Domingo
6 Abril
1. TI BIAG ITI LASAG KEN DARA NI CRISTO
a. Ania ti epekto dagiti sasao ni Cristo cadagiti lider ti relihion? Juan 6:52. Ania ti inlawlawagNa maipapan iti lasagNa ken ti daraNa? Juan 6:53–55.
“Ita, sipupungtot nga impuccaw dagiti rabi, ‘Casano ti pannacabalin daytoy a tao a mangted cadatayo ti lasagna a canen?’ Naapektaranda a mangtarus cadagiti sasaoNa iti isu met la a literal a kaipapanan a cas iti inaramid ni Nicodemo idi insaludsodna, ‘Casano ti pannacabalin ti tao a mayanac idinto a lacayen?’ Juan 3:4. Iti sumagmamano a rucod naawatanda ti kaipapanan ni Jesus, ngem saanda a situtuloc a mangbigbig iti dayta. Babaen ti di umiso a panangtarusda cadagiti sasaoNa, ninamnamada nga agmadi ti panangipapan dagiti tattao maibusor Kencuana.”—The Desire of Ages, p. 389.
b. Ania ti talaga a kaipapanan ti pannangan iti lasag ken panaginum iti dara ti Anac ti Dios? Juan 6:56, 57; 1 Juan 3:24; 5:12.
“Ti pannangan iti lasag ken pananginum iti dara ni Cristo ket panangawat Kencuana cas personal a Mangisalacan, a mamati a pakawanenNa dagiti basoltayo, ken casta met a kompletotayo Kencuana. Babaen ti panangimutectec iti ayatNa, babaen ti panangamiris iti dayta, babaen ti panaginum iti dayta, nga agbalintayo a makiraman iti galadNa. No ania ti taraon iti bagi, masapul a casta met ni Cristo iti cararua.”—Ibid., p. 389.
Lunes
7 Abril
2. TI SAO TI DIOS
a. Iti ania a nayon a panangilawlawag a pinagbalin ni Jesus a nalawag unay ti kaipapanan dagiti sasaoNa? Juan 6:63.
“Saannatayo a magunggonaan ti taraon no saantayo a kanen dayta, ken agbalin a paset ti kinataotayo. Ngarud awan ti pateg ni Cristo cadatayo no ditay am-ammo Isuna cas personal a Mangisalacan. Awan ti maitulongna cadatayo ti teoretikal a pannakaammo. Masapul nga agtaraontayo Kencuana, awaten Isuna iti puso, tapno ti biagNa agbalin a biagtayo. Ti ayatNa, ti paraburNa, masapul a masagepsep.”—The Desire of Ages, p. 389.
“Ti biag ni Cristo a mangted biag iti lubong ket adda iti saoNa. Babaen iti saoNa a pinaimbag ni Jesus ti sakit ken pinaruarNa dagiti demonio; babaen ti saoNa pinagtalnaNa ti baybay, ken pinagungarNa ti natay; ket pinanecnecan dagiti tattao a ti saoNa ket addaan iti pannacabalin. InsaoNa ti sao ti Dios, cas iti panagsaoNa babaen cadagiti amin a propeta ken mannursuro iti Daan a Tulag. Ti sibubukel a Biblia ket maysa a pannakaiparangarang ni Cristo, ket tinarigagayan ti Mangisalacan nga ilinteg ti pammati dagiti pasurotNa iti sao. Inton maiccat ti makita a presenciaNa, ti sao ti gubuayan ti pannacabalinda. Cas iti Apoda, masapul nga agbiagda ‘babaen iti isu-amin a sao a rummuar iti ngiwat ti Dios.’ Mateo 4:4.
“Cas iti pisikal a biagtayo a masustiner babaen iti taraon, casta met a ti naespirituan a biagtayo ket masustiner babaen iti sao ti Dios. Ket tunggal cararua umawat iti biag manipud iti sao ti Dios para iti bagina. Cas masapul a mangantayo para iti bagitayo tapno makaawattayo iti taraon, casta met a masapul nga awatentayo ti sao para iti bagitayo. Saantayo a magun-od dayta babaen laeng iti panunot ti sabali. Rumbeng a siaannadtayo nga adalen ti Biblia, a dawaten iti Dios ti tulong ti Espiritu Santo, tapno maawatantayo ti saoNa. Rumbeng nga alaentayo ti maysa a versiculo, ket ipamaysatayo ti panunot a mangutob iti kapanunotan nga inkabil ti Dios iti dayta a versiculo para cadatayo. Rumbeng nga anagentayo ti kapanunotan agingga nga agbalin a cucuatayo, ket ammotayo ‘no ania ti cuna ti Apo.’ ”—Ibid., p. 390.
b. Kasano ti panangiladawan ni propeta Jeremias iti daytoy a kapadasan? Jeremias 15:16.
“No alaentayo ti Dios iti saoNa, makitatayo ti pannakaisalacanNa. . . . Masapul nga awatentayo ti sao ti Dios. Masapul a kanentayo ti sao, pagbiagan ti sao; isu ti lasag ken dara ti Anac ti Dios. Masapul a kanentayo ti lasagNa ken inumentayo ti daraNa—awaten babaen ti pammati dagiti naespirituan a galadNa.”—Testimonies for the Church, vol. 6, pp. 51, 52.
