Domingo
30 Marzo
1. AMBISIOSO A REGTA
a. Kalpasan ti milagro dagiti tinapay, ania a kombiksion ti nangtagicua iti adu a tattao? Juan 6:14. Ania ti nagagar nga aramidenda? Juan 6:15 (umuna a paset).
“Iti intero nga aldaw pimmigsa ti kombiksion. Dayta a mangkorona nga aramid ket pammatalged a ti nabayagen a sapsapulen a Manangisalacan addan cadacuada . Ti namnama dagiti umili ad-adda a ngumatngato. Daytoy ti mamagbalin iti Judea a naindagaan a paraiso, daga nga agay-ayus iti gatas ken diro. KabaelanNa a penneken ti tunggal tarigagay. MabalinNa a dadaelen ti pannacabalin dagiti Romano a kagurgurada. MabalinNa nga ispalen ti Juda ken Jerusalem. MabalinNa nga agasan dagiti soldado a nasugatan iti gubat. MabalinNa nga ipaayan ti taraon dagiti sibubukel a buyot. MabalinNa a parmeken dagiti nacion, ken ited iti Israel ti nabayagen a sapsapulen a turay.
“Iti kinagagarda, nakasagana dagiti tattao a mangkorona Kencuana nga ari. Makitada nga awan ti panagreggetNa a mangallucoy iti imatang wenno gun-oden iti dayaw iti Bagina. Iti daytoy Isu a kangrunaanna a naiduma cadagiti papadi ken agtuturay, ket mabutengda a saanNa pulos idagadag ti mangtonton iti trono ni David. Nagtitinongda a sangsangkamaysa, umanamongda nga alaenda Isuna babaen ti puersa, ket iwaragawag Isuna nga ari ti Israel. Dagiti adalan nakikaysa iti bunggoy iti panangipacdaarda iti trono ni David cas nainkalintegan a tawid ti Apoda. Ti kinaemma ni Cristo, kunada, ti makagapu Kencuana a mangkedked iti casta a dayaw. Itan-oc coma dagiti tattao ti Manangisalacanda. Mapilitan coma dagiti natangsit a papadi ken agtuturay a mangdayaw Kencuana nga umay a nacawesan iti turay ti Dios.”—The Desire of Ages, pp. 377, 378.
Lunes
31 Marzo
2. PANANGKALMA ITI SAAN A NAIBAGNUS A REGTA
a. Ania ti inaramid ni Jesus tapno malapdan ti bunggoy ken dagiti adalan a mangipatungpal cadagiti planoda a mangisaad Kencuana iti naindagaan a trono? Juan 6:15.
“Sigagagar nga inurnos [dagiti adalan ken ti bunggoy] ti pannakaisayangcat iti panggepda; ngem makita ni Jesus no ania ti magmagna, ket maawatanNa, cas iti dida pannakaawat, no ania ti resulta ti casta a tignay. Uray ita, an-anupen dagiti papadi ken agtuturay ti biagNa. Pabasolenda Isuna a mangiyadayo cadagiti tattao cadacuada. Kinaranggas ken panagalsa ti sumaruno iti panangikagumaanda a mangisaad Kencuana iti trono, ket malapdanto ti trabaho ti naespirituan a pagarian. Awan tactac a kasapulan a mapasardeng ti tignay. InayabanNa dagiti adalanNa, Imbilin ni Jesus cadacuada nga alaenda ti bangka ket agsublida a dagus idiay Capernaum, a panawanda Isuna a mangpapanaw cadagiti tattao.
