1. TI KAINDACLAN A KASAPULAN TI NATDA NGA IGLESIA Domingo Pebrero 28

a. Ania ti kangrunaan ken kasapulan unay kadagiti amin a kasapulan ti iglesia? Oseas 6:1, 2; Isaias 57:14, 15. “Ti panangbiag ti pudno a kinasanto iti nagbabaetantayo isu ti kaindaclan ken kasapulan unay kadagiti kasapulantayo. Ti mangsapul iti daytoy isu ti umuna a trabahotayo.” – RH, March 22, 1887. b. Ania a pannacabalin ti adda iti dayta makabael a mangipaay iti pudno a pangpabiag? Zacarias 4:6; Juan 3:5, 6. “Panangbiag ken repormasyon ti kasapulan a maaramid iti babaen ti panagannong ti Espiritu Santo. Ti panangbiag ken repormasyon ket dua a nagduma a banag. Ipaawat ti panangbiag ti pannakapabaro ti naespirituan a biag, pannakapabileg kadagiti pannacabalin ti panunot ken puso, panagungar manipud naespirituan a pannakatay. Ipaawat met ti repormasyon ti pannakaurnos manen, pangbaliw kadagiti kapanunotan ken teoria, ugali ken kannawidan. Ti repormasyon saanna nga isangbay ti naimbag a bunga ti kinalinteg malacsid no naisilpo iti panangbiag ti Espiritu. Aramiden ti panangbiag ken ti repormasyon ti naituding nga aramidda ket iti panangaramid iti daytoy a trabaho kasapulan nga agtunosda.” – Ibid., Feb. 25, 1902.

---

2. MAYSA A TRABABAHO ITI PANAGISUBLI Lunes Pebrero 29

a. Ania ti nairaman iti misyontayo? Isaias 58:12; Aramid 3:20, 21. “Nabiag a pannacabalin ti kasapulan a mangatendar iti mensahe ti maikadua a yaay ni Cristo. Saantayo nga aginana agingga nga adu a kararua ti maconvertir iti nagasat a namnama ti panagsubli ti Apo. Kadagidi alaldaw dagiti apostoles ti mensahe nga inawitda nangparnuay iti pudno a trabaho, napagsubli dagiti kararua manipud panagdidiosen tapno agserbidan iti sibibiag a Dios. Ti trabaho a maaramid ita ket pudpudno, ket ti kinapudno isu a talaga ti kinapudno, isuna laeng ta itedtayo ti mensahe a buyogan ti kasta unay a kinapasnec bayat ti yaasideg ti yaay ti Dios. Ti mensahe para iti daytoy a tiempo ket positibo, nalawag ken kaunegan ti pategna. Kasapulan nga agtignaytayo kas lallaki ken babbai a mamati iti daytoy. Agur-uray, agbanbantay, agtrabtrabaho, agkarkararag, mangbalballaag iti lubong – daytoy ti trabahotayo.” – Evangelism, p. 219. b. Kasano a sinango ni Nehemias ti oposisyon idi imbangonna manen dagiti bakod ti Jerusalem kalpasan ti pannakakayawda? Nehemias 6:3. Ania ti maadaltayo iti daytoy a kapadasan? “Ti trabaho a mangisubli ken mangreporma nga impatungpal dagiti nagsubli a napagtalaw, iti panangidaulo da Zerubabel, Ezra ken Nehemias, iparangna ti ladawan ti trabaho iti naespiritualan a panagisubli nga isu ti maisangbayto kadagiti pangserra nga alaldaw ti pakasaritaan ti daga. Dagiti natda ti Israel ket nakapoy nga ili, naipasango kadagiti pangdadael dagiti kabusorda; ngem babaen kadacuada inkeddeng ti Dios a preserbaren iti daga ti pannakammo iti maipapan Kencuana ken iti lintegNa. Isuda ti parabantay iti pudno a panagdaydayaw, mangsalsalimetmet kadagiti nasantoan nga oraculo. Nagduduma dagiti kapkapadasan a simmangbay kadacuada bayat ti panangibangonda manen iti templo ken iti bakud ti Jerusalem; napigsa dagiti suppiat a kasapulan a sangoenda. Nadagsen dagiti pagrebbengan a naipabaclay kadagiti dadaulo daytoy a trabaho; ngem dagitoy a tattao nagpatuloyda iti natibker a panagtalecda, iti napakumababa nga espiritu, ken iti natibker a panagsanggir iti Dios, sipapammati a gubuayenNa nga agballigi ti kinapudno. Kas ken Ari Ezekias, ni Nehemias kimpet ken ni Jehova ket saan a simmina iti isusurotna Kencuana, no di ket tinungpalna dagiti bilbilin. . . . Ket ni Jehova adda idi kencuana’ (2 Ar-ari 18:6, 7).” – PP, p. 677.“Awagan ti Dios dagiti lallaki kas kada Elias, Natan ken Juan Bautista – lallaki a mangawit iti mensaheNa a simamatalec, iti lacsid ti banagna; lallaki a situtured a mangisao iti kinapudno nupay gubuayenna ti pannakaisacrificio ti amin nga adda kadacuada.” – Ibid., p. 142.

