Domingo
13 Abril
1. TI BIAG ITI PAGTAENGAN NI JESUS
a. Ania ti serioso a karit ti sinango ni Jesus iti bukodNa a pagtaengan? Juan 7:5.
“Iti nasapa unay nga edad, nangrugin nga agtignay ni Jesus para iti Bagina iti pannakaporma ti kababalinNa, ket uray ti panagraem ken panagayat cadagiti naganacNa ket saan a makaibaw-ing Kencuana iti panagtulnogNa iti sao ti Dios. ‘Adda a Naisurat’ ti rasonNa iti tunggal tignay a naiduma cadagiti kaugalian ti pamilia. Ngem ti impluensia dagiti rabbi ti namagbalin iti biagNa a napait. Uray iti kinaagtutuboNa masapul a sursuroenNa ti narigat a leksion ti kinaulimec ken naanus a panagibtur.
“Dagiti cacabsatNa, nga annac ni Jose a lallaki, nakidanggayda cadagiti rabbi. Impapilitda a masapul nga ipangag dagiti tradision, a casla isuda ti gutoguten ti Dios. Imbilangda pay dagiti pagalagadan dagiti tattao nga ad-adda ngem ti sao ti Dios, ket nakapungtotda unay iti nalawag a iseserrec ni Jesus iti pagdumaan iti nagbaetan ti ulbod ken ti pudno. Ti nainget a panagtulnogNa iti linteg ti Dios kinondenarda a kinasukir. Nasdaawda iti pannakaammo ken sirib nga impakitaNa iti panangsungbatNa cadagiti rabbi. Ammoda nga Isu ket saan a nakaawat iti pannursuro manipud cadagiti masirib a lallaki, nupay casta makitada nga Isu ket maysa a Manursuro cadacuada. Nabigbigda a ti edukasionNa ket nangatngato ngem iti bucodda. Ngem saanda nailasin nga Isu ket addaan iti dalan nga agturong iti kayo ti biag, maysa a gubuayan ti pannakaammo a dida ammo.”—The Desire of Ages, p. 86.
Lunes
14 Abril
2. DAGITI ANNAC A LALLAKI NI JOSE
a. Ania a singasing ti indatag dagiti cacabsat ni Cristo Kencuana iti panangsegsegga iti tinawen a Fiesta dagiti Tabernaculo? Juan 7:3, 4.
“Impagarup dagiti cacabsat [ni Cristo] a biddut para Kencuana ti sumina cadagiti natan-oc ken de-adal a tattao ti nacion. Nariknada a dagitoy a lallaki isu ti adda iti husto, ken ni Jesus ti nakabasol iti panangikabilNa iti Bagina a sumuppiat cadacuada. Ngem nasaksianda ti awan pakababalawanna a biagNa, ket nupay saanda nga imbilang dagiti bagbagida cadagiti adalanNa, naallukoyda unay cadagiti ar-aramidNa. Ti kinalatacNa idiay Galilea ket makaay-ayo iti ambisionda; mangnamnamada pay laeng mangted Isuna iti pammanecnec iti pannacabalinNa a mangiturong cadagiti Fariseo a mangkita nga Isu ti aniaman a tontontonenNa. Kasano ngay no Isu ti Mesias, ti Prinsipe ti Israel! Impategda daytoy a kapanunotan a buyogen ti napannackel a pannakapnec.
“Madanaganda unay maipapan iti daytoy isu nga indagadagda ken ni Cristo a mapan idiay Jerusalem. ‘Pumanawca ditoy,’ kinunada, ‘ket inca idiay Judea, tapno dagiti adalam makitada met dagiti aramidmo nga aramidem. Ta awan ti tao nga agaramid iti uray ania a nalimed, idinto a tarigagayanna a mailatac. No aramidem dagitoy a banag, agparangca iti lubong.’ Ti ‘no’ iyebcasna ti panagduadua ken di panamati. Impabigbigda Kencuana ti kinatakrot ken kinakapuy. No ammoNa nga Isu ti Mesias, apay daytoy karkarna a reserba ken saan a panagtignay? No talaga nga addaan Isuna iti casta a pannacabalin, apay a saan a mapan a situtured idiay Jerusalem, ket patalgedanNa dagiti ibagbagaNa? Apay a saanNa nga aramiden idiay Jerusalem dagiti nacascasdaaw nga aramid a naipadamag Kencuana idiay Galilea? Dikay aglemmeng cadagiti nasulinec a probinsia, kinunada, ket aramidenyo dagiti nabileg nga aramidyo para iti pagimbagan dagiti ignorante a mannalon ken mangngalap. Iparangmo ta bagim iti cabesera, gun-odem ti suporta dagiti papadi ken agtuturay, ket pagkaykaysaem ti nacion iti panangipasdec iti baro a pagarian.”—The Desire of Ages, p. 450.
b. Iladawan ti problema a kankanayon a sangoen dagiti naemma. Salmo 86:14.
