Domingo
Pebrero 14
1. TI LUGAR A PANGRUGIAN
a. Sino ti nangisaadan ti Dios ti nadagsen a pagrebbengan a mangirugi iti trabaho ti repormasyon? Malakias 4:6; Salmo 78:5-7.
“No maamiris dagiti nagannac ti naindaclan a pagrebbengan a naipabaclay kadacuada idi a dagiti annacda ket inosente a tagibi iti pagtaenganda, adu a basol ken kinaay-ay coma ti nalapdan; maisuro coma ti panagteppel, kadagiti practikal a leksion a maulit-ulit iti inaldaw iti lamisaan. Uged iti rabaw ti uged, alagaden mainayon iti alagaden, isuro dagiti annac ti kinasisita ti panangkontrol iti bagi ken iti panangilacsid iti bagi; iti kasta ti pudno a reporma makaaramid iti napaspas a panagdur-as.”– RH, May 1, 1877.
c. Sadino ti pagtaudan ti sirib dagiti nagannac? Efeso 1:17; Santiago 1:5.
“Alaen dagiti nagannac ti Bibliada ket agsukimat tapno maawatanda no ania dagiti gutoguten ti Dios mainaig kadagiti annacda. Ikagumaanda coma nga awaten no ania ti nairaman iti pagrebbengan ti nagannac. Ti sao ti Dios ti kasapulan a pagannurotan iti panangimaton kadagiti pakasecnan ti pamiliatayo.”– CE, pp. 230, 231.
“Babaen iti kararag, panagadal iti Biblia ken babaen iti nasneban a regtada, agballigi dagiti nagannac iti daytoy napateg a pagrebbenganda ket nasupapakandanto iti mamingasut para kadagiti amin a tiempo ken salluadda.” – CG, p. 64.
Lunes
Pebrero 15
2. PAATIDDOGEN TI TRABAHO TI REPORMA
a. Ania ti inranta ti Dios a mapasamac iti pammati dagiti nagannac? Proverbio 22:6; 2 Timoteo 1:5.
“Bayat ti namatalec a panangaramidyo iti pagrebbenganyo iti pagtaengan, ti ama kas padi ti sangbalayan, ti ina ti misionero iti pagtaengan, mapaaduyo dagiti ahencia nga agaramid iti imbag iti ruar ti pagtaengan. Bayat ti panangpasayaat kadagiti bilegyo, agbalincayo nga ad-adda a maitutop nga agtrabaho iti iglesia ken iti karruba. Babaen iti panangigalutyo kadagiti annacyo iti bagbagiyo ken iti Dios, dagiti amma ken inna ken annac agbalinda a trabahador a kadua ti Dios.” – CH, p. 430.
b. Ania ti aramidenyo no mapaaykayo a mamagbalin iti Dios nga umuna iti biagyo ken iti pagtaenganyo? 1 Juan 1:9; Santiago 5:16.
“No dacayo [nagannac] napaay iti pagrebbenganyo iti pamiliayo, iconfesaryo dagiti basbasolyo iti sangoanan ti Dios. Ummongenyo dagiti annacyo ket aminen ti liwayyo. Ibaga kadacuada a tarigagayanyo ti pannakareporma ti pagtaenganyo ket kiddawenyo kadacuada a tumulongda a mamagbalin iti pagtaenganyo a kas rebbengna. Ibasa kadacuada dagiti bilbilin a masaracan iti Sao ti Dios. Makipagkararag kadacuada; ket kiddawen iti Dios nga isalacanNa ti biagda ken tulongan ida a mangisagana iti pagtaengan iti pagarianNa. Iti kasta mabalinyon a rugian ken ituloy ti trabaho ti pudno a reporma.” – RH, Apr. 21, 1904.
k. Iti naan-anay a panangikumittayo ti bagbagitayo iti Dios, anianto ti resulta ti kinamatalectayo? Salmo 51:9-13; Isaias 60:2, 3; Aramid 16:5.
“No agraniag ti naindaclan a lawag nga inted ti Dios kadagiti nataoan nga ahencia, naindaclan a trabaho ti maaramid. Iti panangilawlawag ti Espiritu a buyogan ti bileg, maipalgac ti kinapudno kadagiti nalawag, naiduma a linya. Ngem daytoy a trabaho rumbeng a marugian iti pagtaengan.
Bayat ti pannakaaramid ti umno a trabaho iti pagtaengaan, masaracan dagiti nagannac dagiti pusoda a naparucma ken nalunag. Mapagballigian ken mapukaw dagiti gan-gannaet a madi a panagipato a nangisangbay iti dakes a bunga. Sumrec ti espiritu ti kinapudno, espiritu a maipada ken Cristo. Ti ili ti Dios isukoda dagiti oc-okopanda a tarigagay a maaddaanda iti bukodda a dana ken ipilit dagiti bukodda a kapanunotan; ta maamirisda nga addada iti presencia ti Anac ti Dios.” – Ibid., Jul. 15, 1902.
