Domingo
Enero 24
1. CRISTO, TI CENTRO
a. Sino ti nangiturongan ni Juan kadagiti dumdumngeg kencuana? Mateo 3:11; Aramid 19:4; Juan 1:29
b. Ania ti nagtaudan ti pannakaammo ni Juan? Lucas 3:2. Kasano a ti wagas ti panagadaltayo maipada iti panagadal ni Juan? Hebreo 12:2; 2 Corinto 3:18.
“Ni Juan Bautista iti biagna idiay disierto sinuroan isuna ti Dios. Inadalna dagiti paltiing ti Dios iti nakaparsuaan. Iti babaen ti panangibagnos ti nadiosan nga Espiritu, nagadal kadagiti nalukot a libro dagiti propeta. Iti aldaw ken rabii, ni Cristo ti ad-adalenna, ut-utobenna, agingga a ti isip ken puso ken kararuana napno iti nagloriaan a sirmata.” – GW, p. 54.
“Naimbag para kadatayo ti mangbosbos iti oras ti tunggal aldaw a mangut-utob iti biag ni Cristo. Anagen punto por punto, ket palubosan ti imahinasyontayo a manggammat iti tunggal parang, kangrunaanna kadagiti nangserra a paset. Bayat ti panangut-utob iti naindaclan a sacrificioNa para kadatayo, umun-uneg ti panagtalec ken panagayattayo Kencuana, ket ad-adda a mapno iti EspirituNa. No kayattayo ti maisalacan, sursuroentayo ti leksion ti naladingit a panagbabawi ken panagpakumbaba iti sakaanan ti cruz.” – DA, p. 83.
Lunes
Enero 25
2. AYAB ITI PANAGBABAWI
a. Ania ti linaon ti mensahe ni Juan? Lucas 1:17; Mateo 3:1, 2, 8.
“Ti panangascasaba ni Juan nangparnuay iti nabara a gagar. Iti rugrugi ti panagannongna, nababa unay ti narelihionan nga interes. Inuugma a pammati, tradisyon ken sarsarita ti nangriro iti panpanunot dagiti tattao, ket saanen a naawatan ti umno a dana. Napasnec a manggun-od iti nainlubongan a gameng ken dayaw, dagiti tattao nalipatadan ti Dios. Napan inwaragawag ni Juan ti pinulotan ti Dios ket inayabanna dagiti tattao tapno agbabawida.” – YI, may 17, 1900.
“Impacdaar ni Juan ti yaay ti Mesias ket inayabanna dagiti tattao tapno agbabawida. Kas maysa a tanda ti pannakadalus manipud basol, bautizaranna ida iti danum ti Jordan. Babaen iti dackel ti kaipapananna a leksion, ipacdaarna a dagiti nangtonton a tattaoda a pinili ti Dios narugitda gapu iti basol, ket no awan ti pannakadalus ti puso ken biag awanto ti pannakipasetda iti pagarian ti Mesias.” – DA, p. 104.
b. Ania ti kasasaad ti tattao ita? 2 Timoteo 3:1-4. Ania a mensahe ti itedtayo kadacuada? Aramid 17:30; 26:19, 20.
“Kasapulan nga allokoyentayo dagiti tattao iti sadinoman tapno agbabawida ket maliklikanda ti pungtot a sumangbay. Addaanda iti kararua nga isalacan wenno mapukaw. Awan coma ti saan a mangikankano iti daytoy a banag. Ayaban ti Dios dagiti trabahador a napno iti napasnec ken napinget a panggep. Ibaga kadagiti tattao nga ‘umagawada iti tiempona man ken saanna a tiempo. Kadagiti sasao ti biag nga adda kadagita bibigyo, ibaga kadagiti lallaki ken babbai nga asidegen ti kanibusanan dagiti amin a banbanag.
“Pagtalinaedentayo ti kararuatayo nga agay-ayat iti Dios. Kasapulan a maipaay ti ballaag. Ti kinapudno saan a kumapoy iti bibigtayo. Kasapulan a riingentayo dagiti tattao iti insegida a panagsagana, ta bassit ti ammotayo no ania ti adda iti sangoanantayo. Ti pammatic ket kas ti pigsana iti agnanayon nga agbibiagtayo iti kaudian a natda ti tiempo. Tunggal manursuro coma iparangda ti nakalucat a ruangan iti sangoanan ti amin nga umay ken Jesus, nga agbabbabawi kadagiti basbasolda.” – Ev, p. 217.
