Domingo
18 Mayo
1. DAGITI LALLAKI NGA ANNAC NI ABRAHAM
a. Ania a pangtonton ti agtultuloy nga ulit-uliten dagiti Fariseo? Juan 8:33, 39 (umuna a paset). Ngem ania ti mangpanecnec iti casta a pannakicadua? Juan 8:39 (maudi a paset), 56; Roma 9:6–8.
“Indeclara dagiti Fariseo ti bagbagida nga annac ida ni Abraham. Imbaga ni Jesus cadacuada a daytoy a panagcuna ket mabalin laeng a maipasdec babaen ti panangaramid cadagiti aramid ni Abraham. Dagiti pudno nga annac ni Abraham agbiag, cas iti panagbiagna, a natulnog iti Dios. Saanda a padasen a patayen ti Maysa nga agsasao iti kinapudno a naited Kencuana manipud iti Dios. Iti panagplanoda a maibusor ken Cristo, saan nga ar-aramiden dagiti rabbi dagiti aramid ni Abraham. Awan ti pateg ti panagbalin a caputotan ni Abraham. No awan ti naespirituan a koneksion kencuana, a maipanayag coma iti panagtagicua iti isu met laeng nga espiritu, ken panangaramid cadagiti isu met laeng nga aramid, saanna nga annac ida.
“Daytoy a prinsipio ket addaan iti agpapada a dagsen iti maysa a saludsod a nabayagen a nangririboc iti Nacristianoan a lubong —ti saludsod ti apostolico a panagsasaruno. Ti panagtaud ken ni Abraham ket mapanecnecan, saan a babaen ti nagan ken kapuonan, no di ket babaen ti pannakaipada iti ugali. Isu a ti apostolico a panagsasaruno ket saan nga agsaad iti pannakayallatiw ti eclesiastical a turay, no di ket iti naespirituan a relasion. Maysa a biag a pinatibker ti espiritu dagiti apostol, ti panamati ken sursuro ti kinapudno nga insuroda, daytoy ti pudno a pammanecnec iti apostolico a panagsasaruno. Daytoy ti mangbukel cadagiti tattao a sumuno cadagiti immuna a mannursuro ti evangelio.”—The Desire of Ages, pp. 466, 467.
Lunes
19 Mayo
2. SAAN A NO ANIA TI IPANGPANGASDA
a. Nupay dagiti Judio ket natural a caputotan ni Abraham, dagiti annacda a lallaki ti kinapudnona ania ti pagbalinda idi inlacsidda ni Cristo? Juan 8:41–44.
“Inlibac ni Jesus a dagiti Judio ket annac ni Abraham. KinunaNa, ‘Dacayo aramidenyo dagiti ar-aramid ni amayo.’ Iti pananguyaw insungbatda, ‘Dacami saancam a nayanac iti pannakicamalala; adda maymaysa nga amami, nga isu ti Dios.’ (Juan 8:41). Dagitoy a sasao, cas panangipasimudaag iti kasasaad ti pannakayanacNa, nairanta a duyoc a maibusor ken Cristo iti imatang dagidiay mangrugin a mamati Kencuana. Saan nga impangag ni Jesus iti nalaad a saoda, ngem kinunaNa, ‘No ti Dios coma ti amayo ayatendac coma, ta immayac ken naggapuac iti Dios,’ (Juan 8:42).
“Dagiti aramidda agsacsi iti relasionda kencuana nga ulbod ken mamapatay. ‘Cucuanacayo ti diablo nga amayo, cuna ni Jesus, ket cayatyo nga aramiden dagiti calicagum ni amayo. Isu nacapapatay nanipud idi damo, ket saan a nagtalinaed iti pudno, ta awan ti pudno kencuana.. . . . Ngem siac agsipud ta saoec ti pudno, didac patien.’ Juan 8:44, 45, R.V. Ti kinapudno a ni Jesus nagsao iti kinapudno, ken dayta sigurado, isu ti gapuna a saan nga inawat dagiti panguloen dagiti Judio isuna. Ti kinapudno ti nangsair cadagitoy a tattao a nalinteg iti bagida. Ti kinapudno ti nangibutactac iti kinaulbod ti biddut; condinarenna ti panursuro ken ar-aramidda, ket saanda a maawat dayta. Kaykayatda nga ikidem dagiti matada iti kinapudno ngem ti mangipakumbaba iti bagida a mangiconfesar a nagbiddutda. Saanda nga inayat ti kinapudno. Saanda a tinarigagayan dayta, no man pay kinapudno dayta.”—The Desire of Ages, p. 467.
b. Ania ti mamagbalin cadatayo nga annac ni Abraham—ken kasano nga impakita dagiti lider dagiti Judio a saanda a pudno nga annac ni Abraham? Galacia 3:6–9; Juan 8:40.
