Domingo
Marzo 6
1. TI NADANUMAN A MENSAHE
a. Kasano a mabalin a mapakapoy ti mensahe, wenno maaramid nga awanan epecto ti mensahe ti Dios? 1 Corinto 1:17; Marcos 7:13.
b. Imbes a maysa a namatalec a mensahe, ania ti masansan a maibaga iti ili? Jeremias 6:14, 15; Ezequiel 13:10.
“Makigasan-gasat dagiti tattao nga agramid iti basol a nakana iti imatang ti Dios ket ipagarupda a saandanto a maawagan nga agsungbat para kadagita, agsipud ta ibagada a naaramidda gapu iti kinanerviosa, iti naiduma a kita ti isipda; ngem wagas laeng a mangpabang-ar iti consiensia ken mangipukkaw, ‘Kappia, kappia uray awan ti kappia.’ Ti basol ket basol, ket allilaw ni Satanas ti kumita iti dayta iti sabali a lawag imbes a nakana daytoy .” – RH, Aug. 1, 1893.
k. Kasano ti panangibilang ti Dios iti pasablog? Salmo 5:9; 12:3. Ania ti magun-odan ti panangpasablog? Proverbio 26:28; 29:5.
“Pammadayaw, panangpasablog ken panangpalugod ad-adu ti naaramidanda a nangiturong kadagiti kararua iti biddut a dana ngem iti sabali nga arte a partuat ni Satanas.” – FCE, p. 304.
Lunes
Marzo 7
2. TI ESTILO TI BIAGTAYO
a. Ania ti taraon ni Juan, ken ania ti naibaga maipapan iti ugalina? Mateo 3:4; Lucas 1:80. Kadagiti ania a wagas a ti estilo ti biagna ket maysa a babalaw kadagiti tattao iti dayta a tiempo?
“Idi panawen ni Juan Bautista, nagraira ti kinagamrud iti kinabacnang ken panagayat iti nam-ay. Dagiti makaparugso a ragragsac, ramrambac ken panagiinum ti mangpatpataud iti sakit ti bagi ken dakes nga ugali, mangpangudel iti naespirituan a pannakaawat ken mangpabassit iti panangrikna iti basol. Nagtacder ni Juan kas repormador. Babaen iti nateppel a biagna ken ti simple a kawwesna tubngarenna ti kinalabes idi panawenna. Gapuna a ti bilin a naited kadagiti nagannac ni Juan – leksion ti panagteppel babaen iti angel manipud trono ti langit.” – DA, pp 100, 101.
“Adu a tawtawen nga aw-awagan ti Dios ti imatang ti iliNa a mangreporma iti salun-at. Maysa daytoy kadagiti naindaclan a sanga ti trabaho a panagsagana para iti yaay ti Anac ti tao. Ni Juan Bautista napan nga immuna iti espiritu ken pannakabalin ni Elias, a mangisagana iti dalan ti Apo ken tapno pasublien dagiti tattao iti kinasirib dagiti nalinteg. Isuna ti mangibagi kadagiti agbibiag kadagitoy maudi nga al-aldaw a nangitalcan ti Dios kadagiti sagrado a kinapudno nga iparang iti sangoanan dagiti tattao, tapno maisagana ti dalan para iti maikadua a panagparang ni Cristo. Maysa a repormador ni Juan. Ni angel Gabriel, naggapu sadi langit, nangted iti bitla maipapan iti reporma ti salun-at iti ama ken ina ni Juan. Imbagana a saan a painumen ti arac wenno napigsa nga inumen, tapno mapno isuna iti Espiritu Santo sipud pay pannakaiyanacna.” – CDF, pp. 70-71,
b. Ikompara ti kawwes ni Juan iti cawwes ni Elias. Mateo 3:4; 2 Ar-ari 1:8. Ania a leksion ti adda ditoy para kadatayo?
“Ti karkarna a langa ni Juan iturongna dagiti panpanunot dagiti dumdumngegna kadagiti agipadpadto idi ugma. Iti wagas ken kawwes umas-asping ken propeta Elias. Iti espiritu ken pannacabalin ni Elias tinubngarna ti sangapagilian a kinarugit ken tinubngarna ti agraraira a basbasol. Dagiti sauna nalawagda, natadem ken nakapappapati. Adu ti mamati a maysa isuna a propeta a nagungar. Nakibor ti sibubukel a nacion. Umariwecwec ti aguummong idiay let-ang.” – DA, p. 104.
