Domingo
Pebrero 7
1. PANANGAMIRIS ITI BAGI
a. Sadino ti umuna a pagtrabahoantayo no marugian ti naespirituan a repormasyon? 2 Corinto 13:5; Roma 8:10
“Ti pudno a repormasyon marugian iti panangdalus iti kararua. Ti trabahotayo para iti natnag, magun-od laeng iti pudno a balligi bayat a ti parabor ni Cristo sukogenna ti kababalin ken kasta met a maisangbay ti kararua iti nabiag a pannakisilpo iti Dios.” – MH, p. 180.
b. Ania a bileg ti agtrabtrabaho iti uneg ti nasisita tapno maipatungpal ti reporma iti ruar? Tito 3:5; Ezequiel 36:26, 27.
“Ti bassit a naalumanay a timec ti Espiritu ti Dios ti addaan bileg a mangbalbaliw iti puso.” – PK, p. 169.
“Ti plano a mangrugi iti ruar sananto padasen ti agtrabaho iti uneg ket naynay a mapaay ken kanayon a mapaay. Ti plano ti Dios kenca ket ti mangrugi iti trono ti amin a rigat, ti puso, sa manipud iti puso maisayangkat dagiti prinsipio ti kinalinteg; ti repormasyon ngarud makita iti ruar kasta met iti uneg.” – CDF, p. 35.
Lunes
Pebrero 8
2. PANANGKITA KEN CRISTO
a. Ania ti makitatayo iti ehemplo ni Cristo? Hebreo 12:2; 1 Pedro 2:21-23.
“Ti linteg condinarenna amin a basol ken gutogutenna amin a kinasingpet. Sapulenna iti tao ti akinruar a respeto, ken gutogutenna ti nadalus a kararua. ‘Adtoy,’ insurat ti salmista, ‘tarigagayam ti kinapudno kadagiti caunggan a paspaset; ket iti kaunegan a paset ipacaammomto caniac ti kinasirib’ (Salmo 51:6). Ti linteg ket naipaduyacyac iti biag ni Cristo. Isuna ti modelo ti sangkataoan. NagbiaganNa ti linteg. Ti kinadalus ken kinaimbagNa, ti debosyonNa iti kinapudno, ken ti regtaNa para iti dayag ti Dios ipalgacna ti kinaperpecto ti linteg. Ti tunggal tignayNa ket pannakaipalgac ti dayag ti Ama. Isuna ti amin a gutoguten ti linteg a pagbanaganNa.” – RH, Feb. 26, 1901.
“Nagbiagan ni Cristo ti biag a naan-anay nga agtulnog iti linteg ti Dios, ket iti daytoy, nangipaay iti ehemplo para iti tunggal tao. Ti biag a nagbiaganNa ditoy lubong isu ti pagbiagantayo babaen iti pannacabalinNa ken panursuroNa.” – TM, p. 180.
b. Iti ania a wagas a babaen iti panangkita mabaliwantayo? 2 Corinto 3:18; Salmo 119:11.
“Babaen iti panangkita ken Cristo agbalintayo a nabaliwan. No ti panunot agtaeng a kankanayon kadagiti temporario a banbanag, dagitoy a banbanag ti mangsagepsep, mangapektar iti kababalin, iti kasta ti dayag ti Dios mapukaw iti imatang ken malipatan. Dagiti gundaway a magawgaw-atda tapno agbalinda a managsarita kadagiti nainlangitan a banbanag, ket mabaybay-an. Matay ti naespirituan a biag.” – SDG, p. 105.
“Tapno makaipaay ti kas ti mensahe ni Juan, kasapulan a maaddaan iti naespirituan a kapadasan kas ti kapadasanna. Isu met la a trabaho ti maaramidtayo. Kasapulan a kumitatayo iti Dios, ket iti panangkita Kencuana, mapukaw ti panangkita iti bagi.” – GW, p. 55.
“Ti puso a sinakop ti sao ti Dios ket nataltalged maibusor ken Satanas. Dagiti mamagbalin ken Cristo nga inaldaw a kaduada ken nasinged a gayyemda – mariknada ti pannakabalin ti saan a makita a lubong nga adda iti aglawlawda; ket babaen iti ikikita ken Jesus agbalinda a maipada iti ladawanNa. Babaen iti panangimutectec maba-liwanda a maipada iti nadiosan a modelo; ti kababalinda agbalin a naasi, nadayaw ken natan-oc para iti nainlangitan a pagarian.” – 4 T, p. 616.
