Domingo
Enero 17
1. TI KASASAAD TI ISRAEL
a. Ania ti trabaho ti mensahero nga imbaon ti Dios a mangisagana iti dalan para iti umuna a yaay ti Apo? Malakias 3:1-3.
b. Ania a kita ti tao daytoy a mensahero? Lucas 1:13-17.
k. Ania ti kasasaad ti ili ti Dios ta gutogutenda ti kasta a mensahero? Lucas 5:37-39; Mateo 15:8, 9.
“Dagiti lalat a bote a nausar kas basiha a pagyanan ti baro nga arac. . . imparang ni Jesus kas kasasaad dagiti pangpangulo ti Judio. . . Impagarupda a ti bukodda a kinalinteg ket makaanay ket saandan a kasapulan ti baro nga elemento a maisangbay iti relihionda.” – DA, 278, 279.
“Ti kayo a higos [nga inlunod ni Jesus] naglaylay nga insigida. Daytoy awan bungana a kayo isimbolona ti kasasaad ti nacion dagiti Judio iti dayta a tiempo. Naipaay kadacuad ti tunggal gundaway ken pribilehio.” – ST, May 23, 1900.
Lunes
Enero 18
2. JUAN BAUTISTA, MENSAHERO TI DIOS
a. Kasanu ti panangitudo ni Jesus kenni Juan Bautista? Mateo 11:9, 10, 13-15.
“Maysa met a pammati a sacbay ti yaay ni Moises, nagparang a personal ni Elias. Daytoy nga inanamaen ti sinango ni Juan iti panangilacsidna; ngem dagiti saona addaan iti naun-uneg a kaipapanan. Kalpasanna kinuna ni Jesus a dacdakamatenNa ni Juan, ‘Ket no kayatyo nga awaten, daytoy isu daydi Elias nga umayto’ (Mateo 11:14). Immay ni Juan iti espiritu ni Elias, a mangaramid iti kas ti inaramid ni Elias. No inawat coma dagiti Judio isuna, naipatungpal coma para kadacuada. Ngem saanda nga inawat ti mensahena. Kadacuada saan nga isuna ni Elias. Saanna a maipatungpal para kadacuada ti misyon nga umayna ipatungpal.” – DA, p. 135.
b. Sino ti rimuar a dimngeg ken Juan Bautista? Mateo 3:5, 6; 21:32; Lucas 11:1.
k. Apay a naay-ayoda ken Juan imbes a kadagidi manursuro idi panawenda? Mateo 3:1-3.
“Awanan kadagiti mangilawlawag pay nga argumento wenno naimbag ti pannakaikutna a teoria nga impacdaar ni Juan ti mensahena. Nakabutbuteng ken nainget ngem napno iti namnama, ti timecna mangngeg manipud let-ang, ‘Agbabawicayo ta ti pagarian asidegen’ (Mateo 3:2). Buyogan iti baro ken karkarna a bileg natignayna dagiti tattao. Nakibor ti sibubukel a nacion. Umariwecwec ti aguummong idiay let-ang.”– GW, p. 54.
d. Nagbuteng kadi ni Juan Bautista a mangisao iti kinapudno? Mateo 14:3, 4.
“Kumitada iti Ari iti pintasNa ket ti bagi napukaw iti imatang. Nakitana ti kinangayed ti kinasanto ken ammona ti bagina a nanengneng ken saan a maikari. Mensahe ti Dios ti ipacdaarna. Iti pannacabalin ti Dios ken ti kinalintegNa isu ti itacderna. Nakasagana isuna a mapan kas mensahero ti Langit, saan nga agbuteng iti tao agsipud ta kumitkita iti Nadiosan. Makapagtacder isuna a situtured iti presencia ti naindagaan nga ari, agsipud ta sipipigerger nga agruknoy iti sangoanan ti Ari dagiti ar-ari.”– Ibid.
Martes
Enero 19
3. TI PAGSAGANAANNA, LET-ANG
a. Kadagiti ania a wagas a ti panagbiag iti away isaganana ni Juan Bautista para iti misyonna? Isaias 40:3-5; 30:15; Salmo 101:3.