---

3. PANNAKISIMPATIA ITI BASOL Martes Marzo 1

a. Kasano nga inlawlawag ti Biblia ti kaipapanan ti basol? 1 Juan 3:4. Kasano ti panangibilang ti Dios ti minamaag a pannaki-simpatia iti basol? Tito 3:10, 11; Efeso 5:11. “Iti trabaho ti reporma a maipatungpal ita, adda panagkasapulan kadagiti lallaki kas kada Ezra ken Nehemias a saan a mangekskyus iti basol wenno mangpababa wenno lumned a mangpasingked iti dayaw ti Dios. Kadagiti tattao a pakaipabaklayan ti dagsen daytoy a trabaho awan ti kappiada no adda biddut a maaramid, saanda met nga abbongan ti basol babaen iti cabal ti palso a kinaayat. Laglagipenda a ti Dios awan panangidumdumana kadagiti tattao, a ti kinainget iti sumagmamano a tattao mapanecnecan nga asi iti kaadduan. Laglagipenda pay a ti maysa a mangtubngar iti dakes, kankanayon coma a maipalgac ti espiritu ni Cristo.” – PK, p. 675.“Adda simpatia para iti basol ken managbasol a napeggad iti irarang-ay ti iglesia iti agdama nga aldaw. Kasapulan a maaddaanca iti ayat isu ti pukkaw. Ngem ti sentimiento a mangekskyus iti biddut ken saripda iti nakabasol, saan nga isu ti panangngaasi a dakamaten ti Biblia.” – St, Jan. 6, 1881. b. Bay-an kadi ti basol a saan a matubngar? Efeso 5:11; 2 Timoteo 4:2. “Kaano a mangngeg iti uneg ti iglesia iti maminsan pay ti timec ti namatalec a tubngar, ‘sica dayta a tao’? [kitaen ti 2 Samuel 12:7]. No dagitoy a sasao ket saan a nabattaway, makitatayo ti ad-adu a pannacabalin ti Dios. Dagiti mensahero ti Apo saan nga agreklamo no dagiti peksada ket awanan bunga agingga nga ibabawida iti ayatda a maanamongan, iti tarigagayda a mangparag-o kadagiti tattao, a mangiturong kadacuada a mangparukma iti kinapudno, ken mangipukkaw iti Talna, idinto a saan met nga insao ti Dios ti talna.” – GW, p. 150.“[Naadaw iti Juan 20:23]. Saan a nangted ni Cristo ditoy iti wayawaya para iti siasinoman a mangipasa iti ocom iti sabali. Iti sermon idiay bantay impawilNa daytoy. Karbengan dayta ti Dios. Ngem iti iglesia iti naurnos a capasidadna insaadNa ti pagrebbengan para iti tunggal miembro. Kadagiti natnag iti basol, ti iglesia addaan iti pagrebbengan a mangballaag, mangisuro ken no mabalin mangpasubli. . . . .“Tamingen a simamatalec ti madi nga aramid. Ballaagan ti tunggal kararua nga agpeggad. Awan ti panawan a mangallilaw iti bagina. Awagan ti basol iti pudno a naganna. Ipacdaar no ania ti imbaga ti Dios maipapan iti panagulbod, panangsalungasing iti Aldaw a Panaginana, panagtakaw, panaganito ken tunggal sabali a dakes. ‘dagiti agaramid kadagitoy, saandanto a tawiden ti pagarian ti Dios’ (Galacia 5:21)” – Ibid., p. 502.