“Pulos nga awan idi ti bilin manipud ken Cristo ti casla imposible unay a matungpal. Nabayagen a ninamnama dagiti adalan ti maysa a nalatac a tignay a mangisaad ken Jesus iti trono; dida maibturan ti kapanunotan nga amin daytoy a kinagagar ket agbanag nga awan maayna. Madanagan dagiti bunggoy nga agtataripnong a mangrambac iti Pascua a makakita iti baro a mammadto. Cadagiti pasurotNa casla daytoy ti nabalitocan a gundaway a mangipasdec iti dungdungngenda nga Apo iti trono ti Israel. Iti silnag daytoy baro nga ambision narigat para cadacuada ti pumanaw a bucbuc odda, ken baybay-anda ni Jesus nga agmaymaysa iti dayta a langalang nga aplaya. Nagprotestada maibusor iti urnos; ngem nagsao itan ni Jesus a buyogen ti turay a dina pay pulos impaay cadacuada. Ammoda nga awan serbina ti ibubusorda, ket siuulimecda a nagturong iti baybay.”—The Desire of Ages, p. 378.
b. Iti aldaw calpasan ti milagro, ania ti inaramid dagiti adu a tattao? Juan 6:22–25.
“Naipadamag ti milagro dagiti tinapay iti adayo ken asideg, ket iti nasapa unay iti sumaruno a bigat, nagdudupudop dagiti tattao idiay Betsaida tapno kitaenda ni Jesus. Adu ti immay, babaen ti daga ken baybay. Dagidiay nangpanaw Kencuana iti napalabas a rabii nagsublida, a mangnamnama a masarakanda nga adda pay sadiay; ta awan idi ti bangka tapno mabalinNa ti bumallasiw. Ngem awan bunga ti panagbirocda, ket adu ti nagturong idiay Capernaum, a mangsapsapul pay laeng Kencuana.
“Kabayatanna simmangpet Isuna idiay Genesaret, calpasan ti kaawan iti maysa laeng nga aldaw. Apaman a naammuan nga Isu ket nakasanglad, dagiti tattao 'idi nga napagpagnada iti amin daydiay a daga rinugianda nga innala a silalangcapi dagiti masacsakit ket ipanda ida iti amin a disso, a pacangngeganda nga ayanna.' Marcos 6:55.”—Ibid., pp. 383, 384.
Martes
1 Abril
3. NAIM-IMBAG A PANGGEP, NADIOSAN A TULONG
a. Ania a prangka ngem sipapanunot a mensahe ti inted ni Jesus cadagiti adu a tattao? Juan 6:26, 27.
“Saan a pinennec ni Jesus ti kinausiusoda. SililidayNa a kinuna, ‘Sapulendac, saan a gapu ta nakitayo dagiti milagro, no di ket gapu ta nangancayo cadagiti tinapay, ket nabsogcayo.’ Saanda a sinapul Isuna gapu iti aniaman a maikari a motibo; ngem bayat a mataraonanda cadagiti tinapay, ninamnamada pay laeng nga umawatda iti temporario a pagimbagan babaen ti idedecketda Kencuana. Binilin ida ti Mangisalacan, ‘Saancayo nga agtrabaho gapu iti taraon a madadael, no di ket gapu iti taraon nga agtalinaed agingga iti biag nga agnanayon.’ Saanyo a sapulen laeng ti material a pagimbagan. Saanyo coma nga ikagumaan a nangnangruna ti maipaay iti para iti biag nga adda ita, no di ket sapulen ti naespirituan a taraon, uray daydi sirib nga agtalinaed agingga iti biag nga agnanayon.”—The Desire of Ages, p. 384.
b. Ania a saludsod ti dinamag dagiti Judio ken Jesus maipapan cadagiti trabaho ti Dios? Juan 6:28. Ilawlawag ti sungbat nga inted ti Apo. Juan 6:29.
“Iti dayta a canito nariing ti interes dagiti agdengdengngeg. Impuckawda, ‘Ania ti aramidentayo, tapno maaramidtayo dagiti trabaho ti Dios?’ Adu ken makapadagsen nga aramid ti ar-aramidenda tapno mairekomendada dagiti bagbagida iti Dios; ket nakasaganada a dumngeg iti aniaman a baro a obserbasyon a babaen iti dayta ket masiguradoda ti dacdackel a merito. Ti kayat a saoen ti saludsodda, Ania ti aramidentayo tapno maikaritayo iti langit? Ania ti gatad a masapul a bayadantayo tapno magun-odtayo ti biag nga umay?