“‘Ta saanyo nga inawat ti pakinakem ti pannacaadipen manen tapno agbutengcayo; ngem inawatyo ti pakinakem ti pannacaibilang nga annac, gapuna umawagtayo: Abba, Ama’ (Roma 8:15). Ti espiritu ti pannakaadipen ket mapataud babaen ti panangikagumaan nga agbiag a maitunos iti legal a relihion, babaen ti panangikagumaan a mangtungpal cadagiti tontonen ti linteg iti bukodtayo a pigsa. Adda namnama para cadatayo laeng no umaytayo iti sidong ti Abrahamico a tulag, nga isu ti tulag ti parabur babaen ti pammati ken ni Cristo Jesus. Ti evangelio a naicasaba ken Abraham, a nangted kencuana iti namnamana, isu met la nga evangelio a naicasaba cadatayo ita, a babaen iti dayta adda namnamatayo. Kimmita ni Abraham ken ni Jesus, nga Isu met ti namunganay ken mangleppas iti pammatitayo.”—The Youth’s Instructor, September 22, 1892.
Martes
20 Mayo
3. TI KABABALIN NI CRISTO
a. Ania a saludsod ti saan a masungbatan dagiti cabusor ni Jesus maipapan iti di narugit a kababalinNa? Juan 8:46 (umuna a paset).
“Iti biagNa ditoy daga, nasucog ni Cristo ti naan-anay a kababalin, impaayNa iti naan-anay a panagtulnog cadagiti bilin ni AmaNa. Iti yaayNa iti lubong iti nataoan a porma, iti panagbalinNa nga iturayan ti linteg, iti panangipalgacNa cadagiti tattao nga awitenNa iti sakitda, ti ladingitda, ti basolda, saan a nagbalin a managbasol. Iti sango dagiti Fariseo mabalinNa nga ibaga, ‘Asino cadacayo ti mangbabalaw caniac iti basol?’ Awan uray maysa a mantsa ti basol ti nasaracan Kencuana. Nagtacder iti sangoanan ti lubong nga awan mantsana a Cordero ti Dios.”—Sons and Daughters of God, p. 25.
“Nagbiagan ni Jesus ti linteg iti imatang ti langit, iti imatang dagiti saan a natnag a lubong, ken iti imatang dagiti managbasol a tattao. Iti sangoanan dagiti angel, tattao, ken demonio, nagsao Isuna, saan a nakarit, sasao a manipud iti aniaman a sabali a bibig ket tabbaaw coma: ‘ta siac agnanayon nga aramidec dagiti macaay-ayo Kencuana.’ (Juan 8:29).”—The Desire of Ages, pp. 467, 468.
b. Malacsid iti dayta nga insao ni Jesus cas Anac ti Tao, ania ti ideclara ti Nasantoan a Surat maipapan iti kababalin ni Cristo? Hebreo 4:15; 1 Pedro 1:18, 19.
“Ti pammati dagiti tattao ken Cristo cas Mesias ket saan nga agsanggir cadagiti evidensia ti panagkita, ken mamatida Kencuana gapu cadagiti personal a pangay-ayoNa, no di ket gapu iti kinasayaat ti ugali a masaracan Kencuana, a saan a pulos a nasaracan iti sabali.”—The SDA Bible Commentary, vol. 7, p. 904.
k. Kasano a masagidnatayo ti biag ni Jesus? Filipos 2:6–8.
“Saan kadi a ti Modelotayo nagna iti narigat, mangilibac ken mangisacrificio iti bagi, napakumbaba a dana maigapu cadatayo tapno maisalacantayo? Naipasango Isuna cadagiti rigat, nakapadas cadagiti pannakaupay, ken nagsagaba iti pannakaumsi ken pannakaparigat iti trabahoNa a mangisalacan cadatayo. Ket pagkedkedtayo kadi ti mangsurot no sadino ti pangidauloan ti Ari ti dayag? Agreklamotayo kadi iti rigat ken suot iti trabaho a panangparmec iti bucodtayo a basol, no malagiptayo dagiti panagsagaba ti Mannubbottayo?”—Testimonies for the Church, vol. 3, p. 371.
Mierkules
21 Mayo
4. TI KABABALIN DAGITI PASUROT NI CRISTO
a. Ania ti panggep ti amin a pudno a pasurot ni Cristo? 1 Pedro 1:13–16.
“Ti trabahotayo isu ti mangikagumaan a gun-oden iti sakup ti panagtignaytayo ti kinaperpecto a nagun-od ni Cristo iti biagNa ditoy daga iti tunggal paset ti kababalin.”—That I May Know Him, p. 130.
b. Kasano a maragpattayo daytoy a gakat? Hebreo 12:1–4; Galacia 5:6 (maudi a paset); Filipos 3:12–15; 4:13.
