Domingo
Enero 3
1. TI NAGTAUDAN NI ELIAS KEN TI NAKAAYABANNA
a. Sino ni Elias, ken ania a kita ti tao isuna? 1 Ar-ari 17:1; Santiago 5:17.
“Ni Elias . . . naiyanac kadagiti banbantay ti Galaad, daya ti Jordan ken naggapu iti nacion a nasacnapan kadagiti rimon dagiti Amonita. Ngem simrec iti trabahona nga addaan iti sao ni pammati ken bileg ti adda kadagiti bibigna ken ti sibubukel a biagna naisangrat iti trabaho ti reporma.” – RH, Aug. 14, 1913.
b. Ania a kita ti tao ti masansan a labsan ti Dios ken sino ti awaganNa? 1 Corinto 1:26-28.
“Iti kadaywan a pagna ti biag adda dagiti agbanbannog a siaanus a mangob-obra kadagiti inaldaw nga aramidda, awan puotda kadagiti nakalemmeng a bileg a no mariing nga agtignay, mangisaad kadacuada a maysa kadagiti naindaclan a pangpangulo ti lubong. Kasapulan ti sagid ti nasiglat nga ima a mangriing ken mangsukog kadagiti matmaturog nga abilidadda. Dagiti kakasta a tattao ti kayat ni Cristo a maisilpo Kencuana; ket intedNa kadacuada dagiti gundaway iti tallo a tawen a panagsanay iti babaen ti panangimatonNa. Awan ti korso a maadal kadagiti pagadalan dagiti rabi wenno ti salonan ti filosopia ti nakapada iti pateg daytoy.” – CPTS, p. 511
Lunes
Enero 4
2. PANANGSANGO ITI APOSTASIA
a. Apay a simrec ni Elias iti palacio ti ari tapno mangipaay iti layang a tubngar iti apostasia ti Israel? Juan 16:8; 3:20; 1 Timoteo 5:20.
“Kenni Elias ti nakaitalecan iti misyon a mangidanon kenni Acab iti mensahe a panangocom ti Langit. Saanna a kinalikaguman ti agbalin a mensahero ti Dios; ti sao ti Dios ti simmangbay kencuana. Ket nasaet para iti dayaw ti Dios, saan a nagtukiad a nangtungpal iti nadiosan nga ayab, nupay ti panangtungpalna ket iyawisna ti pannakadadaelna iti ima ti nadangkes nga ari. Nagrubuat a sigida ti propeta ket nagdalyasat iti aldaw ken rabii agingga a nakadanon iti Samaria. Iti idadanonna iti palacio, saan a nagkiddaw iti pannakapastrekna, wenno naguray tapno pormal a maiwaragawag. Nakaarruat iti kadawyan a cawwes dagiti propeta iti dayta a tiempo, limmabas kadagiti guardia, a saanda a nasiputan ket apagkanito a nagtacder iti sango ti nasdaaw nga ari.
“Saan a nagpadispensar ni Elias iti pettat a panagparangna. Nain-indaclan ngem ti ari ti Israel ti nangbilin kencuana nga agsao ket in-ngatona ti imana sadi langit, sisosolemne a pinasingkedan ti sibibiag a Dios a dagiti ocom ti Kangatoan ket maitinnagton iti Israel. ‘awanto ti linnaaw uray tudo cadagitoy a tawtawen, no saan laeng a mayannurot iti saoc’ (1 Ar-ari 17:1).” – RH, Aug. 14, 1913.
b. Para iti ania a panggep a tinubngar ni Elias ti Ari? 1 Ar-ari 18:17, 18; Job 17:8
“Ti saan a panangikankano iti linteg ni Jehova iti paset ni Acab ken ti ilina ti nangisangbay kadacuada kadagiti amin a kalamidad; ket saan a nagtukiad ni Elias a mangipacdaar iti sibubukel a kinapudno iti nagbasol nga ari. Napno ti lubong kadagiti mangpaspasablog ken mangul-ulbod, iti palacio ken iti ordinario a pagna ti biag; ngem kasano kabattaway dagiti addaan iti tured kas ti imparangarang ni Elias – kasano kabattaway ti makapagtacder a mangdepensa iti nadadael a linteg ti Dios a maisuppiat iti nagkaadu a tatao ti daga.” – ST, Dec. 18, 1884.
“Kalikaguman ni Jehova ti mangisalacan, saan a mangdadael. PakaragsakanNa ti mangisalacan kadagiti managbasol. ‘Cas sibibiagac, cuna ni Jehova, awan ti ragsacco iti ipapatay ti nadangkes’ (Ezequiel 33:11). . . InikkanNa ti napiliNa a mensahero iti nadiosan a tured, tapno dagiti makangngeg maaddaanda iti buteng ket makapagbabawida.” – PK, p. 105.