“Iti kadawyan nga urnos dagiti banbanag, ti anac ni Zacarias naadalan coma para iti kinapadi. Ngem ti panagsanay kadagiti pagadalan dagiti rabi saan a mangitutop kencuana iti trabahona. Saan nga imbaon ti Dios isuna kadagiti manursuro ti teolohia tapno agadal no kasano nga ipatarus ti Nasantoan a Surat. InayabanNa isuna a mapan idiay disierto tapno maadalna ti nakaparsuaan ken ti galad ti Dios. . . .
“Ditoy, ti aglawlawna ket mainugot iti ugali a nanumo ken panangilacsid iti bagi. Saan a masinga kadagiti ariwawa ti lubong, ditoy maadalna dagiti leksion ti nakaparsuaan, ti paltiing ken ti Providencia. Dagiti sasao ti angel ken ni Zacarias masansan a maulit-ulit ken ni Juan babaen kadagiti agbuteng iti Dios a nagannacna. Manipud kinaubingna kankanayon a maipalagip kencuana ti misyonna ket inawatna ti nasantoan a talec. Kencuana ti kinaulimec ti disierto ket napintas a paglibasan manipud iti sociodad a pagrairaan ti panagat-atap, kinaawan pammati, ken kinarugit. Saan nga agtalec iti bukodna a bileg a mangdaer iti sulisog ket lumned no naynay a maidekket iti basol; di la ket ta mapukawna ti kapanunotanna iti nalabes a kinamagbasol.” – DA, pp. 101, 102.
b. Tapno agbalin a ‘trabahador nga anamongan ti Dios’ ania dagiti kangrunaan a pagtaudan ti adalen ni Juan Bautista, ken ania ti epektona dagitoy kencuana? 2 Timoteo 2:15; Salmo 19:1-3; Lucas 1:80.
“Saan a nasadut ni Juan. . . . Amin a banbanag a nanglawlaw kencuana iti bantay a pagtaenganna ket libro a pakasursuroan, a naglaon kadagiti leksion a kapatgan unay mainaig iti kababalin, kinamanagtulong ken ayat ti Dios.
“. . . Adayo manipud iti nakumikom a lubong, a dagiti pakasecnan ken mangay-ayo a ragragsacna mabalin a mangisiasi iti panunotna ken kasta met kadagiti kapanunotan ken imahinasyonna, imbaludna ti bagina a kadua ti Dios ken ti nakaparsuaan. Saan isuna a mainpluensiaan iti dakes nga aglawlaw, saan a mabulsecan ti pannakaawatna wenno ti espirituna agbalin a pamiliar iti kinadangkes. Iti natalna a pagiananna idiay let-ang, nagbalin a napigsa ti espiritu ni Juan. Babaen iti nainget a kinateppelna nagun-odanna ti nasalun-at a bagi, panunot ken moral. Nalawag ti pangbigbigna ken umno ti pangusigna.” – YI, Jan. 7, 1897.
Mierkules
Enero 20
4. MAYMAYSA A TURONG
a. Ania ti nakaiturongan ti biag ni Juan? Aramid 13:24. Kas ken apostol Pablo, kasano nga apectaran daytoy a turong ti ugali ti sapasap a biagna? 1 Corinto 9:27.
“Naindaclan a trabaho ti adda iti sango ni Juan, ket tapno maaddaan isuna iti nasalun-at a bagi, panunot ken bileg moral a mangaramid iti daytoy a trabaho, kontrolenna ti raman ken riknana. Mangidaulo ni Juan kas repormador ket babaen iti nateppel a biagna ken ti nanumo a cawwesna tubngarenna ti awan teppelna nga ugali ken naimbasolan a kinabarayuboy dagiti tattao.” – RH, Jan. 7, 1873.
“Ngem ti biag ni Juan ket saan a nabosbos iti kinasadot, iti nalidem a kinarigat, wenno iti naimbukodan a pannakaisina. Kadarato a mapan makilangen kadagiti tattao; ken kankanayon nga agpalpaliiw no ania ti mapaspasamac iti lubong. Manipud iti naulimec a nagpaknianna, banbantayanna dagiti maipalpalgac a paspasamac. Buyogan ti sirmata nga inyanninaw ti nadiosan nga Espiritu inadalna ti kababalin dagiti tattao, tapno maawatanna no kasano a saroten ti mensahe ti langit dagiti puspusoda. Awit-awitna ti misyonna. Iti kinamanagmaymaysa, babaen iti panagut-utob ken kararag, inkagumaanna nga isagana ti kararuana para iti trabaho nga adda iti sangona.” – DA, p. 102.
b. Iladawan ti taraon ken pagan-anay ni Juan Bautista? Mateo 3:4; Lucas 1:15. Apay a dackel ti kaipapannna daytoy iti panagannong ni Juan?