“Ti pudno a panagbabawi nagtaud manipud iti kapanunotan iti makarimon unay a glad ti basol. . . . Adda nagdackel a pagdumaan iti panangamin kadagiti pudno dagiti paspasamac kalpasan a napanecnekanda ken ti panangiconfesar kadagiti basbasol a datayo ken ti Dios laeng ti makaammo.” – 2 BC, p. 997.
Martes
Enero 6
3. TI PUDNO NGA ANNAC NI ABRAHAM
a. Ania a panangtonton ti inaramid dagiti pangpangulo dagiti Judio? Kasano a simmungbatan ni Juan daytoy a panangtonton? Mateo 3:7-10.
“Tinubngar ni Juan ti naimbukodan a kinatangsit ken kinagamrud dagiti Fariseo ken Saduceo. Binallaaganna ida iti kinaawan pammatida ken kinondenarna ti kinamanaginsisingpetda. Imbagana kadacuada a saanda a natungpal dagiti kondisyon ti tulag, a mangted kadacuada iti kalintegan kadagiti karkari nga inaaramid ti Dios iti namatalec ken natulnog nga ili. Ti natangig a panangipangasda nga annac ida ni Abraham saanna maaramid ida a pudno a kasta. Ti panangiparangda iti kinatangsit, kinakuspag, kinaimon, kinamanagimbubukod ken kinadangkes ti nangmarka iti kababalinda kas kaputotan ti carasaen a saan ket ida nga annac ni natulnog ken nalinteg nga Abraham. Ti nadangkes nga ar-aramidda ti saan a nangitutop kadacuada a mangtonton kadagiti karkari ti Dios a naaramid kadagiti annac ni Abraham. Impasingked ni Juan kadacuada a mangbangon ti Dios iti annac ni Abraham manipud kadagiti batbato, isuda ti pangtungpalanNa iti kariNa, imbes nga agdepende kadagiti kadawyan nga annac ni Abraham a nangbaybay-a iti lawag nga inted ti Dios kadacuada ket napatangkenda gapu iti naimbukodan nga ambisyon ken nadangkes a kinaawan pammatida. Imbagana kadacuada a no pudno nga annac ida ni Abraham, aramidenda dagiti ar-aramid ni amada nga Abraham. Maaddaanda iti pammati, ayat ken panagtulnog ni Abraham. Ngem awanada iti kasta a bunga. Saanda a matonton nga amada ni Abraham, wenno dagiti karkari nga inaramid ti Dios iti caputotan ni Abraham.” – 2 SP, p. 51.
b. Kasano a sinarita ni Jesus daytoy isu met la a tontontonen dagiti Judio? Juan 8:39, 40.
k. Kasano a maibilangtayo a caputotan ni Abraham? Galacia 3:26-29.
“Kabayatan nga ibunbunannagda nga ili ida ti Dios a mangsalsalimetmet iti bilbilinNa, ilacsid dagiti ar-aramidda ti pammatida, ket no awan ti pudno a panagbabawi para kadagiti basbasolda, awananda iti paset iti pagarian ni Cristo. Husticia, kinamanagayat, asi ken ayat ti Dios ti mangbukel iti biag ti ili ti Dios a mangsalsalimetmet kadagiti bilbilinNa. Malacsid a makita dagitoy a bungbunga iti inaldaw a biagda, amin a panagibunannagda ket awan mamaayda, kas ti taep a maibelleng iti mangdadael nga apoy.” – Ibid, pp. 5, 52.
Mierkules
Enero 27
4. PUDNO A KINAINDACLAN
a. Ania ti pigsa ken pundasyon ti pudno a kinaindaclan? Salmo 27:1; Exodo 15:2; Galacia 2:20.
“Ti pigsa ti nacion ken ti indibidual ket saan a masaracan kadagiti gundaway ken pasilidades nga agparang a mamagbalin kadacuada a di maparmec; saan a masaracan iti itangtangsitda a kinaindaclan. Ti laeng mamagbalin kadacuada a naindaclan ken napigsa ket ti pannakabalin ken panngep ti Dios. Isuda a mismo, babaen iti ayoda iti panggepNa, ikeddenda ti bukodda a pagtungpalan.” – CT, p. 180.
“Ti pudno a panagraem iti Dios ket mapabileg babaen iti kapanunotan iti awan patinggana a kinaindaclanNa ken iti pannakaamiris iti presenciaNa. Iti daytoy a kapanunotan iti Saan a Makita, tunggal puso siuuneg a mamalditan.” – PK, p. 48.
