Domingo
Enero 10
1. MAYSA A NAMATALEC A NATDA
a. Adda kadi namatalec a natda idi tiempo ni Elias, bayat a ti ocom ti Dios ket agtintinnag iti nagapostasia nga Israel? 1 Ar-ari 18:13; 19:18.
b. Kankanayon kadi nga addaan ti Dios iti namatalec a natda? Roma 11:5; Apocalipsis 12:17.
k. Kasano nga inkari ti Dios ti pannakasaluad ti iliNa bayat a dagiti ocomNa matnagda iti daga? Salmo 27:5; Isaias 33:15, 16.
“Dayta Dios a nangsaluad ken Elias dinanto labsan ti maysa kadagiti annacNa a mangisacrificio iti bagida. Isuna a macabilang kadagiti buoc ti uloda ti mangsaluad kadacuada, ket iti tiempo ti bisin mapnecdanto. Kabayatan a matmatay dagiti nadangkes iti bisin ken angol, dagiti angel ti mangsalacnib kadagiti nalinteg ken mangipaay kadagiti kasapulanda. Kencuana a ‘magna a sililinteg’ matungpal ti kari: [Isaias 33:15, 16; 41:17 naadaw].” – GC, p. 629.
Lunes
Enero 11
2. PANANGISAGANA ITI DALAN NI JEHOVA
a. Ania ti kiniddaw ni Elias a pangkarit ti sangapagilian nga apostasia? 1 Ar-ari 18:19, 20.
“Kiniddaw ni Elias ti panakaummong dagiti amin nga Israel ken amin a propeta ni Baal idiay Carmelo. Ti nakaam-amac a kinapasnec ti langa ti propeta ti nangted kencuana iti langa ti maysa nga agtactacder iti presencia ni Jehova Dios ti Israel. Ti panagapostasia ti Israel ti nanggutogut iti natibker a tignay, nainget a sao, ken naturay a bilin. Insagana ti Dios ti mensahe a mangitutop iti tiempo ken okasyon. . . . Addaan ti Dios ti maitutop a mensahe a mangsabat iti iliNa iti nagduduma a kasasaadda.” – 3 T, p. 279.
b. Sino pay ti nangaramid iti natibker a tacder para iti Dios a mangipatungpal iti trabaho ti reporma? Nehemias 5:9.
“Usaren ni Jehova iti trabahoNa dagiti tattao a kas kapudno ti asero iti prinsipio, a saan a mabackog kadagiti pangul-ulbod dagiti nakapukaw iti naespirituan a pagkita.
“Pinili ti Dios ni Nehemias agsipud ta naannugot isuna a makitinnulong ken Jehova kas maysa nga agtarimaan. . . . Idi nakitana dagiti biddut a prinsipio, saan a nagtacder a kasla awan nakitana ket babaen iti kinaulimecna ipaayna ti yaanamongna. Saanna a pinanawan ti ili a mangipagarop nga agtactacder isuna iti biddut a sibay. Nagtacder isuna a sititibker para iti kinalinteg. Saanna a pinalubosan ti maysa a jota ti inpluensia a matiritir dagiti prinsipio nga impasdec ti Dios.” – RH, May 2, 1899.
“Idi nagtignay ni Nehemias kas maysa a repormador ken mangisalacan iti Israel, nagtignay isuna gapu iti panagayat iti Dios ken gagar para iti idudur-as ti iliNa. Ti pusona ket adda iti trabaho nga aramidenna; ti namnamana, pigsana, siglatna, determinasyon ti kababalinna, ket makaakar ken makapabileg iti sabali a maaddaan iti isu met la a tured ken nadaeg a panggep. Tunggal tao nagbalin a Nehemias iti bukodna a disso ket tumulong a mangpapigsa iti ima ken puso ti kaarrubana; iti mabiit maparmec ti kinasadot babaen iti pigsa ken tured.” – Ibid., March 18, 1884.
“Ti kaindaclan a kasapulan ti lubong isu ti panagkasapulan kadagiti tattao – tattao a saan a nagatang wenno mailaco, tattao nga iti kaunggan ti kararuada ket napudno ken nalintegda, tattao a saan a mabuteng a mangawag iti basol iti pudno a naganna, tattao nga addaan iti konsiensia a napudno iti pagrebbenganda, tattao nga agtacder para iti linteg uray pay matnag ti langit.” – Education, p. 57.
Martes
Enero 12
3. AWIS TI PANAGBABAWI
a. Ania ti panggep dagiti ocom a naipatulod iti Israel? Isaias 1:16-18; Lucas 11:32. Ania ti epektoda ken ni Acab? 1 Ar-ari 18:17.
