Domingo
11 Mayo
1. TI SILAW NAIPADTO
a. Kasano a dinakamat ti Epiritu Santo ni Jesus babaen ken Isaias? Isaias 49:6.
b. Kasano a nabigbig ni Simeon ni Jesus idi naiyeg iti templo para iti pannakaidedicar—ken ania ti gubuayenna daytoy nga utobentayo? Lucas 2:32.
“Ti nataengan a Simeon, iti templo a pangisursuroan itan ken Cristo, ket nagsao maipapan Kencuana cas ‘Maysa a silaw a manglawag cadagiti Gentil, ken dayaw dagiti tattaom nga Israel;’ Lucas 2:32. Cadagitoy a sasao iyaplikarna Kencuana ti padto a pamiliar iti amin nga Israel. Ni Propeta Isaias, impacdaar ti Espiritu Santo, ‘Wen, isu cunana, Bassit unay a banag ti panagbalinmo nga adipenco a mamangon cadagiti caputotan ni Jacob, ken mangisubli iti naigaga ti Israel: Itedcanto met a silaw cadagiti Gentil, tapno macapagbalinca a pangisalacanco agingga iti ungto ti daga.’ Isaias 49:6, R.V. Daytoy a padto ket sapasap a naawatan a cas naisao maipapan iti Mesias, ket idi kinuna ni Jesus, ‘Siac ti silaw ti lubong,’ saan a mabalin a mapaay dagiti tattao a mangbigbig iti panagcunaNa nga isu ti Maysa a Naikari.”—The Desire of Ages, p. 465.
“O, anian a leksion daytoy nacascasdaaw nga estoria ti Betlehem! Kasano a tubngarenna ti saantayo a panamati, ti kinatangsit ken kinaan-anay iti bagitayo. Kasano a ballaagannatayo nga agannad, di la ketdi ta babaen iti kriminal a saantayo a panangigingina, mapaaytayo met a mangilasin cadagiti tanda ti panawen, ket ngarud saantayo nga ammo ti aldaw ti pannakabisitatayo.”—The Great Controversy p. 315.
Lunes
12 Mayo
2. TI SILAW SAAN A NAAWAT
a. Kasano ti reaksion dagiti panguloen dagiti Judio iti mision ni Cristo? Juan 1:11; 8:13.
“Ti intero a biag ken sursuro ni Cristo ket agtultuloy a leksion ti kinapakumbaba, kinamanangngaasi, kinaimbag ken panangilibac iti bagi. Daytoy ket agtultuloy a babalaw iti kinalinteg iti bagi, naturay nga espiritu nga imparangarang dagiti Judio. Indauloan ida ni Satanas agingga a casla addaanda iti panagbuteng nga uray iti pannakadacamat laeng cadagiti nacascasdaaw nga aramid ni Cristo, a mangiyadayo iti imatang dagiti tattao cadacuada. Inaramid dagiti bagbagida a mamati nga Isu ket impostor, ket aniaman a wagas a mabalinda a patauden tapno madispatsa Isuna ket maysa a kinaimbag cadacuada."—Spiritual Gifts, vol. 4a, p. 117.
b. Ania dagiti nalawag a panangilawlawag nga impaay ni Jesus cadagiti di mamati a Fariseo—ngem kasano a simmungbatda? Juan 8:14–18.
“Ignorante [dagiti Fariseo] iti nadiosan a kababalin ken mision [ni Christ] agsipud ta saanda a sinukimat dagiti padto maipapan iti Mesias, cas iti pribilehioda ken pagrebbenganda nga aramiden. Awananda ti koneksion iti Dios ken Langit, gapuna a saanda naawatan ti aramid ti Mangisalacan iti lubong, ket, nupay naawatda ti makakombinsir unay nga evidensia a ni Jesus ti mangisalacan, kaskasdi a nagkedkedda a manglucat iti panunotda tapno maawatanda. Idi damo inkabilda ti pusoda a maibusor Kencuana, ket nagkedkedda a mamati iti kapigsaan a pammanecnec iti kinadiosNa, ket, cas resultana, ad-adda a dimmackel ti pusoda agingga a determinadoda a saan a mamati wenno awaten Isuna.”—The Spirit of Prophecy, vol. 2, pp. 354, 355.
k. Ania ti nalawag a panagduma ti imbaga ni Jesus nga adda iti nagbaetan ti Bagina ken dagiti di mamati a Fariseo? Juan 8:19–23.
d. Anianto ti nakaam-amac a pagbanagan dagiti agtuturay a Judio iti panangrejectarda ken Cristo? Juan 8:24; Mateo 23:38.
Martes
13 Mayo
3. DUA A KLASE DAGITI DUMDUMNGEG
a. Calpasan a naballaaganda a mabalinda ti matay cadagiti basbasolda, ania ti dinamag dagiti Fariseo ken ni Jesus—ken apay? Juan 8:25 (umuna a paset).
