Umuna a Pangsabado a Daton

Para cadagiti Mission iti Lubong

Ita, agallangogan ti naitiempo a mensahe:

“Masapul a mapabiag manen ti espiritu ti misionero cadagiti iglesiatayo. Tunggal miembro ti iglesia rumbeng nga adalaenna no kasano ti tumulong a mangidur-as iti trabaho ti Dios, cadagiti mision iti pagtaengan ken cadagiti ganggannaet a pagilian. Manmano a maikaribu a paset ti trabaho ti maar-aramid a rumbeng a maaramid cadagiti tay-ac ti misionero. Awagan ti Dios dagiti trabahadorNa a mangikapet iti baro a teritoria para Kencuana. Adda dagiti nabacnang a tay-ac a pagtrabahoan nga agur-uray iti matalec a trabahador. Ket dagiti agserservi nga angel tumulongda iti tunggal kameng ti iglesia nga agtrabaho a siaayat para iti Apo.

“Naorganisar ti iglesia ni Cristo ditoy daga para cadagiti panggep ti misionero, ket tarigagayan ti Apo a makita ti intero nga iglesia a mangparnuay cadagiti wagas ken pamay-an a mabalin a mangngeg dagiti nangato ken nababa, nabacnang ken napanglaw, ti mensahe ti kinapudno. Saan nga amin ket naayaban iti personal a panagtrabaho cadagiti ganggannaet a tay-ac, ngem amin ket makaaramid iti maysa a banag babaen cadagiti cararagda ken dagiti sagutda a tumulong iti trabaho a misionero.

“Maysa a negosiante nga Americano a napasnec a Cristiano, iti pannakisaritana iti padana a trabahador ti nagkuna nga isu a mismo ket agtrabtrabaho para ken Cristo iti duapulo ket uppat nga oras iti aldaw. ‘Iti amin a relasionco iti negosio,’ kinunana, ‘ikagumaac nga irepresentar ti Apoc. Bayat nga adda gundawayco, ikagkagumaac nga isangbay dagiti dadduma Kencuana. Iti amin nga aldaw agtrabtrabahoac para ken Cristo. Ket iti rabii, bayat ti pannaturogco, adda taoc nga agtrabtrabaho para Kencuana idiay China.’

Iti panangilawlawagna innayonna: ‘Idi kinaagtutuboc inkeddengco ti mapan cas misionero cadagiti pagano. Ngem iti ipapatay ni tatangco masapul nga alaec ti negosiona tapno maipaayco ti kasapulan ti pamilia. Ita, imbes a siac a mismo ti mapan, suportarac ti maysa a misionero. Iti casta nga ili ti casta a probinsia ti China, nakapuesto ti trabahadorco. Ngarud, uray bayat ti pannaturogco, siac, babaen ti pannakabagic, agtrabrabahoac pay laeng para ken Cristo.’ ”—Testimonies for the Church, vol. 6, pp. 29, 30.

Ita ad-adda ngem idi ti panawen a mangipuonan iti banko ti Langit babaen cadagiti mision ti lubong. Saan nga agbalin a nalaclaca, ngem inton agangay mabalin a naladaw unayen. Mapucaw dagiti cararua nga awan ni Cristo ken ti agdama a kinapudno, intalec ti Apo cadatayo ti napateg a lawag a maiwaras iti intero a planeta.

Pangngaasiyo ta mangtedcayo a sipaparabur, ket sibabacnang coma a bendisionanNacayo ti Apo ken ti sagutyo. Agyamancami!

Departamento ti Eskuela Sabatina Ti Conferencia General