Domingo
8 Hunio
1. TI AGTATACAW KEN TI PASTOR
a. Kasano a pinagduma ni Jesus ti mannanacaw ken ti pastor, ken ania a naespirituan a leksion ti iladladawanNa? Juan 10:1, 2.
“Inyaplicar ni Cristo dagitoy a padto [mangdakamat iti mision ti Mesias cas pastor, cas masaracan iti Isaias 40:9–11; Salmo 23:1, ken Ezequiel 34:23, 16, 25, 28] iti Bagina, ImpakitaNa ti nagdumaan ti bucodNa a kababalin ken dagiti pangpangulo idiay Israel. Kapatpatalaw dagiti Fariseo ti maysa manipud iti arban, gapu ta saanna a kayat ti agsaksi iti pannacabalin ni Cristo. Insinada ti maysa a cararua a papaasitgen ti Pudno a Pastor iti Bagina. Iti daytoy impakitada ti bagbagida nga ignorante iti trabaho a naikumit cadacuada, ken ti saanda a pannakaikari iti naitalec cadacuada cas pastor ti arban. Insaad ita ni Jesus iti sangoananda ti pannakaidumada iti Naimbag a Pastor, ket intudoNa ti Bagina cas pudno nga agaywan iti arban ti Apo.”—The Desire of Ages, p. 477.
“Ay-ayatennanatayo ni Cristo gapu ta awan ti gawaytayo ken agpanpannuray.”—Sermons and Talks, vol. 1, p. 248.
b. Ania a relasion ti adda iti nagbaetan dagiti carnero ken ti pastorda? Juan 10:3, 4. Ania ti aramiden dagiti carnero iti sangoanan ti maysa a ganggannaet? Juan 10:5.
Lunes
9 Hunio
2. TI RUANGAN A SUMREC ITI ARBAN
a. Kasano nga impanayag ni Jesus ti bukodNa a pannakaiduma cadagiti Fariseo? Juan 10:7–10.
“Ni Cristo ti ruangan a sumrecan iti arban ti Dios. Babaen iti daytoy a ruangan amin nga annacNa, manipud iti kasapaan a panawen, nasarakanda ti sumrecan. Ken ni Jesus, cas naipakita cadagiti tipo, cas inyanninaw dagiti simbolo, cas naiparangarang iti panpanayag dagiti mammadto, cas imbucsilan dagiti leksion a naited cadagiti adalanNa, ken cadagiti milagro a naaramid para cadagiti annac dagiti tattao, nakitada ‘ti Cordero ti Dios, a mangiccat ti basol ti lubong’ (Juan 1:29), ken babaen Kencuana maiyegda iti uneg ti arban ti paraburNa. Adu ti immay a mangipresenta iti sabali a bambanag para iti pammati ti lubong; naparnuay dagiti ceremonia ken sistema a pangnamnamaan dagiti tattao a pakaawatanda iti pannakapalinteg ken pannakicappia iti Dios, iti casta masarakanda ti sumrecan iti arbanNa. Ngem ti kakaisuna a ruangan Isu ni Cristo, ken amin a bumallaet iti banag a mangsucat ken Cristo, amin a mangpadas a sumrec iti arban iti sabali a dalan, mannanacaw ken mannibrongda.
“Saan a simrec dagiti Fariseo iti ridaw. Kimmalay-atda iti arban babaen iti sabali a dalan a saan a ni Cristo, ken saanda a tungtungpalen ti trabaho ti pudno a pastor. Dagiti papadi ken agtuturay, dagiti escriba ken Fariseo, dinadaelda dagiti sibibiag a pagpaaraban, ken rinugitanda dagiti ubbog ti danum ti biag. Simamatalecda nga aramiden dagiti sasao ti inspirasion a nangiladawan iti palso a pastor: ‘Dagiti nacapuy saanyo a pinapigsa, ket dicayo met inagasan daydiay masakit, ket saanyo met a binedbedan daydiay nabungtol, dicayo met inyawid daydiay napapanaw, . . . ngem babaen ti panangipapilit ken panangparigat nagturaycayo cadacuada.’ Ezequiel 34:4.”—The Desire of Ages, pp. 477, 478.
b. Kasano a naiduma ti pudno a pastor iti mangmangged? Juan 10:11–13.
“Adda panagkasapulan, saan laeng a dagiti lallaki a maka-sermon, no di ket dagidiay addaan iti eksperimental a pannakaammo iti misterio ti kinadios, ken makapennec cadagiti naganat a kasapulan dagiti tattao—dagidiay makaamiris iti kinapateg ti tacderda cas adipen ni Jesus, ken siraragsac a mangawit iti cruz nga insuroNa cadacuada nga awitenda.
“Napateg unay a ti maysa a pastor ket makilangenlangen cadagiti tattaona, iti casta maam-ammona dagiti nagduduma a paset ti nataoan a galad. Rumbeng nga adalenna ti panagaannayas ti panunot, tapno maibagayna dagiti sursurona iti sirib dagiti dumdumngeg kencuana. Casta a maadalna ti engrande a kinamanangngaasi a tagicuaen laeng dagidiay mangad-adal a naimbag iti galad ken kasapulan dagiti tattao.”—Gospel Workers p. 191.
