Domingo
25 Mayo
1. NAGBIDDUT A PANNAKAAWAT
a. Ania a saludsod ti dinamag dagiti adalan ken ni Jesus idi nakitada ti lalaki a naiyanac a bulsec? Juan 9:1, 2.
b. Ania a biddut a kapanunotan mainaig iti panagsagaba nga iggem dagiti Judio ken dagiti adalan, ken kasano a magunggonaan ni Satanas iti dayta? Juan 9:34 (umuna a paset).
“Sapasap a patien dagiti Judio a madusa ti basol iti daytoy a biag. Tunggal panagsagaba ket naibilang a dusa ti sumagmamano a dakes nga aramid, mabalin a ti agsagsagaba a mismo wenno dagiti dadackelna. Pudno nga amin a panagsagaba ket resulta ti panaglabsing iti linteg ti Dios, ngem naballicog daytoy a kinapudno. Ni Satanas, ti namunganay ti basol ken amin a resultana, ti nangiturong cadagiti tattao a mangkita iti sakit ken ipapatay cas naggapu iti Dios —cas dusa a situturay a maipaay gapu iti basol. Gapuna a ti maysa a nakaawat iti sumagmamano a panagsagaba wenno didigra ti naaddaan iti nayon a dadagsen a maibilang a naindaclan a managbasol.
“Casta a naisagana di dalan para cadagiti Judio a mangilacsid ken ni Jesus. Isuna ‘nangawit cadagiti leddaangtayo, ken cadagiti ladingittayo’ ket kinita dagiti Judio cas ‘pinarigat, sinaplit iti Dios, ken nagsagaba;’ ket inlemmengda dagiti rupada manipud Kencuana.”—The Desire of Ages, p. 471.
Lunes
26 Mayo
2. PARA ITI GLORIA TI DIOS
a. Ania a sungbat ni Jesus ti mangted lawag maipapan iti panagsagaba ken basol? Juan 9:3–5.
“Ti pammati dagiti Judio maipapan iti relasion ti basol ken panagsagaba ket patien dagiti adalan ni Cristo. Bayat ti panangator ni Jesus ti biddutda, saanNa nga inlawlawag ti makagapu iti panagsagaba ti lalaki, no di ket imbagaNa cadacuada no anianto ti resultana. Gapu iti dayta dagiti aramid ti Dios maiparangarangda kencuana. ‘Bayat ti caaddac ditoy lubong,’ kinunana, ‘Siac ti lawag ti lubong.’ ”—The Desire of Ages, p. 471.
b. Ania ti inaramid ni Jesus iti apagbiit a panawen, ken kasano a nakitinnulong Kencuana ti bulsec a tao?Juan 9:6, 7.
“Kalpasan a napulotan dagiti mata ti bulsec a lalaki, imbaonNa nga agbuggo iti tanke ti Siloe, ket naisubli ti panagkita ti lalaki. Ket sinungbatan ni Jesus ti saludsod dagiti adalan iti praktikal a wagas, cas ti gagangay a panagsungbatNa cadagiti saludsod a maidamag Kencuana manipud iti panagusioso. Saan a naayaban dagiti adalan tapno pagsasaritaanda ti saludsod no siasino ti nagbasol wenno saan a nagbasol, no di ket tapno maawatanda ti pannacabalin ken asi ti Dios iti panangtedda iti panagkita cadagiti bulsec. Nabatad nga awan ti makaagas a birtud iti damili, wenno iti tanke a pagbugoan ti bulsec a tao, no di ket ti birtud ket adda ken Cristo.”—Ibid.
k. Iladawan dagiti nadumaduma a reaksion dagiti kaarrubana ti napaimbag a tao—ken isalaysay ti saritaan a simmaruno kencuana ken cadagiti kaarrubana. Juan 9:8–12.
“Kinuna dagiti kaarruba ti agtutubo a lalaki, ken dagidiay makaam-ammo kencuana idi iti kinabulsecna, ‘Saan aya a daytoy daydi agtugtugaw ken makilimlimos?’ Kimmitada kencuana a buyogen ti duadua; ta idi naluctan dagiti matana, ti langana nagbaliw ken rimmaniag, ket agparang a casla sabali a lalaki. Manipud iti maysa agingga iti sabali ti saludsod a naipasa. Dadduma ti nagcuna, ‘isu daytoy;’ dadduma, ‘isu umasping kencuana.’ Ngem isun a nga immawat iti dackel a bendicion ti nangrisut iti saludsod babaen ti panangibagana, ‘Siac.’ ”—Ibid., pp. 471, 472.
