Domingo
22 Hunio
1. JESUS IDIAY BETANIA
a. Apaman a nangngegna nga umay ni Jesus idiay Betania, ania ti inaramid ni Marta ken ania ti inyebcasna a natibker a patienna? Juan 11:20–22.
“Cadagiti agladladingit a gagayyem ket cacabagian ti pamilia, a dadduma cadacuada ti addaan iti nangato a saad ti pagrebbengan idiay Jerusalem. Karaman dagitoy ti sumagmamano cadagiti kakaroan a cabusor ni Cristo. Ammo ni Cristo dagiti panggepda, gapuna a saanNa a dagus nga impakaammo ti Bagina. Naited ti mensahe ken ni Marta a siuulimec unay isu a saan a nangngeg dagiti dadduma iti siled. . . .
“Nagdardaras ni Marta a nangsabat ken Jesus, naririboc ti pusona gapu cadagiti agsusupadi a ricna. Iti mangipapaawat a rupaNa nabasana ti isu met laeng a kinadungngo ken ayat a kanayon nga adda sadiay. Saan a nadadael ti panagtalecna Kencuana, ngem napanunotna ti ay-ayatenna unay a cabsatna, a dungdungoen ni Jesus. Iti nakaro a leddaang iti pusona gapu ta saan dimteng ni Cristo idi, nupay casta, adda namnamana nga uray ita, adda aramidenNa a mangliwliwa cadacuada, kinunana, 'Apo, no addaca coma ditoy idi, ni cabsatco saan coma a natay. Paulit-ulit iti tengnga ti arimbangaw dagiti agladladingit, inulit dagiti cacabsat a babbai dagitoy a sasao.
“Buyogen ti nataoan ken nadiosan a kaasi kimmita ni Jesus iti agledleddaang, masecnan a rupana. Awan ti panagduyos ni Marta a mangisalaysay iti napalabas; Amin ket nayebkas babaen cagiti nakakaasi a sasao, ‘Apo, no addaca coma ditoy idi, ni cabsatco saan coma a natay.' ngem iti panangkitana iti dayta a rupa ni ayat innayonna, 'ammoc a ti aniaman a dawatem iti Dios, ti Dios itednanto kenca.'”—The Desire of Ages, pp. 529, 530.
Lunes
23 Hunio
2. TI KAUDIAN A KARI TI NAMNAMA
a. Ania ti impasigurado ni Jesus ken ni Marta? Juan 11:23. Ania ti naawatanna iti daytoy? Juan 11:24.
“Pinaregta ni Jesus ti pammatina, a cuncunaNa, ‘Agungarto ni cabsatmo.’ Ti sungbatNa ket saan a nairanta a mangparegta iti namnama a dagus a panagbalbaliw. Insangbayna dagiti kapanunotan ni Marta iti labes ti agdama a pannakaisubli ti cabsatna, ket iyurnosna ida iti panagungar dagiti nalinteg. InaramidNa daytoy tapno makitana iti panagungar ni Lazaro a maysa a kari ti panagungar dagiti amin a nalinteg a natay, ken maysa a pammatalged a maibanagto dayta babaen ti pannacabalin ti Mangisalacan.
“Insungbat ni Marta, ‘Ammoc nga agungarto inton panagungar iti camaudianan nga aldaw.' ”—The Desire of Ages, p. 530.
b. Babaen ti ania a sasao a binigbig ni Jesus ti panamati ni Marta? Juan 11:25; 1 Juan 5:12.
“Ikagkagumaan pay nga ipaay ti pudno a direksion iti pammatina, impacdaar ni Jesus, ‘Siac ti panagungar, ken ti biag.’ Ken ni Cristo ket biag, orihinal, saan a nabulod, awan nagtaudanna. ‘Ti agicut iti Anac, adda biagna.’ 1 Juan 5:12. Ti kinadios ni Cristo isu ti pammatalged ti namati iti biag nga agnanayon.”—Ibid.
k. Ania a kari ti nakaibatayan ti namnamatayo iti labes ti tanem? Juan 5:26 (umuna a paset). Kasano a ti kombiksion ni Marta ket nainaig iti milagro ni Cristo? Juan 11:26, 27.
“Kumitkita ni Cristo ditoy iti tiempo ti maikadua nga iyaayNa. Iti casta dagiti nalinteg a natay mapagungardanto a di agrupsa, ket dagiti sibibiag a nalinteg ket agpalangitdanto a saanda a makita ti ipapatay. Ti milagro a dandanin aramiden ni Cristo, iti panangpagungarNa ken Lazaro manipud cadagiti natay, irepresentarna ti panagungar dagiti amin a nalinteg a natay. Babaen ti saoNa ken dagiti aramidNa impacdaarNa ti Bagina a Namunganay ti panagungar. Isuna a mismo iti mabiit matay iti cruz nagtacder nga addaan cadagiti tulbec ni patay, maysa a nangparmec iti tanem, ket pinasingkedanNa ti kalintegan ken pannacabalinNa a mangted iti biag nga agnanayon.”—Ibid.