Martes
10 Hunio
3. TI TIPICAL A NAIMBAG A PASTOR
a. Ania ti sabali pay a kababalin ti naimbag a pastor ti imparangarang ni Jesus? Juan 10:14, 15.
“Cas iti pannakaammo ti maysa a naindagaan a pastor cadagiti carnerona, casta met nga ammo ti nadiosan a Pastor ti arbanNa a naiwaras iti intero a lubong. ‘Ket dacayo dagiti carneroc, dacayo carnero ti pagpaarabac tattaocayo, ket siac ti Diosyo, cuna ni Apo Jehova.’ Cuna ni Jesus, ‘Siac inayabanca nga innaganan, sica ti cucuac.’ ‘Adtoy, imburicca iti daculap dagiti im-imac.’ Ezequiel 34:31; Isaias 43:1; 49:16.
“Am-ammonatayo ni Jesus a saggaysa, ken nasagid iti rikna ti kinakapuy-tayo. Am-ammonatayo amin cadagiti nagnagantayo. AmmoNa ti mismo a balay a pagnanaedantayo, ti nagan ti tunggal agnanaed. Isuna pay no dadduma ti mangted iti direksion cadagiti adipenna tapno mapan iti maysa a kalsada iti maysa a ciudad, iti casta a balay, tapno birokenna ti maysa cadagiti carneroNa.
“Tunggal cararua ket naan-anay nga am-ammo ni Jesus a casla isu laeng ti nakatayan ti Mangisalacan. Ti pannakaririboc ti tunggal maysa tignayenna ti pusoNa. Ti ikkis nga agpaarayat ket makadanon iti lapayagNa. Immay tapno awisenNa amin a tattao Kencuana. IbilinNa cadacuada, ‘Surotendac,’ ket ti espirituNa agtignay iti pusoda tapno awisenNa ida nga umay Kencuana. Adu ti agkedked a maawis. Ammo ni Jesus no siasinoda. AmmoNa met no siasino ti siraragsac a dumngeg iti awagNa, ken nakasaganan nga umay iti sidong ti pastoral a panangaywanna. Kunana, ‘Dagiti carneroc denggenda ti timecco, ket ammoc ida ket surutendac;’ (Juan 10:27). AywananNa ti tunggal maysa a casla awan ti sabali iti rupa ti daga..”—The Desire of Ages, pp. 479, 480.
b. Para iti ania a sabali a carnero ti pakasecnan ni Jesus? Juan 10:16.
“Napanunot ni Jesus dagiti cararua iti intero a daga nga inyaw-awan dagiti ulbod a pastor. Dagidiay il-iliwenNa nga urnongen a cas carnero ti pagpastoranNa ket naiwaras cadagiti lobo, ket kinunana, ‘Adda met sabsabali a carneroc a saanda a naitipon itoy a pagtaracnan: dagidiay masapul nga iyegco ket denggendanto ti timecco; ket addanto maymaysa nga arban, ken maymaysa a pastor.’ (Juan 10:16, R.V.).”—Ibid., p. 483.
“Adda dagiti gameng ti Dios cadagiti amin nga iglesia, ket saan a para cadatayo ti mangaramid iti nasacnap a panangibabawi iti agcuncuna a lubong ti relihion, no di ket iti kinapakumbaba ken ayat, nga adda iti amin a kinapudno a cas ken Jesus. Makita coma dagiti tattao ti kinadiosan ken debosion, kitaenda coma ti kina-Cristo ti ugali, ket maallukoydanto iti kinapudno.”—The SDA Bible Commentary, vol. 4, p. 1184.
Mierkules
11 Hunio
4. NADIOSAN A PANNACABALIN
a. Ania ti nadiosan a pannacabalin ti impacdaar ni Jesus nga adda Kencuana? Juan 10:17, 18.
“‘Gapu iti daytoy ayatennac ni Ama, ta itedco ti biagco, tapno awatecto manen.’ (Juan 10:17). Kayatna a saoen, pagay-ayatnakayo unay ni Amac, isu nga ad-adda pay nga ay-ayatennac gapu iti panangtedCo iti biagCo a mangsubbot cadacayo. Iti panagbalinCo a suno ken talgedyo, babaen iti panangisuco iti biagCo, babaen ti panangala cadagiti obligasionyo, dagiti salungasingyo, ad-adda nga ayatennac ni Amac.
