioda kadagiti bagbagida. Mangan ken uminumda para iti dayag ti Dios, agkedkedked a mangrugit iti kararua ken bagi babaen iti saan a panagteppel. Iti kasta ti kasasaad ti iglesia ti agsacsi a ti silawna saan a naikkat. Ngem no dagiti kameng ti iglesia saanda nga akmen ti paset nga intuding ti Dios kadacuada, ti panagtignay ti reporma ti salun-at agpatuloy uray awanda, ket makitanto nga ikkaten ti Dios ti pagsilawanda manipud iti saadna. Dagiti agkedked nga umawat ken mangisanay iti lawag ket mabati iti likudan.” – 13 MR, p. 339.
Mierkules
Pebrero 24
4. LANA KADAGITI VASOTAYO
a. Ania ti pagpadaan ti kasasaad Laodicea ken ti kasasaad ti iglesia nga irepresentar dagiti lima nga ampang a babbalasang? Apocalipsis 3:15, 18; Mateo 25:3, 8-10.
“Kadagitoy matmaturog a disipulos nakita ni [Jesus] ti pannakaiparang ti matmaturog nga iglesia. No kaano a rumbeng nga agridamda, matmaturogda met.” – 5 BC, p. 1104.
“Ti kasasaad ti iglesia nga iladawan dagiti naampang a babbalasang ket saoenna met ti kasasaad ti Laodicea.” – RH, Aug. 19, 1890.
“Nupay dagiti agkunkuna a pasurot ida ni Cristo ket adda iti nakalad-ladingit a kasasaad, saanda pay laeng a mauppapay a kas kadagiti naampang a babbalasang a maid-iddep ti pagsilawanda ket awan ti tiempo a mangkarga iti lana kadagiti vasoda. Idi dimteng ti asawa, dagiti adda a nakasagana, simrecda a nakikuyog kencuana iti pagbodaan ket idi immay dagiti naampang, ti ruangan napunitan, ket naladawda unayen ket didan nakastrec. Ngem ti balacad ti Pudno a Sacsi saan nga irepresentar dagiti adda iti apagpatay ti lamiisna nga addada iti awanan namnama a kaso. Adda pay la gundaway a mangiremedio iti kasasaadda, ket napno ti mensahe Laodicea kadagiti pammapigsa; ta ti naglikud nga iglesia mabalinna ti gumatang iti balitoc ti pammati ken ayat, maaddaan iti pagan-anay ti kinalinteg ni Cristo, tapno saan a maiparang ti nacababain a kinalamolamoda.”– Ibid., Aug. 28, 1894.
b. Ania ti kasapulan dagiti matmaturog, apagpatay ti lamiisna nga iglesia? Mateo 25:4, 7; Levitico 24:2
“Umaw-awag ti Dios kadacayo nga agraniagcayo. Buyogan iti napalalo a panangigaga, tarimaanenyo ti pagsilawanyo, alaenyo ti lana ti parabor kadagiti vasoyo, ket pagtalinaeden dagiti pagsilawanyo a natarimaan ken sumsumged, tapno agraniag ken nalawag iti baet ti sipnget moral daytoy a lubong. Amin a mangpetpet iti kinapudno petpetanda iti kinalinteg ken apresiarenda ti pateg ken kinasagradona. Agkiddawda iti sirib iti Dios, tapno maidanonda dagiti rayana kadagiti amin a daldalan ti biag. No napasantotayo babaen iti kinapudno, ti kararuatayo ket masacnapan iti nauneg ken agtaeng a kapanunotan iti kinapategna, ket taraon ken inumentayo ti agtulnog iti kinapudno ken iyallawat iti sabali ti napateg a lawag.” – ibid., Feb. 7, 1893.
Hueves
Pebrero 25
5. DAGITi AGAW-AWIT TI SILAW ITI LUBONG
a. Ania ti trabahotayo kabayatan ti ocom iti panawen ti Laodicea? Apocalipsis 3:19-21; 14:6.
“Addaantayo iti napateg a lawag nga iparang iti sango ti ili, ket agrag-otayo nga addaantayo iti mensahe para iti daytoy a tiempo nga isu ti agdama a kinapudno. Dagiti padamag a ni Cristo ti kinalintegtayo, isu ti nangisangbay iti bang-ar kadagiti adu a kararua, ket kuna ti Dios iti iliNa, ‘Agpatuloy.’” – RH, July 23, 1889.
“Trabaho ti tunggal maysa a simmangbayan ti mangballaag a mensahe, ti mangibayog ken Jesus, iparang Isuna iti lubong kas naipalgac kadagiti tipo, ken naiyanninaw kadagiti simbolo, naipaduyacyac kadagiti paltiing dagiti propeta, nailukat kadagiti leksion a naited kadagiti disipulos ken kadagiti nakakaskasdaaw a milmilagro a naisangbay para kadagiti annac dagiti tattao. Sukisoken ti Nasantoan a Surat; ta isuda ti agsacsi ti maipapan Kencuana.
“No kayatmo ti makapagtacder iti panawen ti ririboc, kasapulan a maam-ammom ni Cristo, ket tagikuaem ti sagot ti kinalintegNa, nga ipaayNa iti agbabbabawi a managbasol.” – 1SM, p. 363.
b. Ania a kasasaad ti adda iti uneg ti natda nga iglesia ni Cristo ti agbalinto a sacsi iti lubong? Juan 17:20,21; Hebreo 13:1; 1 Pedro 3:8, 9.
“Pagayatan ti Dios nga adda coma ti panagkaykaysa ken nainkabsatan nga ayat iti nagbabaetan ti iliNa. . . . Idinto a saantayo nga isacrificio ti maysa a prinsipio ti kinapudno, agtultuloy coma a panggeptayo ti mangdanon iti daytoy a kasasaad ti panagkaykaysa.” – PP, p. 520.
Viernes
Pebrero 26
PERSONAL A PANGREPASO A SALSALUDSOD
1. Ania ti naliday a kasasaad ti iglesia bayat ti panawen ti Laodicea?
2. Ania ti nanglapped iti ili ti Dios nga immawat iti naisangsangayan a pannacabalin ti Espiritu Santo iti napalabas a nasuroc a sangagasut a tawtawen?
3. Kasano a mapagranyagtayo ti silawtayo?
4. Ania a namnama ti matagikuatayo bayat ti panangutob iti nagdumaan ti Laodicea ken dagiti lima a naampang a babbalasang?
5. Ania ti tarigagay ti Dios para kadatayo iti daytoy a tiempo?