Martes
Enero 5
3. TI AWIS NGA AGPILI
a. Idi adda isuna iti Bantay Carmelo, umaw-awag para iti reporma, ania ti mangkarkarit a saludsod ni Elias? 1 Ar-ari 18:21.
“Ni Elias, iti baet ti sapasap nga apostasia, saanna a kinalikaguman nga ilemmeng ti kinapudno nga agserserbi isuna iti Dios sadi langit. Dagiti propeta ni Baal uppat a gasot ken limapulo ti bilangda, dagiti papadina, uppat a gasot, ken dagiti agdaydayawna rinibribo; ngem saan a pinadas ni Elias a pinagparang nga adda isuna iti nalatac a sikigan. Siraragsac a nagtacder nga agmaymaysa. . . . Ayanna dagiti Elias ita? . .
“Awan ti magun-odan ti kinatakrut wenno panagbuteng a mangipakaammo a salsalimetmetantayo dagiti bilbilin ti Dios. Ti panangilemmeng iti lawagtayo, a kasla ibain ti pammatitayo, mangibanag laeng iti didigra. Panawannatayo ti Dios iti bukodtayo a kinalupoy. Ipawil coma ti Dios a pagkedkedantayo a pagraniagen ti lawagtayo iti aniaman a lugar a pangayabanNa kadatayo. No makigasanggasattayo a mapano a bukbukodtayo, a suroten ti bukodtayo a kapanunotan, bukodtayo a plano ket ibati ni Jesus iti likudan, saantayo nga inanamaen a magun-odan ti kired, tured wenno naespirituan a pigsa. Addaan ti Dios kadagiti banuar moral, ket imbaonNa idan – dagiti saan a mabain kas naidumduma nga iliNa. Dagiti pagayatan ken planoda ket adda amin iti babaen ti linteg ti Dios. Ti ayat ni Jesus ti nangiturong kadacuada a saan a mangibilang iti biagda a napateg kadacuada. . . . ‘Kinamatalec iti Dios’ isu ti pagsasaoda.” – 5 T, pp. 526-528.
b. Ania ti inaramid ni Elias kas umuna nga addang iti trabaho ti reporma? 1 Ar-ari 18:30.
“Kas iti nasipnget nga ulep, allilaw ken kinabulsec ti nagsacnap iti Israel. Saan nga insegida a maserraan daytoy nakana nga apostasia, no di ket in-inut, kas iti kada tiempo a mapaayda a mangipangag kadagiti ballaag ken tubngar nga impatulod ti Dios kadacuada. Tunggal yaadayo iti panagaramid iti naimbag, tunggal panagkedked nga agbabawi, umun-uneg met ti basolda ken mangabog kadacuada nga umadayo idiay Langit. Ket ita, iti daytoy a krisis, nagtalinaedda nga agkedked nga agtacder para iti Dios.
“Kagura ni Jehova ti di panangikaskaso ken kinasukir iti tiempo ti krisis iti trabahoNa. Ti sibubukel nga universo agbuybuya a sigagagar kadagiti pangserra a buya ti naindaclan a susic ti imbag ken dakes. Umas-asidegen ti ili ti Dios kadagiti beddeng ti awan patinggana a lubong; anianto ti napatpateg kadacuada ngem ti agbalin a napudno iti Dios ti langit?” – PK, pp. 147, 148.
Mierkules
Enero 6
4. NAIPALGAC TI BILEG TI DIOS
a. Inaganan ti sumagmamano a repormador iti napalabas. Lucas 1:17; Genesis 32:28; Exodo 9:16. Kasano a nagun-odanda ti bileg a kasapulan tapno maipatungpalda ti misyonda? Salmo 27:14; 28:7.
“No dagiti tattao makipagna iti Dios, ilemmengNa ida iti rukib ti Bato. Iti pannakailemmengda, makitada ti Dios, kas ti pannakakita ni Moises Kencuana. Babaen iti bileg ken lawag nga imbingayNa, ad-adda a makabigbigda ken ad-adu ti maipatungpalda ngem iti kasla imposible nga ipatungpal ti limitado a panangusigda.” – AA, p. 363.
“Nagballigi ni Jacob agsipud ta napinget ken determinado. Agsacsi ti kapadasanna iti bileg ti di agressat a panagkarkararag. Itan a sursuroentayo daytoy lesson ti napinget a kararag, ti di sumuko a pammati. Dagiti kaindaclan a balligi ti iglesia ni Cristo wenno ti maysa a Cristiano ket saan a dagiti nagun-odan babaen iti talento wenno edukasyon, babaen iti kinabacnang wenno pabor dagiti tattao. Balligida a nagun-odan iti pannakisasao iti Dios, no ti napasnec, umas-asog a pammati kumapet iti nabileg a takkiag ni bileg.