Martes
Pebrero 16
3. TI EPEKTONA ITI IGLESIA
a. No nareporman ti pagtaengan, kasano a maiyanninaw daytoy iti iglesia? Efeso 5:27; Tito 2:14; Salmo 144:14 (maikadua a paset), 15.
“Iti pagtaengan a maisaad ti pundasyon para iti irarang-ay ti iglesia. Dagiti inpluensia nga annuroten ti biag iti pagtaengan ket maisangbay iti biag ti iglesia; gapuna a dagiti pagrebbengan ti iglesia mangrugi nga umuna iti pagtaengan. ” – AH, p. 318.
“Kalikaguman ti Apo a ti trabaho ti repormasyon ket mangrugi iti pagtaengan, kadua dagiti amma ken inna, maamiris ti iglesia ti panagtrabaho ti Espiritu Santo. Ti inpluensia daytoy a trabaho ramaramenna ti iglesia kas ti levadura. Agkasapulan dagiti amma ken inna ti pannakaconvertir. Saanda nga inadalan dagiti bagbagida tapno umiso ti pannakatubay ken pannakatabas ti kababalin dagiti annacda.” – RH, March 18, 1902.
“Rukoden ti Dios dagiti kameng ti iglesia babaen iti kina-aniada iti pagtaengan. No ti sao ti Dios matungpal iti pagtaengan, ti inpluensia dumanon iti iglesia.” – Ibid., July 21, 1903.
b. Kasano a ti inpluensia ti maysa a tao iti pagtaenganna apektaranna ti kinaserbina iti iglesia? 1 Timoteo 3:5. Kasano nga apektaran daytoy ti namnamana iti biag nga agnanayon? Mateo 25:21.
“Isuna a sumrec nga agtrabaho iti annong ti evangelio kasapulan a namatalec iti napamilian a biagna. Nasisita a kas maysa nga ama pasayaatenna dagiti talento nga inted ti Dios kencuana para iti panggep a mamagbalin iti pagtaenganna a simbolo ti nainlangitan a pamilia, kas iti dayta trabaho ti evangelio aramatenna dagiti inted ti Dios a bileg tapno maisangbayna dagiti kararua iti iglesia. Kas padi iti pagtaengan ken kas mensahero ni Cristo iti iglesia, ipaduyacyacna iti biagna ti kababalin ni Cristo. . . .
“Isuna a mapaay nga agbalin a namatalec, nasiglat a pastor iti pagtaenganna, sigurado a mapaay met nga agbalin a namatalec a pastor ti arban ti Dios iti iglesia.” – RC, p. 179.
“Ti biag iti rabaw ti daga ket pangrugian ti biag sadi langit; ti educasyon iti rabaw ti daga ket pangrugian dagiti prinsipio ti langit; ti trabaho ti biag ditoy ket panagsanay para iti trabaho ti biag sadiay. No aniatayo ita, iti kababalin ken nasantoan a servcio isu ti sigurado a mangiyanninaw no aniatayonto.” – AH, p. 535.
“Ti naindaclan a tignay ti reporma kasapulan a mangrugi iti pagtaengan. Panagtulnog iti linteg ti Dios isu ti naindaclan a mangpabileg iti kinagaget, kinasalimetmet, kinapudno ken kinalinteg iti pannakilangen ti tao iti sabali a tao.” – CG, p. 489.
Mierkules
Pebrero 17
4. AGSAGSAGANA NGA AGSACSI
a. No ti pusotayo tinignay ti Espiritu ti Dios, kasano ti isusungbattayo? Isaias 6:8.
“No kayat ti Dios a maaramid ti naisangsangayan a trabaho para iti pannakaidur-as iti kinapudno, malditanNa dagiti tattao nga agtrabaho kadagiti minas ti kinapudno a buyogan ti nainkararagan a kinapasnec tapno matakuatan ti napateg a gameng. Dagitoy a tattao maaddaan iti kas ken Cristo a kinapinget. Saanda a mapaay wenno mauppapay. Lumned ti bagi iti imatang ni Jesus. Mapan dagiti tattao iti espiritu ken bileg ni Elias a mangisagana iti dalan para iti maikadua a yaay ni Apo Jesu-Cristo. Trabahoda ti mamagbalin nalinteg kadagiti killo a banbanag. Sumagmamano a banbanag ti kasapulan a marebba, ket sumagmamano met a banbanag ti kasapulan a maibangon. Dagiti daan a gameng ti kasapulan a maisimpa iti kuadro ti kinapudno. Ikasabada ti Sao ti Dios; dagiti testimoniada saan a nasukog babaen kadagiti opinion ken kapanunotan a naibilang a naimbag, no di ketdi babaen iti Sao ti Dios nga agbiag ken agnaed iti agnanayon. Itag-ayda ni Cristo ket awaganda dagiti managbasol nga agbabawida. . . , igunam-gunam iti amin a personal a pagrebbenganda ti agbalin a naayat ken naraem, nga agaramid iti naimbag ken tapno maisangbay dagiti kararua ken Jesus.” – E. G. White 1888 Mat. p. 169.