Martes
Pebrero 9
3. PANANGIWALIN ITI BAGI
a. No makitatayo a nasisita ti reporma, ania ti umuna nga addang nga aramiden? Marcos 8:34; 2 Corinto 10:5.
“Ti panursuro ni Juan inriingna iti puso ti kaadduan ti naindaclan a tarigagay a makipaset kadagiti bendisyon nga isangbay ni Cristo, ket inawatda ti kinapudno. . . . Awan, malacsid iti nasneban a tarigagay, napinget a pagayatan, natibker a panggep, ti makadaer iti sipnget moral a nangabbong iti daga kas manto ni patay. Tapno magun-odan dagiti bendisyon nga isu ti pribilihioda, kasapulan a sipapasnecda nga agtrabaho, kasapulan a mailacsid ti bagi.” – YI, May 17, 1900.
“No ti Espiritu ti Dios, iti nakakaskasdaaw a mangriing a bilegna, tignayenna ti kararua, pabassitenna ti nataoan a kinatangsit. Dagiti nainlubongan a ragsac ken takem ken pannakabalin ket makita nga awanan pateg. . . . Iti kasta ti kinapakumbaba ken ayat a mangisacrificio iti bagi, a bassit unay ti pannakaipategna kadagiti tattao, ket maitag-ayto nga isu laeng ti addaan pateg. Daytoy ti trabaho ti evangelio, a paset ti mensahe ni Juan.” – DA, p. 135.
b. Kasano kalawa ti trabaho a mangilacsid iti bagi? Filipos 1:21; 2 Corinto 5:14, 15; Juan 3:30.
“Kumitkita a sipapammati iti Mannubbot, nadanon ni Juan ti kangato iti panangilacsid iti bagi. Saanna nga awisen dagiti tattao iti bagina; no di ket itag-ayna dagiti kapanunotanda iti nangatngato ken nangatngato pay, agingga nga agtalinaedda iti Cordero ti Dios. Kencuana ket maysa laeng a timec, pukkaw idiay let-ang. Ita siraragsac nga immawat iti ulimec ken lidem, tapno dagiti mata ti amin ket maiturong iti Silaw ti biag.” – GW, p. 56.
k. Ania ti rumbeng nga ayo ti pudno a mensahero ti Dios? Roma 14:7, 8; Galacia 2:20.
“Dagiti napudno iti nakaayabanda kas mensahero ti Dios saanda a sapulen ti dayaw para iti bagbagida. Ti panagayat iti bagi ket maalon-on iti panagayat ken Cristo. Mabigbigda a trabahoda ti mangipacdaar, kas ken ni Juan Bautista, ‘Adtoy ti Cordero ti Dios, a mangikkat iti basol ti lubong’ (Juan 1:29).” – Ibid.
Mierkules
Pebrero 10
4. PANAGTEPPEL KEN PANANGISANGRAT
a. Kasano a makatulong ti panagtaraon para iti nabungbunga a trabaho? 1 Corinto 9:25-27; Kaano ken sadino ti pakaipakatan daytoy a trabaho? Filipos 2:5; 2 Pedro 1:5-8.
“Ti naindaclan a trabaho ti naparbeng a reporma, tapno naan-anay a naballigi, kasapulan a mangrugi iti pagtaengan.” – RH, Aug. 23, 1877.
“Ti lawag ti reporma ti salun-at ket nailukat iti sangoanan ti ili ti Dios iti daytoy nga aldaw, tapno makitada ti kinasisita ti panangtengngel iti raman ken riknada tapno iturayan ti nangatngato a bileg ti panunot. Nasisita met daytoy tapno maddaanda iti napigsa a kapanunotan ken nalawag a mangbigbig iti sagrado a kawar ti kinapudno ket tallikudan dagiti makaguyogoy a biddut ken makaay-ayo a sarsarita a manglaylayos iti lubong.” – 2 SP, p. 44.
“Ti raman ken nasged a rikna kasapulan a paiturayan iti nangatngato a bileg ti panunot. Daytoy a disiplina ti bagi ket kasapulan para iti pigsa ti panunot ken naespirituan a kinasaririt nga isu ti mamagbael kadatayo a mangawat ken mangisanay kadagiti sagrado a kinapudno ti sao ti Dios. Para iti daytoy a rason a nasarakan ti panagteppel ti saadna iti trabaho nga agsagana para iti maikadua a yaay ni Cristo.” – DA, p. 101
b. Kasano a pabilgentayo dagiti agtutubo a mangkontrol iti kapanunotanda? Roma 12:2; 1 Pedro 1:13.