Martes
8 Abril
3. KRISIS ITI UBING NGA IGLESIA
a. Ania a krisis ti pinarnuay dagiti sasao ni Cristo cadagiti bukodNa nga adalan—ken kasano a ballaag daytoy para cadatayo ita? Juan 6:60, 61, 65, 66.
“Naindaclan unay ti pannuboc. Lumamlamiis ti kinagagar dagidiay nangikagumaan a mangala Kencuana babaen ti puersa ken pagbalinen Isuna nga ari. Daytoy a diskurso iti sinagoga, indeclarada, isu ti nanglucat cadagiti matada. Ita, saandan a naallilaw. Iti panunotda dagiti sasaoNa ket direkta a panangipudno a saan nga Isu ti Mesias, ken awan ti naindagaan a gunggona a matungpal babaen iti pannakaisilpo Kencuana. Inawatda ti pannacabalinNa nga agaramid iti milagro; magagaranda a mawayawayaan manipud iti sakit ken panagsagaba; ngem saanda a makipagrikna iti panangisacrificioNa iti bagiNa. Saanda a maseknan iti misterioso a naespirituan a pagarian a sinaoNa. Dagiti saan a sinsero, managimbubucod, a nangsapsapul Kencuana, saandan a tarigagayan Isuna. No saanNa nga isangrat ti pannacabalinNa ken impluensiaNa iti pananggun-od iti wayawayada manipud cadagiti Romano, awan ti pakainaiganda Kencuana.
“Babaen cadagiti sasao ti kinapudno, maisina ti taep manipud iti trigo. Gapu ta awan unay ti maayda ken nalintegda iti bagida a di makaawat iti pannubngar, managayat unay iti lubong tapno umawat iti biag a napakumbaba, adu ti timmallikud ken Jesus. Adu pay laeng ti agar-aramid iti isu met laeng a banag. Masuot ita dagiti cararua a cas met laeng cadagidi adalan iti sinagoga idiay Capernaum. No maiyeg ti kinapudno iti pagtaengan iti puso, makitada a saan a maitunos ti biagda iti pagayatan ti Dios. Makitada a masapul iti intero a panagbalbaliw iti bagbagida; ngem saanda a situtuloc a mangala iti trabaho a mangilibac iti bagida. Ngarud makapungtotda no matakuatan dagiti basolda. Pumanawda a nasakit ti nakemda, cas met ti panangpanaw dagiti adalan ken Jesus, nga agtanabutob, ‘Narigat daytoy a sao; siasino ti makangngeg?’”—The Desire of Ages, pp. 391–392.
b. Calpasan a pinanawan dagidiay nga adalan Isuna, ania ti dinamag ni Cristo cadagiti sangapulo ket dua? Juan 6:67. Kasano nga iyallangogantayo ita ti nainsiriban a sungbat ni Pedro? Juan 6:68, 69.
“Babaen iti nasayaat ken dakes a padamag, babaen iti sipnget, babaen iti amin a panagbubusor dagiti ahensia ni Satanas, sitatalna nga agsilnag ti Init ti Kinalinteg, a mangsapsapul a mangpacsiat iti dakes, manglapped iti basol, ken mangpabiag manen iti espiritu dagiti napakumbaba ken agbabawi. ‘Apo, siasino ti papananmi? Adda Kenca dagiti sasao ti biag nga agnanayon.’"—Testimonies to Ministers and Gospel Workers, p. 285.
Mierkules
9 Abril
4. MANIPUD CADAGITI ADALAN AGINGGA ITI NAPASINGKEDAN A CABUSOR
a. Ania ti maibagatayo a pangkaaduan maipapan cadagidiay tumallicod ken Cristo? 1 Juan 2:19. Ania a makapaupay a saad ti inaramid dagiti saan a napnec nga adalan?
“Bayat ti panangtallicod dagiti saan a napnec nga adalan ken Cristo, sabali nga espiritu ti nangtengngel cadacuada. Awan ti makitada a makaawis Kencuana a nasarakanda idi a makapainteres unay. Sinapulda dagiti cabusorNa, ta maitunosda iti espiritu ken trabahoda. Di umiso ti panangipatarusda cadagiti sasaoNa, pinalsipicadoda dagiti saritaNa, ken sinupiatda dagiti motiboNa. Tinaginayonda ti aramidda babaen iti panangurnongda iti tunggal banag a mabalinda a pangbusorda Kencuana; ket casta a gura ti napataud babaen cadagitoy ulbod a padamag a ti biagNa agpeggad.”—The Desire of Ages, pp. 392, 393.
b. Ania ti mapasamac cadagiti linalasag ti panunotna a dumdumngeg? Roma 16:17, 18.