b. Anianto ti nabiag a pammanecnec ti napabaro a puso? 2 Corinto 5:17; Colosas 3:10; Mateo 5:16.
“No ti puso napabaro babaen iti Espiritu ti Dios, ti biag agsacsi iti kinapudno. . . . Makita ti nagbaliwan ti kababalin, kadagiti ugali, kadagiti panggep. Ti pagdumaan agbalin a nalawag ken natudio iti nagbaetan no aniada idi ken no aniada ita. Ti kababalin naipalgac, saan a babaen iti sagpaminsan a naimbag nga ar-aramid ken sagpaminsan a dakes nga ar-aramid no di ket babaen iti panagduyos kadagiti nakaugalian a sasao ken ar-aramid.” – SC, pp. 57, 58.
“Ti ayat ti nainlangitan nga Amatayo iti panangisagutNa iti AnacNa a bugbugtong iti lubong ket umanayen a mangparegta iti tunggal kararua, a mangtunaw iti tunggal natangken, awanan ayat a puso tapno agbabawi ken agbalin a naasi; ngem ti makita dagiti nainlangitan a parsua kadagiti nakatayan ni Cristo ket saan a makarikna iti ayatNa, natangken a puso ken awanan panagyaman ken panagayat iti nangted kadagiti amin a banbanag? Dagiti kadi ar-aramid a saan unay a napateg ti mangagsep iti sibubukel a bileg ti kinatao, ket ti ayat ti Dios saan a masupapakan?. . . Kasapulantayo ti dumackel iti pammati, ipacaasi a maiparocpoc a sibubuslon ti Espiritu Santo kadatayo tapno agbalintayo a silaw iti lubong.” – FCE, pp. 198, 199.
Hueves
Pebrero 18
5. MAPAN KADAGITI AMIN A LUBONG
a. Iti buya ti asidegen a yaay ni Cristo, ania ti mensahe a maited ita? Sofonias 1:14; Amos 4:12.
“Kas maysa nga ili a mamati iti asidegen a panagparang ni Cristo, addaantayo iti mensahe nga irakurac – ‘Agsaganaca a sumabet iti Diosmo’ (Amos 4:12).” – 8 T, p. 332.
b. Kasano kalawa ti trabaho a mangipaay iti mensahe ti evangelio? Isaias 61:10, 11; Mateo 24:14; Apocalipsis 14:6.
“Ti tiempo simmangbayen a ti mensahe ti asidegen a yaay ni Cristo ket irakurac iti intero a lubong.” – Ibid., vol. 9, p. 24.
k. Kasano a maited daytoy a mensahe? Aramid 4:29-31.
“Ita kasapulan nga isaotayo ti kinapudno a buyogan ti nasantoan a tured.” – 2 SM, p. 52.
“Ti trumpeta kasapulan a mangipaay iti masinunuo nga aweng, ta addatayon iti naindaclan nga aldaw ti panagsagana ti Apo?” – Ev, p. 218.
“Manipud kadagiti napili a tattao ti Dios [namatalec a mensaheroNa] agranyag ti kinapudno. Mangngeg manipud kadagiti bibigda, maiyanninaw kadagiti langada ken maiparang iti biagda. Mamarkaanda babaen iti kinadalus ken kinaawan rugitda. Ti parabor ni Cristo addaan iti mamagraem, mangitan-oc nga inpluensia iti kababalin.” – RC, p. 347.
Viernes
Pebreo 19
PERSONAL A PANGREPASO A SALSALUDSOD
1. Kasano a rugian dagiti nagannac ti trabaho ti repormasyon kadagiti pagtaenganda?
2. Bayat ti namatalec panangipatungpalmo iti pagrebbengam iti pagtaengam, sadino pay ti mas epectibo a mabalinmo a pagtrabahoan?
3. Kasano ti panangrukod ti Dios cadatayo?
4. Kasano nga agbalintayo a silaw iti lubong?
5. Ania ti mairaman iti panangisao ti kinapudno iti lubong?