“Tunggal maysa kadatayo addaan iti trabaho nga aramiden, a bariksan ti nakemtayo, agparbengcay ken agsalucag iti kararag. Ti panunot ket sititibker a matengngel a mangtaming kadagiti banbanag a mangpapigsa kadagiti bileg moral. Rumbeng a nasapa a mangrugi dagiti agtutubo a mangpasayaat iti umno a kababalin ti panunot. Disiplinaan ti isip nga agpanunot iti makapasalun-at a wagas ket saan a palubosan a mangtaming kadagiti dakes a banbanag. Ipacdaar ti Salmista, ‘Dagiti sasao toy ngiwatco ken ti pampanunot toy pusoc, maawatda cadi ita saclangmo, O Jehova, batoc ken Mannubbot kaniac’ (Salmo 19:14). Bayat nga agtrabaho ti Dios iti puso babaen iti Espiritu SantoNa, makitinnulong ti tao Kencuana. Dagiti kapanunotan kasapulan a magalutan, maingetan, maisina a mangutob kadagiti banbanag a mangpakapoy ken mangrugit iti kararua. Kasapulan a nadalus dagiti kapanunotan, ken dagiti ut-utoben ti puso, no dagiti sasao ti ngiwat ket sasao coma nga awaten ti langit ken makatulong kadagiti kakadua.” – RH, June 12, 1888.
Hueves
Pebrero 11
5. KINAPAKUMBABA ITI PANAGANNONG
a. Ania ti kasapulan a maawatantayo tapno agbalin a naballigi a mangitunda kadagiti kararua ken Cristo? Lucas 14:8-11; Juan 3:30.
“Sacbay ti dayaw ket kinapakumababa. Tapno maisaad iti nangato a takem iti sango dagiti tattao, pilien ti Langit ti trabahdor a kas ken Juan Bautista, nga alaenna ti napakumbaba a saad iti sango ti Dios. Ti kas ti ubing a disiplina isu ti kalaingan iti trabaho para iti Dios. Makitinnulong dagiti nainlangitan nga ahencia iti tao a saan a mangikagumaan a mangitag-ay iti bagi, no di ti mangisalacan kadagiti kararua. Isuna a makarikna a siuuneg iti panag-kasapulanna iti nadiosan a tulong, agpacpakaasi para iti daytoy; ket ti Espiritu Santo ti mangted kencuana kadagiti taldiap ni Jesus a mangpapigsa ken mangitag-ay iti kararua. Manipud iti pannakisao ken Cristo mapan nga agtrabaho para kadagiti mapukpukaw gapu kadagiti basbasolda. Napulotan para iti misyonna; ket agballigi kadagiti pakapaayan dagiti adu a de-adal ken mamasirib a tattao.” – DA, p. 436.
b. Ania ti kasapulan iti iglesia ita? 1 Pedreo 5:5, 6.
“Ti napateg a parabor ti kinapakumbaba ket nakaladladingit a kasapulan iti panagannong ken iti iglesia. Dagiti lallaki a mangicasaba iti kinapudno nangato unay iti panangipatoda kadagiti abilidadda. Pudno a kinapakumbaba ti mangiturong iti tao a mangitag-ay ken Cristo ken iti kinapudno, ken tapno maamiris ti naan-anay a panagsanggir iti Dios ti kinapudno. Nasakit a sursuroen dagiti leksion ti kinapakumbaba, ngem awanen ti ad-adda a makagun-guna iti kanibusanan. Ti ut-ot a katulongan a nangadal kadagiti leksion ti kinapakumbaba ket nangibunga iti pannakaitan-octayo babaen iti palso a pattapatta kadagiti bagbagitayo, tapno saantayo a makita ti naindaclan a kasapulantayo.” – 4 T, p. 378.
Viernes
Pebrero 12
PERSONAL A PANGREPASO A SALSALUDSOD
1. Ania ti kayatna a saoen ti maaddaan iti nabaliwan a puso, ken kasano a maaddaantayo iti daytoy a panagbaliw?
2. Kasano a masurotantayo ti ehemplo ni Jesus a pagbiagan ti biag a naan-anay nga agtulnog iti linteg ti Dios?
3. No ti Espiritu ti Dios sagidenna ti kararua, ania ti mapasamac?
4. Kasano a matengngeltayo ti panpanunottayo, ken kasano daytoy nga apektaranna dagiti sasaotayo?
5. Kasano a matulongannatayo ti kinapakumbaba iti panagannong-tayo para iti sabali?