“Casla saanda nga ikankano dagiti sasaoNa, sinaludsodda, ‘Siasinoca?’ Nagduyosda a piliten Isuna a mangideklara iti Bagina a Cristo. Ti langaNa ken ti trabahoNa ket naiduma unay cadagiti namnamaen dagiti tattao, a, cas ti patien dagiti nasikap a cabusorNa, maysa a direkta a pannakaipakaammo iti Bagina cas Mesias a nanggubbuay Kencuana a mailacsid cas maysa nga impostor.”—The Desire of Ages, p. 465.
b. Kasano a sinungbatan ida ti Mangisalacan— mangipanayag iti naisangsangayan a koneksionNa iti Ama? Juan 8:25 (maudi a paset), 26–29.
“Saan a pulos a simmina ni Cristo manipud iti kinapudno cadagiti prinsipio ti linteg ti Dios. Pulos a saan a nagaramid ti aniaman a maikontra iti pagayatan ni Amana. Iti sangoanan dagiti angel, tattao, ken sairo mabalinNa ti agsao cadagiti sasao a manipud iti aniaman a sabali a bibig ket agtabbaaw coma: ‘ta Siac agnanayon nga aramidec dagiti macaay-ayo kencuana.’ Juan 8:29. Inaldaw-aldaw iti tallo a tawen a sursuroten dagiti cabusorNa, a padpadasenda ti agsapul iti sumagmamano a mantsa iti kababalinNa. Ni Satanas, cadagiti amin a cacaduana iti kinadakes, inkagumaanda a parmeken Isuna; ngem awan ti nasarakanda Kencuana a pakagundawayanda. Uray dagiti diablo napilitanda a nangipudno: 'Sica ti Santo ti Dios.’ (Lucas 4:34).”—Testimonies for the Church, vol. 8, p. 208.
k. Iladawan ti inaldaw a pannakipagna ni Cristo iti Amana—ken kasanotayo nga iyanninaw dayta a kapadasan. Juan 15:10; Efesus 2:4–6.
“Cas iti biag ni Jesus iti nataoan a galad, casta met ti ipaawat ti Dios a pagbalinan dagiti pasurotNa. Iti pigsaNa masapul a pagbiagantayo ti biag a nadalus ken natan-oc a nagbiagan ti Mangisalacan.”—Ibid., p. 289.
“Ti biag ti Mangisalacan ditoy daga, nupay nagbiag iti baet ti suppiat, maysa a biag ti talna. Bayat a kanayon a sursuroten dagiti makapungtot a cabusor, kinunana, ‘Ti nangibaon caniac adda caniac, saannac a binaybay-an a maymaysa, ta siac agnanayon nga aramidec dagiti macaay-ayo kencuana.’ Juan 8:29. Awan ti bagyo ti nataoan wenno sinasatanas a pungtot ti makasinga iti kinatalna dayta a perpecto a pannakilangen iti Dios.”—Thoughts From the Mount of Blessing, pp. 15, 16.
Mierkules
14 Mayo
4. TI SILAW NAIYANNINAW
a. Bayat ti panangisao ni Cristo cadagiti makapatay a kinapudno cadagiti Fariseo, kasano nga inapektaran dagiti sasaoNa dagiti sinsero a dumdumngeg—ken apay a makaparegta daytoy cadatayo ita? Juan 8:30.
“Naawatan ni Cristo no kasano ti agtignay iti kalmado, nainsiriban a wagas, ken mangpaawan iti maay cadagiti planoda a mangiyeg Kencuana iti pannakacondenar. Dagiti sasao ti Apo ket casla natadem a pana a mangmarka, ket nasugatan ti puso dagiti mangac-acusar Kencuana. Tunggal agsao ni Cristo cadagiti tattao, dackel man wenno bassit dagiti agdengdengngeg Kencuana, dagiti sasaoNa addaan iti mangisalacan nga epekto iti cararua iti sumagmamano cadacuada. Awan ti mensahe a matnag manipud cadagiti bibig ni Cristo iti mapucaw. Tunggal sao nga isaoNa ket nangisaad iti baro a pagrebbengan cadacuada a nakangngeg iti dayta. Dagiti ministro a mangmangted iti maudi a mensahe ti asi iti lubong, a mangiparang iti kinapudno a sipapacnec, nga agpanpannuray iti Dios para iti pigsa, pulos a di agbuteng a mapaay dagiti peksada. Awan ti makaibaga a ti pana ti kinapudno ket saan a nagdardaras iti marka, ket naduyoc dagiti cararua dagidiay dumdumngeg. Nupay awan ti mata ti tao a makakita iti panagtayab ti pana ti kinapudno, nupay awan ti lapayag ti tao a nakangngeg iti ikkis ti nasugatan a cararua, ngerm ti kinapudno siuulimec a nangaramid iti dalanna iti puso. Nakisao ti Dios iti cararua, ket iti aldaw ti maudi a panagsungbat ti ministro ti Dios ket agtacderto a kaduana dagiti tropeo ti mangsubbot a parabur tapno mangted iti dayaw ken Cristo, Isu a maikari iti dayaw. Ti Dios, a makakita a sililimed, sipapanayag a gunggonaanNa dagidiay nangipacdaar iti kinapudno iti naganNa.”—The Signs of the Times, February 6, 1896.
b. Malacsid cadagiti ministro, siasino pay ti naparaburan babaen iti panangyanninawna iti lawag manipud langit? Salmo 27:1; 147:15; Isaias 55:10, 11.