Martes
27 Mayo
3. TI SALUDSOD IMMADU
a. Siasino ti nangipanan dagiti panguloen dagiti Judio iti lalaki a nayanac a bulsec —ken apay? Iti ania nga aldaw ti pannakaagasna? Juan 9:13, 14.
b. Iladawan ti reaksion dagiti Fariseo? Juan 9:15, 16.
“Ninamnama dagiti Fariseo a pagbalinen ni Jesus a managbasol, ket ngarud saan a Mesias. Saanda nga ammo nga Isuna ti nangaramid iti Sabbat ken ammonNa ti amin nga obligasionna, a nangagas iti bulsec a tao. Nagparangda a naregtada iti panangsalimetmet iti Sabbat, ngem planplanoenda ti pumatay iti dayta met la nga aldaw.”—The Desire of Ages, p. 472.
k. Siasino ti inayaban dagiti Fariseo a mangpanecnec maipapan iti lalaki a naagasan? Juan 9:18, 19.
“Inayaban dagiti Fariseo ti dadackelna ket dinamagda cadacuada, Isu daytoy ti anacyo, daydi cunayo a nayanac a bulsec?’
“Adda sadiay ti lalaki a mismo, a nangibaga nga isu ket bulsec idi, ket ita makakitan; ngem kaykayat dagiti Fariseo nga ilibacda ti ebidensia ti bucodda a sentido ngem ti mangamin a nagbiddutda. Nabileg unay ti madi a panagipatoda, naballicog unay ti kinalinteg ti Fariseo.”—Ibid.
d. Kasano a naballaagantayo maibusor iti adayo ti madanonna a kinadakes ti addaan iti nasacbay a pagarup a kapanunotan? Proverbio 18:13.
“Adu dagiti nangikabil iti bucodda nga aramid iti mangngegda, a mamagbalin iti kapanunotan nga agparang nga interamente a naiduma iti daydiay inkagumaan ti agsasao nga iyebcas. Ti dadduma dumngeg babaen iti wagas dagiti bucodda a panagipapan wenno patpatien, a maawatanda ti banag a cas iti tinarigagayanda —cas kasayaatan a maibagay iti panggepda.”—Testimonies for the Church, vol. 5, p. 695.
Mierkules
28 Mayo
4. NAIPASANGO ITI PAMUTBUTENG
a. Kasano nga inkagumaan dagiti Fariseo a butbutngen dagiti nagannac ti lalaki a nayanac a bulsec —ken kasano a simmungbatda? Juan 9:20, 21. Apay a nangipaayda iti mangliclic a sungbat? Juan 9:22, 23.
“Adda maysa a nabati a namnama dagiti Fariseo, ti mangbutbuteng cadagiti nagannac ti lalaki. Buyogen ti nabatad a kinapasnec a dinamagda, ‘Kasano ngarud a makakita ita?’ Nagbuteng dagiti nagannac a mangikompromiso iti bagbagida; ta naideklara a siasinoman ti mangbigbig ken ni Jesus a cas Cristo ket ‘maparuar iti sinagoga;’ kayatna a saoen, mailacsid iti sinagoga iti tallopulo nga aldaw. Bayat daytoy a tiempo awan ti ubing a makugit wenno matay a pagladingitan iti pagtaengan ti nakabasol. Ti sentensia ket naibilang a dackel a didigra; Ket no mapaay dayta a mangpataud iti panagbabawi, adayo a nadagdagsen a dusa ti sumaruno. Ti naindaclan nga aramid a naaramid para iti anacda ket nangiyeg iti kombiksion cadagiti nagannac, ket ti insungbatda, ‘Ammomi a daytoy ti anacmi ken nayanac a bulsec; ngem dicam ammo no casano ti pannacakitana ita: ken no asino ti nanglucat cadagiti matana, dicam ammo: isu ti pagintuudanyo; nataenganen: isu agsaanto iti maipapan kencuana.’ Iti casta inyalisda ti amin a responsabilidad manipud iti bagida iti anacda; ta saanda a maitured nga ipudno ni Cristo.”—The Desire of Ages, pp. 472, 473.
b. No mapilitan babaen ti pammutbuteng, ania ti masapul a laglagipentayo? Salmo 118:6.
“Agtacder a natibker, ken pulos a di nagaramid iti biddut ngem ti maawagan a takrot. Awan ti palubosan nga uyaw, awan ti pangta, awan ti mangumsi a sasao, a mangtignay kenca a manglabsing iti consensiam iti kabassitan a banag.”—Fundamentals of Christian Education, p. 93.