“‘Simmungbat ni Jesus ket kinunana cadacuada, Daytoy ti aramid ti Dios, a mamaticayo Kencuana nga imbaonNa.’ Ti gatad ti langit ket ni Jesus. Ti dalan nga agturong idiay langit ket babaen iti pammati iti ‘Cordero ti Dios, a mangiccat iti basol ti lubong.’ John 1:29.”—Ibid., p. 385.
“Ti panagbabawi ket panagbaw-ing manipud iti bagi nga agturong ken Cristo; ket inton awatentayo ni Cristo babaen iti pammati mabalinNa a pagbiagan iti biagNa cadatayo, maiparangarangto dagiti naimbag nga aramid.”—Thoughts From the Mount of Blessing, p. 87.
“Tulongan coma ti Apo dagiti tattaoNa a mangamiris nga adda napasnec a trabaho a maaramid. . . . Iti pagtaengan, iti iglesia, ken iti lubong masapul nga aramidenda dagiti trabaho ni Cristo. Saanda a mabaybay-an nga agtrabaho nga agmaymaysa. Dagiti angel ti katulonganda. Ket ni Cristo ti katulonganda.”—Testimonies for the Church, vol. 8, p. 18.
Mierkules
2 Abril
4. TI TINAPAY TI LANGIT
a. Ania a tanda ti kayat dagiti Judio ken ania a kinapudno iti pakasaritaan ti dinakamatda? Juan 6:30, 31. Kasano a sinao ni Jesus ti tinapay manipud langit? Juan 6:32, 33.
“Pinadayawan dagiti Judio ni Moises cas nangipaay iti manna, nga impaayda ti pammadayaw iti instrumento, ken napukawda ti imatangda Kencuana a nangibanag ti trabaho. Dagiti ammada nagtanabutobda iti maibusor ken Moises, ket nagduaduaan ken inlibacda ti nadiosan a misionna. Ita iti isu met la nga espiritu nga inlacsid dagiti annac ti Maysa a nangawit iti mensahe ti Dios a maiturong cadacuada. Ni Jesus ngarud kinunana cadacuada: Pudno, pudno, cunac cadacayo; Saan a ni Moises ti nangted cadacayo ti tinapay a nailangitan;' Ti nangted iti mana ket agtactacder iti tengngada. Ni Cristo a Mismo ti nangidaulo cadagiti Hebreo iti let-ang, ken inaldaw a nangpakan cadacuada iti tinapay manipud langit. Dayta a taraon ket maysa a kita ti pudno a tinapay manipud langit. Ti mangted-biag nga Espiritu, nga agayus manipud iti awan patinggana a kinaan-anay ti Dios, isu ti pudno a mana.”—The Desire of Ages, pp. 385, 386.
b. Gapu ta naipamaysa laeng ti panunotda iti natural, pisikal a tinapay, ania ti kiniddawda—ken ania ti inlawlawag ti Apo? Juan 6:34–36.
“Ti pigura nga inusar ni Cristo ket pamiliar cadagiti Judio. Ni Moises, babaen ti paltiing ti Espiritu Santo, kinunana, ‘Saan laeng a ti tinapay ti pagbiagto ti tao, no di ket ti isu-amin a sao a rummuar iti ngiwat ti Dios.’ Ket insurat ni mammadto Jeremias, 'Dagiti saom nasaracanda, ket kinnanco ida; ket dagiti saom nagbalinda caniac a ragsac ken rag-o ti pusoc’ Deuteronomio 8:3; Jeremias 15:16. Adda pagsasao a mismo dagiti manursuro, a ti pannangan iti tinapay, iti naespirituan a kaipapanan dayta, isu ti panagadal iti linteg ken panangaramid cadagiti naimbag nga aramid; ket masansan a naikuna nga inton iyaay ti Mesias mapakanto ti amin nga Israel. Ti pannursuro dagiti propeta ti nangilawlawag iti nauneg a naespirituan a leksion iti milagro dagiti tinapay. Daytoy nga adal ket sapsapulen ni Cristo nga ilucat cadagiti agdengdengngeg Kencuana iti sinagoga. No naawatanda coma dagiti Sursurat, naawatanda coma dagiti sasaoNa idi kinunaNa, ‘Siac ti tinapay ti biag.’ Iti laeng aldaw sacbayna, ti dackel a bunggoy, idi nabannog ken nagkapsot, ket nataraonanda babaen ti tinapay nga intedNa. Cas iti dayta a tinapay nakaawatda iti pisikal a pigsa ken pannakabang-ar, casta met manipud ken Cristo mabalin nga umawatda iti naespirituan a pigsa nga agturong iti biag nga agnanayon.”—Ibid., p. 386.
