Pauna a Sarita
Ti pannakaisurat ti evangelio segun ken Juan ket napetsaan a naladladaw ngem cadagiti tallo nga evangelio (a maawagan iti Sinoptiko nga Evanghelio), ngem iti uneg pay laeng ti umuna a siglo. Idi maika-19 a siglo, inkagumaan dagiti kritiko ti Biblia nga ilibac a naisurat dayta sacbay ti a.d. 150, iti casta pinadasda a supiaten ti kinapudno a ni apostol Juan ti nagsurat. Indarum met dagiti kritiko nga iyanninawna ti Gnostico a pilosopia ket ngarud saan coma a naisurat sacbay a nagbalin a nakaro a pangta ti Gnosticismo iti pammati. (Ti Gnostisismo ket maysa a pilosopikal ken narelihionan a sistema babaen ti maysa a nagkauna a sekta a nangibagbaga a ti pannakaammo imbes a ti pammati ti tulbec ti pannakaisalacan.) Nabayagen a nasuppiat ti casta a naballikug a darum.
Maisupadi ketdi, panecnecan ti makinruar nga ebidensia ti kaadda ti maikapat nga evanghelio ken ti nangato a panagraem a dati a natengngel idi pay a.d. 115. Ti maysa a casta nga ebidensia ket dimteng babaen ti pannakatacuat iti bassit a pedaso ti papiro, nga addaan iti sumagmamano a versiculo ni Juan (capitulo 18, versiculo 31–33, 37, 38), a pagaammo cas ti Rylands Papyrus ken gagangay a naituding a cas P52, a napetsaan iti paleograpico c. a.d. 125. Daytoy a pirsay, a nasaracan idiay Egipto idi rugi ti maika-2 a siglo, ket maibilang a makita nga ebidensia iti nasapa ken nasacnap a pannakaiwaras ti maikapat nga evanghelio. Pasingkedan ti nalatac nga eskolar iti Baro a Tulag a ni Adolph Deissmann:
“Ti nakaad-adu a hipotesis maipapan iti naladaw a nagtaudan ti Evangelio segun ken Juan ket alisto a malaylay a cas cadagiti mula iti napudot a balay. Addaantayo iti papiro ti Rylands iti maysa a partikular a documentario a pammanecnec a ti Evangelio segun ken Juan ket saan laeng nga adda idi umuna a kagudua ti maika-2 a siglo, no di ket dagiti kopiana ket nakadanonen idiay Egipto. Ti nagtaudan ti Evangelio ket maisubli ngarud iti adayo a nasapsapa a panawen.”—Deutsche Allgemeine Zeitung, Dec. 3, 1935.
Saan laeng a nagservi ti insurat ni Juan iti espesipiko a panggep cadagiti nagkauna a Cristiano; nangiyeg dayta iti naespirituan a panangiwanwan, tulong, ken pammaregta cadagiti pasurot ni Cristo, iti sidong dagiti nadumaduma unay a kasasaad, iti panaglabas dagiti panawen.
Ti Apo “addaan iti lawag a baro cadatayo, ngem ketdi napateg a daan a lawag nga agsilnag manipud iti Sao ti kinapudno. Addaantayo laeng cadagiti silnag dagiti sinamar ti lawag nga umayto pay cadatayo. Saantayo nga us-usaren a naimbag ti lawag nga inted ti Apo cadatayo, iti casta mapaaytayo nga umawat iti ad-adu pay a lawag; saantayo a magna iti lawag a sigud a naibucboc cadatayo.
“Awaganmi ti bagbagimi a tattao a managtungpal iti bilin, ngem saanmi a maawatan ti nakaro a kalawa dagiti adayo ti saklawenna a prinsipio ti linteg ti Dios; saantayo a maawatan ti sagrado a kababalinna. Adu dagiti agcuncuna a manursuroda iti kinapudno, awanan iti pudno a kapanunotan no ania ti ar-aramidenda iti panangisuroda iti linteg ti Dios, gapu ta awananda iti sibibiag a pannakaammo ken ni Apo Jesu-Cristo.”—Selected Messages, bk. 1, pp. 401, 402.
Sapay coma ta ti agtultuloy a panagadal iti daytoy nga Evang elio tulongannatayo nga ad-adda a mangam-ammo ken Jesus!
Departamento ti Eskuwela Sabatina iti Conferencia General
