Domingo
Enero 31
1. AGBIBIAG ITI PANAGPATINGGA TI TIEMPO
a. Ania a kaipapanan ti adda kadagiti tiempo a pagbibiagan-tayo ita? Malakias 4:1, 5.
“Ni Juan Bautista ket mangibagi kadagiti agbibiag kadagitoy maudi nga al-aldaw, isuda a nangitalkan ti Dios kadagiti sagrado a kinapudno tapno iparang iti sango dagiti tattao, tapno maisagana ti dalan para iti maikadua a panagparang ni Cristo. Repormador idi ni Juan.” – Ibid., p. 71.
b. Ania a kita ti servicio ti naiyawag bayat ti panangsango iti panagpatingga ti tiempo? 2 Pedro 3:11; Lucas 16:13; 10:27.
“Isuna a mangibangon iti napigsa, natibker a kababalin, isuna nga agbalin a naimbag a Cristiano, kasapulan nga itedna amin ken aramidenna amin para ken Cristo; ta saan nga awaten ti Mannubbot ti nabingbingay a servicio.” – AA, p. 483.
“Kasapulan nga agtrabahotayo iti maymaysa nga espiritu, uray iti panunot ni Cristo; ket no aramidentayo daytoy, baro a biag ti sumangbay iti iglesia.” – RH, Nov. 29, 1898.
Lunes
Pebrero 1
2. KAS MAYSA A PARABANTAY
a. Ania ti pagrebbengan ti maysa a parabantay? Ezequiel 33:6-9.
“Dagiti parabantay idi ket maisaadda kadagiti bakud ti Jerusalem ken kadagiti sabali a ciudad nga ayan ti kapatgan a saad. Agsanggir iti kinamatalecda ti talged ti amin nga adda kadagidiay a ciudad. No maduktalanda ti peggad, saanda nga agulimec iti aldaw wenno rabii. Kada sumagmamano a kanito magutogutda nga awagan ti maysa ken maysa tapno ammoen no amin ket nakariing ken awan ti peggad a simmangbay iti asinoman. Maidestino dagiti parabantay kadagiti sumagmamano a nangangato a disso a mangwanawan kadagiti napapateg a disso a mabantayan, ket agallangogan manipud kadacuada ti pukkaw ni ballaag wenno naimbag a pangparegta. Maiyallawat manipud iti maysa a maidanon iti sabali, tunggal maysa ulitenna dagiti sao, agingga a maidanon iti intero a ciudad.
“Dagitoy a parabantay irepresentarda ti annongen, nga iti kinapudnoda nga agsanggir ti pannakaisalacan dagiti kararua.” – 4 T, pp. 402, 403.
“Itan nga awanen ti tiempo nga iyaliwaksay ti peksatayo, nga agbalin a nabuntog ken di mangigin-gina; awan tiempo a mangilemmeng iti lawagtayo ket ilemmeng iti siroc ti salop, nga agsao kadagiti nalamuyot a banbanag, tapno ipadto ti allilaw. Saan, saan; awan ti lugar para kadagiti tur-og a parabantay kadagiti bakud ti Sion. Tunggal bileg maipakat a nay-anay ken amin-amin para iti Dios.” – E.G. White Maaterials, p. 720.
b. Ania ti utobentayo bayat ti panangbuyatayo kadagiti tiempo a pagbibiagantayo ita? 1 Corinto 15:34; Roma 13:11, 12.
“Kakabsatco, agbibiagtayon iti kadaegan a panawen ti pakasaritaan ti daga. Awanen ti tiempo nga agbasol; kankanayon a napeggad ti agtultuloy nga agsalungasing; ngem iti naisangsangayan a kapanunotan, pudno daytoy iti agdama a tiempo. Addatayon kadagiti beddeng ti awan patinggana a lubong ket agtacder iti nadadaeg a relasyon iti tiempo ken iti kinaagnanayon a nakarkaro ngem idi.” – TM, p. 147.
“Ni Enoc addaan met kadagiti sulisog kas kadatayo. . . . Saan isuna a natulawan kadagiti agraraira a basbasol iti panawen a nagbiaganna. Gapuna a makapagtalinaedtayo a nadalus ken awanan tulaw. Itacderna dagiti sasantos nga agbiag iti baet dagiti peggad ken kinarugit dagiti maudi nga alaldaw. Ta gapu iti namatalec a kinatulnogna iti Dios a naiyalis isuna. Ngarud, kasta met a dagiti namatalec, a sibibiag ken natda, maiyalisdanto met. Maikkatdanto manipud iti managbasol ken narugit a lubong tapno maipan iti nadalus a rag-o ti langit.”– 2T, p. 122.