“Nagrason dagitoy a cacabsat ni Jesus manipud iti naimbucodan a motibo a masansan unay a masaracan iti puso dagidiay ambisioso a maiparada. Daytoy nga espiritu ti agturturay nga espiritu iti lubong. Nasairda gapu ta, imbes a sapulenNa ti temporario a trono, impacdaar ni Cristo ti Bagina nga Isu ti tinapay ti biag. Nakaro ti pannakaupayda idi adu unay dagiti adalanNa ti nangbaybay-a Kencuana. Timmallicudda Kencuana tapno malisianda ti cruz a panangbigbig iti impanayag dagiti aramidNa—nga Isu ti Imbaon ti Dios.”—Ibid., p. 451.
Martes
15 Abril
3. SUSIC MAIPAPAN KEN JESUS
a. Ania dagiti agsusupadi a kapanunotan ti napataud maipapan ken Jesus? Juan 7:11, 12.
“Manipud Jerusalem nagsacnap ti damag maipapan cadagiti milagro ni Cristo iti sadinoman a nakaiwarasan dagiti Judio; ket nupay adu a bulan nga awan Isuna cadagiti fiesta, saan a bimmassit ti interes Kencuana. Adu manipud iti amin a paset ti lubong ti simmang-at iti Fiesta dagiti Tabernaculo iti namnama a makitada Isuna. Iti rugi ti fiesta adu ti naaramid a saludsod para Kencuana. Dagiti Fariseo ken agtuturay kumitkitada iti yaayNa, a mangnamnama iti gundaway a mangkondenar Kencuana. Sidadanagda a sinaludsod, ‘Sadino ti ayanNa?’ ngem awan ti makaammo. Ti kapanunotan Kencuana ti kangrunaan iti amin a panunot. Gapu iti panagbuteng cadagiti papadi ken agtuturay, awan ti nakaitured a mangbigbig Kencuana cas Mesias, ngem iti sadinoman adda naulimec ngem napasnec a panagsasarita maipapan Kencuana. Adu ti nangidepensa Kencuana cas maysa a naibaon manipud iti Dios, idinto ta dagiti dadduma ket binabalawda Isuna cas manangallilaw cadagiti tattao.”—The Desire of Ages, pp. 451, 452.
b. Kasano a pinaulimec ni Jesus dagiti agsusupadi a kapanunotan maipapan Kencuana? Juan 7:14–18; Lucas 4:32.
“Iti katengngaan ti fiesta, iti kangitingitan ti gagar maipapan Kencuana, simrec iti paraangan ti templo iti imatang ti adu a tattao. Gapu iti kaawanNa iti fiesta, naipatengteng idi a dina maitured nga isaad ti Bagina iti pannacabalin dagiti papadi ken agtuturay. Nasdaaw ti amin iti kaaddaNa. Nagulimec ti tunggal timec. Nagsiddaaw ti amin iti dignidad ken tured ti panagtacderNa iti tengnga dagiti nabileg a cabusor a mawaw iti biagNa.
“Nakatacder a casta, isu ti sentro ti imatang iti dayta a dackel a bunggoy, nagsao ni Jesus cadacuada nga awan pay tao a nangaramid iti casta. Dagiti sasaoNa ipakitana ti pannakaammoNa cadagiti linlinteg ken institusion ti Israel, ti sacrificio a servicio ken dagiti pannursuro dagiti mammadto, adayo nga artapanna iti pannakaammo dagiti papadi ken rabbi. NaburakNa dagiti lapped ti pormalismo ken tradision. Dagiti parang ti masacbayan a biag casla naiwaras iti sangoananNa. Cas maysa a nakakita iti Di Makita, nagsao Isuna maipapan iti naindagaan ken nailangitan, ti nataoan ken nadiosan, nga addaan iti positibo a turay. Dagiti sasaoNa ket nalawag ken makakombinsir unay; ket manen, cas idiay Capernaum, pagsidsiddaawan dagiti tattao iti isursuroNa; ‘ta ti saoNa adda pannacabalinna.’ Lucas 4:32. . . . Nagsiddaaw ti amin iti pannakaammoNa iti linteg ken cadagiti padto .”—Ibid., pp. 452, 453.
Mierkules
16 Abril
4. GURA MAIBUSOR ITI MAYSA A SANTO
a. Ania ti maawatan ni Jesus cadagiti rabbi ken ania a saludsod ti dinamagNa cadacuada? Juan 7:19.
“Inickan ni Jesus dagiti rabbi iti pammanecnec iti kinadiosNa babaen iti panangipakitaNa a mabasaNa ti pusoda. Manipud iti panangagas idiay Betesda pangpangependan ti ipapatayNa. Gapuna nga isuda a mismo ti manglablabsing iti linteg nga ibagbagada nga irupirda. ‘Dinacayo aya iniccan ni Moises ti linteg, kinunaNa, ket awan pay cadacayo ti mangaramid ti linteg? Apayapay agawaandac a papatayen?’ ”—The Desire of Ages, p. 456.
b. Iti sungbatda ken Cristo, iti ania ti panagakusaran dagiti rabbi Kencuana—ken kasano met a simmungbat Isuna? Juan 7:20–23.