“Dagiti saan a naannugot a mangilacsid iti tunggal basol ken mangikagumaan a sipapasnec para iti bendisyon ti Dios, didanto magun-odan daytoy. Ngem amin a mangpetpet kadagiti karkari ti Dios kas ti inaramid ni Jacob, ket agbalin a napasnec ken napinget kas kencuana, agballigi kas ti panagballigina. ‘Ket ti Dios dinanto aramiden aya ti kinalinteg cadagiti piniliNa, nga umaw-awag kencuana iti aldaw ken rabii, ket addanto anusna cadacuada? Cunac cadacayo nga aramiden-nanto ti calinteganda a dagus’ (Lucas 18:7, 8).” – PP, p. 203.
b. Ania dagiti karkari a tontonen ita dagiti repormador no makitada ti panagkasapulanda iti nadiosan a bileg? Salmo 68:35; 2 Samuel 22:32, 33.
“Ti leksion ti kapadasan ni Elias ket saan laeng a para kadagiti tattao nga addaan dackel a pagrebbengan ti mangadal no kasano ti agtalec iti Dios iti oras ti suot. Isuna a nagbalin a pigsa ni Elias ket pigsa a mangbitibit iti tunggal makigubgubal nga anac ti Dios, nupay kasano ti kapsotna. Iti tunggal maysa, namnamaenNa ti kinapudno, ket ipaayNa iti tunggal maysa ti bileg kas maitutop iti kasapulan. Iti bukodna a pigsa ti tao nalupoy; ngem iti bileg ti Dios agbalin isuna a napigsa a mangparmec iti diablo ken tulonganna ti sabali tapno agballigi. Pulos a di magundawayan ni Satanas ti tao a mangaramid a depensana ti Dios. ‘Masasao, a maipapan caniac, ken Jehova laeng ti puon ti kinalinteg ken kinapigsa; . . . Ken ni Jehova ti pacapalinteganto amin a bi-i ti Israel, ken paggloriaandanto’ (Isaias 45:24, 25)’.” – RH, Oct. 30, 1913.
Hueves
Enero 7
5. AGTACDER A MAYMAYSA?
a. Iti panangpasingked iti Dios ken iti lintegNa, nagmaymaysa kadi ni Elias? Apay wenno apay a saan? Salmo 34:7; 91:11; 103:20.
“Sinangona ni Ari Acab ken dagiti palso a propeta, ken napalawlawan kadagiti naummong a buybuyot, nagtacder ni Elias, ti maymaysa a nagparang a mangpasingked iti dayaw ni Jehova. . . Ngem saan laeng nga agmaymaysa ni Elias. Iti ngatoen ken aglawlawna adda dagiti mangsalacnib a buyot ti langit – angeles a macadaeg iti pigsa.” – RH, Sept. 18, 1913.
b. Idi nagtacder a maymaysa a mangdepensa iti kinapudno ken kinalinteg, ania ti laglagipentayo? 1 Ar-ari 19:18.
“Saan nga amin nga adda iti lubong ket awanan linteg ken managbasol; saan nga amin ket kumanonong iti kabusor. Addaan ti Dios kadagiti rinibo a saan a nagparintumeng ken Baal; adu dagiti agkalikagum a mangawat a naan-anay ti maipapan ken ni Cristo ken ti linteg, adu dagiti mangnamnama nga umayton ni Jesus iti mabiit tapno agpatingga ti turay ni basol ken patay. Ket adu dagiti agdaydayaw ken Baal a siiignorante; ket isuda ti ikagkagumaan pay ti Espiritu ti Dios.” – PK, p. 171.
“No agsagabacayo iti umsi ken pannakaidadanes addacayo iti kasayaatan a bunggoy; ta inanduran aminen ni Jesus ken ad-adu pay. No namataleckayo a parabantay ti Dios, komplimento dagitoy a banbanag kadacayo. Dagiti natured a karkararua, a napudno no agtacderda a maymaysa, ti makagun-od iti di madadael a korona.” –YI, May 28, 1884.
Viernes
Enero 8
PERSONAL A PANGREPASO A SALSALUDSOD
1. Manipud iti sadinno ti masansan a pangayaban ti Dios kadagiti tattao ken apay?
2. Imbes a tubngaren ti basol, ania ti imbes nga aramiden ti kaaduan a tattao?
3. Ania ti maipakita no ilemmengtayo ti lawagtayo, ken anianto ti banagna?
4. Kasano ti pannakagun-odtayo iti bendisyon a maaddaan iti bileg ti Dios nga agtrabtrabaho iti biagtayo?
5. No datdatayo ti agmaymaysa nga agtacder para iti kinapudno, apay nga iti kinapudnona saantayo laeng nga agmaymaysa?