Martes
Pebrero 2
3. NABILIN A MANGISAGANA ITI DALAN
a. Sino ti mangipacdaar kadagiti kaudian a mensahe ti evangelio? 2 Timoteo 4:2; Apocalipsis 14:6, 7; Malakias 3:1.
“[Naadaw iti Apocalipsis 14:6, 7.] Daytoy a mensahe maipacdaar kas paset ti ‘awan patinggana nga evangelio.’ Ti trabaho a mangicasaba iti evangelio saan a naikumit kadagiti angeles no di ket naitalec kadagiti tattao. Naisaad dagiti angeles a mangiturong itoy a trabaho, isuda ti mangimaton iti naindaclan a tignay para iti pannakaisalacan dagiti tattao; ngem ti pudno a mangiwaragawag iti evangelio ket aramiden dagiti adipen ni Cristo nga adda iti rabaw ti daga.” – GC, p. 312.
b. Ania ti mangipakita nga isaganatayo ti dalan para iti maikadua a yaay ni Cristo, kas ti inaramid ni Juan Bautista iti umuna a yaayNa? Isaias 40:3; Juan 1:23; Hebreo 12:13.
“Ti trabaho ni Juan Bautista itacderna ti trabaho para kadagitoy a tiempo. Ti trabahona ken ti trabaho dagiti mapan iti espiritu ken bileg ni Elias ti mangriing kadagiti tattao manipud iti kinaawan interesda. Umayto ni Cristo iti maikadua a gundaway tapno ocomenNa ti lubong iti kinalinteg. Dagiti mensahero ti Dios a mangawit iti maudi a mensahe ti ballaag a maipaay iti lubong, isaganada ti dalan para iti maikadua a yaay ni Cristo kas ti panangisagana ni Juan iti dalan para iti umuna a yaayNa.” – YI, May 17, 1900.
k. Apay a magutogut ti panagsagana? Henreo 12:14; Lucas 12:39.
“Agsagsagana coma dagiti Cristiano para iti mabiiten a mapasamac iti lubong kas makapasegga a sorpresa, ket daytoy a panagsagana maaramid babaen iti naanus a panagadal iti sao ti Dios ken panangikagumaan a panangitunos iti biagda kadagiti annurotenNa. . . . Iyawag ti Dios ti mangpabiag ken repormasyon.” – PK, p 626.
“Tarigagay ti Dios nga agsagana ti iliNa para iti krisis a sumangbay iti mabiit. Nakasagana wenno saan a nakasagana, kasapulan a sangoenda daytoy; ket dagiti laeng nakaisangbay iti biagda a maitunos iti nadiosan a pagibasaran ti makapagtacder a sititibker iti tiempo ti suot ken pannuboc.” – AA, pp. 431,432.
Mierkules
Pebrero 3
4. PASUBLIEN TI PUSO DAGITI NAGANNAC KEN ANNAC
a. Ania ti naisangsangayan a trabaho dagiti nagannac a nakaayaban-da nga aramiden? Lucas 1:13-17; Proverbio 22:6.
“Maysa nga angel manipud langit ti immay a nangbilin kada Zacarias ken Elisabet no kasano a sanayen ti anacda, tapno makapagtrabaho a maitunos iti Dios a mangisagana iti mensahero a mangipacdaar iti umay a Cristo. Kas nagannac simamatalecda a makitinnulong iti Dios a mangsukog iti kababalin a mangitutop ken ni Juan iti trabaho nga intuding ti Dios kencuana kas nalaing a trabahador. Ni Juan ket anac iti kinataengan, anac isuna ti milagro, ket mabalin nga irason dagiti nagannac nga addaan isuna iti naisangsangayan a trabaho nga aramiden para iti Apo ket ti Apo ti mangtarabay kencuana. Ngem dagiti nagannac saan a nagrason a kasta; napanda iti putputong a disso ti away, lugar a saan a maibaskag ti anacda kadagiti sulisog ti biag ti ciudad, wenno masinga a maisina iti pammalacad ken bilbilin nga it-itedda kencuana. Inakoda ti pasetda iti pannakasukog ti kababalin ti ubing a mangipatungpal iti panggep ti Dios iti biagna. Di la ketdi a babaen iti kinaliway iti pasetda mapaay ti anacda nga agbalin a nalaing ken masirib, [naadaw iti Lucas 1:7-9].” – ST, Apr. 16, 1896.
b. Ania ti naisangsangayan a trabaho ti aramiden ti tunggal maysa kadacuada? Malakias 4:4-6.