“Makaay-ayo coma ti panangidayaw ken pasablog. . . . ngem saan a mapasangbay ti kinapudno; saanda a mangngeg dayta. No sumurot dagiti bunggoy, ken mataraonan dagiti adu a tattao, ken mangngeg dagiti dir-i ti balligi, napigsa ti timecda a mangidaydayaw; ngem no ipanayag ti mangsuksukimat nga Espiritu ti Dios a ti basolda, ket ibilinna a panawanda dayta, tallikudanda ti kinapudno, ket saandan a makipagna ken Jesus.”—Ibid., p. 392.
k. Malacsid cadagidiay nangpanaw ken Jesus, siasino pay ti nagbalin a nakikaysa cadagiti cabusorNa —ken kasano a naiparangarang daytoy saan a naimpusoan a panagtalec? Juan 6:70, 71.
“Ti panagsao ni Cristo idiay sinagoga maipapan iti tinapay ti biag ti nangbalbaliw iti pakasaritaan ni Judas. . . . Nakitana nga ididiaya ni Cristo ti naespirituan imbes a nailubongan nga imbag. Imbilangna ti bagina cas adayo ti panagkitana, ket impagarupna a makitana a ni Jesus awanan iti dayaw, ken awan ti maitedNa a nangato a saad cadagiti pasurotNa. InkeddengNa a saannan nga ikaysa unay ti bagina ken Cristo no di ket mabalinna ti umadayo. Makapagbantay isuna. Ket nagbantay a talaga.
“Manipud iti dayta a tiempo inyebcasna dagiti panagduadua a nangriro cadagiti adalan. Inserrecna dagiti kontrobersia ken makaallilaw a sentimiento, ulit-ulitenna dagiti argumento nga indagadag dagiti escriba ken Fariseo maibusor cadagiti ibagbaga ni Cristo. Amin dagiti babassit ken dadackel a ririboc ken cruz, dagiti rigat ken nalawag a lapped iti panagrang-ay ti evangelio, impatarus ni Judas cas pammanecnec a maibusor iti kinapudnona.”—Ibid., p. 719.
Hueves
10 Abril
5. PANANGILASIN ITI TRAIDOR
a. Iladawan ti galad nga inadaptar ni Judas. Juan 12:4–6; Proverbio 3:32.
“Iyammo [ni Judas] dagiti teksto ti Kasuratan nga awan pakainaiganna cadagiti kinapudno nga iparparang ni Cristo. Dagitoy a teksto, a naisina iti koneksionda, ti nangriro cadagiti adalan, ken nangpaadu iti pannakauppapay a kanayon a mangsapsaplit cadacuada. Ket amin dagitoy inaramid ni Judas iti wagas tapno agparang nga isuna ket napudno.”—The Desire of Ages, p. 719.
b. Ania a kari ti masansan a mapasingkedan iti narelihionan a kapadasantayo —uray cadagiti kaso a cas iti daytoy a krisis idiay Galilea? Roma 8:28.
“Idi indatag ni Jesus ti mangsuot a kinapudno a nakaigapuan ti panagsubli ti adu nga adalanNa, ammoNa no ania ti resulta dagiti sasaoNa; ngem adda panggep ti asi a tungpalenNa. Nasacsacbay a nakitaNa nga iti oras ti sulisog tunggal maysa cadagiti ay-ayatenNa nga adalan ket masuotda unay. Ti panagsagabaNa idiay Getsemani, ti pannakaliput ken pannakailansaNa, agbalinto cadacuada a makapatuoc unay a rigat. No awan coma ti dati a naited a pannuboc, adu coma dagiti natignay babaen laeng cadagiti naimbukodan a motibo a naiconecta cadacuada. Idi nasentensiaan ti Apoda iti pangocoman; idi a ti bunggoy a nangidaydayaw Kencuana cas arida inuyawda Isuna ken linaisda; idi impuckaw ti managuyaw a bunggoy, ‘Ilansayo Isuna!’ —idi nadismaya dagiti nailubongan nga ambisionda, dagitoy nga agsapsapul iti bagida, babaen ti panangtallicodda iti kinapudnoda ken Jesus, inyegda cadagiti adalan ti napait, makapadagsen iti puso a ladingit, mainayon iti leddaang ken pannakaupay iti pannakadadael dagiti kaay-ayoda a namnama. Iti dayta nga oras ti sipnget, ti ehemplo dagidiay timmallicodd Kencuana mabalin a nangikuyogda cadagiti dadduma. Ngem inyeg ni Jesus daytoy a krisis bayat ti personal a presenciaNa a mabalinNa pay a pabilgen ti pammati dagiti pudno a pasurotNa.”—Ibid., p. 394.
Viernes
11 Abril
PERSONAL A PANGREPASO A SALSALUDSOD
1. Kasano ti "pannangantayo iti lasag ti Anac ti tao, ken yiinum iti daraNa”?
2. Ania ti kaipapanan ti panangmingming ken Jesus?
3. Apay a sumagmamano ti masactan cadagiti sasao ni Cristo?
4. Ania ti inaramidda calpasanna—ken kasano a ballaag daytoy para cadatayo?
5. Iladawan ti naespirituan a kasasaad ni Judas calpasan daytoy ken ti epektona?