“Nadalus ken kinanumo ti makita kadagiti pagtaengan ken pagan-anay ti amin a mamati kadagiti solemne a kinapudno iti daytoy a tiempo.” – 1 T, p. 189.
Martes
Marzo 8
3. AWAN LUGAR TI KINATANGSIT, KINAUBBAW, KINABA-RAYOBOY
a. Ania ti ayotayo kadgiti nainlubongan a banbanag? 1 Juan 2:15-17. Ania ti kangrunaan a prinsipio iti likudan ti reporma ti cawwes, ken ania ti panggepna? 1 Timoteo 2:9, 10; Numereos 15:38-40.
“Dagiti annac ti Israel kalpasan a nairuarda idiay Egipto ket nabilinda a maaddaan iti lubid nga azul kadagiti gayadan ti cawwesda a mamaglasin kadacuada kadagiti nacion iti aglawlawda ken mangipaawat nga isuda ti naidumduma nga ili ti Dios. Ti ili ti Dios ita ket saanen a nagutogut a maaddaan iti naisangsangayan a tanda a maisaad kadagiti cawwesda. Ngem iti Baro a Testamento masansan a maitudo kadatayo ti daan nga Israel kas pagwadan. No nangted ti Dios iti nalawag a bilbilin iti iliNa idi maipapan iti cawwesda, ti kadi kaso ti iliNa iti daytoy a panawen saan a dimteng iti imatangNa? Saan kadi a ti cawwesda maiduma iti lubong? Saan kadi nga ikagumaan ti ili ti Dios kas naiduma a gamengNa, nga uray iti cawwesda igloriada ti Dios? Saan coma nga isuda ti pagwadan iti cawwes, ken babaen iti simple nga estiloda matubngar ti kinatangsit, kinaubbaw ken kinabarayoboy dagiti nainlubongan, managayat iti ragragsac nga agibunbunannag? – Gutoguten ti Dios daytoy iti iliNa. Natubngar ti kinatangsit iti saoNa.” – RH, Jan. 23, 1900.
b. Ania ti masansan a kaso ti ili ti Dios ilacsidna ida, ken ania ti pagrebbengantayo kadagitoy a kakabsat a lallaki ken babbai? Proverbio 28:4; Roma 1:32.
“No dagiti nakikaysa iti lubong, ngem mangtontonton iti naindaclan a kinatarnaw, agdawat a makikaysa kadagiti nangsuppiat iti pakaigapuan ti kinapudno, kabuteng ken liklikan ida kas ti inaramid ni Nehemias. Ti kasta a balakad ket singasing ti kabusor ti amin nga imbag. Bitla dayta dagiti oportunista, ket rumbeng a pagkedkedan ida. Aniaman nga inpluensia ti agduyos a mangkiro iti pammati ti ili ti Dios iti mangibagnus a pannacabalinNa, rumbeng a sititibker a daeran.” – PK, p 660.
“Adda dagiti tiempo a sumangbay ti apostasia iti bunggoy, no ti kinadebosyon ket naawan iti puso babaen kadagiti namagtalinaed iti pannakiaddangda iti nadiosan a Pangulo. Ti ili ti Dios naisina manipud pagtaudan ti pigsada, ket sumukat ti kinatangsit, kinaubbaw, kinabarayoboy ken parang. Adda dagiti didiosen iti uneg ken iti ruar; ngem imbaon ti Dios ti Mangliwliwa kas tubngar ti basol, tapno ti iliNa maballaagan iti apostasiada ken matubngar ti panaglikudda.” – CE, p. 95.
Mierkules
Marzo 9
4. PANANGTAPAYA ITI PAGIBASARAN
a. Kasano ti panangitag-aytayo iti pagibasaran ti kinapudno ita? 2 Pedro 1:10-12; 2 Timoteo 2:15; Roma 12:9.
“Amin a makitipon iti iglesia ipalgacna ti nabaliwan a kababalin a mangipakita iti panagraemda kadagiti nasantoan a banbanag. Ti sibubukel a biagda masukog a maiyalubog iti panangpasayaat ni Cristo Jesus. Dagiti makitipon iti iglesia ket napakumbaba coma nga umawat iti bilin kadagiti punto a naliwayan ken no sadino ti rumbengda a baliwan. Kasapulan a mangipaayda iti Nacristianoan nga inpluensia. Dagiti saan nga agbaliw iti panagsasao ken panagtigtignayda, iti cawwesda wenno iti pagtaenganda, agbibiagda kadagiti bagbagida, saan ken ni Cristo. Saanda a napabaro ken ni Cristo Jesus, agingga a madalusan ti puso ken ti akinruar nga aglawlaw.” – TSA, p. 87.