“Kasano a madanontayo ti kinaperpecto nga inkeddeng ti Apo ken Mangisalacantayo a ni Jesu-Cristo —ti naindaclan a Mannursuro? Mabalintayo kadi a matungpal ti kalikagumanNa ken maragpattayo ti nangato unay a pagibasaran? Mabalintayo, di la ketdi ta saan coma nga ibilin ni Cristo nga aramidentayo dayta. Isu ti kinalintegtayo. Iti kinataoNa, napan Isuna iti sangoanantayo ken nangsucog para cadatayo ti perpecto a kababalin. Masapul nga addaantayo iti pammati Kencuana nga agtrabaho babaen ti ayat ken mangdalus iti cararua. Ti kinaperpecto ti kababalin ket naibatay iti no siasino ni Cristo cadatayo. No addaantayo iti kanayon a panagpannuray iti merito ti Mangisalacantayo, ken magnatayo cadagiti tugotNa, agbalintayo a cas Kencuana, a nadalus ken awanan tulaw.”—Ibid.
k. Kasano nga agbalintayo a pudno a nadalus ken awanan basol iti sango ti Dios? Roma 5:18–20; Hebreo 10:14.
“Awan ti pakawanen ni Cristo no di laeng dagiti agbabawi, ket siasinoman a pacawanenNa aramidenNa pay isuna nga agbabawi a silaladingit.”—Selected Messages, bk. 1, pp. 393, 394.
“Masapul a kankanayon a kumita ti managbasol iti Calvario; ket buyogen ti simple a pammati iti bassit nga ubing, masapul nga agsadag cadagiti merito ni Cristo, awaten ti kinalintegNa ken mamati iti asiNa. . . .
“Anian nga ayat daytoy - anian a nacascasdaaw, saan a matucod nga ayat a mangiturong ken Cristo a matay para cadatayo kabayatan a managbasoltayo pay! Anian a pannakapucaw ti cararua a makaawat cadagiti napigsa a gutoguten ti linteg, ken napaay a makaawat iti parabur ni Cristo nga aglaplapusanan!”—Ibid., p. 384.
Hueves
22 Mayo
5. TI KABABALINTAYO AGBALIN A CAS ITI KABABALINNA
a. Kasano nga aramidentayo a sigurado ti pannakaayab ken pannakapilitayo? 2 Pedro 1:4–11; Apocalipsis 19:8.
“Gutoguten ti Dios ita no ania ti ginutogutNa ken ni Adan, naan-anay a panagtulnog, kinalinteg nga awanan tulaw, nga awanan iti pagkurangan iti imatangNa. TulonganNatayo ti Dios a mangipaay Kencuana iti amin a gutoguten ti lintegNa. Saantayo a maaramid daytoy no awan dayta pammati a mangyeg iti kinalinteg ni Cristo iti inaldaw nga aramid.”—Selected Messages, bk. 2, p. 381.
“Agingga nga agturay ni Satanas, addaantayo iti bagi a pasucoen, adda dagiti mangraraut a basol a parmeken; agingga nga adda biag, awanto ti pagsardengan a lugar, awan ti punto a mabalintayo a madanon ket kunaen, naan-anay a nagun-odcon. Ti pannakasantificarar ket resulta ti tungpal biag a panagtulnog.”—The Acts of the Apostles, pp. 560, 561.
“Masapul a maamiristayo a babaen iti panamati Kencuana pribilehiotayo ti agbalin a makiraman iti nadiosan a galad, tapno malisian ti panagrupsa nga adda ditoy lubong gapu iti derrep. Ket, madalusantayo manipud iti amin a basol, amin a depekto ti kababalin. Saantayo a kasapulan a pagtalinaeden ti maysa a naimbasolan a pagduyosan. . . .
“Bayat a makiramantayo iti nadiosan a galad, ti natawid ken napatanor a panagduyos iti biddut ket maputed manipud iti kababalin, ket maaramidtayo a sibibiag a pannacabalin para iti imbag. Kanayon nga agsursurotayo ti nadiosan a Manursuro, inaldaw a makiraman iti galadNa, makitinnulong iti Dios a mangparmec cadagiti sulisog ni Satanas. Agtrabaho ti Dios, ken agtrabaho ti tao, tapno ti tao makikaysa ken Cristo a cas ken Cristo a nakikaysa iti Dios. . . .
“Ti Dios ti mangted cadatayo iti pannacabalin a mangparmec. Dagidiay makangngeg iti timecNa ken agtulnog cadagiti bilinNa ket mapagbael a mangsucog iti nalinteg a kababalin.”—The SDA Bible Commentary, vol. 7, p. 943.
Viernes
23 Mayo
PERSONAL A PANGREPASO A SALSALUDSOD
1. Apay a saan a magun-od dagiti Fariseo ti biag nga agnanayon a naibatay iti linia ti nagtaudanda—wenno aniaman ita a panagtalec iti kapuonan wenno DNA cas maysa a pagilasinan para iti pannakaisalacan?
2. Ilawlawag ti pudno a kababalin ti pudno nga annac ni Abraham.
3. Mainaig iti kababalinNa, ania ti nabalinan ni Jesus nga ipacdaar?
4. Ania a gakat ti naisaad iti sango ti tunggal Cristiano?
5. Kasano a masaracantayo a perpecto ken awanan tulaw iti sango ti Dios?