Hueves
3 Abril
5. PANAGUNGAR KEN BIAG NGA AGNANAYON
a. Ania dagiti dua a nasinged nga agkakanaig a kari a naited cadagidiay mangikadua iti bagbagida ken Cristo —ket kasano a mangyeg daytoy iti namnama iti tunggal managbasol? Juan 6:37–40.
“Amin nga umawat Kencuana a sipapammati, kuna ni Jesus, maaddaan iti biag nga agnanayon. Awan ti maysa a mapucaw.”—The Desire of Ages, p. 387.
“Saanca a dumngeg iti singasing ti cabusor nga umadayo ken Cristo agingga a mapasayaatmo ta bagim; agingga a nasayaatcan a sumaclang iti Dios. No agurayca iti dayta, dika pulos makaapan. No itudo ni Satanas dagiti narugit a cawesmo, ulitem ti kari ni Jesus, ‘Daydiay umay Caniac diacto pagtalawen.’ Juan 6:37. Ibagam iti cabusor a ti dara ni Jesu-Cristo dalusanNa ti amin a basol. Pagbalinem a cucuam ti cararag ni David, ‘Dalusannac babaen iti hisopo, ket dumalusacto, buggoannac, ket napudpudawacto ngem nieve.’ Salmo 51:7 .
“Tumakderca ket mapanca ken Amam. Sabatennaca uray adayoca pay. No aramidem uray maysa laeng nga addang nga agturong Kencuana iti panagbabawi, agdardaras Isuna a mangaracup kenca cadagiti taciagNa ti awan patinggana nga ayat. Silulucat ti lapayagNa iti ikkis ti agbabawi a cararua. Ti umuna unay a panangidanon iti puso iti Dios ket ammoNan. Ni caanoman awan ti cararag a naidaton, nupay agpigerger, awan nagarubos a lua, uray kasano kinalimed, awan ti sincero panagtarigagay iti Dios ti naipateg, nupay nakapuy, ngem ti Espiritu ti Dios rumuar tapno sabtenna dayta. Uray sacbay pay a maisao ti cararag wenno maipakaammo ti panagtarigagay ti puso, rummuar ti parabur manipud ken Cristo tapno sabtenna ti parabur nga agtrabtrabaho iti cararua ti tao.”—Christ’s Object Lessons, pp. 205, 206.
b. Ania ti intanabutob dagiti saan a mamati a Judio ken ania a kari ti inulit ni Jesus cadagidiay mamati Kencuana? Juan 6:41–51.
Viernes
4 Abril
PERSONAL A PANGREPASO A SALSALUDSOD
1. Calpasan ti milagro ti tinapay, ania ti plano nga aramiden dagiti pasurot ni Cristo?
2. Iladawan ti kangrunaan nga interes dagiti adu a tattao a sumursurot ken Jesus.
3. Ilawlawag dagiti sao ni Jesus iti Juan 6:29.
4. Ania nga ilustrasion ti inusar ni Cristo tapno mailadawan ti pagtaudan ti naespirituan a biag?
5. Kasano nga impanayag dagiti panguloen dagiti Judio ti madi a panagipatoda busor ken Cristo?