Domingo
1 Hunio
1. NAPABARO A PANAGSALSALUDSOD
a. Apaman a naayaban iti maikadua a gundaway ti agtutubo a lalaki a ti panagkitana insubli ni Jesus, ania ti inkagumaan dagiti Fariseo nga ipilitda kencuana nga aramidenna? Juan 9:24.
“Nakita dagiti Fariseo a mangipapaayda ti publisidad iti trabaho nga inaramid ni Jesus. Saanda a mailibac ti milagro. Ti bulsec a lalaki napno iti rag-o ken panagyaman; makitanan dagiti nacascasdaaw a banbanag ti nakaparsuaan, ket napno iti ragsac, iti kinapintas ti daga ken tangatang. Siwayawayana nga insalaysay ti kapadasanna, ket manen pinadasda a pagulimeken, a cuncunada, ‘Iccam ti pammadayaw iti Dios: ammomi a daytoy a tao managbasol.’ Kayatna a saoen, saanmo nga ibaga manen a daytoy a tao ti nangted kenca iti panagkita; Ti Dios ti nangaramid iti daytoy.”—The Desire of Ages, p. 473.
b. Ania ti saan a masupiat nga argumento ti indatag ti agtutubo a lalaki? Juan 9:25.
Lunes
2 Hunio
2. NAPABARO A PANAGSALSALUDSOD (MAITULOY)
a. Ania manen ti dinamag dagiti Fariseo iti agtutubo a lalaki a naisubli ti panagkitana—ken ania ti pudno a panggepda? Juan 9:26.
“Nagsaludsod manen [dagiti Fariseo], ‘Ania ti inaramidna kenca? Kasano ti pananglucatna cadagiti matam?’ Babaen ti adu a sasao inkagumaanda a riroen, tapno panunotenna ti bagina a naallilaw. Adda ni Satanas ken dagiti dakes nga angelna iti sibay dagiti Fariseo, ket pinagkaykaysada dagiti pigsada ken sicapda iti panagrasrason ti tao tapno makontra ti impluensia ni Cristo. Pinagbalinda a nangudel dagiti kombiksion nga umun-uneg iti adu a panunot.”—The Desire of Ages, p. 473.
b. Kasano a sinungbatan ida ti agtutubo a lalaki —ken sino ti nagtacder iti sibayna tapno maparegta isuna? Juan 9:27.
“Adda met dagiti angel ti Dios iti daga tapno papigsaenda ti lalaki a naisubli ti panagkitana.
“Saan a naamiris dagiti Fariseo a masapul a makilangenda iti sabali malacsid iti di nakaadal a lalaki a nayanac a bulsec; Saanda nga am-ammo isuna a kasusicda. Nagsilnag ti nadiosan a lawag iti cararua ti bulsec a lalaki. Bayat nga inkagumaan dagitoy a managinsisingpet a pagbalinen daytoy a di mamati, tinulongan ti Dios Isuna a mangipakita, babaen ti pigsa ken kinatarus dagiti sungbatna, ket saan isuna a napalab-ogan.”—Ibid., pp. 473, 474.
k. Kasano a naipasigurado cadatayo daytoy met la a tulong ita?Lucas 12:11, 12.
“Ita, kayatyo ti mapan iti sango ti Dios nga iggemyo dagiti Bibliayo, ilucatyo iti sangoanan ti Dios, ken agpakaasi Kencuana. Kayatyo a sumiglat ti pannakaawatyo; Kayatyo a maammoan nga ammoyo dagiti pudno a prinsipio ti kinapudno, ket no maipasangocayo cadagiti kalaban saanyo a sangoen ida iti bukodyo a pigsa. Agtacderto ti angel ti Dios iti sibayyo tapno tulongannakayo a mangsungbat iti tunggal saludsod a mabalin a saludsodenda cadacayo. Ngem maigiddato met nga agtacderto ni Satanas iti sibay dagiti kalabanyo a mangsugsog cadacuada a mangisao cadagiti bambanag a narigatyo nga ibturan tapno maprobokarcayo nga agsao a diyo mapupuotan; ti panagsasaoyo coma ket tay saan a magundawayan ni Satanas.”—The Review and Herald, May 3, 1887.
Martes
3 Hunio
3. TURED SACBAY TI SIPAPAKINAKEM A PANAGBULAG
a. Gapu ta saanda a maallilaw ti napaimbag nga agtutubo a lalaki, kasano a tinagibassit dagiti Fariseo isuna—ken kasano a naiparangarang ti casta a kinaignorante iti intero a pakasaritaan? Juan 9:28, 29; 1 Corinto 1:18, 19, 26–28.