“Insangratna ti aminna iti Dios kas maysa a Nazareno sipud pannakaiyanacna, [ti anac ni Zacarias], inaramidna a sapatana iti inggana adda biag a pannaka-iconsagrar.” – DA, p. 102.
“Mapan ni Juan kas mensahero ni Jehova a mangisangbay iti lawag ti Dios kadagiti tattao. Kasapulan nga ipaayna ti baro a turong iti panpanunotda. Imalditna kadacuada ti kinasanto dagiti gutgutoguten ti Dios, ken ti panagkasapulanda iti perpecto a kinalintegNa. Ti kasta a mensahero kasapulan a santo. Kasapulan a templo isuna a pagnaedan ti Espiritu ti Dios. Tapno maipatungpalna ti misyonna kasapulanna ti maaddaan iti nasalun-at a bagi, panunot ken naespirituan a pigsa. Gapuna a nasisita para kencuana ti mangkontrol iti raman ken rinknana. Kontrolenna amin a bilegna tapno mabaelanna ti makipagtacder kadagiti tattao a saan a magaraw kadagiti paspasamac ti aglawlaw kas kadagiti batbato ken banbantay idiay let-ang.” – Ibid., p. 100.
“Adayo unay iti kinamagmaymaysa, kinaladingit wenno kinaliday, naragsac iti biagna a nanumo ken naisina, ti nateppel nga ugalina ti namagtalinaed iti nasimbeng a paniriganna.” – YI, Jan. 7, 1897.
Hueves
Enero 21
5. TI MENSAHETAYO ITA
a. Kasano Ti pannakaammotayo a ti mensahe ni Elias saan a nagpatingga ken ni Juan Bautista, ti mangyuna ni Cristo? Malakias 4:5, 6. Ania ti mensahetayo ita? Aramid 3:19: Isaias 58:1.
“Naayaban ni Juan a mangaramid iti naisangsangayan a trabaho; isaganana ti dalan ti Apo, mangaramid a nalinteg ti danaNa. . . [Isaias 40:3-5 naadaw]. Daytoy a mismo ti mensahe a kasapulan a maited iti ilitayo; asidegtayo iti panungpalan ti tiempo, ket ti mensahe, dalusan ti dalan ti Ari; urnongen dagiti batbato, ipangato ti pagibasaran para iti ili. Kasapulan a mariing ti ili. Awanen ti tiempo ita a mangipukkaw iti talna ken talged.” – RH, Feb. 18, 1890.
b. Kasano a daytoy a mensahe maaddaan iti epecto iti iglesia ken iti lubong ita? Aramid 22:15; Roma 10:13.
“Addatayo iti babaen ti personal nga obligasyon iti sociodad nga. . . ipakat ti inpluensia a pabor iti linteg ti Dios. Pagranyagentayo ti silawtayo tapno makita ti amin a ti sagrado nga evangelio ket addaan ti inpluensia iti puso ken biagtayo, tapno magnatayo a natulnog kadagiti bilbilinNa ken awan ti nasalungasingtayo a prinsipiona. Agsung-sungbattayo iti lubong para kadagiti kararua dagiti adda iti aglawlawtayo. . . . Makita coma ti lubong a tarigagaytayo a makiranodda kadagiti bendisyon ken gundawaytayo babaen iti panangpasanto iti kinapudno.” – 4 T, p. 59.
Viernes
Enero 22
PERSONAL A PANGREPASO A SALSALUDSOD
1. Babaen iti ania a kasasaad a maibilangtayo nga ili ti Dios ita?
2. Kasano a naidanon ti mensahe ni Juan kadagiti tattao, ken ania ti resoltana?
3. Ania dagiti sumagmamano a magun-guna iti panagnaed iti adayo iti ciudad?
4. Apay a nateppel ni Juan kadagiti amin nga ugalina iti biag?
5. Kasano a kalikagumanNatayo ti Dios a makibingay iti isu met la a mensahe ita?