“Ti pudno a Nacristianoan a kababalin ket mamarkaan coma babaen iti kinatibker ti panggep, maysa a di maparmec a determinasion, saan a masucog wenno maparucma ti daga wenno impierno. Isuna a saan a bulsec iti pangawis ti nailubongan a dayaw, a di masecnan cadagiti pangta, ken di matignay babaen cadagiti panangay-ayo, ket agbalinto, amin a di ninamnama iti bagina, a naparmec babaen cadagiti wagas ni Satanas.”—Testimonies for the Church, vol. 4, pp. 543, 544.
“Awatentayto ti karungsotan nga ibubusor manipud cadagiti Adventista a bumusbusor iti linteg ti Dios. Ngem, cas cadagiti agibangbangon cadagiti pader ti Jerusalem, saantayo coma a maiibaw-ing ken malapdan manipud iti trabahotayo babaen cadagiti padamag, babaen cadagiti mensahero nga agtarigagay iti panaglilinnawag wenno kontrobersia, wenno babaen cadagiti makapabuteng a pangta, ti pannakaipablaac dagiti kinaulbod, wenno aniaman cadagiti wagas a mabalin a pangsugsog ni Satanas.”—Ibid., vol. 3, p. 574.
Hueves
29 Mayo
5. MAULIT TI PAKASARITAAN
a. Iladawan ti eksena a sangoen dagiti tattao a mangsalungasing iti bilin ti Dios—ken no kasano ti panangsungbattayo iti dayta. Apocalipsis 12:17; Aramid 4:18–20.
“Bayat a ti susic agsacnap cadagiti baro a tay-ac ken ti panunot dagiti tattao ket naayaban iti naibaddec a linteg ti Dios, makibor ni Satanas. Ti pannacabalin a mangtaming iti mensahe ket mangpabagtit laeng cadagidiay bumusbusor iti dayta. Mangipacat dagiti papadi cadagiti karkarna a peksa a mangiddep iti silaw di la ket ta agsilnag iti arbanda. Babaen ti amin a wagas a maaramidda ikagumaandanto a lapdan ti pannakalawlawag dagitoy napateg a saludsod. Agdawat ti simbaan iti napigsa a takiag ti sibil a pannacabalin, ket, iti daytoy a trabaho, agkaykaysa dagiti papista ken Protestante. Bayat a ti tignay para iti pannakaenforsar iti Domingo nga agbalin a naturtured ken napinget, ti linteg maipacabusor cadagiti mangsalimetmet iti bilin. Mapangtaandanto cadagiti multa ken pannakaibalud, ken ti dadduma ti maidiayaan iti saad ti impluensia, ken dadduma pay a gunggona ken pagimbagan, cas panangguyugoy tapno ilacsidda ti pammatida. Ngem ti natibker a sungbatda ket: ‘Ipakitayo manipud iti Sao ti Dios ti biddutmi’—ti isu met laeng a pakaasi nga inaramid ni Luther iti babaen ti umasping a kasasaad. Dagidiay maidarum iti sangoanan dagiti korte mangaramidda iti napigsa pangpasingked iti kinapudno, ket sumagmamano a makangngeg cadacuada maiturongda a mangala iti takderda tapno matungpal amin a bilin ti Dios. Gapuna a ti lawag ket maiyegto iti sangoanan dagiti rinibu a saan coma a nakaammo cadagitoy a kinapudno.”—The Great Controversy p. 607.
b. Iti panangsango iti suppiat, ania ti masapul a kanayontayo a pagtalinaeden iti panunot? Juan 9:39; Aramid 4:33; Mateo 10:28.
“Saan a mapengdan wenno mabutbuteng dagiti apostol cadagiti pangta.”—The Acts of the Apostles, p. 48.
Viernes
30 Mayo
PERSONAL A PANGREPASO A SALSALUDSOD
1. Kasano a hinusgaan dagiti panguloen dagiti Judio ti masakit ken agsagsagaba?
2. Sino ken ania a talaga ti nangagas iti bulsec a lalaki?
3. Apay a nariro dagiti kaarruba ti bulsec a lalaki?
4. Ania a kasasaad ti sangoen ti agtutubo a lalaki calpasan ti pannakapaimbagna?
5. Kasano a maliclicac iti pannakatnag iti silo a mangtinnag cadagiti dadackelna?