“Para iti iglesiaNa iti tunggal kaputotan ti Dios addaan iti naisangsangayan a kinapudno ken naisangsangayan a trabaho. Ti kinapudno a mailemmeng cadagiti nailubongan a mamasirib ken nalalaing ket maipanayag iti casla iti ubing ken napakumbaba. Awaganna ti panangilacsid iti bagi. Addaan gubat a parmeken ken balligi a gun-oden. Iti rugrugi dagiti iruprupirda ket manmano. Babaen cadagiti natan-oc a tattao ti lubong ken babaen ti maysa nga iglesia a maitunos iti lubong, masuppiat ken maumsida.”—Christ’s Object Lessons, p. 78.
“Impagarup dagiti naindaclan a pangpangulo ti relihion nga iti daytoy a caputotan iyallangoganda ti pammadayaw ken agibangon cadagiti monumento dagidiay nagmula iti bukel ti kinapudno sinigsiglon ti napalabas. Saan kadi nga adu ti naglicod iti daytoy a trabaho tapno maibaddec ti panagrusing ti isu met la a bukel ita? Maulit-ulit ti daan nga ikkis, ‘Ammomi a ti Dios nakisao ken Moises; ngem daytoy a tao dicam ammo no adino ti naggapuanna.’ Juan 9:29. Cas cadagiti immun-una a panawen, dagiti naisangsangayan a kinapudno para iti daytoy a panawen ket nasaracan, saan a cadagiti turay eclesiastica, no di ket cadagiti lallaki ken babbai a saan unay a de-adal wenno nainsirib unay a mamati iti Sao ti Dios.”—Ibid., p. 79.
b. Ania nga ehemplo ti masursurotayo manipud iti sinsero a testimonia ti agtutubo a lalaki, agraman cadagiti dadduma pay a napudno a mamati ken Cristo? Juan 9:30–33; Aramid 4:19, 20.
“Iti amin a kinaemma, iti espiritu ti parabur, ken iti ayat ti Dios masapul nga itudotayo dagiti tattao iti kinapudno a ti Apo a Dios ti Namarsua iti langit ken daga, ken ti maikapito nga aldaw ket Aldaw a Panaginana ti Apo.
“Iti nagan ti Apo masapul nga umabantetayo, nga iyucradtayo ti banderaNa, irupir ti saoNa. No bilinendatayo dagiti agtuturay a saantayo nga aramiden daytoy a trabaho, no pawilandatayo nga iwaragawag dagiti bilin ti Dios ken ti pammati ni Jesus, ngarud kasapulanen nga ibagatayo a cas iti inaramid dagiti apostol: ‘Ipatoyo man, no nalinteg iti sangoanan ti Dios a denggendacayo a nangnangrona ngem iti Dios: Ta dicam mabalin a di saoen ti nakita ken nangngegmi.’ Aramid 4:19, 20.”—Testimonies for the Church, vol. 6, p. 395.
Mierkules
4 Hunio
4. NASIPNGET NGA UGALI, NASIPNGET A TIGTIGNAY
a. Yantangay ta dagiti makapungtot a Fariseo dida kayat nga awaten dagiti ebidensia, ania ti inaramidda iti agtutubo a lalaki a nangpanecnec iti pannakaagasna? Juan 9:34.
“Nasungbatan ti lalaki dagiti agsalsaludsod kencuana iti bukodda a daga. Ti rasonNa saanda a masungbatan. Nasdaaw dagiti Fariseo, ket nagtalnada, napaulimecda sacbay ti natadem, determinado a sasaoNa. Iti sumagmamano a canito adda kinaulimec. Kalpasanna, inalicomcom dagiti nakarupanget a papadi ken rabbi dagiti badoda, a casla pagamkanda a marugitanda iti pannakaidennada Kencuana; winagwagda dagiti tapoc cadagiti sacada ket imbatoda ti babalaw Kencuana—‘Naigamer iti basol ti pannacabukelmo, ket isuronacami?’ ket pinaruarda isuna.”—The Desire of Ages, p. 474.
b. Iti kasupadinana, kasano a trinatar ni Jesus ti agtutubo a lalaki? Juan 9:35–38.
“Impasag ti lalaki ti bagina iti sakaanan ti Mangisalacan cas pagdayaw. Saan laeng a naisubli ti natural a panagkitana, no di ket nalukatanen dagiti mata ti pannakaawatna. Naipalgac ni Cristo iti cararuana, ket inawatna Isuna cas imbaon ti Dios.”—The Desire of Ages, p. 475.
k. Ilawlawag ti dackel a nagdumaan iti panangpatalaw iti nakarit a rebelde contra iti nasukir a bulsec a mangilacsid ken Cristo a mangickat cadagiti cararua a siaayat nga agtulnog iti Dios. 1 Ar-ari 9:6–9; Mateo 12:31, 32; Salmo 11:3.