“Aniaman nga ibagam iti lubong mamarkaan iti naisangsangayan a kaibatogan no maitutop iti aniaman a saoem iti uneg iglesia. Ta modom, ta sasaom, ta espiritum, agtultuloy a mangar-aramid iti maldit kadagiti tattao a makalangenmo.” – CT, p. 198.
b. Ania ti nabilbileg ngem iti sao a mangipeksa iti pannakaammo iti Dios kadagiti sabsabali? Mateo 5:14-16; 2 Tesalonica 3:9 (maudi a paset).
“Imposible para iti asinnoman kadatayo ti agbiag a saan a mangipaay iti inpluensia iti lubong. Awan ti miembro ti pamilia ti mangbakud iti bagina iti unegna met laeng, tapno ti kameng ti pamiliana dida marikna ti inpluensia ken espirituna. Ti ekspresyon ti langana addaan iti inpluensia para iti imbag wenno dakes. Ti espirituna, dagiti sasaona, dagiti tigtignayna, ti modona iti sabali ket nalawag. No agbibiag a managimbubukod, palawlawanna ti kararuana iti makamalaria nga angin; idinto a no napno isuna iti ayat ni Cristo, iparangarangna ti kinaraem, kinaimbag, mannakaawat iti rikna ti sabali ken maiyammona kadagiti kakaduana, babaen iti tigtignay ni ayat, asi, kinamanagayat, ken naragsac a rikna. Maiparangarang nga agbibiag isuna para ken Jesus ken inaldaw nga agad-adal kadagiti leksion iti sakaananNa, umaw-awat iti lawagNa ken cappiaNa.” – AH, pp. 33, 34.
“Ikagumaantayo a takuaten dagiti paglaingan imbes a dagiti depecto. Masansan a ti bukodtayo a modo, ti law-ang a nangpalawlaw kadatayo ti mangikeddeng no ania ti maipalgac kadatayo iti sabali.” – Ibid., p. 105.
Hueves
Enero 28
5. TI SUNGBAT A TIGNAY DAGITI TATTAO
a. Ania ti nangawis ti kasta kadackel a bilang dagiti tattao idiay let-ang? Marcos 1:4; Lucas 3:15.
“Kas katibker ti bato a nagtacder ti propeta ti Dios, namatalec a nangtubngar iti basol ken krimen iti amin a kita, kadagiti ar-ari ken natan-oc a tattao, kas kadagiti saan a madaydayaw ken di am-ammo. Saan a liniklikan ni Juan Bautista ti pagrebbenganna. Napudno iti Diosna, natan-oc a dignidad ti kababalinna, nagtacder a natibker kas bato, namatalec iti prinsipio.” – 2 SP, p. 72.
“Umariwecwec ti immawat iti panangasaba ni Juan ken simmurot kencuana iti nagduduma a luglugar. Adu ti nangipateg iti pusoda ti namnama nga isuna ti Mesias. Ngem bayat ti pannakakita ni Juan kadagiti tattao nga agturong kencuana, inkagumaannna nga iturong ti panpanunotda iti umay a Maysa.” – RH, Nov. 28, 1907.
b. Ania ti nalawag a pagbalbaliwan ti maar-aramid iti biag dagiti tattao? Mateo 3:8; Armid 18:24, 25; 2 Corinto 5:17.
“Ti pannakaisalacan . . . . ket nabiag a pannakaitipon ken Jesu Cristo tapno mapabaro ti puso, nga agaramid kadagiti ar-aramid ni Cristo iti pammati ken agtrabaho a siaayat, iti kinaanus, kinaemma ken namnama. Tunggal kararua a naikaysa ken Cristo agbalin a sibibiag a misyonero kadagiti amin nga adda iti aglawlawna.” – EV., p. 319.
Viernes
Enero 29
PERSONAL A PANGREPASO A SALSALUDSOD
1. Kasano a ti inaldaw a panagadal ket maipada ken iti panagadal ni Juan Bautista?
2. Kasano a ti mensahe nga itedtayo ita maipada iti mensahe ni Juan?
3. Kasano a maibilangtayo nga annac ni Abraham ita?
4. Ania dagiti sumagmamano a wagas a makaipaaytayo iti positibo nga inpluensia iti sabsabali?
5. Kasano a nagbalbaliw dagiti tattao babaen iti mensahe ni Juan?