Umuna a Pangsabado a Daton
para iti pannakaibangon manen ti simbaan idiay Prokhorovka, Russia
Ti Rusia, babaen ti kalawana, isu ti kadackelan a pagilian iti lubong, a nangsacup iti 6,612,073.2 a milia kuadrado (17,125,191 km2) nga addaan iti populasion iti 147,000,000. Agnanaed dagiti tattao manipud iti nasuroc a 180 a nasionalidad iti daytoy nalawa a teritoria, ket iti biangda, ibagbagada a nagduduma ti narelihionan a pammatida. Ti kalatakan ket ti Russian Orthodox (41.1%), sarunoen dagiti dadduma a Cistiano a pammati (6.3%), Islam (6.5%), Neopagan ken Tengrist (1.2%), Buddismo (1.2%), awanan iti patpatien (25.2%). Ateista (13%), ti nabati ket saan nga agkunkuna iti aniaman a relihion.
Manipud idi rugi ti SDARM, ti mensahe ti agnanayon nga evangelio ket rimmang-ay ditoy iti lacsid dagiti narigat unay a kasasaad. Adu a namati ti nagsagaba iti nakaro a pannakaidadanes—ti dadduma nangsaksi para iti nailansa ken napagungar a Mangisalacan a nakapucawanda ti biagda.
Idi arinunos ti 1990’s, maysa a Bible Worker a caduana ti asawana ti immakar iti makintengnga a rehion ti Russia gapu iti panggepna a mangisayangkat iti trabaho a misionero. Cas resulta ti reggetda ken cararagda, naorganisar ti maysa a grupo dagiti mamati. Ngem awananda iti lugar a paggigimongan ken pagdaydayawan. Kamaudiananna, idi 2006 nakasaracda iti bassit a balay iti maysa a sigkay ti daga idiay Prokhorovka, maysa nga urban administratibo a sentro ti Prokhorovsky District ti Belgorod Oblast —maysa a lugar ti agrikultura a mangpatpataud cadagiti bukbukel, sugar beets, mirasol, ken prutas iti igid ti Karayan Psyol iti abagatan a daya ti ciudad ti Kursk, a pagtaengan dagiti nalawa a deposito ti landok.
Nalawag a nakitatayo ti ima ti Dios nga agtrabtrabaho idi simimilagroNa nga inickat ti adu a lapped ken binendisionanNa ti pannakagatang daytoy a balay. Nagtultuloy a dimmackel ti trabaho iti daytoy a rehion, ket di nagbayag, nagbalin a bassit unay ti balay tapno makatugaw ti amin nga agdaydayaw iti Dios. Sumagmamano a tawenen ti napalabas, nakaawatkami iti pammalubos manipud cadagiti autoridad a mangbangon iti baro a balay a pagdaydayawan. Nangted dagiti cacabsat iti donasion ken nagtrabahoda a sipipinget, ngem tapno malpas daytoy a proyekto kasapulantayo ti naparabur a tulong dagiti tattao iti intero a lubong nga agayat iti Apo. Ti pannakaileppas daytoy a proyekto ket mangted iti gundaway a mangpadur-as pay iti trabaho ti Evangelio cadagiti kabangibang a rehion, cas parola ti lawag iti pannakaisacnap iti maudi a mensahe ti pannakaisalacan. Sapay coma ta bendicionan ti Apo ti tunggal maysa a sisasagana ti pusona a tumulong iti balligi ti agdama a kinapudno iti daytoy a rehion ti lubong!
Dagiti cacabsatyo manipud iti simbaan ti Prokhorovka ken ti Russian Union