“Dagiti tattao a saan a naayaban iti ministerio ket maparegta coma nga agtrabaho para iti Apo sigun iti nagduduma nga abilidadda. Ginasut a lallaki ken babbai ita ti sadot a makaaramid iti makaay-ayo a servicio. Babaen ti panangawitda iti kinapudno cadagiti pagtaengan dagiti gagayyem ken kaarrubada, makaaramidda iti dackel a trabaho para iti Apo. Ti Dios saan a mangidumduma cadagiti persona. Usarennanto dagiti napakumbaba, debosionado a Cristiano, uray no saanda a nakaawat iti casta a naan-anay nga edukasion a cas iti dadduma. Bay-am a dagiti cacasta a makipaset iti servicio para Kencuana babaen ti panangaramidda iti agbalay-balay a trabaho. Iti panagtugawda iti sibay ti temtem, mabalinda —no napakumbaba, nainsiriban, ken nadiosan —ad-adu ti maaramidda a mangpennec cadagiti pudno a kasapulan dagiti pamilia ngem iti mabalin a maysa nga ordinado a ministro.”—Testimonies for the Church, vol. 7, p. 21.
Hueves
15 Mayo
5. PANNAKAADIPEN KONTRA WAYAWAYA
a. Ania ti imbaga ni Jesus cadagiti Judio a nangawat Kencuana? Juan 8:31, 32. Iti kasupadina, kasano a napaay dagiti di manamati a mangkita iti kakaisuna a kondisyon a mamagbalin cadatayo a nawaya manipud iti basol? Juan 8:33–36.
“Adda [dagiti Fariseo] iti kadaksan a kita ti pannakaadipen —nga inturayan ti espiritu ti kinadakes. . . .
“Tunggal cararua nga agkedked a mangted iti bagina iti Dios ket adda iti sidong ti panangtengngel ti sabali a pannacabalin. Isu ket saanna a bukod. Mabalin a saoenna ti maipapan iti wayawaya, ngem isu ket adda iti nakaay-ay-ay unay a pannakaadipen. Saan a mapalubosan isuna a mangkita iti kinapintas ti kinapudno, ta ti panunotna ket adda iti sidong ti panangtengngel ni Satanas. Bayat a pasabloganna ti bagina a sursurotenna ti dicta ti bukodna a pangusig, agtulnog isuna iti pagayatan ti Prinsipe ti Sipnget. Immay ni Cristo tapno burakenna dagiti kawar ti mangadipen a basol iti cararua.
“Iti trabaho ti pannakasubbot awan ti pannakapilit. Awan ti makinruar a puersa a mausar. Iti babaen ti impluensia ti Espiritu ti Dios, nawaya ti tao a mangpili no siasino ti pagservianna. Iti panagbalbaliw a mapasamac no ti cararua ket sumuko ken Cristo, adda ti cangatoan a kapanunotan ti wayawaya. Ti pannakapapanaw ti basol ket aramid ti cararua a mismo. Pudno, awanantayo iti pannacabalin a mangwayawaya iti bagitayo manipud iti pangkontrol ni Satanas; ngem no tarigagayantayo ti mawayawayaan manipud iti basol, ken iti dackel a panagkasapulan agpuckawtayo para iti maysa a pannacabalin manipud ken iti ngato ti bagitayo, dagiti pannacabalin ti cararua ket naagsepan iti nadiosan nga enerhia ti Espiritu Santo, ket agtulnogda cadagiti dikta ti pagayatan iti panangtungpal iti pagayatan ti Dios.
“Ti laeng kondision a posible ti pannakawayawaya ti tao ket ti pannakikaysa ken Cristo. ‘Ti kinapudno ti mangwayawaya cadacayo,’ ket ni Cristo ti kinapudno. Ti basol makapagdir-i laeng babaen ti panangpakapoy iti panunot, ken panangdadael iti wayawaya ti cararua. Ti panagpaituray iti Dios ket pannakaisubli iti bagi —iti pudno a dayag ken dignidad ti tao. Ti nadiosan a linteg, a nakaiyegantayo iti pagpaiturayan, ket ‘ti linteg ti wayawaya.’ Santiago 2:12.”—The Desire of Ages, p. 466.
Viernes
16 Mayo
PERSONAL A PANGREPASO A SALSALUDSOD
1. Ilawlawag ti kaipapanan dagiti balikas ni Simeon maipapan ken Jesus.
2. Iladawan ti panangtrato dagiti escriba ken dagiti Fariseo ken ni Cristo.
3. Ania ti mapasamacto iti nacionda gapu iti panangilacsidda ken Jesus?
4. Kasano a sumungbat dagiti sinsero a cararua ken ni Cristo—agpadpada idi ken ita?
5. Ilawlawag ti konsepto ti “wayawaya” iti lawag ti kinapudno ti Evangelio.