“Napaliiw [ni Wycliffe,] awan ti tao a mailacsid a sipupudno malacsid no isu ti umuna a mangiyeg iti bagina iti pannangcondenar ti Dios.”—The Great Controversy p. 84.
“Pannakasuppiat ti gasat dagiti amin nga usaren ti Dios a mangiparang ti kinapudno a naisangsangayan a mayaplikar iti panawenda. Adda agdama a kinapudno idi kaaldawan ni Luther —maysa a kinapudno iti dayta a tiempo ti addaan naisangsangayan a kinapateg; Adda agdama a kinapudno para iti iglesia ita. . . . Dagidiay mangiparang iti kinapudno para iti daytoy a panawen ket saanda coma a namnamaen a maawatda a buyogen iti dacdackel a pabor ngem cadagiti immun-una a repormador. Ti dackel a susic iti nagbaetan ti kinapudno ken biddut, iti nagbaetan da Cristo ken Satanas, isu ti panangpaadu iti kinapinget agingga iti panagserra ti pakasaritaan daytoy a lubong.”—Ibid., pp. 143, 144.
Hueves
5 Hunio
5. BENDITO KONRA NAOCOM BABAEN ITI LAWAG
a. Ania ti imbaga ni Jesus maipapan cadagiti resulta ti trabahoNa? Juan 9:39.
“Maysa a grupo dagiti Fariseo ti naguummong iti asideg, ket ti pannakakitada cadacuada ti nangiyeg iti panunot ni Jesus iti panagduma a kanayon a maipanayagg iti epekto dagiti sasao ken aramidNa. . . . Immay ni Cristo a manglucat iti mata dagiti bulsec, tapno mangted iti lawag cadacuada nga agtugtugaw iti sipnget. IndeklaraNa ti Bagina a silaw ti lubong, ket ti milagro a kapaspasamac ti mangpanecnec iti misionna. Dagiti tattao a nakakita iti Mangisalacan idi iyaayNa ket napaburan iti naan-anay a pannakaipanayag ti nadiosan a presencia ngem ti lubong a nagragragsac idi. Ti pannakaammo iti Dios ad-adda a perpecto a naipanayag. Ngem iti daytoy a mismo a paltiing, ti panangocom lumablabasen cadagiti tattao. Nasuot ti kababalinda, naikeddeng ti gasatda.”—The Desire of Ages, p. 475.
b. Kasano ti panagtignay dagiti Fariseo cadagiti sasao ni Cristo? Juan 9:40. Bayat ti panagsaoNa cadacuada, kasano nga imbascag ni Jesus ti basolda gapu iti bukodda a kinabulsec? Juan 9:41.
“Ti pannakaiparangarang ti nadiosan a pannacabalin a nangted iti bulsec a tao iti natural ken naespirituan a panagkita ti nangibati cadagiti Fariseo iti naun-uneg pay a kinasipnget. . . . No inaramid coma ti Dios nga imposible para kenca a mangkita iti kinapudno, ti kinaignorantem saan a maibilang a basol. ‘Ngem ita kunayo, makitatami’ (Juan 9:40). Mamaticayo a makakitacayo, ken liacsidyo dagiti wagas nga isu laeng ti pakaawatanyo iti pagkita. Cadagiti amin a nakaamiris iti kasapulanda, immay ni Cristo nga addaan iti awan patinggana a tulong. Ngem imbaga dagiti Fariseo a saanda a kasapulan; Nagkedkedda nga umay ken Cristo, gapuna a nabatida a bulsec —kinabulsec nga isu a mismo ti nakabasolanda. Kinuna ni Jesus, ‘ti basolyo mataginayon’ (versiculo 41).”—Ibid.
Viernes
6 Hunio
PERSONAL A PANGREPASO A SALSALUDSOD
1. Ania ti impadas dagiti Fariseo a pangkombinsir iti dati a bulsec a lalaki?
2. Sino ti mangus-usar iti saan a mamati a Fariseo?
3. Sino ti nangtulong iti agtutubo a lalaki a mangted cadagiti nalawag ken makacombinsir a sungbat?
4. Ania ti napasamac idi situturedna nga impudno ni Cristo?
5. Ilawlawag no ania a talaga ti kadadacsan a porma ti panagbulsec, ken apay.