“Iti daytoy a singasing [a dagiti nacascasdaaw nga aramidNa ket insugsog ti dakes nga espiritu] saan nga impangag ni Cristo. IntultuloyNa nga impakita a ti trabahoNa a panangagas idiay Betesda ket maitunos iti linteg ti Sabbat, ken nainkalintegan dayta babaen ti panangipatarus nga inkabil a mismo dagiti Judio iti linteg. KinunaNa, ‘Ni Moises intedna cadacayo ti pannacacugit . . . . ket iti aldaw a panaginana cugitenyo ti tao.’ Sigun iti linteg, tunggal ubing masapul a makugit iti maikawalo nga aldaw. No ti naituding a tiempo ket agtinnag iti Aldaw a Panaginana, masapul ngarud a maaramid ti panangkugit. Anian a masapul nga ad-adda a maitunos iti espiritu ti linteg ti panangaramid iti maysa a tao ‘mapaimbag nga awan pagcuranganna iti aldaw a panaginana.' ”—The Desire of Ages, pp. 456, 457.
k. Ilawlawag ti nalawa a kaipapanan ti sumaruno a ballaag ni Cristo. Juan 7:24.
“Napaulimec dagiti agtuturay; ket adu cadagiti tattao ti nangipuccaw, ‘Saan aya nga daytoy ti sapsapulenda a papatayen? Ngem, adtoy, Isut’ agsao a situtured, ket awan ti maibagada Kencuana. Pudno kadi nga ammo dagiti agtuturay a daytoy ti mismo a Cristo?’ ”—Ibid., p. 457.
“Saan a kumita [ni Cristo] iti makinruar a langa; Saanna a manghusga cas iti pananghusga ti tao. SaanNa nga ipatpateg ti tao sigun iti ranggo, talento, edukasion, wenno saadna. ‘Kitaekto daytoy a tao,’ indeklaraNa, ‘uray daydiay napanglaw, ken addaan iti agbabawi nga espiritu, ken agpigpigerger iti saoc.’ ”—The Signs of the Times, October 21, 1897.
Hueves
17 Abril
5. NATAOAN CONTRA NADIOSAN A PANANGHUSGA
a. Kasano nga iladawan ti Kasuratan ti kasasaad ti isip ti kagimongan iti daytoy a lubong —masansan a cas makita idi un-unana a panawen, ngem nangnangruna ita? Isaias 59:14, 15.
“Ti ahensia ti kinadakes pagtitiponenda dagiti puersada ken agtitinnulongda. Agpappapigsada para iti maudi a dackel a krisis. Asidegen a mapasamac dagiti dadackel a panagbalbaliw iti lubongtayo, ket dagiti maudi a panagtignay ket napartakto. . . .
“Nagballigi ti cabusor a nangballikug iti hustisia ken nangpunno iti puso dagiti tattao iti tarigagay para iti naimbucodan a gunggona. . . . Dagiti ikkis ti mabisbisin a sangataoan ket umas-asideg iti sangoanan ti Dios, bayat a babaen ti tunggal kita ti panangirurumen ken panagsamsam dagiti tattao agurnongda cadagiti nagdadackel a kinabacnang.”—Testimonies for the Church, vol. 9, pp. 11, 12.
b. Iti baet ti riribuk, apay a mapagtalcantayo dagiti wagas ti Dios? Isaias 55:8, 9.
“Nupay ti addaan patingga nga isip dagiti tattao ket saan nga umdas a sumrec cadagiti balacad ti Awan Patinggana, wenno tapno maawatanda a naan-anay ti pannakaisayangcat dagiti panggepNa, kaskasdi a masansan a gapu iti sumagmamano a biddut wenno panagbaybay-a iti bukodda a biang a saanda unay a maawatan ti mensahe ti Langit. Saan a nabattaway ti panunot dagiti tattao, ken uray dagiti adipen ti Dios, nabulsecan unay gapu cadagiti nataoan a kapanunotan, dagiti tradision ken ulbod a pannursuro dagiti tattao, isu sangkapaset laeng ti maawatanda cadagiti naindaclan a banag nga impalgakNa iti saoNa.”—The Great Controversy pp. 344, 345.
“Ti panggep ti Dios para cadagiti annacNa ket nangatngato ngem ti madanon ti cangatoan a nataoan a kapanunotan. IntedNa iti nasantoan a lintegNa a nakaisuratan ti kababalinNa.”—Testimonies for the Church, vol. 8, p. 63.
Viernes
18 Abril
PERSONAL A PANGREPASO A SALSALUDSOD
1. Iladawan ti aglawlaw ti pagtaengan a dimmackelan ni Jesus.
2. Kasano ti ugali nga impakita dagiti cacabsat ni Cristo a masansan a maulit ita?
3. Ania dagti agsusupadi a kapanunotan ti agwarwaras maipapan ken Jesus?
4. Ilawlawag ti espiritu nga impanayag dagiti rabbi maiturong ken Jesus.
5. Ilawlawag ti naglawa a pagsupadian ti nagbaetan dagiti wagas ti tao ken iti wagas ti Dios?