Martes
24 Hunio
3. NAGSANGIT NI JESUS
a. Iladawan dagiti tignay ken sasao ni Maria a casta unay leddaangna. Juan 11:28–32.
b. Idi nakita ni Jesus ni Maria ken ti sumagmamano cadagiti Judio nga agsangsangit, ania ti inaramid ni Jesus—ken apay? Juan 11:33–35.
“‘Idi nakita ngarud ni Jesus nga isu agsangsangit, ken agsangsangit met dagiti Judio a nanguyog kencuana, nagladingit iti nakemna ket nagsennaay.’ MabasaNa ti puso ti amin a naguummong. NakitaNa a gapu iti adu, ti naglabas cas demostrasion ti ladingit ket pammarang laeng. AmmoNa a ti dadduma iti ummong, nga itan ket mangiparangarang iti managincucuna a ladingit, ti mangiplano iti ipapatay, saan laeng a ti mannacabalin nga agar-aramid iti milagro, no di ti maysa a mapagungar manipud ken patay. Mabalin coma nga uksoben ni Cristo cadacuada ti bado ti pammarang a ladingit. Ngem linapdanNa ti nalinteg a pungtotNa. Dagiti sasao nga iti amin a kinapudno mabalinNa nga isao, saanNan nga insao, gapu iti maysa nga ay-ayatenNa a nakaparintumeng iti sacaananNa nga agladladingit, ken pudno a mamati Kencuana.
“‘Adino ti nangicabilanyo kencuana? dinamagNa. Cunada kencuana; Apo, umayca ket kitaem.’ Nagcucuyogda a nagturong iti tanem. Maysa a naladingit a buya. Adu ti agay-ayat ken ni Lazaro, ket nagsangit dagiti cacabsatna a babbai buyogen ti naburac a puso, idinto a dagiti gagayyemna nakipagsangsangitda cadagiti agledledaang a cacabsat. Iti buya daytoy nataoan a pagel, ken ti kinapudno a dagiti agsagsagaba a gagayyem agladingit cadagiti natay bayat a nagtacder ti Mangisalacan iti lubong—'nagsangit ni Jesus.' Nupay Isu ti Anac ti Dios, innalaNa Kencuana ti nataoan a galad, ket natignay iti nataoan a ladingit. Ti nadungngo, naasi a pusoNa ket kanayon a matignay a makisimpatia iti nataoan a panagsagaba. Makipagsangit cadagidiay agsangsangit, ken makipagrag-o cadagiti agrag-o.”—The Desire of Ages, p. 533.
k. Kasano a daytoy a canito iti biag ni Jesus agbalin a pagwadan cadatayo? Roma 12:15.
“Ti nacascasdaaw nga ehemplo ni Cristo, ti awan kaaspingna a kinadungngo nga isu ti simrecanNa a makipagricna iti sabali, makipagsangit cadacuada nga agsangit, a makipagrag-o cadacuada nga nagrag-o, masapul nga addaan iti nauneg nga impluensia iti kababalin ti amin a sumurot Kencuana iti kinapasnec. Babaen cadagiti naasi a sasao ken aramid pabalinendanto a naannayas dagiti dalan cadagiti nabannog a saka.”—The Ministry of Healing, pp. 157, 158.
Mierkules
25 Hunio
4. PANAGTINNULONG TI DIOS KEN TI SANGATAON
a. Ania ti bilin nga inted ni Jesus cadagiti adda iti aglawlawNa? \<bible_source\>Juan 11:39\</bible_source\> (umuna a paset). Kasano a nagtignay ni Marta ken ania ti imbaga ni Jesus kencuana? Juan 11:39 (maudi a paset).
“Idi dandanin aramiden ti Apo ti maysa a trabaho, nagtignay ni Satanas iti maysa a tao tapno agkedked. ‘Iccatenyo iti bato,’ kinuna ni Cristo. Agingga a mabalin, isagana ti dalan para iti trabahoc. Ngem ti positibo ken ambisioso a kinatao ni Marta pinatalgedanna. Saanna a kayat a ti agruprupsa a bagi ket maisangbay iti buya. Ti nataoan a puso nabannayat a makaawat cadagiti sasao ni Cristo, ket ti pammati ni Marta saanna a nagammatan ti pudno a kaipapanan ti kariNa.
“Binabalaw ni Cristo ni Marta, ngem dagiti sasaoNa ket naisao a buyogen ti naan-anay a kinaalumamay. ‘Diac aya kinuna kenca, a no mamatica, makitam ti dayag ti Dios?’ Apay a rumbeng nga agduaduacayo maipapan iti pannacabalinCo? Apay nga agrason a maikontra cadagiti gutogutec? Adda kenca ti saoc. No mamatica, makitamto ti dayag ti Dios. Dagiti natural nga imposible saanda a malapdan ti trabaho ti Maysa a Mannacabalin-amin. Ti iskepticisimo ken kinaawan panamati ket saan a kinapakumbaba. Ti nalawag a panamati iti sao ni Cristo ket pudno a kinapakumbaba, pudno a panangisuco iti bagi.