“Amma ken inna, iturongyo ti pusoyo a mangsapul iti Apo; para iti naindaclan a pagrebbengan a naipabaclay kadacayo a mangipaay kadagiti annacyo iti ummo a sukog ti kababalin. Kankanayonyo a laglagipen ti para iti kinaagnanayon a pagimbaganda. Adalan ida nga agbalin a nadayaw, nadalus, natan-oc, mangipalpalgac iti kangatoan a kababalin ket iti sangoanan ti lubong ken langit ipakaammo a pinilida ti agservi iti Dios. . .
“Agkakaindaclan a bendisyon ken naespirituan a pigsa ti sumangbay kadagiti pamilia a mangikeddeng nga ikkatenda dagiti banbanag a saan a nasisita ket sipapasnecda nga alaen ti trabaho nga agsagana para iti yaay ti Apo. Intalec ti Dios kadagiti nagannac ti trabaho a mangtulong kadagiti annac a manggun-od iti kas ken Cristo a kapadasan. . . .
“Ipalgac iti bukodyo a biag ti pannakaitunos iti ladawan Dios. Pasayaaten dagiti talento nga adda kadacayo; pabilgen ti panunot ken bagi; paadduen ti pannakaammo ti Sao ti Dios; pasayaaten ti sagut nga agsao; babaen iti pannakaimatang iti nasantoan nga ehemplo maitag-aymo iti sangoanan ti sabali ti bileg ti Sao a mangbalbaliw iti kababalin.” – RH, Oct. 5, 1911.
Hueves
Pebrero 4
5. TI TRABAHO PARA KADAGITI NAGANNAC KEN ANNAC
a. Apay a nasisita para kadagiti dadackel ni Juan ti mangpadackel kencuana iti nateppel a panagtaraon?
“Maapektaran ti anac, para iti imbag wenno dakes, babaen kadagiti ug-ugali ti ina. Kasapulan a kontrolado isuna babaen iti prinsipio ken kasapulan nga isanayna ti kinateppel ken panangilacsid iti bagi, no kalicagumanna ti pagimbagan ti anacna.
“Addaan ti Dios iti importante a trabaho nga aramiden para iti naikari nga anac ni Zacarias; trabaho nga agkasapulan iti aktibo a panunot ken nasiglat a tignay. Kasapulan a maaddaan iti nasalun-at a bagi, panunot ken pigsa moral; gapu iti pananggun-od kadagiti a nasisita a talugading a kasapulan a matubay a siaannad, uray iti kinatagibina. . . . Igunamgunammi a dagiti prinsipio ti panagteppel ket maisangbay iti amin a detalye ti biag iti pagtaengan; tapno ti ehemplo dagiti nagannac agbalin a leksion ti kinateppel; tapno ti panangilacsid ken panangi-sacrificio iti bagi ket maisuro kadagiti annac ken maipaugali kadacuada uray pay iti kinatagibida.” – HS, pp. 208, 209.
b. Apay nga importante unay nga ipamaysa ti peksatayo iti pannakasanay kadagiti annactayo? Proverbio 22:6; Salmo 127:3.
“Nakarkaro ngem iti aniaman a kadawyan a sagut, a dagiti ug-ugali a naipaugali kadagiti nasapa a tawtawen, ikeddengna ti tao no agbalin a naballigi wenno maparmec iti gubat ti biag. Iti kinaagtutubo ti tiempo a panagmula. Ikeddengna ti kababalin ti maapit, para iti daytoy a biag ken para iti biag nga umay.” – DA, p. 101.
Viernes
Pebrero 5
PERSONAL A PANGREPASO A SALSALUDSOD
1. No ay-ayatentayo ti Dios nga ipangpangruna, kasano nga apec-taran daytoy no kasano a pagbiagan ti biagtayo?
2. Kasano nga agtignay a sitatacneng ti namatalec a parabantay ita?
3. Kasano a makapagsaganatayo para iti sumangbay a krisis?
4. Ania ti naisangsangayan a trabaho a kayat ti Dios a maaramid kadagiti pampamilia ita?
5. Kasano a maisurotayo cadagiti annactayo dagiti leksion ti panag-teppel, ken ania ti aramiden daytoy a pannakaammo kadacuada iti maud-udi a biag?