“'Ta itedco ti biagco, tapno awatecto manen. Awan ti mangiccat caniac no di ket iyawatco a sisiac. Adda pannacabalinco a mangyawat ti biagco ken adda pannacabalinco met a mangawat manen,’ (Juan 10:17, 18). Bayat a cas kameng ti nataoan a pamilia isu ket mortal, cas Dios isu ti ubbog ti biag para iti lubong. CabaelanNa a daeran dagiti panggundaway ni patay, ket agkedked nga umay iti sidong ti panangiturayna; ngem boluntarioNa nga impaay ti biagNa, tapno iyegNa ti biag ken imortalidad iti lawag. InawitNa ti basol ti lubong, inibturanNa ti lunodna, insucoNa ti biagNa cas sacrificio, tapno dagiti tattao saan a matay iti agnanayon. ‘ Pudno nga isu inturedna dagiti lidaytayo, ken inawitna dagiti ladingitayo. . . . Ngem isu nasugsugat a gapu cadagiti labsingtayo, isu napalitem a gapu cadagiti kinadangkestayo; ti dusa ti pacaicappiaantayo naipatay kencuana; ket gapu cadagiti saplitna maagasantayo. Datayo amin castayla carcarnero a nayaw-awan; nagturong ti tunggal maysa cadatayo iti dalanna met laeng; ket ni Jehova impatayna kencuana ti kinadakestayo amin.’ Isaias 53:4–6.”—The Desire of Ages, pp. 483, 484.
b. Ania ti mangiturong cadagiti tattao a sumurot ken Cristo? Juan 10:27; 1 Juan 4:10, 19.
“Saan a ti panagbuteng iti dusa, wenno namnama ti agnanayon a gunggona, ti mangiturong cadagiti adalan ni Cristo a sumurot Kencuana. Naimatanganda ti awan kaaspingna nga ayat ti Mangisalacan, a naipanayag iti intero a panagdaliasatNa ditoy daga, manipud iti kulluong ti Betlehem agingga iti cruz ti Calvario, ti panangmingming Kencuana makaallucoy, paluknengenna ken parmekenna ti cararua. Ayat a nariing iti puso dagiti makaimatang. Mangngegda ti timekNa, ket surotenda Isuna.”—Ibid., p. 480.
“Ibilangtayo ti biagNa ditoy daga, ti sacrificioNa para cadatayo, ti trabahoNa idiay langit cas manangibabaettayo, ken dagiti mansion nga isagsaganaNa para cadagidiay mangay-ayat Kencuana, ken mabalintayo laeng nga ipuccaw, O ti cangato ken kinauneg ti ayat ni Cristo!”—The Acts of the Apostles, p. 334.
Hueves
12 Hunio
5. PAMMATALGED TI PANNAKAISALACAN
a. Ania ti pammatalged nga ited ni Jesus cadagiti carneroNa? Juan 10:28, 29.
“Nupay ita nagpangato Isuna iti imatang ti Dios, ken makibingay iti trono ti universo, awan ti napukaw ni Jesus a naasi a galadNa. Ita ti isu met la a nadungngo, mannakipagrikna a puso ti nakalucat cadagiti amin a leddaang ti sangataoan. Ita ti ima a natudoc ket naiyunnat tapno ad-adda a bendisionanna dagiti tattaoNa nga adda iti lubong. ‘Ket didanto mapucaw uray caano, ket awanto ti mangrabsut cadacuada itoy imac.’ Ti cararua a nangited iti bagina ken Cristo ket napatpateg iti imatangna ngem iti intero a lubong. Ti Mangisalacan limmasat iti panagsagaba ti Calvario tapno maisalacan ti maysa iti pagarianNa. Pulos a saanNa a baybay-an ti maysa a nakatayanNa. Malacsid no pilien dagiti pasurotNa a panawan Isuna, petpetanNa ida.”—The Desire of Ages, pp. 480, 483.
b. Iti ania ti pagsadagan ti naespirituan a kinatalged ken pammatalged ti pannakaisalacantayo? Roma 8:31–39.
“Iti paraangan idiay ngato, agpakpakaasi ni Cristo para iti iglesiaNa —agpakaasi para cadacuada a binayadanNa iti gatad ti daraNa. Dagiti siglo, tawtawen pulos a dida mabalin a pabassiten ti kinaepektibo ti mangabbong a sacrificioNa. Awanto ti makaisina cadatayo iti ayat ti Dios ken Cristo Jesus uray pay ti biag wenno patay, cangato wenno kauneg, saan a gapu ta petpetantayo a sititibker unay, no pinetpetanNatayo a nasayaat. No ti pannakaisalacantayo ket agpannuray iti bukodtayo a peksa, saantayo a maisalacan; Ti petpettayo Kencuana mabalin a nakapsot, ngem ti ayatNa ket cas ti maysa nga inauna a cabsat; agingga a taginayonentayo ti pannakikaysatayo Kencuana, awanto ti makaikkat cadatayo iti imana.”—The Acts of the Apostles, pp. 552, 553.
Viernes
13 Hunio
PERSONAL A PANGREPASO A SALSALUDSOD
1. Ilawlawag ti nagdumaan ti ugali ti maysa a pastor ken mannanacaw.
2. Babaen iti ania a sabali a simbolo nga ikaysa ni Jesus ti Bagina?
3. Kasano a ti pudno a pastor agtacder a sitatacneng cadagiti carneroda?
4. Apay a suroten dagiti carnero ti pastor ket saan a ti ganggannaet?
5. Ilawlawag no kasano a masiguradotayo ti pannakaisalacan.