“‘Iccatenyo ti bato.’ Mabalin coma a bilinen ni Cristo ti bato a maiccat, ket nagtulnog coma iti timecNa. MabalinNa coma a bilinen dagiti angel nga adda iti sibayNa a mangaramid iti daytoy. Iti panangbilinNa, dagiti saan a makita nga ima ti nangiccat coma iti bato. Ngem masapul nga iccaten dayta dagiti ima ti tao. Casta nga ipakita ni Cristo a ti sangataoan ket makitinnulong iti nadiosan. Ti mabalin nga aramiden ti nataoan a pannacabalin saanen nga ayaban ti nadioasan a pannacabalin a mangaramid. Saan a sayangen ti Dios ti tulong ti tao. PatibkerenNa isuna, a makitinnulong kencuana bayat nga us-usarenna dagiti pannacabalin ken kabaelan a naited kencuana.”—The Desire of Ages, p. 535.
b. Ania dagiti sasao ni Cristo ti siaannad a mangtubngar iti saantayo a panamati ita? Juan 11:40.
“Adu ti awanan iti sibibiag a pammati. Daytoy ti gapuna a dida makita ti ad-adu pay a pannacabalin ti Dios. Ti kinakapuyda ket resulta ti saanda a panamati. . . . Agplano ken agparnuayda, ngem bassit laeng ti panagcararagda, ken bassit laeng ti pudno a panagtalecda iti Dios. Ipagarupda nga addaanda iti pammati, ngem rugso laeng iti dayta a canito. Iti saanda a pannakaamiris iti bukodda a panagkasapulan, wenno ti kinatuloc ti Dios a mangted, saanda nga impinget ti mangitultuloy iti kiddawda iti sangoanan ti Apo.”—Christ’s Object Lessons, pp. 145, 146.
Hueves
26 Hunio
5. PINAGUNGAR NI JESUS NI LAZARO
a. Ania ti cararag nga indaton ni Jesus iti sibay ti tanem? Juan 11:41, 42.
“Ti bilin natungpal. Naitulid ti bato. Amin ket maaramid a sipapanayag ken sitatallugod. Amin ket maikkan iti gundaway a makakita nga awan ti allilaw a naaramid. Nakaidda sadiay ti bagi ni Lazaro iti nabato a tanemna, nalamiis ken naulimec iti ipapatay. Nagtalna dagiti ikkis dagiti agladladingit. Nasdaaw ken mangnamnama, nagtacder ti bunggoy iti aglawlaw ti tanem, nga agur-uray a mangkita no ania ti sumaruno . . . .
“Adtoy ni Cristo mangibagbaga nga AmaNa ti Dios, ket buyogen ti naan-anay a panagtalec impacdaarNa nga Isu ti anac ti Dios.”—The Desire of Ages, pp. 535, 536.
b. Cadagiti ania a sasao a pinagungar ni Jesus ni Lazaro? Juan 11:43. Ania ti napasamac nga insegida? Juan 11:44.
“Ti timec [ni Christ], nalawag ken sumarsarut, ket sumalpot iti lapayag dagiti natay. Bayat ti panagsaoNa, nagandap ti kinadios babaen ti sangataoan. Iti rupaNa, a naraniagan babaen ti dayag ti Dios, nakita dagiti tattao ti pammatalged ti pannakabalinNa. Tunggal mata nakaturong iti pagsercan ti cueba. Tunggal lapayag agur-uray a mangammat iti kabassitan nga uni. Buyogen ti nakaro ken nasaem nga interes naguray ti amin para iti pannakasuboc ti kinadios ni Cristo, ti ebidensia a mangpanecnec iti panangtontonNa nga isu ti Anac ti Dios, wenno tapno maiddep ti namnama iti agnanayon.
“Adda naggaraw iti naulimec a tanem, ket ti natay ti nagtacder iti ruangan ti tanem. . . . Ti sangataoan agtrabaho para iti sangataoan. Nawayawayaan ni Lazaro, ket agtactacder iti sangoanan ti bunggoy, saan a cas maysa nga addaan nakapoy, matumtumba a saka, no di ket cas maysa a tao iti kangitingitan ti biag, ken iti pigsa ti natan-oc a kinalalaki. Dagiti matana agrimat iti kinasaririt ken panagayat para iti Mangisalacanna. Impadsona ti bagina iti panagdayaw iti sacaanan ni Jesus.”—Ibid., p. 536.
Viernes
27 Hunio
PERSONAL A PANGREPASO A SALSALUDSOD
1. Iladawan ti panagtalec dagiti cacabsat ni Lazaro a babai ken ni Jesus.
2. Ania ti inkari ni Jesus cada Marta, Maria ken cadagiti amin a mamati?
3. Apay a nagsangit ni Jesus?
4. Kasano a makitinnunlong ti sangataoan iti nadiosan iti daytoy a milagro?
5. Iladawan dagiti tignay ni Lazaro iti awag ni Jesus.