“Nabilinnac a mangibaga a kasapulan ti repormasyon iti tunggal iglesia, iti tunggal pamilia. Awan ti tiempo nga isangrat iti panangayat iti ragragsac, awan kuwarta nga igatang kadagiti ladawan ti nataoan a rupa. Ipuonam ta kuwartam iti pakaigapuan ti Dios. Siaannad a bantayam ta ehemplom. Dackel ti ibungana iti tunggal kararua nga agayat ken agbuteng iti Dios ti agtungpal iti bilbilinNa. Kasapulantayo amin ti mangam-ammo unay kadagiti linlinteg ti pagarian ti Dios di la ketdi ta mapukawtayo ti biag nga agnanayon [2 Pedro 1:10-12] ket mapaay a makasarac iti sumrekan iti ciudad ti Dios.” – 21MR, p. 409.
b. Ania dagiti pagibasaran a pakaibangonan? Isaias 59:19; 8:20; Ecclesiastes 12:13.
“Ti Dios addaan iti ili iti rabaw ti daga a mamagtalinaed iti Biblia ket ti Biblia laeng ti pakaibasaran ti amin a doctrina ken pakaibangonan ti amin a reporma. Dagiti kapanunotan dagiti deadal a tattao, dagiti kapanunotan ti siencia, dagiti credo wenno desisyon ti consejo iti iglesia, kas kawadwad ken di agtutunos kas kadagiti iglesia nga ibagida, ti timec ti kaaduan – saan a maysa wenno amin dagitoy ti maibilang a pammanecnec wenno maibusor iti aniaman a punto ti narelihionan a pammati. Sacbay nga awaten ti maysa a doctrina wenno pagalagadan, dawatentayo ti nalawag a ‘Kas kuna ti Apo’ kas suportana.” – GC, p. 595.
Hueves
Marzo 10
5. NAYON A BILEG TI MENSAHE
a. Kaano nga agtrabaho ti Espiritu Santo tapno maidur-as ti kaudian a mensahe ti kinapudno? Aramid 2:1, 4; Apocalipsis 2:26.
“No ti umsi ti kinasadut ket maikkat a mapunas iti iglesia, ti Espiritu ti Dios ket sipaparabor a maipaduyacyac. Maipalgacton ti Nadiosan a bileg. Makita ti iglesia ti panagtrabaho ti providencia ti Apo dagiti buybuyot. Ti lawag ti kinapudno agranyag iti nalawag, napigsa a raya, ket kas kadagidi panawen dagiti apostoles, adu a kararua ti aglikud iti biddut ket agsublida iti kinapudno. Ti daga malawagan iti dayag ti Dios.” – 9 T, p. 46.
b. Kaano a namnamaentayo ti pannacabalin ti Dios a maiparanga-rang iti nakakaskasdaaw a wagas a mangagas iti masakit? Mateo 17:19-21; 1 Corinto 10:31; 9:27.
“Mabalinmo nga ibaga, ‘apay ngarud a dimo alaen ti trabaho ket agasan ti masakit kas ti inaramid ni Cristo? Sungbatak, ‘Saanca a nakasagana. Sumagmamano ti mamati; sumagmamano ti naagasan; ngem adu dagiti namagbalin ti bagbagida a masaksakit gapu iti saan a nateppel a pannangan wenno iti panangpalugod iti biddut nga aramid. No agsakitda, ikararagantayo kadi tapno makabangonda, tapno aramidendanto manen ti isu met la nga aramid? Kasapulan nga adda reporma iti bunggoytayo; ti ili kasapulan a makadanon iti nangatngato a pagibasaran sacbay a namaen ti bileg ti Dios a maiparangarang iti nakakaskasdaaw a wagas ti panangagas iti masakit.” – MM, pp. 15, 16.
Viernes
Marzo 11
PERSONAL A PANGREPASO A SALSALUDSOD
1. Ania ti pasablog, ken apay a saan nga usaren dagiti Cristiano?
2. Kasano a tinubngar ni Juan ti kinaawan parbeng nga agraraira idi panawenna? Ania ti ipaawat daytoy para kadatayo?
3. Ania ti napasamac kadacuada a nangiparang iti kinatangsit, kina-ubbaw ken kinabarayoboy?
4. Kasano a maipalgac a napabarotayo a naiparsua ken ni Cristo?
5. Tapno ti mensahe ket maitultuloy a buyogan ti pannacabalin, kasano ti panagbiagtayo?