“Ti panggep daytoy pettat a panagsagaba ket tapno mariing ti Israel a mangamiris iti basolda, isangbay ida nga agbabawi ket agsubli iti Dios, tapno idayawda ni Jehova kas maymaysa a pudno ken sibibiag a Dios. Kalpasan ti tallo ket gudua a tawtawen ti tikag, kinuna ti Apo ken ni Elias, ‘Inca, agparangca ken Acab, ket siac ibaonconto ti tudo iti daga.’ ‘Ket naaramid, idi a ni Acab nakitana ni Elias, a ni Acab kinunana kencuana, Sica aya, sica a manangririboc iti Israel? Ket isu simmungbat, Siac saanco a riniriboc ti Israel, no di ket sica ken ti balay ni amam, iti panangbaybay-ayo cadagiti bilbilin ni Jehova ket sica simmurotca cadagiti Baales’ (1 Ar-ari18:1, 17, 18).” – RH, May 26, 1891.
“Saan nga awaten ti Dios ti panagconfesar no awan ti napudno a panagbabawi ken repoprmasyon. Kasapulan nga adda nalawag a panagbalbaliw iti biag; amin a makapagura iti Dios kasapulan nga ilacsid. Daytoy ti resulta ti pudno a panagladingit iti basol.” – SC, p. 39.
b. Ania ti pagdumaan ti pudno a panagbabawi ken ti palso a panagbabawi? 2 Corinto 7:9-11.
“Umariwecwec ti agladingit ta nakabasolda ken urayda la nga agaramid ti pammarang a reporma agsipud ta mabutengda a dagiti biddut nga aramidda ti mangisangbay ti panagsagabada. Ngem saan daytoy a panagbabawi iti panirigan ti Biblia. Pagladingitanda ti sagabaen imbes a ti basol. Kasta ti leddaang ni Esau idi nakitana nga agnanayonen a napukawna iti kalinteganna kas inauna. Ni Balaam, nagbuteng gapu iti angel a nakaasut iti espada nga agtactacder iti dalanna, binigbigna ti basolna di la ketdi ta mapukawna ti biagna; ngem awan ti napudno a panangibabawina iti basolna, awan ti pannakabalbaliw iti panggep, awan ti pananggura iti dakes. Ni Judas Escariote, kalpasan a liniputanna ti Apo, impacdaarna, ‘Siac nakabasolac iti panangyawatco iti dara nga awan biddutna’ (Mateo 27:4).” – Ibid., pp. 23, 24.
“Iti daytoy hepe dagiti agsingsingir iti buis a nariing iti tarigagay para iti naim-imbag a biag. . . nangngeg ni Zaqueo ti awag nga agbabawi. . . . Ammona ti Nasantoan a Surat ket naconvictar a biddut ti aramidna. . . Naricnana a managbasol isuna iti imatang ti Dios. . . Insegida a rinugian ni Zaqueo ti pannakaconvictarna ket insublina dagiti innalana kadagiti tattao a nagaramidanna iti biddut.” – DA, p. 553.
Mierkules
Enero 13
4. AWIS TI PANAGTULNOG
a. Iti ania nga agsanggir ti ragsac ken pannakaisalacantayo? Salmo 106; Job 36:11; Jeremias 7:23.
“Ti ragsac ken pannakaisalacantayo ket agsanggir iti pannangan iti tinapay ti biag, dayta ket, ti panagtulnog kadagiti sasao ken panagaramid kadagiti ar-aramid ni Cristo, idurdur-as ti kinalinteg ken lapdan ti kinakillo. Awan ti makaited iti kasta a panagtalec iti bagi, kasta a tured, kasta a yaadu ti talento ken abilidad, kas ti pudno a pattapatta dagiti gut-gutoguten ti linteg ti Dios. . . Panagayat ken Jesus ti mangiturong kadatayo a mangtungpal kadagiti bilbilin ti Dios, isuda a silaw kadagiti sacatayo ken lawag iti dalantayo, manggun-od para kadatayo ti agsilsilnag, mangdaldalus, naragsac a presencia ti Ama ken ti Anac. Isuna a natulnog mabalinna ti makisao iti Dios kas ken ni Enoc.” – SDG, p. 194.
b. Ania nga ayo ti ipalgac dagiti tattao nga agkedked nga agtulnog iti Dios? Aramid 7:51- 53; 2 Timoteo 3:8. Kasano ti panangibilangda iti ili ti Dios kadagiti maudi nga alaldaw? Mateo 24:9.