---

4. KINAPASNEC NGA AGRAMID ITI NALINTEG Mierkules Marzo 2

a. Kasano kapasnec coma dagiti mensahero ti Diosa para iti nalinteg? Isaias 58:1. “Iti daytoy a tiempo ti nganngani sangalubonganen nga apostasia, awagan ti Dios dagiti mensaheroNa a mangipacdaar iti lintegNa iti espiritu ken pannacabalin ni Elias. Kas ken Juan Bautista a nangisagana iti maysa nga ili para iti umuna a yaay ni Cristo, iturong ti imatangda kadagiti sangapulo a bilbilin, isu nga itedtayo iti nalawag nga aweng, ti mensahe: ‘Agbuteng cay iti Dios ket isu dayawenyo; ta dimteng ti horas ti panangocomNa’ (Apocalipsis 14:7). Buyogan ti kinapasnec a nangiladawan ken Elias a propeta ken ni Juan Bautista, ikagumaantayo nga isagana ti dalan para iti maikadua a yaay ni Cristo.” – 4 BC, p. 1184.“Ti mensahetayo ket diretso kas ti mensahe ni Juan. Tinubngarna dagiti ar-ari gapu iti salungasingda. Iti lacsid nga agpeggad ti biagna, saan a nagtactac a nangipacdaar iti sao ti Dios. Ket ti trabahotayo iti daytoy a panawen kasapulan a simamatalec a maaramid.” – GW, p. 55. b. Kasano ti masansan a panagtignaytayo no maayaban a makipaset iti trabaho ti repormasyon ken kasano ti panangapektarna iti sabali? Deuteronomio 20:8. k. Ania ti malagiptayo iti kasta a tiempo? Isaias 35:4; Mateo 28:20 (maudi a paset). “Saan coma a pinanawan ni Elias ti pagrebbenganna. Sinangona coma ti pamutbuteng ni Jesabel a buyogan ti panagdawat iti panalacnib ti Maysa a nangbilin kencuana a mangpasingked iti dayaw ni Jehova. Imbagana coma iti mensahero a ti Dios a pagtaltalcanna ti mangsalacnib kencuana manipud iti pungtot ti reyna. Sumagmamano laeng nga oras ti napalabas sipud nasacsian ti nakakaskasdaaw a pannakaipaduyacyac ti nadiosan a pannacabalin, ket daytoy coma ti nangted kencuana iti talged a saan isuna a mabaybay-an. No nagtalinaed iti ayanna, no inaramidna ti Dios a salacnib ken pigsana, agtacder a sipupudno para iti kinapudno, nasalacniban coma iti peggad. Inikkan coma ni Jehova isuna iti sabali a tanda ti balligi babaen iti panangipatulodNa iti ocom ken ni Jesabel; ket ti impresyon a naaramid iti ari ken ti ili nangisangbay coma iti repormasyon.” – PK, p. 160.

---

5. TI BILEG TI EHEMPLO Hueves Marzo 3

a. Kasano kaepectibo ken kalawa ti madanonna ti pannacabalin ti ehemplo? 1 Timoteo 4:12; Isaias 62:10. “Manmano nga agpangato dagiti tattao a nangatngato ngem iti ministroda. Ti mangayat iti lubong nga espirituna addaan iti nagdackel nga inpluensia iti sabali. Aramaten dagiti tattao dagiti pagkuranganna kas pambar a mangabbong iti bukodda nga espiritu a managayat iti lubong.“Dagiti ministro coma ti ehemplo kadagiti arbanda. Iparangarangda ti awan ressat a panagayatda kadagiti kararua ken iti debosyon a manggubbuay iti kayatda a makita iti ili.” – 2 T, pp. 645, 646. b. Kasano a maallilawtayo amin iti bagbagitayo maipapan iti bukodtayo a kasasaad? Mateo 23:25-28; Ania ti remedio? Santiago 4:8. “Dagiti repormador saan a paradadael. Pulos a saanda nga ikagumaan ti mangdadael kadagiti saan a maitunos kadagiti planoda ken saan a kumanonong kadacuada. Dagiti repormador kasapulan nga agpasango, saan ketdi nga agsanud. Kasapulan a napinget, natibker, napasnec, saan nga agtukiad; ngem kinatibker a saan nga agpababa nga agbalin a naturay nga espiritu. Tarigagay ti Dios nga amin nga agservi Kencuana ket natibker kas bato no mainaig iti prinsipio. Ket no agtaengda ken Cristo, maarmidda ti trabaho nga aramidenNa no adda Isuna iti saadda.” – Ibid., vol. 6, p. 151.“Ti relihion ni Jesus palucnengenna ti natangken ken nagubsang a rikna, ken palinisenna ti narusanger ken natadem ti modona. Aramidenna dagiti sao a nalanay ken makaay-ayo. Agsursurotayo ken ni Cristo no kasano a pagtiponen ti nangato a kapanunotan ti kinadalus ken ti integridad a buyogan ti naranyag a disposisyon. Ti naasi, managraem a Cristiano isu ti kabilegan nga argumento a mapataud a mangpabor iti kinaCristiano.” – CM, p. 73.

PERSONAL A PANGREPASO A SALSALUDSOD Viernes Marzo 4

1. Ania ti kaindaclan a kasapulan ti iglesia ita? 2. Kasano a mairamantayo a mangipaay iti mensahe ti asidegen a panagsubli ni Jesus? 3. Ania ti pagrebbengan ti iglesia kadagiti miembrona? 4. Ania ti rumbeng nga ayotayo bayat ti pannakipasettayo iti trabaho ti repormasyon? 5. Kasano a surotentayo ti ehemplo ni Cristo iti wagas ti pannakilangentayo iti sabali?