“Ti klase a nangprobokar iti gura ti Langit ipasangda amin a riribocda kadagiti tattao nga agtultulnog kadagiti bilbilin ti Dios ket agnanayon a tubngar kadagiti agsalungasing. Maipacdaarto a dagiti tattao ket busbusorenda ti Dios babaen iti panangsalungasing iti Domingo kas aldaw a panaginana; a daytoy a basol ti nangisangbay kadagiti kalamidad a saan nga agsardeng agingga a siiinget a maipatungpal ti pannakangilin ti Domingo; a dagiti mangiparang kadagiti tontontonen ti maikapat a bilin, daddadaelenda ti panagraem para iti Domingo, riribocda kadagiti tattao, laplapdanda ti pannakaisublida iti nadiosan a pabor ken temporario a rang-ay. Kasta a maulit ti pammabasol idi kadagidi adipen ti Dios, ken kadagiti rason a nakaipasdecanda: ‘Ket naaramid, idi a ni Acab nakitana ni Elias, a ni Acab kinunana kencuana, Sica aya, sica a manangririboc iti Israel? Ket isu simmungbat, Siac saanco a riniriboc ti Israel, no di ket sica ken ti balay ni amam, iti panangbaybay-ayo cadagiti bilbilin ni Jehova ket sica simmurotca cadagiti Baales’ (1 Ar-ari18:1, 17, 18). Iti pannakaparurod dagiti tattao gapu kadagiti palso a pammabasol; agaramidda ti addang maibusor kadagiti mensahero ti Dios a maipada unay iti inaramid di nagapostasia nga Israel ken ni Elias.” – GC, p. 590.
“Amin a panulisog ni Satanas, nadaeran ni Cristo babaen iti sao ti Dios. Babaen iti panagtalec kadagiti karkari ti Dios, immawat iti bileg nga agtulnog kadagiti bilbilin ti Dios, ket ti manulisog saan a nakagundaway.” – MH, p. 181.
Hueves
Enero 14
5. TRABAHO TI PANAGISUBLI
a. Ania dagiti “daan a dandana” a kasapulan a maisubli? Jeremias 6:16; Isaias 58:12-14.
“Inawis ni Jeremias ti imatang ti nacion a paulit-ulit iti balakad a naited iti Deuteronomio. Nakarkaro ngem kadagiti sabsabali a propeta, in-gunamgunamna dagiti panursuro ti linteg ni Moises ken impakitana no kasano dagitoy a mangisangbay iti kangatoan a naespirituan a bendisyon iti nacion ken iti tunggal indibidual a puso. ‘Damagenyo dagiti daan a dandana, sadino ti yan ti nasayaat a dalan ket magnayao idiay,’ indawatna, ‘ket macasaraccayo iti inana a maipaay cadagiti cararuayo, (Jeremias 6:16).” – PK, p. 411.
b. Ania ti nairaman iti trabaho ti panagisubli. Ken sino ti naayaban a mangaramid iti daytoy a trabaho? Isaias 62:6; 58:1.
“Maysa a makapadanag a kinapudno ti di panangikankano, kinatur-og ken kinaawan interes ti mangiladawan kadagiti tattao nga adda iti saad, ken kasta met a kumarkaro latta ti kinatangsit ken di panangipangag kadagiti ballaag ti Espiritu ti Dios. Dagiti tubeng nga insaad ti sao ti Dios iti aglawlaw ti ilina ket narebbada. Dagiti tattao a makaammo iti dalan a nangiturongan ti Dios iti iliNa iti napalabas, imbes a damagenda dagiti daan a dandana ken salacnibanda ti saadda kas naidumduma nga ili, inkawarda dagiti imada iti lubong. Ti makapakigtot a buya ti kaso ket, dagiti mangbalbalaag a timec – saan a mangngeg a mangtubngar, agdawat ken mangballaag. Ti mata ti ili ti Dios kasla bulsec, idinto a ti iglesia napaspas a mailuyluyos iti dana ti kinainlubongan.” – 4 T, p. 513.
Viernes
Enero 15
PERSONAL A PANGREPASO A SALSALUDSOD
1. Kasano a nagbiag dagiti namatalec a natda ti Dios, nupay napalaw-lawanda kadagiti agan-anito? Kasano a maipakat daytoy kadatayo?
2. Ania ti inaramid ni Nehemias tapno mapabileg ti sabali a makipagtrabaho kencuana?
3. Ania a kita dagiti pagbaliwan a nasisita iti biagtayo no sipupudnotayo nga agbabawi?
4. Sadino ti pagtaudan ti pudno a ragsac ken apay?
5. Imbes a sapulen dagiti “daan a dandana” ania ketdi ti aramiden ti sumagmamano, ken kasano daytoy nga apektaranna ti iglesia?